JUAN 7

Jesosaja echahuamesecuana o shajja-ajjajji pojjeama poa

1Majoya aje quijje Jesosa provincia Galilea meshijo nequi oya poquinequiapoa macuiñajjicuana sohuihuohuiya. Oya ca provincia Judea meshiyasijje poquijjima poa majo judío etii poanicuaa oya sa-ajjacapoajjejojoya o quecuamee'yojji. 2Judiocuanaja fiesta ojee ejjachichaquijji poechipi'yapoa.#7.2 Nota: Ma fiesta judiocuaa equisisicuana iyacapoa eshahuaba'yojji ma yahuajonei se-ejjama' meshijo oja etiiquiana equisisijo anicapoa.* Ocho cahuime huiso fiesta acapoa cuaa ojee. “Equisisi” fiesta bajjani acapoa, español esohuijo bajjani ba'a: “Fiesta de las Casitas.” 3Majoya Jesosaja chahuacuana onijje mimiapoa jama ba'a: —¡A'a jja oe jiquiojo Galilea meshijotii anijji! Judea meshiyasijje oe poquipea-aicue. Cuamaya aje oe mi shajja-ajjajji poanicuaa miyaya dejjaja ajjima'neineicuana aje bapea-aicaje. 4Bacue, dejjacuana ojjañajo jjabameequisapoani oya queaca'a nequiani. Queaja'anee ohuaya esohui huohuicani jjabameequisapoani, quehuajje pojjeama. Jamajjeya miyaya dejjaja ajjima'neineicuana queaja'anee acue ojjañacuanaja ebajji miya queaca'anee poani.—

5Jama huohuimeya oja chahuacuaa Jesosa acapoa Jesosa Eyacuiñajjija huoojea pojjeama poso acapoajjejojoya. 6Jamajjeya Jesosaa oja chahuacuana saja-acapoa jama ba'a: —Eya jjeya apoa pojjeama nequi ojjañacuanajo ejjabameequijji. Miquianaya caca oe jamatii poquiani poquisapomajje. 7Jiquio meshijo nequica dejja mimishicuanaja quiana botiama eajji pojjeama. Eya caca oe botiamaneinei acani cuaa oja mimishi eya queaja'a huohuiañajojoya. 8Jamajjeya poquicue miquiana Jerusalén meshiyasijje ojjaña judiocuananijje fiesta a'yohua. Eya ca jjeya epoquijji pojjeama so'o. Epojja e poquijji poejjima so'o e queaca'a onajo jjabameequijji.—

9Oja chahuacuana huohuijeyomajje Jesosa nequiapoa so'o majotii Galilea meshijotii.

Jesosa quijje poquipea-aiapoa fiesta a'yohua Jerusalén meshiyasijje

10Majoya aje quijje oja chahuacuana poquiajo Jesosa poquipea-aiapoa judiocuaa fiesta acaje'yohuasijje. Jesosa oja chahuacuanaja bajjimatii jecanequiñaquiapoa Jerusalén meshiyasijje. 11Judío etiicuaa Jesosa Jerusalén meshijo nequi onaa fiesta aca'yoquijo sa-ajjacanequiapoa. Jama poa cuana ojo ba'a: —¿Achacua shai comaya dejja nequi?—

12Queahuisocuana ejjachichaqui ani mimimimicapoa Jesosajo. Becacuana jama poa ojo ba'a: —Oya dejja queapamenee.—

Peacuana ca jama poa ojo ba'a: —¡Chojja de! Oya ca queapame pojjeama. Ohuaya ojjaña eseya dasiacani, siajje acani.—

13Ma ejjachichaqui anicacuana esohui queapame ja'anei mimijjima poa Jesosajo judío dejja etiicuana yajjajo.

