JUAN 9

Oe dejja cojjama'tii cuaya Jesosaa jjacojjaja'ameequicapoa

1Majoya aje Jesosaa ejeojjijje poquijeya oe dejja cojjama'tii cuaya ani bacapoa. 2Majo nequiya o shajja-ajjajji poanicuaa Jesosa huohuiajjacapoa jama ba'a: —Esohuihuohuijji, ¿yajjajje acuae jiquio dejja cojjama'tii cuayapoa? ¿A'a oja chiija mimishijo, a'a oja naeja pojja'a, a'a oja mimishineijo pojja'a?—

3Jesosaa saja-acapoa cuana jama ba'a, —¡Chojja de! Oya cojjama'tii cuayapoa oja mimishineijo pojjeama, oja chiija, oja naeja mimishijo pea-ai pojjeama. Oya jamatii cuayapoa cojjama'tii Eyacuiñajji queaca'aneetii poani queahuisocuanaja ebajjijo. Yajja Eyacuiñajjiya oya quijje acaje ebajjijo cuanaja oya jamaya cuayapoa. 4Epojjajo eseya chacochacocajji e huoojeajji epoja echacojjijo. Quijje eseya chacochacopajeaje jiquio ecua meca poeajo dejja chacochacopajeani jamaya. 5Eya jiquio meshijo nequi ojjañacuana jeaja'apoquiajji poani— jamaya Jesosa poa.

6Majoya aje Jesosaa jama huohuime amajjeya meshi cuichocapoa. Meshi cuichoja choe Jesosaa ma cojjama'tii cuaya dejja oja cojja iñapepacapoa meshi choeya. 7Majoya Jesosaa cojjama' dejja huohuicapoa jama ba'a: —Jjeya miya poquicue ecojja shacuaquiya ena nequiyasijje, ma Siloé bajjani ena nequiyasijje— jamaya poa. (Ma enanequijji Siloé bajjani jama poanijje ba'a: Ehuoojea.)

Jamajjeya dejja cojjama' poquicuajiapoa enanequijjiyasijje oja ecojja shacuaa. Majoya oya ecojja shacuamajje poe'yapoa oja equiyasijje ejjacojjaja'aqui. 8Opejjejo ba'ecacuaa, pea dejjacuaa ma oya cojjama' yahuajo memeani bajji poanajecuaa pea-ai oya queacojjaja'a baca'yapoa. Jamajjeya ojee mimimimicapoa cuana ojo jama ba'a: —¡De! ¿A'a jiquio dejja jjeya jjabaquinaje ma yahuajo cojjama' eanioque memeaninajeya eseya banajeya?—

9Becacuaa saja-acapoa jama ba'a: —E'e de, oyaya jjeya jjabaquiani.—

Peacuaa ca jama poa ojo ba'a: —Chojja de, pea pojja'a coma oya jayojja yamime, oyanei pojjeama.—

Majoya ma dejja cojjama'tii cuaya jama poa ba'a: —Eyaneiya iquio ma yahuajo cojjama'tii cuayapoaya.—

10Ohua jama acajje oya huohuiajjacapoa cuaa jama ba'a: —¡De! ¿yajjajje acuae mi jjeya queaja'a jjabaquiani so'o?—

11Ohuaya saja-acapoa cuana jama ba'a: —Ma Jesosa bajjani dejjaa meshi cuichomajje ecuea ecojja ohuaya iñapepacanaje meshi choeya. Majoya eya huoojeacanaje Siloé enanequijjiyasijje ecuea ecojja shacuaa. Jamajjeya eya poquinaje. Ecojja shacuajeahuajo eya jjacojjaja'aquinananaje.—

12Majoya huohuiajjacao'oyapoa cuaa jama ba'a: —¿Achacua comaya dejja nequi?—

Ohuaya saja-acapoa jama ba'a: —Cua'a de, ¿achacua shai maya dejja nequi jjeya?—

Fariseocuaa dejja cojjama' ejjabaqui nequi huohuiajjamajamajacapoa

13-14Ejomishocajji sábado epojjajotii Jesosaa meshichoe acapoa dejja cojjama' jjabaquijji. Jamajojoya aje oya cojjama'tii cuaya dejja peacuaa dojocapoa fariseo dejjacuanaja ebajji. 15Majo aniya fariseocuaa oya huohuiajjacapoa ebajji yajjajje jjeya oya jjabaquinaje. Dejja cojjama' ejjabaqui nequiya saja-acapoa jama ba'a: —Meshichoeya ohuaya ecuea cojja iñapepacanaje. Ecojja ecuea eya shacuajje jjacojjaja'aquinananaje.—

