Génesis 22

Dios Abrahamnö itji̧nö juwö iyobö weina jawa

1Ja̧danö, Abrahamkwö Abimeleckwö tjiwene yöbawö tjujunina tupakwö Diosma, Abraham ötjönö o̧'wo̧ wa̧na̧lö weti̧ a̧ja̧kwojobö chedo, jö̧ba̧lö, jwöbijetö Abrahamnö:

—Abraham— jwöökwe:

—Chuluwo̧, yöba̧li cha̧ja̧kwo— atadijetö Abrahamma.

2Ja̧danö, Diosma webijetö Abrahamnö:

—Abraham, ökwö kwitji̧ Isaacnö, jo̧dawo̧nö, ile nikebökwenöma e'ewö 'ya̧wi Moria nijibe. Jobe mö'ösa'otjö, ökwönö chi̧sebakwa'otjö, juwö iyawobekwö 'ya̧wi. Jobetjö kwitji̧nö, ökwösobu ebawinö ö̧kwö̧la̧ 'wibebö loköbajökwenö juwö kwiyo, ötjönö ösödö— webijetö.

3Jejenö weajökwe ju'wi dewachö Abrahamma wilubö, a̧laibö imi pabijetö, Diosnö ösödö iyö ujuwakwa̧. Pabajo̧ bulu oma'anö wanabijetö imima. Wanabijo̧ itji̧ Isaacnö, ömöayedö du̧ju̧tajanöbi labeibö öbibö 'yi̧jetö Dios weajobekwö 'ya̧nö.

4Ja̧danö, dötölataja möle baledibajena wa̧pötakwa mölenö Abrahamma edijetö ödöobe Dios weinemi i̧'yobö. 5Jemi edö jö̧ba̧lijetö ömöayedönö:

—Benada bulukwöda ji̧baduwi. Chitji̧kwö chi̧'ya yai, juwö iyö Diosnö ösödö. Ja̧ iyö kabatöma tjedachajakobe baikwö—jö̧ba̧lijetö.

6Ikenama Abrahamma Isaac öböbe'onö kabebö wanijetö. Wanajo̧ i̧sa̧pi̧, ökwöla juawa 'dö̧tekwa e'ewö 'yi̧jetö, itji̧ Isaac imi e'ewo̧kwö. 7Bakobe 'ya̧nö abebö a̧ja̧kwijetö Isaacma abe'do Abrahamnöma:

—Chabe'do— jö̧ba̧lijetö.

—¿Tajida chitji̧?— atadijetö Abrahamma.

Ja̧danö, Isaacma jö̧ba̧lijetö:

—Ökwöla juawabi, imibi dujuna̧la. Jo̧kwaijayonö ¿daida obeja itji̧ma, Diosnö juwö diyakwo̧ma? Dea— abebö a̧ja̧kwijetö.

8Jejenö abebö a̧ja̧kwökwe:

—Chitji̧, Diosda iyakobe juwö diyakwo̧nöma— atadijetö Abrahamma itji̧ Isaacnö. Ikenama bakobe 'yi̧jadötö.

9Dios weinemi ichibö Abrahamma Diosnö juwö iyawemi otidajo̧ imi wanabijetö jena. Imi wanajo̧ itji̧nö unu'yaja̧ ikena unu'yajökwenöma imiko wame wanijetö. 10Ikenama itji̧nö, juwö iyakwo̧nöma ö̧kwö̧la̧ 'wiebotö jö̧ba̧lö i̧sa̧pi̧ do̧batijetö. 11Jo̧kwaijayonö Isabenö Jo̧ Dios weajökwe ángelma jwöbijetö Abrahamnöma:

—Abraham, Abraham— jwöökwe:

—Chuluwo̧, yöba̧li cha̧ja̧kwo— atadijetö.

12Ja̧danö, ángelma jö̧ba̧lijetö:

—Abraham, ¡kabati! ¡Kwitji̧nö 'wibebö lobökönuwi! Babema ötjö weti̧ a̧ja̧kwö kwitji̧nö, jo̧dawo̧nö ö'wiawökönö ötjönö kwiyobe chedobetjö̧ chöwaisa, ökwöma ötjönö kwo̧'wo wa̧na̧lö ösödo̧ja, jö̧ba̧lö— jö̧ba̧lijetö ángelma.

