Génesis 19

Sodoma Gomorra Jojodö Sulabenö Ja̧bö Tjuju̧kwina Jawa

1Ja̧danö, jobadö du̧ju̧taja ángelesdö, Abraham ö̧jelö labebajadöma Sodoma comunidadnö ichibijadötö yi̧benakwö. Tjichibena Lotma Sodoma teachakwawemi apjude apetukwöchobe bi̧jetö. Jobadö tjichobe edö Lotma a̧laibö tjichobekwö 'yawibö u̧yu̧kijunö jamatö öba bȩbachibijetö nijakwö uunö.

2Ja̧danö jö̧ba̧lijetö jobadönö:

—Chuluwedö. Ökwödö kwömöayo̧duwisa ötjöma. Cheju okwa tebachajaduwi kwömasapaduwi kwidichawaduwo. Dichawö kabatöma kwabaduwo, dewachö wiluibö labebö kwi̧'yaduwo— jö̧ba̧lijetö.

Jejenö jö̧alijayonö jobadöma jö̧ba̧lijadötö:

—Kwejunöma dabökö. Ökwödöma apetube daboda—jö̧ba̧lijadötö. 3Jejenö jö̧tja̧lijayonö Lotma labinö yöa̧liawö̧, Chejube kwabaduwo tebachaduwi, jö̧ba̧lö jo̧bakwö 'ya̧nö ejube tebachijadötö ángelesdöma Lotkwö. Ikenama Lotma kwakwawa otidijetö tjukwobö, pan 'ye'yeachökönö balö. Iyajawö̧ma kwijadötö. 4Tjukwaja̧ ikena tjabakwa̧ abönö tjö̧bajena Sodoma comunidadnö ju̧kwadö ömadö okobe deinö, möayedöbi, damöbi Lot eju apetube ichajadöma sulabenö ja̧tjotö jö̧ba̧lö tjösawibijadötö. 5Tjösawajadöma jwö̧beba̧lijadötö Lotnöma:

—Lot ¿daida jo̧da yi̧bena kwejunö tebachajadöma? Labebö ichejebidönö, 'da̧dodönö— jwöbeba̧lijadötö. 6Jejenö jwötjeba̧lökwe Lotma apetube labebö apjude tumatijetö. 7Tumatajo̧ jö̧ba̧lijetö jobadönö:

—Chömöledö jejenöma sulabenöma kwalewaduwadönö. 8A̧ja̧kwaduwi. Ötjö chi̧tji̧mu du̧ju̧taja ya̧dönö chujuna̧la, ina ömadökwö jö̧kö̧dönö. Abebaduwitjö jobadönöda wetaduwokwö kwösödaduwi̧ kwalewaduwobö. Jo̧kwaobetjö̧ bidö chejunö tebachajadönöma sulabenöma alewaduwökönuwi— jö̧ba̧lijetö Lotma. 9Jejenö jö̧a̧lijayonö jobadöma öpöjödijadötö. Lotnö webijadötö:

—Apjudema tjöbeba̧lökönuwi. Pjolachibö ja̧wi tedachibo—labinö webijadötö. Ja̧danö, Lotnö tjo̧'wo̧ sulinö edö yöba̧lakwawijadötö idöda tjöwaye:

—Bite, ökwödönö jelobetjö ichinama babeda ökwödönö edö, otiwanö domukwatojobö, sulabenö domukwatojobö, jö̧ba̧lö yöbawo̧ baibajabe— yöba̧lakwawijadötö idöda tjöwaye. Ikenama jö̧ba̧lijadötö Lotnö:

—Ökwönö yödawa. Idönö sulabenö ja̧do jö̧da̧lajemi bajalekwönönö sulabenö ja̧dakwo̧ja ökwönöma— jö̧ba̧lijadötö. Jejenö jö̧ba̧lö bakobe isayunö mebö jibö döbebijadötö Lotnö apjudenö ö̧jajelöma, apjude 'dotjakwotö jö̧ba̧lö. 10Jo̧kwaijayonö Lot eju okwa tebachajadö ángelesdöma omönanö do̧batibö töbebijadötö Lotnöma o̧do okwakwöchobe. Töbeibö tebatibö omönanö tumatijadötö apjudema. 11Ikenama ángelesdöma o̧pekwöchobe ju̧kwadönöma möayedönöbi, damönöbi tjöbajale tjewawachibanö ja̧bijadötö, apjudebi tjedökönö.

