JUAN 8

Epona peacojjojji yecapoa cuaa Jesosaque oja bajji

1Majoya aje Jesosa jaasohuaquiapoa eyiyoiyeao nequi Olivos bajjaniyasijje. 2Majoya aje mecajjeahuanei jjapojjaquiajo Jesosa poquio'oyapoa Eyacuiñajjija equi-aiquiquibohuasijje. Queahuisoneecuana jjachichaquicapoa oque. Jamajjeya Jesosaa anioquemajje esohui huohuica-aniapoa ma oque jjachichaquicanaje cuana.

3Majoya Moisesja tehuehuohuijjicuaa, fariseo dejjacuaa pea-ai oe epona peacojjojji poani dojocapoa Jesosaque. Jamajjeya ona ejjachichaqui aniyasijje epona nequiacañaquiapoa ojjaña majo anicaja ebajji. 4Jesosa jama acañaquiapoa cuaa ba'a: —Esohuihuohuijji, jiquio epona pea dejjanijje jaa bacanaje cuaa, ojahuenijje pojjeama. 5Eseja esohuijo Eyacuiñajjija tehuemee jama Moisés poa ba'a: “Epona jajahuejjajea'yocue meiya peacojjojji poani bamajje.” Jamajjeya, ¿yajja acuae miyaya jiquio epona aje?—

6Jamaya Jesosa acapoa fariseocuaa, Moisesja tehuehuohuijji poanicuaa yajja saja-ame ohua acaje ebajji. Jesosaa Eyacuiñajjija oja tehuemee esohui mi-acajo Jesosa dojocaje cuaa judío etii poanicuana cojjaneiyasijje enequijji. Majoya Jesosaa anioquemajje meshipohui tehuecapoa oja emeya. 7Jesosa eanioquetii ani huohuiajjamajamajacanequiapoa cuaa ma eponajo. Majoya aje Jesosaa nequisohua'yomajje huohuicapoa cuana jama ba'a: —¡Joya mimishiamaneinei nequi dejjaa ebionei meiya jajahuejjajeacoocue jiquio ani epona emanojea'yojji!— jamaya poa Jesosa.

8Majoya mimijeyomajje Jesosa anioqueo'oyapoa. Meshipohui tehuecao'oyapoa emeya. 9-10Jesosaja esohui shajja-ajjamajje judío dejjacuana majo ejjachichaqui anica oe cuayaqui'yo, oe cuayaqui'yo popoquiapoa cuana esecueyasijje. Ebionei dejja ma etiinojinoji nequi ehuidojojji cuayacooquipoqui'yapoa. Majoya ojjañatii cuayaqui'yapoa. Ojjañacuana cuayaqui'yajo Jesosa nequisohua'yomajje epona oenei onaja jeana'yo ani jama huohuiajjame acapoa ba'a: —Epona, ¿aecue cuana? ¿A'a chama'neinei mi jajahuejjajea'yojji epojji?—

11Eponaa Jesosa saja-acapoa jama ba'a: —¡Esohuihuohuijji, chama'neinei cuana! Ojjañatii poquica'yonaje.—

Majoya Jesosa jama po-o'oyapoa onijjenei ba'a: —E'e epona, ecuea miya ejajahuejjajeamee'yojji pojjeama pea-ai. Jjeya miya poqui'yocue pea-ai. ¡A'a oe queamimishiya pobeca'yojji!—

Jesosa ojjañacuiñajjicuana jeaja'apoquiajji poani

12Majoya Jesosaa ojjaña ma ejjachichaqui anica poanajecuana pea esohui huohuicapoa jama ba'a: —Eya ojjaña meshijo ba'ecacuana jeaja'apoquiajji poani. Ojjaña joya e shajja-ajjajji poanicuana queaja'anee ba'epoquije, quea-aapo jayojjatii epopoquijji pojjeama poaje. Queasajajanee poaniya oya queaja'anee jjashahuabameequicapoquijetii.—

13Majoya fariseo dejjacuaa Jesosa jama acapoa ba'a: —¡De! Miyayanei caca oe huohuiaña ae miya poani, peaja huohuijo pojjeama. Jamajjeya jiquio miya aña esohui mijotii peajja, miqueanei.—