14Judiocuana cuatro cahuime huiso ojee ejjachichaqui anicajo Jesosa nobiquiapoa Eyacuiñajjija equi-aiquiquibohuasijje esohui huohuiya. 15Majoya aje judío etii poanicuana ohua esohui huohuicaqui shajja-ajjamajje jjabaneineiquiapoa ojo. Jama poa cuana ojo ba'a: —¡De! ¿yajjajo shai joya dejjaja ebaneinei queahuiso esohui? Jiquio eseja esohui etehuehuohuijji poanicuanaja oya sohuihuohuijjimaneinei.—

16Jesosaa saja-acapoa cuana jama ba'a: —Jiquio eya huohuiaña esohui ecueanei pojjeama. Eyacuiñajjija e huoojeajji epoja esohui caca eyaya miquiana huohuiaña. 17Joya dejjaa jiquio queaja'anee Eyacuiñajjija esohui shajja-ajjajji poani dejjaa bacaje eyaya e'ejojonei esohui huohuiaña. Ecueanei esohui pojjeama huohuiaña bacaje. 18Beca dejjacuaa ojayanei ejjashahuabaquijji huohuicani. Jamaya ohuaya acani onajaya oya queapamenee poani ebajji. Pea dejjaa ca esohui huohuicani onajaya oya queapame poani ebajji pojjeama. Ohuaya ca esohui huohuicani o huoojeajji epoja queapamenee o bajji. Coma dejjaaya esohui e'ejojonei huohuicani, siajje pojjeama. Jama pea-aiya eyaya aña. 19¡Bacue! E'ejojonei yahuajonei Moisesya Eyacuiñajjija esohui etehue quiacapoa quiana. Jamatii miquiana ojjaña shajjama'tii jayojja nequipoquiani, jjashajja-ajjaquiajja coma Moisesja tehuecuanajo. ¿Yajjajo shai miquiaaya eya quecua'yosa-aña?—

20Queahuisocuaa oya saja-acapoa ojee aniya jama ba'a: —¡Miya eshahuamase yamijji de! ¿Ache dejjaa shai miya quecua'yosa-acani?—

21Jesosaa jama acapoa cuana ba'a: —Yahuajopishana eyaya oe dejjaja ajjima'neinei anaje ejomishocajji epojjajo bamajje queaquenenee poanaje enijje. 22Bacue jiquio. Yahuajonei Moisesya quiana huohuicapoa miquianaja ebacuaejjasho'ija cuiishasha jehuisejjajjijo ocho cahuime huiso ebacua ecuaya jaajo. (Moisesyanei pojjeama miquiana huohuicoocapoa jamaya eapoquiajjijo. Pea judío etiiquiaa ca jama huohuimeya acoocapoa.) Judío dejjasho'icuana ocho cahuime huiso ecuaya jaa miquiaaya oja cuiishasha jehuisejjameeaña jamatii ejomishocajji sábado epojjajo jaa. 23Miquiaaya Moisesja tehuecuana Eyacuiñajjija quia esohui atiisa-apoquiaña, jamatii miquiaaya dejjasho'ija cuiishasha jehuisejjameeaña ejomishocajji sábado epojjajotiiya. Jamajjeya, ¿apiojji acuae quiana queaquenenee poani enijje eyaya dejja emano jaa jja-ajameequi'yonaje ejomishocajji epojjajotii pea-ai? 24¡A'a eya niñebajji jamatii queaja'anee jjashahuabaquijjima nequiya! Eya baneineimajje miquianajaya ca huohuicajji achajja eya poani, a'a queapame, a'a queapame pojjeama— jama huohuimeya Jesosaa acapoa cuana.

Jesosaa huohuicapoa cuana achejje oya poeapoa

25Majo ani beca Jerusalencuiñajjicuaa jama acapoa ba'a: —Jiquio nequi dejjaya sa-ajjacani cuaa equecuamee'yojji. 26Bacue, ohuaya esohui ja'anei nequiya huohuicani cuana, quehuajje pojjeama, jamatii oya onaja iñameejjima nequiya. ¿A'a acuae judío etii poanicuaa Jesosa Eyacuiñajjija huoojea ojjaña nahue'yojji epojji e'ejojonei bacani pojja'a? 27Ecuanaja ca oya ebanei achejje poe oya. Jiquio Eyacuiñajjija huoojea ojjaña nahue'yojji epojji caca ojjañacuanaja bajjima poaje achejje shai oya poeje— jamaya poa cuana ojo.