13Ikenama Abrahamma jemi tupakwö edemi obejama sȩakanö i'yekanö akwachibajo̧ ji̧jetö. Jo̧ba ö̧jobekwö 'ya̧nö jebatö do̧batö ichejebijetö juwö iyawemi otidajobekwö. Jobetjö obejanöda 'wibebö lobö juwö iyijetö, Diosnö ösödö. Abrahamma itji̧ Isaac imidawo jö̧a̧laja̧ma balekwo̧nö juwö iyijetö Diosnö. 14Jo̧kwaobetjö̧ Abrahamma jemima midijetö, Isabenö Jo̧ Diosma iyo̧, jö̧ba̧lö. Babe mölebi jejenö yötja̧lobe, Isabenö Jo̧ Diosma mö'ösa'otjö iyakwo̧, jö̧ba̧lö.

15Ikenama Isabenö Jo̧ Dios weajökwe ángelma yemidanö jwöbijetö Abrahamnöma mölejebetjö. 16Jo̧bama jö̧ba̧lijetö:

—Abraham, Isabenö Jo̧ Dios ökwönö yöawi̧ma baikwö laeba: Abraham, ötjö weti̧ma otiwanö kwa̧ja̧kwajabe. Kwitji̧nö, jo̧dawo̧nö, ile nikebökwenö juwö kwiyotjö, jö̧ba̧lö weti̧ma kwa̧ja̧kwajobetjö̧ ötjöda chiwene yöbawö chujuna ökwönöma. 17Abraham, isabenö ökwönö dösölö̧jinö edö pjatatakwo̧sa. Ja̧danö, ökwötjö tupadanö jojodönö mölejȩbe tjö̧jadö si̧li̧'i̧dödanö, so̧bi̧ya̧pu̧ so̧pja̧danö tjöba̧jekwachinö pjatatakwo̧sa, Abraham. Ja̧danö, ökwötjö tupadanö jojodö tjöpöjojodönöma tjujuluwobö pjatatakwo̧sa. 18Jao Abraham, ötjö weti̧ kwa̧ja̧kwajobetjö̧ ökwötjö tupadanö jojodönöma pjatatakwo̧sa. Ja̧danö, jobadö ökwötjö tupadanö jojodönö pjatatobetjö̧ okobe deinö böjȩnö ju̧kwadönö, bakwasokwena jojodönöma dösölö̧jinö edö pjatatakwo̧sa— jejenö yöbawijetö Isabenö Jo̧ Dios weajökwe ángelma Abrahamnöma.

19Jemi ikenama Abrahamma, itji̧kwö tjebachajijetö ömöayedö tjö̧jibajobekwö. Ikenama bakobe ȩwa̧jijadötö Beersebabekwö. Jenada ju̧kwijetö Abrahamma.

Abraham ö̧ja̧wo̧ Nacor i̧tji̧mu tjö̧jina jawa

20Ju'wi möle Abrahamma ju'wedö jo̧banö yötjawi̧ a̧ja̧kwijetö, biya̧ yötjawi̧ma:

—Abraham, kwöjawo̧ Nacorma ilekwo Milcatjöma jelemutjö wa̧medukwa i̧tji̧munö ujuna̧lobe. 21Abönö pöema Us mikwo̧, öjawo̧ma Buz mikwo̧, Buz öjawo̧ma Kemuel mikwo̧, Aram abe'do. 22Kemuel öjawo̧ma Quesed mikwo̧, Quesed öjawo̧ma Hazo mikwo̧, Hazo öjawo̧ma Pildas mikwo̧, Pildás öjawo̧ma Jidlaf mikwo̧, Jidlaf öjawo̧ bajaliya luwo̧ma Betuel mikwo̧—yötjawi̧ a̧ja̧kwijetö Abrahamma.

23Ja̧danö, Betuelma Rebeca jabe'do. Jobadö jelemutjö wa̧medukwanö Abraham öjawo̧ i̧tji̧munö 'yabebijotö Milcama. 24Jeluju ilekwo, Reúma mikwujuma bidönö ö'wejemu luwanö 'yabebijotö: Tebanö, Gahamnö, Tahasnö, Maacanö.

Currently Selected:

Génesis 22: WPC

Highlight

Copy