14Jesosaa saja-acapoa cuana jama ba'a: —Chojja, jama pojjeama. Eyayanei esohui ejo huohuiaña queapamenee ae eya poani. Ecuea esohui e'ejojonei poani ecuea ebajojoya achejje poe eya. Achacua eya poquije'yo ecuea ebanei pea-aijojoya queapame huohuiaña. Miquianajaya caca oe bajjimanei. 15Miquiaaya eya baneineiaña ehuohuijji ae shai eya poani miquianaja ejjashahuabaquijjineijo. Eya ca iña ecueanei ejjashahuabaquijjijo baneineiajja cuana ae shai oya poani ehuohui'yojji. 16E'ejojonei eya peacuana baneineijji poani ache oja acuana queapame ehuohui'yojji. Echii-aiya e huoojeajji epohua enijje nequiya oja acuana ache queapame poani eya huohuimeesahuacaje'yo queaja'a. 17Moisesja tehue ma miquiaaya apoquiaña esohui jama poani ba'a: “Beca dejja oya jayojja pea-ai mimime poajo ojaya esohui e'ejojonei poani bacaje cuaa.” 18Jamajjeya eyaya e'ejojonei esohui aña eya Eyajje poe. Ecue Chiiya, e huoojeajji epohua, e'ejojonei oya esohuiya apea-aicani ejo.—

19Majo nequi dejjacuaa Jesosa huohuiajjacapoa jama ba'a: —¿Aecue mique Chii?—

Jesosaa saja-acapoa cuana jama ba'a: —Miquianajaya eya bajjimanei, jamajjeya ecue Chii miquianajaya bajjimanei pea-ai. Eya miquianajaya ebajojjemo ecue Chii miquiaaya bapea-aime.—

20Jesosaa jamaya sohuihuohuicanequiapoa cuana Eyacuiñajjija equi-aiquiquibojo nequiya ma cajón bejjo chichapoquiajjicuana anijo nequiya. Jamatii judiocuanaja Jesosa iñameejjima poa so'o epojja o Jesosa iñajji apoa pojjima' poajojoya.

Ma Jesosa poquije'yohuasijje pea epoqui'yojji pojjeama poaje

21Jesosaa huohuitiicapoa cuana jama ba'a: —Eya poqui'yajo miquiaaya eya sa-ajjaje'yo. Jamatii quiana quijje manopoquije'yo mimishijjitii nequi. Ma e poquije'yohuasijje miquianaya epoqui'yojjitii pojjeama poaje.—

22O jama poajo judío dejjacuana oya oopana jama poa ba'a: —¡De! ¿A'a cuae oyatii Jesosa jjaquecuaqui'yome? Jamajjeya pojja'a oya esenijje jama poanaje ba'a: “Miquianaya eque epoqui'yojji pojjeamatii poaje”— jamaya Jesosa epoaje'yo posoya acapoa cuaa.

23Majoya Jesosaa jama huohuime apea-aicapoa ba'a: —Miquianaya jiquio meshi eba'ejjijotii jjashahuabaquipoquiani, eya ca iña Eyajo nequi poe. Miquianaya ca jiquio meshijotii eba'ejjijo jjashahuabaquipoquiani, eya ca iña miquianaya jama pea-ai pojjeama. 24Jamajojoya aje eyaya quiana huohuinaje jama ba'a: “Miquianaya mimishijjitii nequi manopoquije'yo.” Eya Eyacuiñajjija huoojea pojjeama poso amajje mijjashahuabaqui'yonaje ejo. Jamajjeya quiana mimishijjitii nequi manopoquije'yo.—

25Majoya aje Jesosa huohuiajjacao'oyapoa cuaa jama ba'a: —¿A'ya acuae mi so'o de? ¿Ae dejja miya?—

Jesosaa saja-acapoa cuana jama ba'a: —Jjeyanei aje quiana huohuinaje ae eya. 26Ecuea quiana queamimishihuiso poani huohuicajji poanaje. E huoojeajji epohua esohui e'ejojoneitii acani. Jamajjeya ojaya esohuinei huohuije ma e ohua acanaje esohuineiya— jamaya acapoa Jesosaa.

27Ma dejjacuanaja ca bajjimanei poa Jesosaa oja Chii-aijo Eyacuiñajjijo esohui huohuicani. 28Jamajjeya Jesosaa huohuitiicapoa cuana jama ba'a: —Miquiaaya eya, Dejjapojji epo, ba'ehuanasohuajeameemajje baneije ae shai eya poani. Eya ca iña quio. Eya jama poajoya miquiaaya eya baneije ecuea ejjashahuabaquijjinei pojjeama huohuiaña. Quio e ecue Chiiya huohuicani huisotii esohui oya esohuineiya eyaya quiana huohuiaña. 29E huoojeajji epo enijjetii nequipoquiani. Ecue Chiija eya enei eanijji jeana'yojjima poani. Jamajjeya cua ecue Chiiya e ameesa-acani huisotii eyaya apoquiaña o queabihui pojji ejo.— 30Jesosaa jama huohuime acajje queahuiso cuana jjashahuabaquica'yapoa ojo.

