JUAN 18

Jesosa iñaca'ajeacapoa dejja mimishicuaa

(Mt 26.47-56; Mc 14.43-50; Lc 22.47-53)

1Majoya aje Jesosa oja Chiinijje mimijeyomajje poquiapoa o shajja-ajjajji poanicuananijje eta'a Cedrón bajjani jaa ojjemijiyasijje. Mamijijjeya bacañaquiapoa cuaa ebanacuana aniyiyejo. Majotiiya aniñaquiapoa Jesosa o shajja-ajjajji poanicuananijjetii. 2Judasja, ma Jesosa iñameesahuajji poajeja eba pea-ai poa ma meshi Jesosa o shajja-ajjajji poanicuananijje cuama jjachichaquipoquinajejojoya. 3Majoya aje cuamaya Judas queahuiso romano soldadocuananijje ma meshiyasijje poeapoa Jesosa aniyasijje. Fariseo dejjacuaa, Eyacuiñajjija equi-aijo chacochacopoquiani etii poanicuaa pea-ai Eyacuiñajjija equi-aiqueyajji poanicuana huoojeacapoa Jesosa iñaca'ajeasahuaa. Ma oja huoojea dejjacuana baase'beca mejji acui mejji pea-ai poeapoa. Cuaquijiji mejji pea-ai poa cuana. 4Jesosaja ebatii poa yajja quijje oya acaje'yo cuaa. Jamajjeya oya poquinanapoa o poejeyasijje. O cojjaneijo nequimajje Jesosaa huohuiajjacajjequiapoa cuana jama ba'a: —¿A'ya quiaa sa-ajjaña?—

5Oya saja-acapoa cuaa jama ba'a: —Jesosa bajjani dejja, oya Nazaretcuiñajji.—

Jesosaa saja-acapoa cuana jama ba'a: —Jiquia aje eyaya Jesosaya.—

Judas, Jesosa iñameesahuajji poani bejjo sosejje nequipea-aiapoa ma dejjacuananijjetii. 6Jesosa jama poajo ba'a: “Jiquia aje eyaya Jesosaya” ma Jesosa iñaca'ajea poecuana jjajeashiñaquinanapoa. Jaabichajeananaquiapoa meshiyasijje. 7Majoya Jesosaa huohuiajjacao'oyapoa cuana jama ba'a: —¿A'ya quiaa sa-ajjaña?—

Jama saja-ame acao'oyapoa cuaa ba'a: —Jesosa bajjani dejja, oya Nazaretcuiñajji.—

8Jesosaa jama acao'oyapoa cuana ba'a: —De, eyaya aje quiana huohuiajjanaje jiquia aje eyaya Jesosaya. Eyanei miquiaaya sa-ajjañajo jiquio e shajja-ajjajji poanicuana capoqui'yahua jjeyahuanei.—

9Jamaya Jesosaa huohuiajjacapoa cuana ma oja Chiinijje miminaje esohui jayojja eajeyo'yojjijo. Oja Chiinijje jama mimime poa ba'a: “Eyaya edosiquiana e shajja-ajjajji poanicuana dojomee'yojjimatii apoquianaje Cuaqui-aiyasijje.” 10Majotiiya Simón Pedro baase'beca mejji nequiapoa Jesosanijje. Ohuaya oja baase'beca jjequihuijjiamajje oe dejjaja eshajja, Malco bajjanija, ebañeimijijje nequi shajja, jajasejjajeacapoa Jesosa nahueajjajo. Oya Malco Eyacuiñajjija equi-aijo chacochacopoquiani ebionei etii poanijo chacochacopoquiapoa. 11Majoya Jesosaa Pedro jama acapoa ba'a: —Pedro, mique baase'beca huacuaya nequiahuosho'yocue. ¿A'a miquea bajjima ecue Chiiya eya queaneenee ameecaje'yo? Eya caca oe eyaneitii jjaiñameequije cuana, epoquiquehuajji pojjeama.—

Jesosa siajje acapoa cuaa Anás dejja etiija cojjaneijo nequimeemajje

(Mt 26.57-58; Mc 14.53-54; Lc 22.54)

12Majoya aje soldadocuaa, o huohuijji etii poaniya, Eyacuiñajjija equi-aiqueyajji soldadocuaa pea-aiya Jesosa iñaca'ajeamajje me jeyocapoa jjonohua. 13Majoya oya dojocapoa cuaa Anás bajjani dejjaja equiyasijje. Oya Caifasja baba poa. Ma shequiajajo Caifás Eyacuiñajjija equi-aijo chacochacopoquiani ebionei etii nequiapoa. Jamajjeya Jesosa oque dojocapoa cuaa. 14Ohuaya Caifasya yahuajo judiocuana huohuicapoa jama ba'a: “Oe dejja ojjaña esejo camanoqui'yahua romano soldadocuaa ojjaña ese equecuajeyoca'yo cuahuajje” jamaya oya yahuajo poa Jesosajo.

