Génesis 18
18
Isabenö Jo̧ Dios Abrahamnö öwawachina jawa, Kwilekwo jemakobe kwitji̧nö, jö̧ba̧lö
1Ju'wi möle Abrahamma, Mamre itebonö ja̧nö, i̧sa̧do̧ debatö otidineju apjude a'o bi̧jetö, towi nöowi jena. Jenada bi̧jetö, ja̧wo̧ wöatena. Jena ö̧bena Isabenö Jo̧ Diosma öwawachijetö jo̧banöma. Baikwö baledijetö: 2Abrahamma jobe apjude a'o ba̧nö, edemi omönanö ömadö wa̧medukwa ji̧jadötö, jo̧ba ö̧bemi badeibö. Jobadönö edö omönanö a̧laibö jobadö tjö̧jobekwö 'ya̧wibö u̧yu̧jukijunö bamatö öba bȩbachibijetö nijakwö uunö, chuluwedö, jö̧ba̧lö.
3Ikenama jö̧ba̧lijetö Abrahamma bakwo̧nö:
—Chuluwo̧, ötjönö otiwanö kweditjö̧ma juluwanö baledökönuwi kwömöayo̧ chö̧jelöma. 4Ja'yubeda ojwiyo weto tjichejebobö kwömasapaduwi kwidichawaduwobö. Ja̧danö, dichawö kabatöma towi la'aka ba̧nö kwö'wachaduwo, tiyuwena. 5Ja̧danö, kwakwawa tjotidobö weta kwukwaduwobö, juluwachibö kwi̧'yaduwo. Ökwödöma chö̧jobekwö kwichaja̧duwobema kwömöayo̧duwisa ötjöma— jö̧ba̧lijetö Abrahamma. Jejenö jö̧a̧liawö̧ jö̧ba̧lijadötö:
—Jao kwatjö̧ma, otiwa. Yöka̧li̧danö webi— jöba̧lijadötö.
6Ikenama Abrahamma eju okwa tebachibö webijetö Saranöma:
—Sara, juluwanö emaji harina de trigo otiwa jawatjö, veintenö kilos jenanö. Ikenama pan yo̧bibö kwotido— webijetö.
7Ikenama Abrahamma juluwanö ö'öbakwawijetö pa̧ka̧yö̧ tjuju̧kwobekwö. Ichibö bakwo̧ pakayanö, otiwanö möayo̧nö, itebiya 'waabo̧nö ba̧ja̧dö, itenö do̧bati, jö̧ba̧lö, webijetö ömöayo̧nö. Ja̧danö, ömöayo̧ma juluwanö kwabö lobö, kwabö loajökwe i̧sȩdo̧ 'yo̧bö, 'da'dabö otidijetö, itebiya söobö. 8Ikenama Abrahamma isa'be o̧'da̧'bebi, o̧do'bi̧sobubi, itebiya söawabi ichejebö iyijetö ichajadönöma. Ja̧danö, jobadöma towi la'aka ba̧nö tjukwonö Abrahamma yö̧ne te'ada̧lö bi̧jetö.
9Ikenama jobadötjö bakwo̧ abebö a̧ja̧kwijetö Abrahamnöma:
—¿Kwilekwo Saraja?— aebökwe:
—Yada o̧do okwa— atadijetö Abrahamma.
10Ja̧danö jobadötjö bakwo̧ yöbawijetö:
—Abraham. Isabenö, babedajayena ju'wi o̧banö yemidanö chichocha. Chichenama kwilekwo Sarama ida̧ökö jitji̧nö jujuna̧lakobe— yöbawijetö.
Ja̧danö, Sarama apjude okwakwöchobe, yö̧ne ja̧nö jo̧ba yöawi̧ma a̧ja̧kwa̧lijotö. 11Ja̧danö Sara, Abraham jwiinö damöbijadötö. Sarama iwobi debachinuju pöojobetjö̧. 12Ja̧danö, jobujuma Isabenö Jo̧ Dios yöawi̧ a̧ja̧kwö obö omukwatijotö jomajadenö, ötjöma ida̧ökö pjolobachujusa ¿dakwö chösödobö pöe chilekwekwö alewö chö̧ji̧ma? jö̧ba̧lö.
13Ikenama Isabenö Jo̧ Diosma abebö a̧ja̧kwijetö Abrahamnöma:
—Sarama ¿tajawedö obujuda, ötjö puoma isabenö chemakwaji̧ chitjinö, emököjusa, jö̧ba̧lö? 14Abraham, ötjö, Isabenö Jo̧ Diosma ¿baledobö weti̧ waiyi̧ma jo̧beji̧'? Jo̧okobe. Jweinö yöta̧la Abraham, kwilekwo Sarama kwitji̧nö jemakobe. Babedajayena ju'wi o̧ba ichenama yemidanö chichocha. Chichenama Sara jitji̧nö jujuna̧lakobe— jö̧ba̧lijetö Isabenö Jo̧ Diosma Abrahamnöma.