Jesosaa huohuicapoa cuana Eyacuiñajjija bacuacuanajo, pea dejjacuana oja mimishijo ejeyo'yotii jayojja poanijo pea-ai

31Majoya aje Jesosaa joya ojo jjashahuabaqui'yonaje judiocuana huohuicapoa jama ba'a: —Miquianaya ecuea esohuijo jjashajja-ajjaquipoquimajje e'ejojonei e shajja-ajjajjitii poaje. 32Miquiaaya ecuea esohui e'ejojonei bapoquiaje. Ecuea esohui bamajje queapamenee ba'epoquije. Jiquio ecua dejjacuana ejjeshe peajo chacochacopoquianitii majoya oya huoojeaca'yani, jama pea-aiya quiana poaje'yo queabihuinee.—

33Jesosa saja-acapoa cuaa jama ba'a: —Ecuana caca jiquio Abrahamja osecuaneiya poani. Ecuana ca chacomeejjimanei acanaje cuaa peajo. Jamajjeya, ¿apiojji acuae ecuana huoojeacaje'yo jama aña?— jamaya poa judiocuana Jesosanijje.

34Jesosaa huohuitiicapoa cuana jama ba'a: —E'ejojonei esohui eyaya quiana huohuiaña. Ojjaña miquiana queamimishitii poani jiquio ecua dejja ejjeshe peajotii chacochacopoquiani jama pea-aiya quiana poani miquianaja mimishijo. 35Joya peajo chacochacopoquianitii ejjeshe o chacomeejji poanija equijo aniajja oja bacuanei pojjeama poanijjejojoya. Oja bacuaejjanei ca oja chiija equijotii anipoquiani onijjetii. 36Jamajjeya quiana eyaya Eyacuiñajjija Bacuaejjaa miquianaja mimishijo nahue'yajje queabihui ba'eje. Jiquio ecua dejja ejjeshe peajotii echacochacopoquijji majoya oya huoojeaca'yani, jama pea-aiya quiana queabihui poaje'yo. 37Ecuea ebanei miquianaya Abrahamja osecuanei poani. Jamatii eya miquiaaya jajahuejjajea'yosa-aña ecuea esohui cajaa añajjejojoya. 38Eyaya jiquio esohui aña ma ecue Chiiya e bameesahuacanajeya ehuohuijji. Oya jayojja miquiaaya esohui aña ma miquianaja chiiya quiana huohuicanaje esohuiya.—

39Jesosa saja-acapoa cuaa jama ba'a: —¡Ecuanaja baba caca Abraham bajjani poa!—

Majoya Jesosaa huohuicao'oyapoa cuana jama ba'a: —Miquianaya Abrahamja osecua e'ejojonei poaniyajjemo ma miquianaja babaa acapoa jayojja pea-aiya apoquiame. 40Eyaya quiana esohui e'ejojonei huohuiaña ma Eyacuiñajjiya e huohuicanaje esohuitiiya. ¡Jamatiiya quiaa eya jajahuejjajea'yosa-aña! Abraham caca jama pojjima'neinei poa. 41Miquianaya caca oe miquianaja chii jayojjayatii ba'epoquiani queaquehuatii— jamaya poa Jesosa.

Majoya aje queaqueneneeya Jesosa huohuicapoa cuaa jama ba'a: —Ecuana ca ahuemaja mejo pojjeama. Ecuanaja Chii-ai caca oe oenei poani, Eyacuiñajji poani.—

42Jesosaa huohuitiicapoa cuana jama ba'a: —Eyacuiñajji miquianaja Chii-ai e'ejojonei poanijojjemo miquiaaya eya queajeanee ame. Eya Eyacuiñajjija huoojea miquiananijje nequi jjeya. Eya ca iña jiquio ecueanei ejjashahuabaquijjijo poe pojjeama nequi. Ecue Chiiya eya huoojeacapoa. 43¿Yajjajo acuae ecuea esohui miquianajaya queaquehuaneetii poani? Miquianaja queaquehuanee poani jiquio ecuea esohui miquiana shajja-ajjasapo-ajjajjejojoya. 44Edosiquiana caca miquianaja chii poanitii. Oya emiquianamesetii nequipoquiani. Ojayanei ejjashahuabaquijji queaquehua asa-añatii quiaa. Edosiquiana pea quecuacoo'yojji poa ebionei, jjeyanei pea-ai oya pea quecua'yojji poanitii. Oya esohui e'ejojoneijo jjashahuabaquiajja, esohui e'ejojonei huohuiajja pea-ai. Oya siajjepoanitii oya siajjepojjijjejojoya. Ohuaya siajje acoocapoa, siajjetii ameecani cuana jjeya pea-ai. 45Jamajojoya aje quiana oe ecuea esohuijo jjashahuabaquiajja eya e'ejojonei poanijojoya. 46¿Ache oe miquiaaya eya queamimishi poani banaje? Eya ca iña mimishiamaneinei poani. Eyaya miquiana esohui e'ejojonei huohuiajjaña, jamajjeya, ¿yajjajo shai mijjashahuabaqui'yani quiana ejo? 47Jamajjeya ojjaña joya Eyacuiñajjija bacua poanicuaa ojaya esohui shajja-ajjaneicani. Miquianaya caca Eyacuiñajjija bacua pojjeama poani, jamajjeya ojaya esohui shajja-ajjasapo-ajjatii poani— jamaya Jesosaa huohuicapoa cuana.