Pedrohua Jesosa ojaya bajjima nisho acapoa

(Mt 26.69-70; Mc 14.66-68; Lc 22.55-57)

15Simón Pedrohua, pea Jesosa shajja-ajjajji poani dejja pea-aiya Jesosa equijje acapoquiapoa yajja oya acaje cuaa ebajji. Ma pea dejja Pedronijje poqui Caifasja eba poa. Jamajjeya oya Caifasja equiquibojotii nequimeecapoa ojo chacochacoanicuaa. 16Pedro ca esecuejjanipejjejotii nequiapoa. Oya equiquibojo nequimeejjima acapoa cuaa. Jamajjeya ma pea Jesosa shajja-ajjajji poani dejja, Caifás bajji epo, poquiapoa esecuejjaniqueyajji poani epona huohuiya Pedrojo. Ohua huohuiajjacajje eponaa Pedro nobimeequicapoa equiquibo epeeidojjohuasijje. 17Majoya aje esecuejjaniqueyajji eponaa Pedro jama acapoa ba'a: —¿A'a miya pea-ai Jesosa shajja-ajjajji poani?—

Pedrohua oya saja-acapoa jama ba'a: —Chojja ca iña, eya o shajja-ajjajji pojjeama poani— jama nishoya Pedro poa onijje.

18Ma mecajjetiiya aje queahuoenee poa. Jamajjeya Eyacuiñajjija equi-aiqueyajji poanicuaa cuaqui dahuahuojjecapoa ejjayoquijji. Pedro pea-ai jjayoquiapoa onanijjetii ojee cuaquichipineijo.

Eyacuiñajjija equi-aijo chacochacopoquiani ebionei etii poani dejjaa Jesosa huohuiajjacapoa oya ebajji

(Mt 26.59-66; Mc 14.55-64; Lc 22.66-71)

19Majoya aje Eyacuiñajjija equi-aijo chacochacopoquiani ebionei etii poani dejjaa Jesosa huohuiajjacanequiapoa o shajja-ajjajji poanicuanajo ojaya esohui ehuohuicuanajo pea-ai ebaneijji. 20Jesosaa oya jama acapoa ba'a: —Eyaya esohui huohuinequinaje ja'anei, quehuajje pojjeama, ojjañacuanaja ebajji. Eyaya huohuimajamajanequinaje judiocuanaja equi-ai ejjachichaquijjicuanajo nequiya. Eyacuiñajjija equi-aiquiquibojo nequiya pea-ai huohuinequinaje judiocuana cuamaya jjachichaquianijojoya. Jamajjeya ecuea quehuajje esohui huohuijjima poanaje cuana. 21¿Apiojji acuae eya miyaya jama huohuiajjame aña? Joya e shajja-ajjajji poanicuana oe huohuiajjaquicue. Ohuaya aje mi huohuicaje'yo ma eya huohuinaje esohuiya.—

22Jesosa jama poani shajja-ajjamajje oe Eyacuiñajjija equi-aijaahuanajji poaniya Jesosa oja shemojje cuiasejjajeacapoa emeya. Majoya oya jama poa Jesosanijje ba'a: —¿Apiojji jama mimime poani Eyacuiñajjija equi-aijo chacochacopoquiani ebionei etii poani dejjanijje?—

23Jesosaa oya saja-acapoa jama ba'a: —Eya esohui queatai añajo ca iña oe huohuiajjacueya ¿ache eyaya esohui queatai aña? Eya e'ejojonei esohui añajo, ¿apiojji miyaya eya shemo cuiasejjajeanaje?—

24Majoya aje Anás bajjani etii poaniya Jesosa ejeyotii nequi huoojeacapoa Eyacuiñajjija equi-aijo chacochacopoquiani ebionei etii Caifás aniyasijje oja bajji.

Pedrohua Jesosa ojaya bajjima nisho acao'oyapoa

(Mt 26.71-75; Mc 14.69-72; Lc 22.58-62)

25Jesosa dojocanijo Pedro cuaquipejjejotii nequiapoa ejjayoquijji. Onijje anicacuaa Pedro huohuiajjacapoa jama ba'a: —¿A'a cuae miya o shajja-ajjajji poani pea-aiya?—

Pedrohua bajjima nisho acao'oyapoa jama ba'a: —¡Chojja ca iña de! O shajja-ajjajji pojjeama poani.—

26Majoya quijjepishana Eyacuiñajjija equi-aijo chacochacopoquiani ebionei etii poanijo chacochacoaniya Pedro huohuiajjapea-aicapoa. Oya ma shajja jajasejjajeacanajeja huapa pojjeama poa. Oya jama poa Pedronijje ba'a: —Eyaya miya pea-ai banaje Jesosanijje nequiya acuiyiye ebana anijo.—

27Ohua jama acajje Pedrohua Jesosa bajjima nisho acao'oyapoa. O jama pojeahuajo cachinayahue taaapoa.

