JUAN 13

Jesosaa oja babaca dejjacuanaja ejeojji shacuacapoa

1Fiesta eshahuaba'yojji ma yahuajonei Eyacuiñajjiya judío etiiquianaja bacuacuana nahuecapoajo poechipi'yapoa. Jesosaja ebatii poa ojaya jiquio meshi jiña'yojji epojja poechipinaje, oja Chii aniyasijje epoqui'yojji. Jesosaa oja babaca dejjacuana queajeaneetii acapoquiapoa jiquio meshijo nequiya. Ohuaya queajeaneetii acapoquije quijje pea-ai.

2Majoya aje Jesosa oja babaca dejjacuananijje ijjiaijjianijo edosiquiaa Judas, Simón Iscarioteja bacuaejja, queajjashahuabaquiquehua pomeecapoa Jesosa iñameesahuajjijo bejjo sosejje. 3Jesosa jjabaquitiipoquiapoa oya Eyacuiñajjija huoojea, quijje oya huacuaya poquije'yo oja Chii aniyasijje pea-ai. Ojaya ebatii pea-ai poa Eyacuiñajjiya oya Emeshimesenei ojjañacuana huoojeapoquiajji epojji pomeecapoa. 4Majoya aje Jesosa oja babaca dejjacuananijje ijjiaijjiani nequisohuapoa. Oya oja daqui-ao huijeamajje pea daquijo toallajo jjayica'aquiapoa. 5Majoya Jesosaa ena shocapoa enanequijjiyasijje oja babaca dejjacuanaja ejeojji shacuajji. Ojaya ejeojji shacuamajje Jesosaa cuica'yapoa oja ejjayica'aquijji epo daquiyatii.

6Jesosaa oja jeojji shacuacaje bamajje Simón Pedro jama poa onijje ba'a: —Emeshimesenei, ¿a'a cuaeya ecuea ejeojji pea-ai shacuame? ¿Apiojji?—

7Jesosaa oya saja-acapoa jama ba'a: —Jjeya miquea queaquehua apiojji eyaya jama shacuaña. Quijje ca miquea queaja'a poaje.—

8Pedro mimio'oyapoa onijje jama ba'a: —¡De! Ecuea miya ecuea ejeojji eshacuameejji pojjeamatii poaje.—

Jesosaa oya saja-acapoa jama ba'a: —Pedro, miya ejo jjajeojjishacuameequiajja pomajje ca miña e shajja-ajjajji pojjeamatii poaje.—

9Jamajjeya Simón Pedrohua Jesosa huohuicao'oyapoa jama ba'a: —E de, Emeshimesenei, ¡a'a oenei ecuea ejeojji shacuajji! Eme pea-ai ecuea sapa pea-ai shacuacue.—

10Jesosaa oya Pedro saja-acapoa jama ba'a: —Joya jjeyanei besacuana ca ebesao'oyajji pojjeama oja yami queaboejeajojoya. Oja jeojjinei ca oe shacuacajji. Oya jayojja pea-aiya quiana po'yani queaboejea. Jamatii quiana ojjañatii pojjeama queaboejea po'yani.—

11Jesosaja eba poa ache dejja onijje poaniya oya iñameesahuacaje bejjo sosejje. Jamajjeya jama mimime Jesosa poa ba'a: “Jamatii quiana ojjañatii pojjeama queaboejea po'yani.”

12Majoya Jesosaa oja babaca dejjacuanaja ejeojji shacuajeyomajje oja daqui-ao huoshoca'yapoa. Oya jaao'oyamajje mesapejjejo oja babaca dejjacuana huohuicapoa jama ba'a: —¿A'a quianaja queaja'a poani yajja poanijje jiquio eyaya miquianaja ejeojji shacuanaje? 13Miquiaaya eya aña ba'a: “Esohuihuohuijji, Emeshimesenei.” E'e, jamaya queaja'a aña quiaa ejo eya Emeshimesenei eojjañamese e'ejojonei poanijojoya. 14¡Bacue! Eyaya, esohuihuohuijjiya, Emeshimeseneiya miquianaja ejeojji shacuanaje. Jamajojoya aje oe miquiaaya pea-ai minijjejaajjicuanaja ejeojji shacuapea-aicue. 15Eyaya jamaya anaje miquianajaya queaja'a ebajji. Jiquio ecua dejja peajo chacochacoani jama pea-aiya eyaya quiana anaje. Jamajjeya miquiaaya peacuana jama pea-aiya acue. 16E'ejojonei eyaya quiana huohuiaña. Joya dejja peajo chacochacoani o chacomeejji etii poani jama pea-ai pojjeama. Oya queaca'apishana, o chacomeejji poani dejja ca queaca'a. Bacue, dejja ehuoojea o huoojeajji epo jama pea-ai pojjeama poani. 17Jjeya ecuea esohui miquianajaya queaja'a. Jamajjeya jiquio ecuea esohuijo miquiana jjashajja-ajjaquimajje queabihuinee ba'epoquije.—

Jesosaa huohuicapoa cuana Judasya oya iñameesahuacaje bejjo sosejje

18—Eya ojjaña miquianajo pojjeama jiquio mimiani. Ecuea ebaneinei miquianaya ecue babaca poani. Ma ecua yahuajonei tehuecapoa esohui oya jayojjaya acaje quijje. Jama tehueme acapoa ba'a: “Jiquio jjeya enijje ijiiaijjiani dejja e iñameesahuajji poaje oya.” 19Eyaya quiana huohuiaña jiquio oja jama ajjimahuajo miquianaja queaja'a ebajji ejo eya ca iña eyatiiya poani ma yahuajonei eaniatiiapoaya. 20E'ejojonei eyaya huohuiaña. Joya dejjacuana ecue huoojeacuanaja esohui shajja-ajjajji poaniya eya pea-ai shajja-ajjacaje ma dejjacuaaya. Jamajje ojjaña joya ejo jjashahuabaqui'yanicuana e'ejojonei e huoojeajji epojo pea-ai jjashahuabaquije'yo— jamaya Jesosaa acapoa.

