JUAN 16

1Jesosaa o shajja-ajjajji poanicuana jama huohuime apea-aicapoa ba'a: —Eyaya quiana jiquio esohui huohuiaña quijje miquiana onaa queacamaja pomeecajje ejotii ejjashahuabapajeaqui'yo poanijje. 2Judiocuanaja equi-ai ejjachichaquijjijo ani quiana jeacuayacaje'yo cuaa miquiananijje ani sapo-ajjajjejojoya. Miquiana quecua'yojji poaje dejjacuana Eyacuiñajjiya oya queapame bacani poso jjabaquije. 3Jamaya quiana acaje cuaa eya, ecue Chii pea-ai ojaya bajjimanei poaniyajjejojoya. 4Miquiana onaja jama ajjimahuajo jiquio esohui eyaya huohuiaña miquianajaya queaja'a eshahuaba'yojji ma ecua eyaya huohuinaje jama pea-aiya quiana acaje cuaa quijje. Eya ebionei miquiananijje nequipoquinaje, jamajjeya jiquio esohui yahuajo ecuea quiana huohuijjima poanaje— jamaya Jesosaa acapoa cuana.

Edojjoshahuapameya jama chacome acapoquije

5Jesosaa o shajja-ajjajji poanicuana jama huohuime apea-aicapoa ba'a: —Jjeya eya poquije'yo e huoojeajji epo aniyasijje. Miquianajaya eya huohuiajjajjima poanaje achacua eya poquije'yo. 6Eya jama huohuime ajje quiana eya poquije'yo queayenonee poanaje quiana. 7Eyaya e'ejojonei esohui aña. E poqui'yajo miquianaya queapamenee nequije jiquio ecua jjeya e enequijo queapamepishana nequi jama pojjeama. Jamajjeya eya poquije'yo. E mipoqui'yajo jiquio miquianaya ba'emeesahuapoquiajji epojji Edojjoshahuapame epoejjitii pojjeama poaje. Eyaya poqui'yomajje oya huoojeaoqueaje miquianaque. 8Ohuaya poemajje ojjaña joya Eyacuiñajjima' jayojja ba'ecacuana jjabameequicaje oya queamimishi poani. Ohuaya ojjañacuana eya Jesosa queapamenee mimishima'neitii poani bameecaje pea-ai. Ohuaya bameecaje ojjaña joya shajjama'tii jayojja poanicuana Cuaqui-aiyasijje poquicaje'yo mano'yomajje. 9Edojjoshahuapameya ojjañacuana bameepea-aicaje eya queapameneetii, mimishima'neitii nequipoquiani. Majoya jjabaquicaje cuana oyaneitii queamimishi poani ejo jjashahuabaquiajjanei poanajejjejojoya. 10Eya ecue Chii aniyasijje poquije'yo bamajje eya queapameneetii nequinaje bacaje cuaa mimishima'neitii. Majoya eya ebabeca'yojji pojjeamatii poaje cuanaja. 11Edojjoshahuapameya bameepea-aicaje ojjaña joya queamimishitii poanajecuana Cuaqui-aiyasijje poquicaje'yo. Jiquio ecua edosiquiana jiquio meshijo ba'ecacuana queamimishi pomeejjitii poani, quijje Cuaqui-aiyasijje poquije'yo jama pea-aiya oya poaje.

12—Yani ecuea esohui queahuiso miquiana huohuijji. Jjeya quiana ca ecuea ehuohuijji pojjeama poaje miquianajaya queacamaja ebajeyojji. 13Quijje Edojjoshahuapame, esohui e'ejojoneitii yejji poani, poeje. Ohuaya quiana queaja'anee huohuicapoquije ecuea esohui miquianajaya queaja'a ebajji. Ohuaya ojayanei esohui pojjeama huohuicaje. Ojjaña cua Eyacuiñajjiya oya acani esohui huisotiiya ohuaya quiana huohuicapoquije. Ma quijje Eyacuiñajjiya acaje maya huohuipea-aicaje ohuaya miquianajaya queaja'a ebajji. 14Ohuaya Edojjoshahuapameya quiana bameesahuacaje acheca'aneetii achepameneetii pea-ai eya nequipoquiani. Jamajjeya ecue esohui ma eya o anaje esohui huisotiiya ohuaya huohuipea-aicaje oya esohuiya miquianajaya queaja'a ebajji. 15Ojjaña jiquio ecue Chiija poani esohui ecuea pea-aiya poani. Jamajjeya eyaya quiana huohuineinaje Edojjoshahuapameya ecuea esohuinei pea-aiya huohuicaje miquianajaya queaja'a ebajji.

