JUAN 14

Jesosa ejeojji jayojja poani e'ejojonei Eyahuasijje epoqui'yojji

1Majoya aje Jesosa oja babaca dejjacuananijje mimiapoa jama ba'a: —¡A'a quiana oe queayenotii pojji! Eyacuiñajjijo jjashahuabaqui'yocue. Ejo pea-ai jjashahuabaqui'yocue. 2Ecue Chii ani Eyahuasijje queahuisoneenee equicuana eba'epoqui'yojji yani. Queahuisonee equicuana eba'epoqui'yojji cuamaya chamajojjemo ecuea quiana ehuohuijji pojjeamatii pome. Eya poquije'yo miquiana anijji eba'epoqui'yojji apoa aa. 3Jamajjeya eya poquije'yo miquiana anijji eba'epoqui'yojji apoa ajeyohua. Majoya quijje eya poeje o'oya miquiana dojo'yohua enijjetii. Jamajjeya miquiana ma e anije'yo Eyahuasijje anipea-aije'yo ojee enijjetii. 4Miquianajaya eba ejeojji ma e anije'yohuasijje epoquipea-ai'yojji.—

5Majoya aje Tomasya Jesosa jama acapoa ba'a: —Emeshimesenei, ecuanajaya bajjimanei achacua shai miya poquije'yo. Jamajjeya, ¿ache ejeojjijje shai poquica'yojji mi anije'yohuasijje?—

6Jesosaa oya saja-acapoa jama ba'a: —Tomás, jiquia aje eya ejeojji jayojjaya poani. Eya e'ejojonei esohui poanitii pea-ai. Eya ojjañacuana eshe ba'emeepoquiajji poani. Ejonei jjashahuabaqui'yomajje quiana poquije'yo ecue Chii aniyasijje. 7Miquiaaya eya bapoquiaña queaja'a, jamajojoya aje quiaa ecue Chii bapea-aiaña queaja'a. Jamajjeya miquianajaya oya eba pea-ai poani jjeyanei eya miquiaa bapoquiañajojoya.—

8Majoya aje Felipe jama poa ba'a: —Emeshimesenei, Eyacuiñajji Echii-ai jjeya ecuanaja ecojjaa bameecue. Mahuiso saya ecuana poani.—

9Jesosaa oya saja-acapoa jama ba'a: —¡De! Felipe queaba'ihuiso eya ojee miquiananijje nequipoquiani. ¿Yajjajo acuae miquea eya bajjimatii poani? Cua e bajji poanicuaa oja ecojjaa ecue Chii bapea-aicani queaja'a. Jamajjeya, ¿yajjajo eya huohuiajjaña ecuea miquiana ecue Chii ebameejjijo? 10¿A'a miya jjashahuabaquijjima poani ejo eya ecue Chiinijje nequipoquiani, ecue Chii enijje nequipoquiani pea-ai? Jiquio eyaya miquiana huohuiaña ecueanei esohui pojjeama. Ecue Chiiya enijjetii nequiya oja echacojjicuana eya ameesahuacani, eyayaneitii pojjeama. 11Ecuea esohuijo jiquio eya ecue Chii jayojja pea-ai poani esohuijo jjashahuabaqui'yocue quiana. Maya queaquehua poani jjabaquimajje dejjaja ajjima'neineicuana ma eya anaje bacue. Majoya queaja'a jjashahuabaqui'yocue quiana ejo eya Eyacuiñajji ecue Chii jayojjaya pea-ai poani. 12Eyaya quiana e'ejojonei huohuiaña. Joya ejo jjashahuabaqui'yonajecuana jiquio ecua eyaya aña oya echacojji pea-aiya ohuaya acaje. Pea echacojjicuana pea-ai queahuisonee acapoquije macuaaya. Queapamenee acapoquije ma echacojjiya ma ecua eyaya anaje jama pojjeama e epoqui'yo ecue Chii aniyasijje poajejojoya. 13Jamajjeya cua miquiaaya huohuiajjaña ecuea bajjanijo mimiajo eyaya miquianaja mimi jayojjaya aje. Majoya ejo, Ebacuaejjajo ojjañacuaa Eyacuiñajji queaca'aneetii queasajajanee nequi bacaje. Oya bihuiacapoquije cuaa. 14Jamajjeya eyaya aje cua miquiaaya huohuiajjaje huisotii ecuea bajjanijo enijje mimiajo.—

Jesosaa Edojjoshahuapame oja poejjijo huohuicapoa cuana

15Jesosaa oja babaca dejjacuana huohuicao'oyapoa jama ba'a: —Miquianajaya eya queajea poani jjabaquimajje ecuea esohuicuanajo jjashajja-ajjapea-aiquije. 16Eya huohuiajje ecue Chiiya miquiana queaca'a ba'emeesahuapoquiajji huoojeacaje miquiananijje enequipoqui'yojji. Oya Eyacuiñajjija Edojjoshahuapame esohui e'ejojoneitii huohuipoquiajji poani. 17Ojjaña joya ema' jayojjatii ba'ecacuana ca Edojjoshahuapame ecuea equiajji pojjeama poaje ojaya bajjimajojoya, ojo jjashahuabaquiajjajojoya pea-ai. Miquianajaya ca oya eba miquiananijje nequijojoya. Edojjoshahuapame miquiananijjetii nequipoquije'yo miquianaja eyamidojjojotii.

