JUAN 15

Jesosa jjono ebana jayojja poani

1Jesosaa o shajja-ajjajji poanicuana huohuicapoquiapoatii jama ba'a: —Eya jjono emaijje epohua jayojja poani. Ecue Chii ca jjono banajji, o cuiñajji pea-ai jayojja poani. 2Ecue aasisicuana jjajja-ajjatii poajo ecue Chiiya jehuisejjacani jjajja-ajjajojoya. Pea aacuanajje ca jjajjani. Jamajjeya ecue Chiiya beca oja eñacuana tetojeacani queajjajjahuisonee epojji.#15.2 Nota: Jiquio ecua ejjonomeseya beca oja eña tetojeacani queajjajjahuiso epojji jama pea-aiya Eyacuiñajjiya oja epeejjicuana acani queapame eba'epoquijji, queajjajjahuiso jama.* 3Ecue esohui eya huohuiajje miquiana queaboejea po'yani etetojea jayojja poani. 4Jamajjeya enijjetii jjapeeneiquipoquicue quiana jiquio ecua eya miquiananijje jjapeeneiquipoquiani jamaya. Bacue jiquio jjono aasisicuana. Oya jjonoaijo nequi ejajasejja jaa oyaneitii jjajja-ajja. Oya jayojja pea-aiya miquianaya poaje. Eyacuiñajjinijje jjapeequipajea'yomajje jiquio ecua jjono aasisi ejajasejja jaa jjajja-ajja poani jama pea-aiya poaje quiana.

5—Eya jjono emaijje bana jayojja poani. Miquianaya ca jjono aasisi epohua jayojja poani. Jamajjeya ojjaña joya enijjetii jjapeeneiquipoquianicuana jiquio ecua ebana queajjajjahuiso poani jama pea-aiya oya poaje e onijjetii nequipoquianijojoya. Jamajjeya enijje jjapeepajeaqui'yomajje quiana queapametii eba'epoquijji pojjeama poaje. Jjajjama' jayojjatii poaje. 6Cua enijje jjapeepajeaqui'yonajecuana jiquio ecua jjono aasisi jjajja-ajja jeajeacani jama jayojja poaje cuana. Jiquio ecua jjono aasisi ejehuisejja nojinoji'yajo chichacani cuaa edahuajeajji jama pea-aiya acaje cuana.

7—Jamajjeya quiana enijjetii jjapeequianijo, ecuea esohuijotii jjashahuabaquipoquianijo pea-ai ojjaña cua miquiaaya huohuiajjaña huisotii eyaya aje. 8Jjonoja aasisi queajjajjahuiso bamajje queabihuinee poani cuana. Jamajjeya peacuaa miquianaya queaja'a jjapeequipoquiani enijjetii bamajje ecue Chii bihuiapea-aicapoquije cuaa. E shajja-ajjajjinei poani quiana bapea-aicaje cuaa. 9Eyaya quiana queajeaneetii apoquiaña jiquio ecua eya ecue Chiiya queajeaneetii acapoquiani jama pea-aiya. Jamajjeya enijjetii jjapeequipoquicue miquiana ejo ejjabaquipoquijji ecuea quiana queajeaneetii poani. 10Ecuea esohuicuanajo jjashajja-ajjaquitiipoquimajje queaja'a quiana jjabaquipoquije ejo ecuea quiana queajeaneetii poani. Ecuea ebatii ecue Chiiya eya queajeaneetii acapoquiani eya oja esohuijo jjashajja-ajjaquipoquianijojoya. Jiquio ecua eya jjashajja-ajjaquipoquianitii ecue Chiija esohuijo jama pea-aiya quiana oe pocue ecuea esohuijo.

