Génesis 20

Abraham Abimalecnö omöna yöawina jawa Saranö, bisu ötjö chöjawuju, jö̧ba̧lö

1Ja̧danö, ju'wi möle Abrahamma ö̧jelö Mamretjö labebö a̧li̧kwöchobe Neguev niji jobekwö 'yi̧jetö ömöledökwö, ömöayedökwö, a̧jwi̧mukwö. 'Ya̧jadöma Betel niji, Shur niji 'da̧denö ju̧kwijadötö. Ju'winö jobetjö labebö 'ya̧jadöma Gerar comunidadnö ichibijadötö jobe tjuju̧kwobö. 2Jobe ja̧nö, Abrahamma ju'wedönö ilekwo Saranö yöba̧lijetö, Bisuma chöjawuju, jö̧ba̧lö. Jejenö jö̧a̧liökwe Gerar la'aka luwo̧, Abimelec mikwo̧ma webijetö ömöayedönö Saranö jo̧ba ö̧jobekwö tjichejebobö, iteda ilekwo baibanö jö̧jakwujunöma.

3Jo̧kwaijayonö Diosma öpöjödijetö Abimelec Saranö emoböma. Jo̧kwaobetjö̧ Abimelecnö öwawachijetö Diosma i̧'wi̧dinö yö̧te. Öwawachö:

—Abimelec, ökwöma debö kwi̧'yakwo̧ja jelo̧ ilekwonö kwemajabetjö̧, kwilekwo baibanö— jö̧ba̧lijetö Diosma. 4Ja̧danö, Abimelecma ina Sarakwö ji̧jökötö. Jö̧ba̧lijetö Diosnö:

—Chuluwo̧, jobujunö chöjokobe ina emö̧kö̧sa chilekwo baibanö. Isabenö, ökwöma ¿ötjönö, ja̧danö chitebo ju̧kwadönö söbebö lobö lȩkebakwa̧ji̧ sulabenö ja̧dököjayonö? 5Abrahamma ötjönö jö̧a̧lijatö, bisuma chöjawuju, jö̧ba̧lö. Ja̧danö, jobujubi, bakwainö jö̧ja̧lijatö, öjawujusa, jö̧ba̧lö. Ötjöma, jo̧ba ilekwoena, jö̧ba̧löma, wajwitijatö. Ja̧danö, chomajadenö otiwanö omukwatö wetijatö jobujunö tjichejebobö. Sulabenö chomukwatijökötö, kwichejebaduwojö, jö̧ba̧lö wetenama— yöbawijetö Abimelecma Diosnöma.

6Ikenama Diosma jö̧ba̧lijetö Abimelecnöma, i̧'wi̧dinö:

—Jau, chöwaisa. Kwomajadenö otiwanö omukwatö weköbinobe jobujunö tjichejebobö. Jejenö chöwaisobetjö̧ ökwönö pjatatijatö, ötjö chöpöjödi̧ma sulabenö ja̧köbapji jö̧ba̧lö. Ja̧danö, pjatatijatö jobujunö maköbokobö, jobujuma jelo̧ ilekwo wajwiköbi̧ chöwaisobetjö̧. 7Ja̧danö, babema jilekwekwö tjebatijö. Jilekwema ötjö yötawi̧ yöbawo̧. Jo̧bama ökwönö aebakobe ötjönöma. Ja̧danö ötjönö aebobetjö̧ 'yaka̧lakwo̧ja. Jo̧kwaijayonö, jobujunö tjekatökötjö̧ma ökwöbi, kwömöledöbi, kwejunö ju̧kwadöbi debö kwi̧'yaduwakobe— jö̧ba̧lijetö Diosma Abimelecnöma.

8Jo̧kwajobetjö̧ ju'wi dewachö yȩayi Abimelecma jwöbijetö ömöayedönö tjichobö. Ichajadönö yöbawijetö okobe jwiinö Dios yöa̧laja̧ i̧'wi̧dinö. Ja̧danö, yöawiawö̧ jwiinö yebaibijadötö.

9Ikenama Abimelecma jwöbijetö Abrahamnö ö̧jobekwö ichobö. Ichajo̧nö jö̧ba̧lijetö:

—Ökwöma suli̧ kwöwaedajabe ökwödönöma, ötjö chöjawuju, jö̧ba̧lö. Ökwönöma ja'yubebi sulabenö ja̧tököjayonö ökwö sulabenö omöna yöka̧lobetjö̧ babema ötjöbi, chitebonö ju̧kwadöbi usula emawadösa. Omöna yöka̧li̧danöma yöka̧linatjö̧bö. 10¿Tajawedö omöna yöka̧linada, chöjawuju jö̧ba̧löma?— abebö a̧ja̧kwökwe:

11—Chomukwatijatö, bemi jojodöma Diosnö yebaböködö, jo̧ba wei̧ a̧ja̧kwöködö tjuju̧kwena, jö̧ba̧lö. Ja̧danö, chilekwonö tjemobö ötjönöma kwabö lotjena, jö̧ba̧lö chomukwatijatö— atadijetö Abrahamma Abimelecnö.

12Ja̧danö ju'wibi jö̧ba̧lijetö Abrahamma:

— Ju'wibi yöta̧la. Sarama isabenö ötjö chöjawuju, chabe'do itjijujayonö chojo'do jitjijubö̧kuju. Jobujunö chilekwo baibanö chemijatö. 13Ja̧danö, Diosma ötjönö, chömöledö tjuju̧kwelö labebö chi'yakwemima wajwibö chi'yobö weenama jö̧ta̧lijatö Sarahnö, chilekwo ötjönö ösödinö edö baikwö jö̧ka̧lo okobe jwiinö kwedachenama: Bitema ötjö chöpöe, jö̧ba̧lö—yöbawijetö Abrahamma Abimelecnöma.

Abimelec Abrahamnö iyina jawa

14Ikenama Abimelecma o̧bȩja̧dönö, pa̧ka̧yönö, ömöayedönö iyijetö Abrahamnöma. Ja̧danö, Abraham ilekwonö tjebatijetö. 15Ikenama jö̧ba̧lijetö Abrahamnöma:

—Ötjö chitebo niji edi. Kwisödemi kwemo kwuju̧kwaduwobö— jö̧ba̧lijetö.

16Ja̧danö, Saranö jö̧ba̧lijetö:

—Sara, ötjö chöpöe jö̧ba̧lö omöna jö̧ka̧linökwenö nöinö plata, mil ö̧pi̧biya̧ chiyajabe. Ja̧ plata chiyaja̧ma ökwökwö ju̧kwadönö tjöwaisinö i̧sebobe, Sarama sulabenö ja̧jinokobe, jö̧ba̧lö— jö̧ba̧lijetö Abimelecma Saranöma.

17-18Ja̧danö, ajayinö, Abimelecma Saranö emiökwe Diosma webijetö Abimelecnö ö'wöchobö. Ja̧danö, okobe deinö Abimelec ilekwonöbi okobe deinö omöayedö ya̧dönöbi webijetö Diosma, tjemu detjinö tjö̧jobö. Jokwajobetjö̧ Abrahamma Diosnö abebijetö jobadönö pjaatobö. Ja̧danö, Diosnö aebobetjö̧ Abimelecma bi̧bajijetö, ja̧danö ilekwobi, ömöayedö ya̧döbi bi̧bajijadötö, tjemunö 'yatjebobö.

Currently Selected:

Génesis 20: WPC

Highlight

Copy