JUAN 17

Jesosa mimiapoa Eyacuiñajjinijje

1Jesosa ma esohui huohuijeyomajje jjabajeasohuaquiapoa eyahuasijje. Oya jama mimime poa ba'a: —Ecue Chii, jjeya e mano'yojji epojja apoa. Eya queaca'aneetii queasajajanee nequi ojjañacuanaja ebajji acue. Miya queaca'aneetii queasajajanee nequi ojjañacuaa bapea-aicaje. Eya queaca'aneetii poani bamajje miya pea-ai bihuiacaje queahuisocuaa. 2Eya mique Bacuaejja ojjañacuana huoojeapoquiajji epojji Emeshimesenei epojji pea-ai miyaya nequimeeapoa. Jamajjeya ojjaña mique quiacuana joya ecuea epeejji poanicuanaya eyaya ba'etiitiimeeje'yo minijje. 3Ojjaña joya minijje ba'etiitiije'yocuana jama jjashahuabaquime poani ba'a: Miya Eyacuiñajji oenei e'ejojonei poani. Eya Jesosa pea-ai mique huoojea e'ejojonei poanijo jjashahuabapea-aiqui'yani. 4Eyaya jiquio meshijo ba'ecacuana bameenaje miya queaca'aneetii queasajajanee nequi. Ojjaña ma miya e huohuinaje huisotii ecuea echacojji eyaya ajeyo'yonaje. 5Yahuajoneinei eyatahuatahua, meshi pea-ai panajjimahuajo eya queaca'aneetii queasajajanee enequipea-aiapoa minijjetii. Jamajjeya jjeyanei mi nequiyasijje poqui'yajo eya queaca'aneetii nequimeeo'oyacue ma ecua yahuajo eya minijje queaca'aneetii queasajajanee nequiapoa jama pea-aiya eya pomeeo'oyacue.—

Jesosa mimiapoa Eyacuiñajjinijje o shajja-ajjajji poanicuanajo

6Jesosa oja Chiinijje mimitiiapoa jama ba'a: —Miyaya babacanaje cuana jiquio meshijo dejja mimishicuananijje ojee ba'e ecuea epo'yojji. Eyaya macuanaya bameesahuanaje achajja miya nequi queaja'a mi bajji. Ma dejjacuanaya miquea ebionei poanaje. Majoya miyaya eya quia'yonaje ecue jaahuanapoquia'yojji. Jamajjeya macuanaya miquea esohuijo jjashajja-ajjaquinaje. 7Jjeya queaja'a bacani cuaa ojjaña jiquio ecuea po'yanicuana mique quia poanaje. 8Eyaya miquea esohui ma miya e anaje huisotii esohui huohuipoquianaje cuana. Majoya jjashahuabaqui'yonaje cuana ecue esohui shajja-ajjamajje. Queaja'a bacanaje cuaa eya minijjetii ani poe, eya mique huoojea poa jiquio meshiyasijje bacanaje cuaa.

9—Jamajjeya eya minijje mimipoquiani macuanajo. Peacuana Eyacuiñajjima' jayojja jiquio meshijo ba'ecacuanajo ca iña minijje emimijji pojjeama. Eya mimiani minijje jiquio mique quia e shajja-ajjajji poanicuanajonei macuanaya miquea pea-ai poanijojoya. 10Ojjañacuana jiquio ecuea po'yanicuana miqueatii pea-aiya. Jamajjeya ojjaña jiquio miquea poani ecuea pea-aiya. Eya queaca'aneetii queasajajanee nequi bacaje jiquio meshijo ba'ecacuaa e shajja-ajjajji poanicuana queaja'a poani bamajje.

11—Eya jiquio meshijo enequipoquijjitii pojjeama poaje. Mique quiacuana ca jiquio meshijotii nequipoquije jamatii e mi nequiyasijje poqui'yajo. Ecue Chii miyaya oenei queapameneetii mimishima'nei queaca'aneetii poaniya jaahuanacue jiquio mique quiacuana. Oya jayojja pea-ai jjashahuabaquime eba'epoquijji pomeesahuacue macuanaya. Jiquio ecua eseya oya jayojja pea-ai jjashahuabaquime poanitii jama epopea-aijjiya oya pomeecue. Miya queaca'ajjejojoya oya jaahuanacue. 12Eyaya jiquio meshijo onijje nequiya jaahuananeineipoquianaje cuana miyaya eya queaca'anee pomeenajeyajjejojoya. Eyaya edosiquiana e shajja-ajjajji poanicuana dojomee'yojjimatii apoquianaje Cuaqui-aiyasijje. Oenei che dojoquehuaca'yonaje quea-ehueshatii enequipoqui'yojji. Ma yahuajonei miquea esohuihuohuijjiya tehuecapoa, oe poquije'yo Cuaqui-aiyasijje, ma dejjaya oenei dojoquehuacaje'yo quea-ehueshatii enequi'yojji.