28Jama poani cuana shajja-ajjamajje Jesosaa Eyacuiñajjija equi-aiquiquibojo nequiya janobajjimanei huohuicapoa cuana jama ba'a: —¡Jamajjeya miquianajaya eya ebaneijo jjashahuabaquiani! Eba quianaja pea-ai achejje poe eya. Bacue, eya jamatii ecueanei ejjashahuabaquijjijo pojjeama poeapoa, eya ca ehuoojea. Jiquio e huoojeajji epo e'ejojoneitii poani. Miquianajaya oya bajjimaneinei. 29Ecuea oya ebaneinei eya onijjetii nequipoquiapoayajjejojo. Ohuaya caca oe eya jiquio meshiyasijje huoojeacapoa— jamaya huohuicapoa cuana Jesosaa.

30Majoya beca judiocuaa Jesosa eiñajji nisho a-ajjacapoa. Jamatii oya Jesosa napajjima poa cuanaja epojja Jesosa iñajji apoa pojjima'jojoya. 31Pea judiocuana queahuisopishana ca Jesosajo jjashahuabaquica'yapoa. Jama mimime poa cuana ojo ba'a: —¿A'a Eyacuiñajjija huoojeaa ojjaña nahue'yojji epojjiya dejjaja ajjima'neineicuana queahuisoneenee acañame jiquio ecua Jesosaa queahuisopishana jjeya acani jama pojjeama? ¡Chojja de!—

Fariseo dejjacuaa Jesosa eiñajji nisho a-ajjacapoa

32Fariseo dejjacuaa, pea Eyacuiñajjija equi-aijo chacochacopoquiani etii poanicuana pea-aiya judiocuana queahuiso mimimimiani Jesosajo shajja-ajjacapoa. Jamajojoya aje ma etii poanicuaa Eyacuiñajjija equi-ai queyajji poanicuana soldadocuana huoojeacapoa Jesosa iñaa. 33Majoya Jesosaa jama acapoa cuana ba'a: —Eya miquiananijje jiquiojo iyeba'ihuiso nequije so'o. Majoya eya poquije'yo ma e huoojeajji epo aniyasijje. 34Miquiaaya eya sa-ajjaje'yo. Jamatii eya miquianajaya eba'yojjitii pojjeama poaje ma e anije'yohuasijje miquiana epoqui'yojji pojjeama poajeyajjejojo— jamaya Jesosaa acapoa cuana.

35Ohua jama huohuime acajje judío etiicuana ojee jjahuohuiajjaquiapoa jama ba'a: —¿Achacua shai jiquio dejja poquije'yo esejaya oya ba'yojjima yajji? ¿A'a acuae oya poquije'yo ma judiocuana ejjaba'echejjequi ba'eca'yo meshiyasijje? ¿A'a poquije cuamaya judío pojjeamacuana esohui huohuiya? 36¿Yajja poanijje shai oja esohui jama poani ba'a? “Miquiaaya eya sa-ajjaje'yo. Jamatii eya miquianajaya eba'yojjitii pojjeama poaje e anije'yohuasijje miquiana epoqui'yojji pojjeama poajeyajjejojo.” ¿Yajja poanijje shai maya esohui?— jamaya acapoa cuaa.

Jesosa ese ba'etiitiimee'yojji ena jayojja poani

37Oe-ejjenei epojja fiesta eajeyo'yojji queapamenee judiocuaa acapoa, pea epojjacuana fiesta yajji jama pojjeama. Majoya Jesosa nequisohuamajje janobajjimanei majo ejjachichaqui anicacuana huohuicapoa jama ba'a: —Cua queanabataja poani quiana poecue eque ena ishiya. 38Eyacuiñajjija esohui jama poani ba'a: “Ojjaña joya ejo jjashahuabaqui'yanicuana jiquio ecua meshiquipajje enaoshe queahuiso cuayaquinequianitii jama pea-ai oya poaje'yo. Oja eyamiquipajje cuayaquipoquije enaoshe jayojja eba'etiitii'yojji.”—

39Jiquio Jesosaja esohui Edojjoshahuapamejo jama poanijje ba'a: Quijje ojjaña joya Jesosajo ejjashahuabaqui'yocuanaja eyamiyasijje Edojjoshahuapame nequinobiquije. Edojjoshahuapame ca poejjima so'o dejjaque nobiquiya Jesosa Eyahuasijje poqui'yojjima poanajejojoya.