11—Eyaya quiana jama huohuimeya aña miquiana queabihuinee epojjijo jiquio ecua eya queabihuinee poani jama pea-ai miquiana epojjiya. Majoya achebihuinee ba'epoquije quiana ejo. 12Ecuea esohui queaja'a eba'epoquijji jama poani ba'a: Miquiaaya pea minijje ecue epeejjicuana queajeanee apoquiacue jiquio ecua eyaya quiana queajeaneetii aña jama pea-aiya oya acue. 13Dejja oja epeejji queajeaneenee amajje o nahuejo jjaquiaquije emano'yojji oja jjocojo. 14Miquianaya ecuea esohuijo jjashajja-ajjaquipoquimajje ecuea epeejjinei poani. 15Bacue, joya peajo chacochacoanicuanaja bajjimanei o chacomeejji poanija ejjashahuabaquijji. Jamajjeya eyaya miquiana ejo echacochacojji poani apajeaje'yo. Jjeya ca eyaya quiana aña ecuea epeejjinei poani eyaya quiana ma ecue Chiiya huohuicanaje huisotii esohui huohuijeyonajejojoya. 16Eya ca iña miquianajaya babaca pojjeama nequi. Miquianaya caca oe ecue babaca poani. Jamajjeya eyaya quiana huohuiaña miquiana queaja'a ba'epoquijjijo queajjajjahuiso jayojja epojjijo. Jamatii eba'ejeapoquijjijo pojjeama eyaya quiana huohuiaña. Majoya miquianaya queaja'a ba'epoquiani bamajje cua miquiaaya huohuiajjaje huisotii ecue Chiiya acaje ecue bajjanijo mimiajo. 17Jamajjeya jiquio esohui queaja'a eba'epoquijji eyaya quiana huohuiaña ba'a: Miquiaaya pea minijje ecuea epeejjicuana queajeanee apoquiacue.— Jamaya Jesosaa huohuicanequiapoa cuana.

Dejja mimishicuaa Jesosa, o shajja-ajjajji poanicuana pea-ai botiamanei acapoquiapoa

18Jesosaa huohuicanequiapoatii cuana jama ba'a: —Jiquio meshijotii nequica ema' jayojja poanicuaa miquiana botiamanei acajo miquiaaya baje ebionei eya botiamanei acoocanaje cuaa. 19Miquianaya jiquio Eyacuiñajjima' jayojja poanicuana jama jayojja pea-ai poanijojjemo macuanajaya quiana queajea pea-ai pome miquianaya o jayojja pea-ai poanijjemo. Eyaya ca quiana ca jiquio meshijo onijje nequi babacanaje o jayojja pea-ai epojji pojjeama. Jamajojoya aje quiana macuaaya botiamanei acani jjeya miquianaya jiquio meshijotii nequi o jayojja pea-ai jama pojjeama poanijojoya. 20Shahuabacue jiquio esohui eya miquiana huohuinaje. Joya peajo chacochacoani dejja o chacomeejji etii poani jama pojjeama. Oya queaca'apishana, o chacomeejji etii poani dejja ca queaca'anee. Eya napacanaje dejja mimishicuaa queanee epojji. Jamajjeya miquianaya napapea-aicaje cuaa. Ecuea esohui iyehuisocuaa shajja-ajjacanaje, jamajjeya miquianajaya esohui iyehuisocuaa shajja-ajjapea-aicaje. 21Jamaya quiana dejjamimishicuaa acapoquije ejo ojaya e huoojeajji epo bajjimaneineijojoya.

22—E poejjima poajojjemo, eya mimishicuananijje mimijjima poanajejojjemo pea-ai oya jjabaquijjimatii poquiae queamimishi poani. Jjeya chama' ojaya esohui o queamimishi poani bajjima nisho yajji. 23Jamajjeya ojjaña joya e cajaa ajji poanicuaa ecue Chii pea-ai cajaa acani. 24Jiquio ecuea dejjaja ajjima'neineicuana ajjima'jojjemo dejjamimishicuana queamimishi poani jjabaquijjimatii pea-ai poquiae. Eyaya dejjaja ajjima'neineicuana aje bacanaje cuaa oja ecojjaa. Jamatiijojoya eya cajaa acani cuaa, ecue Chii pea-ai. 25Eya queatai acapoquiani cuaa ma yahuajonei Eyacuiñajjija esohui ejo jama tehueme acapoa ba'a: “Eya cajaanei acanaje cuaa jamatiiya eya ojjañacuananijje queamimishi pojjima'tii nequi.”

26—Miquiana ba'emeesahuapoquiajji epojji Eyacuiñajjija Edojjoshahuapame poeje. Eyaya oya Eyacuiñajjinijje ani huoojeaoqueaje miquianaque. Ohuaya esohui e'ejojoneitii yecaje, jamajjeya Edojjoshahuapameya esohui queaja'a acaje ejo. 27Miquiaaya pea-ai queaja'a esohui huohuipoquiaje cuana ejo ebionei queaba'ihuisonee enijje nequipoquinajeyajjejojoya.— Jamaya Jesosaa huohuicanequiapoa cuana.

Currently Selected:

JUAN 15: ESE

Highlight

Copy