Isabenö Jo̧ Dios weajawö̧ ángelesdö Lotnö yöawina jawa Sodoma comunidadnö Gomorra comunidadnö söbebö lotjakwa̧

12Ikenama ángelesdöma abebö a̧ja̧kwijadötö Lotnöma:

—Ökwö kwömöledöma ¿didökwena tjuju̧kwobeda bemi comunidadnöma? ¿Kwo̧jo̧li̧mu̧, kwi̧tji̧mu kwujuna̧li̧ji̧? Kwömöledönö bemi comunidadnö tjuju̧kwitjö̧ma jobadönö öbibö betjö dökibo. 13Bemima söbebö lodakobe. Isabenö Jo̧ Diosma, Sodoma comunidadnö ju̧kwadö sulabenö ja̧bö tjuju̧kwobe, jö̧ba̧lö jwötjeba̧li̧ a̧ja̧kwajabetjö̧ söbebö lodobö weijatö ökwödönöma— yöbawijadötö ángelesdöma Lotnöma.

14Jejenö yötjawökwe Lotma labebö 'yi̧jetö i̧tji̧mu ju'winö tjȩmakwawö̧ tjö̧jobekwö yöbawö. Ichibö yöbawijetö:

—Belöma labebaduwi jelobekwö. Bemima Isabenö Jo̧ Diosma söbebö loakobe— yöbawijetö. Jejenö yöawijayonö, omöna yöba̧lo̧, jö̧ba̧lö omukwatijadötö jobadöma, a̧ja̧kwökönö.

15Ja̧danö, dewachenama ángelesdöma labinö webijadötö Lotnöma:

—Lot, a̧la̧ibi. Juluwanö kwilekwonö, kwi̧tji̧munö öbibö lakebo okwödö debö kwi̧'yaduwapjii söbebö lodenama— webijadötö. 16Jejenö wetjijayonö Lotma juluwanö döbibajijökötö. Jo̧kwaiawö̧ ángelesdöma Lotnöbi, ilekwonöbi, i̧tji̧mu dujutaja ya̧dönöbi, tjömamijunö do̧ba̧lö öbibö junijadötö Sodoma comunidad pjeakwö. Isabenö Jo̧ Dios Lotnö, ilekwonö, i̧tji̧munö lȩlö̧jinö edobetjö̧ ángelesdönö webijetö jejenö öbibö tjujunobö. 17Jobe Sodoma comunidad pjeakwö tjö̧jena ángelesdötjö bakwo̧ webijetö Lotnö:

—Döbibajaduwi 'yaka̧laduwakobetjö̧. Jalachiböbi kwedaduwoko kwö̧kömaduwikwöma. Niji ba̧ba̧laemibi okobe jwiinö 'ya̧duwi jamatökönö, tupakwö 'ya̧nö. Ja̧danö, mö'ösa'iju jo̧bekwö döbibaduwi ökwödöbi debö kwi̧'yaduwapji jö̧ba̧lö— webijetö.

18Jejenö weiökwe Lotma jö̧ba̧lijetö:

—Chuluwo̧, jobekwö dötibajoböma webökönuwi. 19Isabenö lȩlö̧jinö kwedajabe ötjönö, kwömöayo̧nöma 'ya̧talobö otiwanö pjabatö. Jo̧kwaijayonö mö'ösa'iju jobekwö ödöobetjö̧ ina chichibapjii söbebö loköbaduwena, ötjöbi debö chi̧'yinö baibanö. 20Edi. Yai comunidad ja'yuwemi yö̧neawinö ja̧. Jobekwö juluwanö dötibajo webitjö. Ja'yuwemi ¿jö̧tö̧? Söbebö loköbaduwoko ja̧ comunidadma. Jejenöma jobekwö dötibajitjö̧ma 'yata̧lakwo̧sa— abebijetö Lotma ángelnöma.

21Jejenö aebiökwe ángelma jö̧ba̧lijetö:

—Jao kwatjö̧ma, akebobekwö weta. Yöka̧laja̧ comunidadma söbebö lotökakobe. 22Juluwanö döbibaji jobekwöda. Ina jamatö söbebö lotoböma weokobe jobe kwichibenanö kabatö— jö̧ba̧lijetö. Ja̧ comunidad imi, Zoar, jö̧ba̧lö, ja'yuwemi, jö̧ba̧lö, wanekwachobe.