13—Jjeya eya mi nequiyasijje poquije'yo. Jamajjeya eya jiquio meshijo nequi poqui'yojjimahua e shajja-ajjajji poanicuanajo mimiani minijje o queabihuinee nequipoquijjijo. Jiquio ecua eya queabihuinee nequipoquiani jama pea-aiya e shajja-ajjajji poanicuana queabihuinee nequipoquijjijo eya mimiani minijje. 14Eyaya mique quiacuana miquea esohui queaja'a bameesahuapoquianaje. Jiquio meshijo onijje nequica dejja mimishicuaa e shajja-ajjajji poanicuana botiamanei acoocanaje oya dejjamimishicuana jayojja pea-ai pojjeama poanijojoya. Eya o jayojja pea-ai pojjeama poani. 15Ecuea miya jama ehuohuiajjajji pojjeama poaje e shajja-ajjajji poanicuana jjeya miquea edojopea-ai'yojji Eyahuasijje. Eya ca mimiani minijje e shajja-ajjajji poanicuana jiquio meshijotii nequi so'o edosiquianajo mique o nahuepoquiajjijo. 16E shajja-ajjajji poanicuana eya jiquio meshijo nequicacuana jama pea-ai epojjijo jjashahuabaquiajja. Eya pea-ai oya jama pojjeama poani. 17Queapamenee nequipoquimeecue cuana mijo echacochacojji. Miquea esohui oja sapajo huanameecue. Miquea esohui e'ejojoneitii poani. 18Miyaya eya jiquio meshiyasijje huoojeapoa mimishicuananijje nequiya so'o. Ma ecua eya miyaya huoojeapoa jiquio meshiyasijje nequiya jama pea-aiya eyaya e shajja-ajjajji poanicuana huoojeapea-aije jiquio meshijo ba'ecacuana sohuihuohuiya. 19Eya minijje queapameneetii nequipoquiani e shajja-ajjajji poanicuana asahuapoquiajji epojji miquea esohui e'ejojoneijo. Jamaya eya poani ojaya miquea echacojji queapame eapoquiajjijo.—

Jesosa mimiapoa ojjaña oja nahue'yo poajecuanajo

20Jesosa oja Chiinijje mimitiiapoa jama ba'a: —Eya jiquio e shajja-ajjajji poanicuanajonei pojjeama mimiani minijje. Cua quijje ejo jjashahuabapea-aiquicaje'yocuanajo eya mimipea-aiani minijje. Jiquio e shajja-ajjajji poanicuaa esohui huohuicajje jjashahuabaquicaje'yocuanajo eya mimiani. 21Ecue Chii, eya minijje mimiani ojjaña ecuea nahue'yocuanajo ojee oya jayojja pea-ai jjashahuabaquime epojjijo jiquio ecua eseya oya jayojja pea-ai jjashahuabaquime poani jama pea-ai epojjijo. O esenijje ejjapeequipoquijjitiijo pea-ai eya mimiani minijje. Ecue nahue'yocuana esenijje queapame jjapeequipoquianitii bamajje dejjamimishicuana queahuiso ejo mique huoojea poanijo jjashahuabaquicaje'yo. 22Eyaya ecue nahue'yocuana queaca'a ba'emeenaje jiquio ecua miyaya eya queaca'anee pomeeañatii jama pea-aiya. Jamaya eyaya pomeenaje cuana jiquio ecua eseya oenei poani jayojja jama pea-ai o pojjiya. 23Eya ecue nahue'yocuananijje jjapeequipoquianitii jiquio ecua miya enijje jjapeequipoquianitii jama pea-aiya. Jamaya eya poani ecue nahue'yocuananijje o oya jayojja pea-ai jjashahuabaquimetii epojjijo. O jama jjashahuabaquime poajo jiquio meshijo ba'ecacuaa queaja'a bacaje eya e'ejojonei mique huoojea jiquio meshiyasijje. Bapea-aicaje cuaa miyaya ecuea epeejjicuana queajeaneetii apoquiaña jiquio ecua miyaya eya queajeaneetii apoquiaña jamaya.

24—Ecue Chii, eyaya jiquio mique quiacuana enijjetii Eyajo nequimee'yosa-aña. Enijje Eyajo nequi'yomajje eya queaca'aneetii queasajajanee nequianitii bacaje mique quiacuaa. Ojjaña aquianacuana meshi pea-ai chamahuajo miyaya eya queajeaneetii apoquiapoa. Jamajjeya eya queaca'aneetii queasajajanee enequipoquijjitii miyaya pomeeapoa yahuajonei. 25Ecue Chii, miya queapameneetii nequipoquiani. Jamatii jiquio meshijo ba'eca mimishicuanaja miya bajjimaneitii poani. Ecuea ca mi ca oe ebanei. Jiquio e shajja-ajjajji poanicuaa caca oe eya queaja'a bacanaje mique huoojea e'enei poani. 26Eyaya e shajja-ajjajji poanicuana queaja'a bameepoquianaje miya Eyacuiñajji queapameneetii poani. Jamaya eyaya apoquiajetii cuana e shajja-ajjajji poanicuanaja peacuana queajeanee eapoquiajjijo. Jiquio ecua miyaya eya queajeaneetii apoquiaña jama pea-ai o epojjijo eyaya oya queajeanee aña. E shajja-ajjajji poanicuana jama poajo eya onijjetiiya jjapeequipoquije— jama mimimeya Jesosa poa oja Chiinijje.

Currently Selected:

JUAN 17: ESE

Highlight

Copy