18—Jamajjeya ecuea quiana chiima' jayojja ejea-ajjana'yojjitii pojjeama poaje. Majoya quijje eya poeje o'oya miquiananijje nequi o'oyaa. 19Eya jiquio ema' jayojjatii poanicuanaja ebabeca'yojji pojjeamatii poaje. Miquiaaya caca oe eya baje o'oya ecojjaa. Eya shequije'yo. Jamajojoya aje eyaya quiana shequimeepea-aije'yo quijje. 20Ma pojjajotiiya e jama po'yajo miquiaaya queaja'anee baje eya ecue Chii pea-ai oenei poani. Miquianaya jjabaquije eya miquiananijjetii nequipoqui'yani, miquianaya enijjetii nequipoqui'yani jjabaquije pea-ai. 21Joya ecuea esohuicuana ehuohuijo jjashajja-ajjaquijji poanicuaa comaaya eya queajeanee acani. Joya e queajea ajji poanicuana comacuanaya ecue Chiiya queajeanee acapoquije pea-ai. Eyaya pea-ai oya queajeanee apoquiaje. Joya e queajea ajji poanicuanajo eya queaca'anee poani jjabameequije— jamaya Jesosaa oja babaca dejjacuana huohuicapoa.

22Majoya aje pea Judas bajjani dejjaa, Iscariote pojjeama dejjaa, Jesosa huohuiajjacapoa jama ba'a: —Emeshimesenei, ¿yajjajo acuae mima' jayojja poanicuanajo pea-ai mijjabameequije so'o miya queaca'anee poani? ¿A'a ecuananeijo miya queaja'anee jjabameequiani?—

23Jesosaa oya saja-acapoa jama ba'a: —Joya e queajea ajji poanicuana caca oe ecuea esohuijo jjashajja-ajjaquipoquiani. Ecue Chiiya oya queajeanee acapoquije. Ecue Chii eya pea-ai poeje oque onijjetii enequipoqui'yojji. 24Joya e queajea asapo-ajja poanicuana ca ecuea esohuijo jjashajja-ajjaquisapo-ajjanei poani. Jiquio ecue huohui esohui miquiaaya shajja-ajjaña caca ecuea esohuinei pojjeama. Jiquio ca ecue Chiija esohuinei e huoojeajji epoja esohui.

25—Eyaya quiana jiquio esohui jama huohuimeya aña eya miquiananijje jjeya enequitiiyajjejojoya so'o. 26Quijje Edojjoshahuapame jiquio miquiana ba'emeesahuapoquiajji epojji Eyacuiñajji Echii-aiya oya ecuea bajjanijo huoojeaoqueacaje. Ohuaya miquiana queaja'a shahuabameecapoquijetii jiquio ecue huohui esohui huisotiicuana. Ecuea esohui ohuaya queaja'a bameesahuacapoquije pea-ai.

27—Eyaya poqui'yojjimahuaa quiana queaquijijjijaji pomeeaña. Jamaya quiana eyaya pomeeaña queaquijijjijaji enequipoquijji e poqui'yajo. Jiquio ecua pea dejja jiquio meshijo ba'ecacuana queaquijijjijaji jayojja poani jama pojjeama miquiana queaquijijjijajinee poaje. Jamajojoya aje quiana oe ¡a'a queaquijijjiyenonee pojji! ¡A'a queamete pojji pea-ai! 28Miquiaaya ecuea esohui shajja-ajjanaje eya poquije'yo majoya quijje poeje o'oya miquianaque miquiananijje nequi o'oyaa. E'ejojonei miquiaaya eya queajeanee añajojjemo esohui e ecue Chiique poquije'yo shajja-ajjamajje queabihui quiana pome. Eya queaca'apishana ecue Chii ca queaca'aneetii poani, jamajjeya quiana queabihui pocajji ejo. 29E'e, eyaya quiana poqui'yojjimahuaa huohuina'yaña eya jjeya poquije'yo majoya quijje eya poeje o'oya. Jamaya eyaya quiana huohuina'yaña ejo ejjashahuabaquipoquijjitii quijje e jama poaje'yo bamajje.

30—E'e, mahuisoya. Jjeya ecuea miquiana ehuohuimajamajanequijjitii pojjeama poaje. Edosiquiana, jiquio meshijo ba'ecacuana queamimishi pomeejjitii poani, jjeya poeje. Ohuaya dejjacuana queamimishi epojji huohuicanitii. Oya ca e huoojeajji pojjeamatii poani. 31Jamajjeya eyaya ecue Chiija echacojji apoquiajetii ojjañacuanaja queaja'a ebajji eyaya oya queajeaneetii apoquiaña. Cua ecue Chiiya eya huohuicani esohui huisotii echacojji eyaya ajeyopoquiaje. Mahuiso ecuea esohui. Ee, cua'a nequisohua'yocue epoqui'yo quiojo ani— jama huohuimeya Jesosaa oja babaca dejjacuana acapoa.

Currently Selected:

JUAN 14: ESE

Highlight

Copy