15Sarama Isabenö Jo̧ Dios ¿tajawedö obujuda? jö̧a̧lioko yebaibijotö. Jo̧kwaobetjö̧ jö̧ba̧lijotö:
—Isaö̧kö̧. Ötjöma otökötö— jö̧ja̧lökwe:
—Omöna yöka̧la. Oköbatö— jö̧ba̧lijetö Isabenö Jo̧ Diosma.
Isabenö Jo̧ Dios Abrahamnö yöawina jawa, Sodoma Gomorra comunidad jojodönö labinö jwötjeba̧li̧ cha̧ja̧kwajabe, jö̧ba̧lö
16Ikenama jobe ichajadöma Abraham eju apetutjö a̧laibö labebijadötö. Abrahamma jobadökwö 'yi̧jetö, ja'öda. Ja̧danö, labebajadöma ja̧nö eda̧lijadötö Sodomabekwö. 17Isabenö Jo̧ Diosma, Sodoma comunidad eda̧lö itedada jö̧ba̧lijetö:
—Abrahamnö yötawobö jo̧be öwaisobö Sodoma comunidad baledobö wetakwa̧ma. 18Jo̧banö chiwene yöbawö chujuninobetjö̧, ökwötjö tupadanö jojodöma tjitebonö ba̧jekwachö juluwadö tjuju̧kwakobe, jö̧ba̧lö yötawobö jo̧be. Ja̧danö, Abramnö ösödanö edö pjatatobetjö̧ ju'wedönö, bakwasokwena jojodönöbi ösödanö edö pjatatawö̧ tjuju̧kwakwedö. Jo̧kwaobetjö̧ jao, yötawonöcha Sodoma comunidad baledobö wetakwa̧ma. 19Isabenö, Abrahamnöda omudawö chujunijatö iteda i̧tji̧munöbi, jo̧batjö tupadanö jojodönöbi öba̧jadobö, ötjö weti̧ a̧ja̧kwö tjö̧jakobetjö̧, jweinö omukwatö, ötjö chösödi̧danö ja̧bö. Jejenö tjuju̧kwitjö̧ma ötjö chiwene Abrahamnö yöbawö chujuninadanö badekwachakobe— jö̧ba̧lijetö Isabenö Jo̧ Diosma, itedada.
20Ikenama Isabenö Jo̧ Diosma Abrahamnö jö̧ba̧lijetö:
—Abraham, Sodoma comunidad jojodönö, Gomorra comunidad jojodönö ju'wedö labinö jwötjeba̧li̧ cha̧ja̧kwijatö, jwiinö sulabe ja̧bö ju̧kwadö, jö̧ba̧lö. 21Jo̧kwaobetjö̧ 'ya̧nö chedajocha sulabenö ja̧bö tjuju̧kwojobö. Chöwaisobö chi̧'ya, jobadö tjö̧ji̧ma sulojobö, sulökojobö, jö̧ba̧lö— jö̧ba̧lijetö Isabenö Jo̧ Diosma.
22Ikenama jobadö wa̧medukwa jojodötjö du̧ju̧tajama 'yi̧jadötö Sodomabema. Jo̧kwaijayonö Isabenö Jo̧ Diosma ji̧bijetö Abrahamkwö.
23Ja̧danö, Abrahamma Isabenö Jo̧ Dios ö̧jobekwö 'ya̧wibö abebö a̧ja̧kwijetö:—Chuluwo̧, abebö cha̧ja̧kwakwö: Sodomanö ju̧kwadötjö, Gomorranö ju̧kwadötjö jwiinö sulabenö ja̧badö tjö̧jitjö̧ma ¿jobe comunidades okobe jwiinö söbebö loköbakwa̧ji̧? Yöta̧lakwö: Jobe ju̧kwadötjö ju'wedöma sulabenö ja̧böködö tjö̧jena. Jo̧kwaobetjö̧ okobe jwiinö söbebö loköbitjö̧ma otiwadönöbi sulabedökwö debö tji̧'yobö weköbena. 24Ja̧danö, cincuentanö jojodö otiwanö omukwatö tjuju̧kwitjö̧ma ¿jobadönöbi debö tji̧'yobö jobe comunidades okobe jwiinö söbebö loköbenaji̧? 25Chuluwo̧, ökwöma jejenö lȩkebö̧kena. Otiwanö omukwatö ju̧kwadökwö sulabenö ja̧bö ju̧kwadökwö debö tji̧'yobö söbebö loköbökena. Jejenö söbebö loköbitjö̧ma otiwadönöbi sulabedönöbi bakwainöda kwedena. Ökwöma jejenö kwomukwatökena. Ökwöma böjȩnö ju̧kwadötjö didö sulabenö ja̧tjojobö, didö otiwanö ja̧tjojobö waiso̧ja. Jo̧kwaobetjö̧ jweinö omukwatö weköbakwo̧ja— yöba̧lijetö Abrahamma Isabenö Jo̧ Diosnö.