Oya jayojja pea-ai pojjeama jjashahuabaquime poa cuana

40Beca dejja judiocuana Jesosaja esohui shajja-ajjamajje jama poa ba'a: —E'ejojonei jiquio dejja Eyacuiñajjija esohuihuohuijjinei poani.—

41Peacuana ca jama poa ba'a: —Oya e'ejojonei Eyacuiñajjija huoojea ojjaña nahue'yojji epojji.—

Pea dejjacuana ca jama poa ba'a: —¡Chojja de! Eyacuiñajjija huoojea ojjaña nahue'yojji epojji provincia Galilea meshijje pojjeama poeje. 42Eyacuiñajjiya yahuajonei oja esohui tehuemeecapoa jama ba'a: “Ecue huoojea ojjaña nahue'yojji epojji emeshimese Davidja osecua poaje. Oya Belén meshijo cuayaje ma yahuajo oja etiiquiana David cuayapoa meshijotii pea-aiya”— jamaya acapoa cuaa.

43Jamajjeya ojjaña majo anicuana oya jayojja jjashahuabaquime pojjeama pocapoa Jesosajo. Becacuana queapame mimiapoa Jesosajo. Peacuana ca queaquehuatii mimiapoa. 44Beca dejjacuaa Jesosa dojosa-acapoa ejeanobiameejji nisho, jamatii oya iñajjima poa.

Judío dejja etii poanicuana Jesosajo jjashahuabaqui'yojjimatii poa

45Majoya aje Eyacuiñajjija equi-ai queyajji poani soldadocuana poeo'oyapoa fariseo dejja aniyasijje, Eyacuiñajjija equi-aijo chacochacopoquiani etii poani pea-aiyasijje. Jama soldadocuana acajjequiapoa ma o huoojeajji poanajecuaa ba'a: —¿Yajjajo acuae quiaa Jesosa miyenaje ecuanaque?—

46Soldadocuaa saja-acapoa cuana jama ba'a: —¡De, jiquio dejja queapamenee mimiani! ¡Chama'neinei pea dejja oya jayojja mimiani!—

47Jamajjeya fariseo dejjacuaa jama acapoa cuana ba'a: —¡Miquiana pojja'a ojo jjadasiameequi'yonaje pea-ai! 48¿A'a acuae ecuana fariseocuana, peacuana ese huohuijji poani dejja etii poanicuana pea-ai ojo jjashahuabaqui'yonaje so'o? ¡Chojja! 49Jiquio Eyacuiñajjija esohui Moisesja tehuecuana bapojjima'nei dejjacuana ca Jesosajo jjashahuabaqui'yani. Jamajjeya queaneenee capomeeca'yahua macuanaya Eyacuiñajjiya— jamaya judío etiicuaa oja huoojea soldadocuana acapoa.

50-51Majoya aje fariseo Nicodemohua, ma yahuajo mecajje Jesosaque poquinajeya jama huohuime acapoa cuana ba'a: —Moisesja tehue esohui jama poani ba'a: “Dejja jamatii equecuamee'yojji pojjeama. Ebionei ojaya esohui baneineicajji so'o queaja'anee ehuohuijji, a'a oya queamimishinee poani, a'a mimishiama pojja'a. Ebionei oya baneicajji.”—

52Majoya Nicodemo jama tecueame acapoa cuaa ba'a: —¿Apiojji miya mimiani Galileacuiñajji jama o nahuejo? Eyacuiñajjija esohui yahuajonei etehue baneineicue oe. Majoya e'ejojonei miyaya baje chama'neinei esohuihuohuijji poa Galilea meshijo nequi poe dejja— jama tecueameya acapoa cuaa.

53Majoya aje ojjaña majo anicuana poquica'yapoa oja equiyasijje.

Currently Selected:

JUAN 7: ESE

Highlight

Copy