Isabenö Jo̧ Dios Sodoma comunidad Gomorra comunidad söbebö loina jawa

23Ikenama ja̧wo̧ ida̧ökö laebajena Lotma, ilekwokwö, i̧tji̧mukwö ichibijetö Zoarnöma. 24Ikenama Isabenö Jo̧ Diosma webijetö inawiya ubi̧ öwia mölejȩbetjö tjoduwinö Sodomanö, Gomorranö, okobe deinö jo̧ba comunidadesno ju̧kwadönö, ja̧danö okobe jwiinö nijitjö pokwi̧nanöbi tjoduwinö. 25Ja̧danö, Isabenö Jo̧ Diosma Sodoma comunidad, Gomorra comunidad söbebö lobijetö, ja̧danö, okobe jwiinö niji ba̧ba̧lawena ji̧ma. 26Ja̧danö, Lot ilekwo, Lot ökömanö ichajajuma söbebö loobekwö jalachibö jö̧kömakwö edijotö. Ja̧danö, jalachibö jö̧kömakwö jedemi sayu'oda babibijotö.

27Ja̧danö, ju'wi dewachena Abrahamma wiluibö a̧laibö 'yi̧jetö Isabenö Jo̧ Diosnö yöbawö ö̧jajelöma. 28Sodomakwö Gomorrakwö okobe jwiinö niji ba̧ba̧lawobekwö edemi imiyu'woda nijitjö kaamijetö, isa'wo nöa'wo ubajobedanö.

29Jejenö baledijetö Dios niji ba̧ba̧lawemi comunidades lȩbebö söbebö loina mölema. Ja̧danö, Diosma Abrahamnö ösödobetjö Abraham ömöledöso̧ Lotnö öbibö webijetö söbebö loelö jelobekwö döibajobö debö i̧'yökakobetjö̧.

Lot i̧tji̧mu sulabenö ja̧tjina jawa

30Ja̧ baledina tupakwö Lot, Zoar comunidadnö ji̧bajo̧ma yebabikwawiabö labebijetö Zoartjöma mö'ösa'iju jo̧bekwö ö̧jobö, du̧ju̧taja ya̧dö i̧tji̧mukwö. Jobema i̧lȩdo̧ okwa ju̧kwijadötö.

31Ju'wi möle abönö pöoma jö̧ba̧lijotö jöjawujunöma:

—Chöjawuju, ökwödö dabe'doma jwiinö pöe. Ja̧danö, ju'wedö ömadö di̧lȩkwa̧mu baibanö demawö̧ma baima dea. 32Jo̧kwaobetjö̧ ubasobu o̧'do̧bu diyo dabe'donöma 'dukwachobö. Ikenama 'dukwachena jo̧bakwö dö̧jo, di̧tji̧mu, jo̧batjö tupadanö jojodöma tjuju̧kwakobetjö̧— jö̧ba̧lijotö. 33Jo̧kwabetjö̧ ja̧ yö̧te tjabe'donö iyijadötö ubasobu o̧'do̧bu owobö 'dukwachobö. 'Dukwachena itjiju abönö pöoma jabe'dokwö ji̧jotö. Lotma wajwibijetö itjiju sulabenö ja̧ji̧ma, 'dukwachobetjö̧.

34Ja̧danö, ju'wi dewachö yö̧te abönö pöoma jö̧ba̧lijetö jöjawujunö:

—Jo̧da yö̧te ötjöma chabe'dokwö chö̧jatö. Babe yö̧tebi yemidanö ubasobu o̧'do̧bu diyo 'dukwachobö. Ikenama 'dukwachena ökwöda jo̧bakwö kwö̧jo, jo̧batjö tupadanö jojodöbi tjuju̧kwakobetjö— jö̧ba̧lijotö.

35Jo̧kwaobetjö̧, ja̧ yö̧tebi tjabe'donö iyijadötö ubasobu o̧'do̧bu owobö 'dukwachobö. 'Dukwachena itjiju bajaliya luwujuma jabe'dokwö ji̧jotö. Lotma yemidanö itjiju sulabenö ja̧ji̧ma wajwibijetö, 'dukwachobetjö̧.

36Jo̧kwabetjö̧ Lot i̧tji̧muma metu'wo ji̧jadötö tjabe'donötjö. 37Abönö pöoma jitji̧nö emijotö. Jo̧banöma Moab#19:37 Moab jö̧ba̧löma hebreo tjiwenenö chabe'dotjö, jö̧ba̧lö ökwöi̧danö ökwöobe , jö̧ba̧lö, midijotö. Ja̧danö, jo̧bama moabites jojodötjö abönö ji̧na. 38Ja̧danö, bajaliya luwujubi jitji̧nö emijotö. Jo̧banöma Ben-ammi#19:38 Ben-ammi jö̧ba̧löma chömöledöso̧ itji̧, jö̧ba̧lö wanekwachobe. Ja̧danö hebreo tjiwenenö amonita jö̧ba̧lö okwöi̧danö ökwöobe , jö̧ba̧lö, midijotö. Jo̧bama amonites jojodötjö abönö ji̧na.

Currently Selected:

Génesis 19: WPC

Highlight

Copy