16Beca fariseocuaa oya jama acapoa ba'a: —Ma dejja mi jjabameequijji poanaje Eyacuiñajjija amee pojjeama poanaje ohuaya ejomishocajji sábado epojjajotii miya jjabameequicanajejojoya.—

Pea fariseocuana ca jama poa ba'a: —Oya queamimishi epohuajjemo ojaya jiquio dejjaja ajjima'neinei ajjima'tii pome.—

Jamajjeya fariseo dejjacuana Jesosajo oya jjashahuabaquime pojjeama poa. 17Majoya fariseocuaa dejja cojjama'tii cuaya huohuiajjacao'oyapoa ba'a: —E'e pojja'a ohuaya miya jjacojjaja'ameequicanaje, jamajjeya ¿yajja huohui'yome jjeya miyaya aje ojo?—

Ohuaya saja-acapoa jama ba'a: —Oya Eyacuiñajjija esohuihuohuijji e'ejojonei poani— jamaya poa.

18Jamatii judío dejja etii poanicuana jjashahuabaquisapo-ajjaneitii poa Jesosaa cojjama'tii cuaya dejja jjacojjaja'ameequicanajejo. 19Jamajojoya aje fariseocuaa dejja cojjama'tii cuayaja chii, oja nae pea-ai iyaacapoa. Jama huohuiajjame acapoa oja chii, oja nae pea-ai ba'a: —¿A'a jiquio mique bacuaejjanei? E'ejojonei ecuana huohuicue so'o, ¿a'a e'ejojonei oya cojjama'tii cuayapoa? ¿Yajjajje acuae oya jjeya jjabaquiani?—

20Oja chiiya, oja naeya pea-ai saja-acapoa jama ba'a: —E'e, jiquio oya ecuanaja bacuaejjanei. Yahuajo oya cojjama'tii cuayapoa. 21Jjeyanei ecuanaja oya bajjima yajjajje oya jjabaquiani queaja'a. Ecuanaja bajjima aya shai oya jjacojjaja'ameequicanaje. ¿Apiojji acuae ecuana miquiaaya huohuiajjaña ojo? Oya oe huohuiajjaquisocue. Oya caca etii, esho'i pojjeama. Jjeyanei aje quiana ohuaya huohuicaje.—

22Jamaya huohuicapoa oja chiiya, oja naeya pea-ai oya judío etiicuanajo queamete poajjejojoya. Judío etii poanicuanaja esohui ehuohui poa jama ba'a: “Ojjaña joya Jesosa e'ejojonei Eyacuiñajjija huoojea ojjaña nahue'yojji epojji ajji poani, ecuaaya oya huoojeacuayaje'yo judiocuanaja ejjachichaquijji equi-aijo ani, enobibecameequi'yojji pojjeama poaje'yo” jamaya judío etiicuana poa. 23Jamajojoya aje cojjama' cuayaja chii, oja nae pea-ai jama poa etiicuananijje ba'a: —Oya oe huohuiajjasocue. Oya caca etii, esho'i pojjeama.—

24Majoya judío etiicuaa ma cojjama'tii cuaya iyaacao'oyapoa ehuohuiajjanei'yojji. Jama oya acapoa ba'a: —Eyacuiñajjiya miya bacani, jamajjeya e'ejojonei ecuana queaja'a huohuicue. Ecuanajaya ebanei oya Jesosa queamimishi poani.—

25Majoya cojjama'tii cuaya dejjaa saja-acapoa cuana jama ba'a: —Ecuea oya bajjimanei, a'a oya Jesosa queamimishi, a'a oya mimishiama pojja'a. Ecuea caca ebaneinei jiquio ba'a: Eya yahuajo cojjama'tii cuayapoa, jjeya ca eya jjabaquiani queaja'a.—

26Oya judío etii poanicuaa huohuiajjacao'oyapoa jama ba'a: —¿Yajja acuae mi acanaje Jesosaa? ¿Achajja amajje miya ohuaya jjacojjaja'ameequicanaje?—

27Ohuaya saja-acao'oyapoa cuana ba'a: —Huohuineinaje aje quiana, jamatii miquianaya ecuea esohui shajja-ajjasapo-ajja. ¿Apiojji acuae quiaaya eya huohui pomeemajamajasa-aña oya esohuiya? ¿A'a quiana e'ejojonei Jesosa shajja-ajjajji posapea-aipoani?—