16—Quijjepishana eya miquianaja ecojjaja ebatiinequijji pojjeama poaje so'o. Majoya quijje miquiaaya eya baje o'oya ecojjaa.—

Jesosa shajja-ajjajji poanicuana queayeno ani queabihui poaje'yo

17Ohua jama huohuime acajje beca Jesosa shajja-ajjajji poanicuana ojee mimimimiapoa jama ba'a: —De, ¿yajja poanijje shai oya jama poani esenijje? Eseya acanaje quijjepishana pa esejaya oya ebajji pojjeama so'o poaje. Majoya aje pa seya oya baje o'oya. Oya oja Chii aniyasijje poquije'yo, jamajjeya esejaya oya ebanequijjitii pojjeama poaje eseja ecojjaa. 18¿Yajja poanijje shai jiquio Jesosa poani ba'a: “quijjepishana”? Esejaya queaquehua de, ¿ache cahuihuisojo shai oya jama poani?—

19Jesosaa o shajja-ajjajji poanicuana bacapoa oya huohuiajjasa-acani cuaa ma esohuijoya. Jamajjeya Jesosaa jama acapoa cuana ba'a: —Eyaya quiana huohuinaje quijjepishana miquianajaya eya ebanequitiijji pojjeama poaje so'o. Majoya eya miquiaaya baje o'oya. ¿A'a quianaja jiquio esohui queaquehua poani ejo e ehuohuiajjajji? 20E'ejojonei eyaya quiana huohuiaña quijje miquianaya queayenonee panequije ejo. Jiquio meshijo ba'eca mimishicuana ca queabihuinee poaje. Majoya quijje miquianaya queayenonee nequi queabihuinee poaje'yo. 21Bacue, eponacuana bacuaneemajje queayeno jjashahuabaquiani ebacua queaneenee cuayajejo. Majoya oja bacua cuayajo jjashahuabapajeacuajiqui'yani oya queaneenee poanaje. Oja bacuaejja queapame cuayanaje bamajje oya queabihui po'yani. 22Jiquio ecua epona ebionei bacuaneemajje queayeno poani majoya ebacua cuayajo queabihui po'yani, jama pea-aiya quiana poaje'yo. Jjeya miquianaya queayenonee poaje so'o. Majoya e bao'oyamajje ca quiana ca oe queabihuinee ponanaje'yo ejo. Queabihuitii quiana nequipoquije'yo. Chama' pea poaje miquiana queayenonee pomee'yojji epojji.

23—Majoya quijje miquianajaya ehuohuiajjajji pojjeamatii poaje cua miquiaaya asa-añajo ecuea equiajji. Eyacuiñajjiya quiacaje cua miquiaaya saña huisotii ecuea bajjanijo mimiajo. 24Yahuajo, jjeyanei pea-ai miquianaya ecuea bajjanijo cua miquiaaya sañajo mimijjima poanitii Eyacuiñajjinijje. Jamajjeya miquianaya jjeya mimicue onijje. Majoya ohuaya quiacaje ma ecua miquiana miminaje onijje jamaya. Queabihui quiana poaje onijje mimimajje.—

Jesosa Quito queaca'anee nequianitii

25Jesosaa o shajja-ajjajji poanicuana jama huohuime apea-aicapoa ba'a: —Eyaya quiana huohuinequinaje jiquio pea esohuicuana ebameesahuajji Eyacuiñajjija esohui miquianajaya queaja'a ebajji. Quijje ca eyaya quiana jama huohuime apajeaje'yo. Eyaya queaja'anee esohui quiana huohuije ecue Chiijo. 26Majoya quijje ma epojja poeyajo miquiaaya ecue Chii huohuiajjaje cua miquiaaya sa-aña huisotiijo ecuea bajjanijo. Eyaya ecue Chii huohuiajjapajeaje miquianajo miquiaayanei oya huohuiajjajejojoya. 27Ecue Chiiya quiana queajeaneetii acapoquiani miquiaaya eya queajeanee pea-ai añajojoya. E oja huoojea poanijo miquianaya jjashahuabaqui'yonajejojoya Eyacuiñajjiya quiana queajeaneetii acapoquiani. 28Eya ebionei ecue Chiinijje nequiapoa. Majoya jiquio meshiyasijje poeapoa. Jjeya eyaya jiquio meshi jiñaje'yo ecue Chii aniyasijje huacuaya nequi'yohua.—

29Majoya aje Jesosa shajja-ajjajji poanicuana onijje mimiapoa jama ba'a: —Jjeya miyaya queaja'anee ecuana huohuiaña ma ecua yahuajo pea esohui ecuana ebameesahuajjijo huohuinaje jama pojjeama. 30Ecuaaya miya baña ojjañacuana miquea ebajeyojeyo ehuohuijji. Jamajjeya ecuanajaya miya ehuohuiajjapoquiajjitii pojjeama poaje'yo. Ecuana mijotii jjashahuabaqui'yani miya Eyacuiñajjija huoojea poani ojjaña miquea ebajeyojeyojojoya.—

31O shajja-ajjajji poanicuana jama poajo Jesosaa oya huohuiajjacapoa jama ba'a: —¿A'a quiana jjeya ejotii jjashahuabaqui'yani? 32Ma yahuajo e jama poanaje epojja poeje jjeya, apoa. Quijjepishana miquianaya jjajeatepequije miquianajaya meshineiyasijje e jeana'yojji eenei. Eya ca iña eenei pojjeama nequije ecue Chii enijjetii nequijojoya. 33Ma miquiana quijje acaje cuaa eyaya jjeya huohuiaña miquianaya queaquijijjijaji epojjijo. Miquianaya enijjetii jjapeequimajje meteama poaje. Jiquio meshijo nequica dejja mimishicuaa miquiana napacaje, queacamajanee acapoquije. Jamatii ohua acaje jjabaquimajje, ¡a'a queamete pojji ojo! ¡A'a quiana oe ojo queayeno jjapomeequijji! Eyaya edosiquiana, ojjaña joya queamimishitii poanicuana pea-ai jeabichajea'yonaje.—

Currently Selected:

JUAN 16: ESE

Highlight

Copy