Abraham cuayajjimahuajo Jesosa Quito enequitiiapoa

48Majoya aje judiocuaa Jesosa niñebacapoa jama ba'a: —¡E'ejojonei ecuaa miya aña, miya caca samaritano dejja, eshahuamase yamijji de!—

49Jesosaa saja-acapoa cuana jama ba'a: —Chojja, eya eshahuamase yamijji pojjeama. Eya ecue Chiijo queapame mimiani. Miquianaya caca oe ejo queatainee mimiani. 50Eyaya quiana jama aña miquianaya ejo queapame emimijji pojjeama. Ecue Chiiya quiana ejo queapame mimimeesa-acani. Ojjaña joya e sapo-ajja poanicuana ecue Chiiya oja mimishi ja'anei huohuicaje'yo. 51E'ejojonei eyaya huohuiaña jama ba'a: Ojjaña joya ecuea esohuijo jjashajja-ajjaquijji poanicuana emano'yojji pojjeamatii poaje.—

52Jesosaa esohui jama acajje judiocuaa oya saja-acapoa jama ba'a: —¡E'ejojonei jjeya ecuaaya miya baña eshahuamase yamijji de! Abraham, ojjaña Eyacuiñajjija esohuihuohuijji poacuana pea-ai yahuajonei manocapoqui'yapoa. Jamatii miyaya ecuana huohuiaña ba'a: “Ojjaña joya ecuea esohuijo jjashajja-ajjaquijji poanicuana emano'yojji pojjeamatii poaje.” ¡Chojja, jamaya ca queaquehua de! 53¿A'a acuae miya jjabaquiani queaca'aneenee, ecuanaja chii Abraham queaca'apishana? ¡Chojja de! Oya Abraham mano'yapoa. Ojjaña Eyacuiñajjija esohuihuohuijji poacuana pea-ai yahuajonei manocapoqui'yapoa. ¿Ae jayojja miya jjabaquiani?—

54Jesosaa saja-acapoa cuana jama ba'a: —Eyanei queapame mimije ejotii ecuea esohui queapame pojjeama poaje. Ecue Chiiya ca eya queapamenee queaca'anee poani bacani queabihuiya. Ma miquiaaya aña miquianaja poani Eyacuiñajjiya, maaya eya queaca'anee queapamenee bacani. 55Jamatii miquianajaya oya Eyacuiñajji bajjimaneinei poani. Ecuea caca oe oya ebanei. Ecuea Eyacuiñajji bajjimanei jama ehuohuijojjemo eya miquianaya jayojja pea-aiya pome, siajjepojjinei pea-ai pome. E'ejojonei ecuea ca Eyacuiñajji ebanei. Jamajjeya ojaya esohuijo eya jjashajja-ajjaquipoquianitii. 56Miquianaja etiiquiana Abrahamja eba poa eya quijje poeje jiquio meshiyasijje ojjaña nahue'yohua. E poejji epojjajo oya jjashahuabaquipoquitiiyapoa. Majoya oya e epoe bamajje queabihuinee poa.—

57Majoya judiocuaa Jesosa acao'oyapoa jama ba'a: —¡Miya ca mi ca oe esho'i de! Cincuenta shequiajame huiso pojjima'. ¿A'a cuae jje etiiquiana Abraham eshe nequiahua miquea oya eba poa? Chojja. ¡Bajjima miquea de!—

58Jesosaa saja-acapoa cuana jama ba'a: —E'ejojonei eyaya quiana huohuiaña. Abraham cuayajjimahuajotii caca oe eya e'ejojonei enequitiiapoa.—

59Jesosaa jama huohuime acajje judío dejjacuana quenequeneneineiapoa onijje. Jamajojoya aje meicuana iñacapoa cuaa Jesosa jajahuejjajea'yojji nisho. Jesosa ca Eyacuiñajjija equi-aiquiquibojo nequi quehuacuayaqui'yapoa, oya macuanaja iñajjima.

Currently Selected:

JUAN 8: ESE

Highlight

Copy