26Jejenö jö̧a̧lökwe Isabenö Jo̧ Diosma atadijetö Abrahamnöma:
—Abraham, cincuentanöbedö otiwanö omukwatö ju̧kwadönö jobe comunidadesnö chöbadekwajitjö̧ma jobadönö tjö̧jibinö pjabatö söbebö lotökakwo̧sa jobe comunidades— atadijetö.
27Ikenama Abraham jö̧ba̧lijetö:
—Ayö, chuluwo̧, ötjöma nijitjö otikwo̧chijayonö, ökwöla so̧pja̧danö chichejekwijayonö labinö abeba̧lo̧sa ökwönöma baikwö: 28Cuarenta y cinconöbedö otiwanö omukwatö ju̧kwadö tjuju̧kwitjö̧ma, cinconö jojodönöda jwibatö, jobadönöbi debö tji̧'yobö okobe jwiinö jobe comunidades ¿söbebö loköbenaji̧?— abebö a̧ja̧kwijetö Abrahamma.
Jejenö abebö a̧ja̧kwökwe Isabenö Jo̧ Diosma atadijetö Abrahamnöma:
—Abraham, cuarenta y cinconöbedö otiwanö omukwatö ju̧kwadönö chöbadekwajitjö̧ma jobadönö tjö̧jibinö pjabatö söbebö lotökakwo̧sa jobe comunidades— atadijetö.
29Ikenama yemidanö abebö a̧ja̧kwijetö Abrahamma:
—Ja̧danö ¿cuarentanöbedöbi jwiinö otiwanö omukwatö ju̧kwadönö kwöbadekwajitjö̧bi?— abebö a̧ja̧kwijetö.
Jejenö abebö a̧ja̧kwökwe Isabenö Jo̧ Diosma atadijetö Abrahamnöma:
—Jobadö cuarentanöbedö ju̧kwadönö tjö̧jibinö pjabatö söbebö lotökakwo̧sa jobe comunidades— atadijetö.
30Ikenama Abrahamma jö̧ba̧lijetö:
—Ina, ateba̧lanöbi labökönuwitjö ötjönöma, Chuluwo̧. Trentanöbedö otiwanö omukwatö ju̧kwadönö kwöbadekwajitjö̧bi debö tji̧'yobö ¿söbebö loköbenaji̧ jobetjöma?— abebö a̧ja̧kwijetö Abrahamma.
Jejenö abebö a̧ja̧kwökwe:
—Trentanöbedöda otiwanö omukwatö ju̧kwadönö chöbadekwajitjö̧ma jobadönö tjö̧jibinö pjabatö söbebö lotökakwo̧sa jobe comunidades— atadijetö Isabenö Jo̧ Diosma.
31Ikenama Abrahamma jö̧ba̧lijetö:
—Chuluwo̧, labinö ateba̧la. ¿Veintinöbedö otiwanö omukwatö ju̧kwadönö kwöbadewajitjö̧bi?— abebö a̧ja̧kwijetö. Jejenö abebö a̧ja̧kwökwe:
—Jobadönö veintinöbedö tjö̧jibinö pjabatö söbebö lotökakwo̧sa jobe comunidades— atadijetö Isabenö Jo̧ Diosma.
32Ikenama Abraham jö̧ba̧lijetö:
—Yemidanö bakwötanö atebonö labökönuwitjö. Chuluwo̧, dieznöbedö ötiwanö omukwatö ju̧kwadönö kwöbadekwajitjö̧bi?— Abrahamma abebö a̧ja̧kwijetö.
Jejenö abebö a̧ja̧kwökwe Isabenö Jo̧ Diosma atadijetö Abrahamnö:
—Dieznöbedö ja̧nö chöbadekwajitjö̧ma jobadönö tjö̧jibinö pjabatö söbebö lotökakwo̧sa jobe comunidades— atadijetö.
33Ikenama Abrahamkwö yöba̧lakwawö kabatö Isabenö Jo̧ Diosma 'yijetö Sodomabe. Ja̧danö, Abrahamma ejube ȩwa̧jijetö.
Currently Selected:
Génesis 18: WPC
Highlight
Share
Copy
Want to have your highlights saved across all your devices? Sign up or sign in
©2021, All Rights Reserved