Etiicuaa Jesosa Pilato bajjani dejjaja ebajji dojocapoa

(Mt 27.1-2,11-14; Mc 15.1-5; Lc 23.1-5)

28Majoya aje mecajjeahuanei Jesosa Caifasja equijo ani etii poanicuaa oya dojomeecapoa romano emeshimese dejjaja equi-aiyasijje. Judío dejjacuana nobiquisapo-ajjapoa oja equi-aiyasijje oya judío dejja pea-ai pojjeamajjejojoya. Judiocuana ojaya equiyasijje enobiquijjemo oya jjabaquiquiae mimishijji. Jama pomajje oya pea pojjajo eijjiaijjiajji pojjeama poaje pea judiocuananijje fiesta eshahuaba'yojji ma yahuajo oja etiiquianaja bacuacuana nahuecapoajo. 29Jamajjeya Pilato Jesosa yecaje bamajje cuayaquinanapoa o dojomeejji poanaje dejjacuananijje mimiya. Ohuaya huohuiajjacapoa cuana ba'a: —¿Apiojji shai miquiaaya jiquio dejja ejeyo yenaje? ¿Ae poanaje oya?—

30O dojomeejji poanaje dejjacuaa Pilato saja-acapoa jama ba'a: —Oya queatainee mimiajjajjemo ecuaaya oya jiquiacua yejjimatii aquiae miquea bajji.—

31Pilatohua oya huohuicapoa jama ba'a: —Miquiaaya jja oe dojo'yocue. Miquianajaya esohuinei etehuejo oya baneineicue enapameejji. Queanee oya ameecue miquiaaya jama asa-amajjeya.—

Ma judío dejjacuaa oya jama acapoa ba'a: —Chojja Pilato, ecuana ca quio judiocuana pea dejja manomee'yojji pojjeama jamatiijo mique ecuana huohuijjimajo.—

32Yahuajo Jesosaa huohuicapoa achajja manomee'yome oya acaje cuaa. Oja huohui jayojjaya oya acaje'yo cuaa. 33Majoya Pilatohua oja equi-aiyasijje nobiquimajje Jesosa iyaameecapoa oya ehuohuiajjajji. Jama huohuiajjame acapoa ba'a: —¿A'a miya judiocuanaja emeshimese poani?—

34Jesosaa oya saja-acapoa ba'a: —¿A'a eya jama huohuiajjaña miqueaneitii ejjashahuabaquijjijo? ¿A'a pojja'a peacuaa miya ejo huohuicanaje jamajjeya miyaya eya jama aña?—

35Pilatohua oya saja-acapoa jama ba'a: —¿A'a cuae iña jiquio judío dejja? Chojja de. Minijjejaajjicuaa caca oe Eyacuiñajjija equi-aijo chacochacopoquiani etii poanicuaa pea-aiya miya iñameemajje yecanaje jiquiacua eque. ¿Yajja miyaya anaje cuana?—

36Jesosaa oya saja-acapoa jama ba'a: —Eya ca iña jiquio meshijo emeshimesecuana poani jama pojjeama. Jama pea-ai poanijjemo e shajja-ajjajji poanicuaa jiquio e iñajji poani judiocuana quecuaca'yome e nahuejo. Eya ca iña jiquio meshijo emeshimesecuana jama pea-ai pojjeama.—

37Majoya Pilatohua Jesosa huohuiajjacao'oyapoa jama ba'a: —¿A'a mi jamajjeya emeshimese poani?—

Jesosaa oya saja-acapoa jama ba'a: —Miya e'ejojonei poanaje eya emeshimese poani. Majoya eya jiquio meshijo cuayapoa. Jiquio meshiyasijje eya poeapoa ojjañacuana esohui e'ejojonei huohuiya. Jamajjeya ojjaña joya esohui e'ejojonei basapoanicuaa ecuea esohui shajja-ajjacani.—

Pilatohua Jesosa acui ecuiata'apeejo me cacajeameecapoa emano'yojji

(Mt 27.15-31; Mc 15.6-20; Lc 23.13-25)

38Majoya Pilato jama poa ba'a: —Ache shai esohui e'ejojonei poani ecuea bajjima.—

Jesosa jama amajje Pilato cuayaquiapoa judiocuana queahuiso nequiyasijje onijje mimiya. Jama huohuime aquicapoa cuana ba'a: —Ecuea bajjimanei ache oja mimishijo shai oya queanee ecuea pomeecajji, ¡chama'! 39Ojjaña shequiajajo eyaya oe dejja ejeanobia ani huoojeacuayamee'yaña epoqui'yojji fiesta eshahuaba'yojji ma yahuajo Eyacuiñajjiya judío etiiquianaja ebacuacuana nahuecapoajo poechipi'yajo. Ojjaña shequiajajo eyaya jamaya apoquiaña miquianaja sa esohuijo. ¿A'a jamajjeya jiquio nequi dejja judiocuanaja emeshimese poani huoojeacuayameeje'yo?—

40Judiocuana ejjachichaqui nequi oja esohui shajja-ajjamajje ojjaña taaasajasajacapoa jama ba'a: —Chojja, Jesosa pojjeama, ¡a'a pichojeamee'yojji! Barrabás dejja oe huoojeacuayamee'yocue— jamaya poa cuana. Oya Barrabás ejeanobia aniapoa pea quecua'yojji epojojoya.

Currently Selected:

JUAN 18: ESE

Highlight

Copy