28Majoya aje judío etiicuaa cojjama'tii cuaya dejja niñebacapoa jama ba'a: —Miya ca jja mi ca oe Jesosa shajja-ajjajji poani. Ecuana ca cho, Moisesja tehuecuana jayojja ecuana ba'epoquiani. 29Ecuanaja ebanei pea-ai Eyacuiñajji mimiapoa Moisesnijje. Joya dejja Jesosa bajjani caca ecuanaja bajjimaneinei achejje shai poe oya.—

30Jama huohuime acajje etii poanicuaa dejja cojjama'tii cuaya jama poa ba'a: —¡Jamaya queaquehuaneenee mimiani quiana! Miquianajaya jiquio dejja Jesosa bajjimaneinei poani achejje shai poe oya. Jamatii e'ejojonei ohuaya eya jjacojjaja'ameequicanaje de. 31Esejaya ebanei Eyacuiñajji mimishicuanaja esohui eshajja-ajjajji pojjeama. Ohuaya caca oe joya o bihuiajjinei poanija esohui joya ojo jjashajja-ajjaquijji poanicuanaja esohui shajja-ajjacani ohuaya. 32Yahuajoneinei, jjeyanei pea-ai chama'nei dejja jiquiojo enequi cojjama' poani jjacojjaja'ameequi'yojji epojji. Che oema'neinei. 33Jiquio dejja Eyacuiñajjija huoojea pojjeamajjemo ojaya dejjaja ajjima'neineicuana eajji pojjeamatii pome— jamaya cojjama'tii cuaya dejja poa judío etiicuananijje. 34Jamajjeya mimijajiapoa cuana cojjama'tii cuaya dejjanijje jama ba'a: —Miya ca mi ca oe mimishijjitii cuaya, ¿apiojji acuaeya ecuana jjabahuejjameequisa-aña miyaya? ¡Chojja de!—

Majoya aje oya judioja ejjachichaquijji equi-aijo ani huoojeacuayaca'yapoa cuaa enobibecameequi'yojji pojjeama acapoa.

Joya Eyacuiñajjijo jjashahuabaquiajja poanicuana dejja cojjama' jayojja pea-ai poani

35Jesosaa cojjama'tii cuaya dejja judioja ejjachichaquijji equi-aijo ani huoojeacuayaca'yonaje shajja-ajjacapoa. Jamajjeya Jesosaa oya ba'yomajje jama huohuiajjame acapoa ba'a: —¿A'a miya e'ejojonei jjashahuabaqui'yonaje joya Dejjapojji epojo?—

36Ohuaya jama acapoa ba'a: —Huohuicue mo ae shai oya. Eya e'ejojonei ojo jjashahuabaqui'yosapoani.—

37Jesosaa oya saja-acapoa jama ba'a: —Miyaya oya banaje. Eya ca iña quio jiquio jjeya minijje mimianiya Dejjapojji epo.—

38Majoya aje ohuaya ecuioshajjajo nequimajje Jesosa bihuiacapoa jama ba'a: —Emeshimesenei, eya e'ejojonei jjashahuabaqui'yani mijo.—

39Jesosaa pea esohui acapoa cuana jama ba'a: —Eya jiquio meshiyasijje poeapoa ojjañacuanaja oja mimishi ja'anei huohui'yohua. Joya cojjama' jayojja poanicuana jjacojjaja'ameequije o queajjashahuabaquija'anee epo'yojji ejo. Eyacuiñajjija esohui bapojjima'cuana eyaya esohui bameesahuaje. Joya Eyacuiñajjija esohui chacojjinisho poanicuana ca jjashahuabaquiajja ejo oyatii queapame poani poso jjabaquianijjejojoya, comacuanaya queaquehua cojjama' jayojja poani. Eyacuiñajjija esohui ecuea oya ebameesahuajji pojjeama poaje— jamaya poa Jesosa.

40Fariseocuana beca ma Jesosanijje nequinaje oja esohui shajja-ajjamajje jama poa onijje ba'a: —¿A'a miyaya ecuanajo huohuiaña? ¿A'a ecuana miyaya cojjama' jayojja pea-ai baña?—

41Jesosaa saja-acapoa cuana jama ba'a: —Miquiana cojjama' jayojja poani jjabaquianijjemo, jiquio ecua Eyacuiñajjija esohui bapojjima' jamajjemo, eyaya quiana jjacojjaja'aquimeeme, queajjashahuabaquija'a pomeeme. Miquiana ca Eyacuiñajjija esohui baneineijji poani jayojja jamatii jjashahuabaqui'yoajja. Jamajojoya aje quiana oe Eyacuiñajjija miquianaja mimishicuana ecuijea'yojii pojjeama poaje— jamaya huohuicapoa Jesosaa.

Currently Selected:

JUAN 9: ESE

Highlight

Copy