21Jama huohuime amajje Jesosa queayenonee ponanapoa. Oja babaca dejjacuana queaja'a huohuicao'oyapoa jama ba'a: —E'ejojonei quiana huohuiaña, oe jiquiojo enijje ani dejjaa eya iñameesahuacaje eso'dojjo sosejje quijje equecuamee'yojji.—

22O jama huohui pome poajo oja babaca dejjacuana jjababacaquiapoa ebajji acheya shai oya iñameesahuacaje. Bajjimanei poa cuanaja. 23Oe oja babaca dejja, ma Jesosaja queajeanee poani dejja, jaapoa opejjeneijo. 24Majoya Simón Pedroya eme huocapoa ma Jesosapejjeneijo jaa dejja ojaya Jesosa ehuohuiajjajji ache dejjaa oya iñameesahuacaje. 25Jamajjeya ma Jesosaja queajea poani dejja jjajaachipiquiapoa o jaahuasijje ehuohuiajjajji jama ba'a: —Emeshimesenei, ¿ache dejjaa jiquiojo aniya miya iñameesahuacaje?—

26Jesosaa oya saja-acapoa jama ba'a: —Eyaya jiquio pahui emiji enajo iyanobiaje. Cua eya quiaje pahui dejjaa comaaya eya iñameesahuacaje.— Majo aniya Jesosaa pahui emiji enajo iyanobiamajje Judas, Simón Iscarioteja bacuaejja quiacapoa. 27Judasya pahui jjeshecajeahuajo ebionei eshahua Satanás bajjani oja eyamidojjohuasijje nobinanaquiapoa.

Jesosa onijje mimiapoa jama ba'a: —Judas, jiquio miya jjeya aje, acuajicue.— 28Jesosaja babaca dejjacuanaja ma onijje ijjiaijjiajaaja ca queaquehuaneetii poa yajjajo shai Jesosaa Judas jama acanaje. 29Judas onijje Jesosa shajja-ajjajji poanicuanaja bejjojaahuanapoquiajji poa. Jamajjeya beca oja babaca dejjacuaa Jesosaa Judas huoojeacani bobi jjesheya fiesta yajjijo poso acapoa. Judas pojja'a aema'cuana bejjo quiaa poquije poso apea-aicapoa cuaa.

30Majoya Judas pahui emiji jjeshemajje poquinana'yapoa. Mecajjetii poa.

31Judas poqui'yajo Jesosa jama poa ba'a: —Jjeya eya jiquio Dejjapojji epo ojjañacuanajo jjabameequije eya queaca'aneetii queasajajanee nequi. Eyacuiñajji queaca'aneetii queasajajanee nequi pea-ai eyaya bameeje cuana ejo. 32Jamajjeya eyaya jiquio Dejjapojji epohua ojjañacuana bameeje Eyacuiñajji queaca'aneetii queasajajanee nequi. Eyacuiñajjiya eya queaca'aneetii queasajajanee nequi pea-ai bameecaje cuana. Jjeyanei ohuaya jamaya acaje. 33Ee, jjeyanei shajja-ajjacue mo, ecue bacuaejjacuana. Eya jjeya jiquio meshijotii miquiananijje iyecahuihuiso nequije so'o. Majoya eya miquiaaya sa-ajjaje'yo. Ma yahuajo eya judiocuana huohuinaje esohui ejo oya sohuiya quiana huohuiaña jama ba'a: “Miquianaya jiquio e poquije'yohuasijje epoquijji pojjeama poaje so'o.” 34Jjeya eyaya quiana pea esohui eyacua eapoquiajji huohuipea-aije jama ba'a: Miquiaaya minijje ecuea epeejjicuana queajeanee apoquiacue jiquio ecua eyaya quiana queajeanee apoquiaña jama pea-aiya quiaa acue cuana. 35Miquiaaya minijje ecuea epeejjicuana queajea apoquiaña bamajje queahuiso cuaa bacaje e'ejojonei miquiana e shajja-ajjajjinei poani.—

Jesosaa huohuicapoa quijje Pedrohua Jesosa ojaya bajjima nisho acaje

(Mt 26.31-35; Mc 14.27-31; Lc 22.31-34)

36Majoya aje Simón Pedrohua Jesosa huohuiajjacapoa jama ba'a: —Emeshimesenei, ¿achacua acuae mi poqui'yani?—

Jesosaa oya saja-acapoa jama ba'a: —Jiquio e poquije'yohuasijje miquea eya jjeya equijje ea'yojji pojjeama so'o. Quijje ca mi ca oe enijje nequipoquije'yo.—

37Pedrohua jama acao'oyapoa ba'a: —Emeshimesenei, ¿yajjajo acuae iña minijje enequipoqui'yojji pojjeama jjeyanei poaje? Eya ca iña apoa ejjaquecuameequi'yojji mi nahuejji epojji dejjamasecuanajo.—

38Ohua jama huohuime acani shajja-ajjamajje Jesosaa Pedro jama acapoa ba'a: —¿A'a e'ejojonei miya apoa ejjaquecuameequi'yojji e nahuejji epojji? Pedro, eyaya miya huohuiaña, jiquio mecajjetii cachinayahue taaajjimahuajo miyaya eya bajjima nisho aje. Tres huisome miyaya esohui aje ejo.—

Currently Selected:

JUAN 13: ESE

Highlight

Copy