JUAN 12

Oe eponaa Jesosa shiyeshiyeya shacapoa

1Seis cahuime huiso judiocuanaja fiesta eshahuaba'yojji ma yahuajonei Eyacuiñajjiya oja etiiquianaja bacuacuana nahuecapoajo a'yojjimahuajo Jesosa poquiapoa pueblo Betania meshiyasijje ma Lázaro ba'e meshiyasijje. Yahuajopishana ma meshijoya Jesosaa Lázaro shequimeeca'yapoa. 2Ma meshijotiiya Jesosaja epeejjicuaa bobi queahuiso cuacuacapoa Jesosa queapame ja'ajjequijji. Martaa bobi iyacuayacapoa Jesosa bobiajji, ma onijje poecuana bobiajji pea-ai. Lázaro ca Jesosanijje ijjiaijjiajaapoa mesajo. 3Majoya aje Jesosa ijjiaijjianijo Mariaa shiyeshiye queasosehuisoneeya Jesosaja ejeojji shacapoa. Queahuisonee shacapoa, oe tahuoo shiyeshiye 300 gramos oe acapoa oja ejeojjijo. Mariaa Jesosaja ejeojji shamajje cuica'yapoa oja esao-aohua. Jamajjeya ma equi shiyeshiyeya cuamayee queashiyenee acapoa. 4Majoya aje Jesosa shajja-ajjajji dejja Judas Iscarioteya, ma quijje Jesosa iñameesahuajji poaje dejjaa jama acapoa ba'a: 5—¡De! ¿Yajjajo acuae jiquio shiyeshiye bejjo sosejje miquiacanaje? Ma bejjojoya aema'cuana ba'emeesahuacajji poanaje. Jiquio shiyeshiye queanahuenee poanaje de, queasosehuisonee, 300 eso'dojjo sosejje.—#12.5 Nota: Oe eshequiaja chaco sosejje 300 eso'dojjo huisome poa.*

6Judas ca aema'cuanajo pojjeama jjashahuabaquiapoa. Oya caca Judas siipojji poa. Oya Jesosa shajja-ajjajji poanicuanaja bejjojaahuanapoquiajjinisho poa. Ohuaya bejjo siicapoquiapoa. 7Jamajjeya Jesosaa Judas jama acapoa ba'a: —Judas, a'a jiquio epona tecueajji. Eya quijjepishana manoje'yo. Ohuaya ecuea ejeojji shacanaje shiyeshiyeya e huananobiajji yajji epojjajo quijje. 8Aema'cuana miquiananijjetii nequipoquije. Eya caca oe miquiananijje jiquio meshijotii enequitiitiipoquijji pojjeama poaje.—

Lázaro pea-ai quecuapanacapoa judío etii poanicuaa

9Queahuiso judiocuaa shajja-ajjacapoa Jesosa Betania meshijo nequi. Jamajjeya poquicapoa cuana Jesosa baa, Lázaro, ma Jesosaa shequimeeca'yonaje dejja baa pea-ai. 10Jamajjeya Eyacuiñajjija equi-aijo chacochacopoquiani etii poanicuaa Lázaro pea-ai quecuamee'yosa-acapoa. 11Judiocuaa queahuisohua Lázaro eshequi'yo nequi ba'yomajje onijje judío etii poanija esohui shajja-ajjapajeaca'yapoa Jesosajo ejjashahuabaqui'yojji.

Jesosa ciudad Jerusalén meshiyasijje nobiquiapoa

(Mt 21.1-11; Mc 11.1-11; Lc 19.28-40)

12Queahuiso judiocuana epoqui poa Jerusalén meshiyasijje fiesta a'yohua eshahuaba'yojji ma yahuajonei Eyacuiñajjiya oja etiiquianaja bacuacuana nahuecapoajo. Majoya aje pea pojjajo shajja-ajjacapoa cuaa Jesosa poepea-aije Jerusalenyasijje. 13Jamajjeya jememeiña jayojja cobocapoa cuaa ejeahuanequijji Jesosa bihuiajjequijji. Majoya Jesosa poeje bamajje cuayaquicananapoa cuana o bihuiajjequiya. Jesosa bihuiajjequijji ojjañacuana jjasajeaquicapoa jama ba'a: —Ejjabihuiaqui oya. Eyacuiñajjiya oya queapamenee ca-acahua. Oya Eyacuiñajjija huoojea Eyajje poe. Israel emeshimese, oya queabihuinee capomeecahua Eyacuiñajjiya— jama bihuiameya Jesosa acapoa cuaa.

14Jesosa oe mapichi bamajje oja daasabiajje anisohuaquiapoa. Eyacuiñajjija esohui yahuajonei tehuecapoa jama ba'a:

15“Ojjaña Jerusalencuiñajjicuana a'a queamete pojji.

Bacue oya, miquianajaya Emeshimese poeje mapichibiajje ani”

jama tehuemeya yahuajo acapoa Jesosajo. 16Ebionei o shajja-ajjajji poanicuanaja queaquehua poa so'o yajja poanijje oja tehue esohui. Majoya quijje queaja'a bacapoa apiojji jama Jesosa acajjequiapoa cuaa quijje Jesosa shequi'yonaje bamajje. Ma esohui yahuajonei ojo tehuecapoa jayojjaya acapoa cuaa.

17Ojjaña ma Jesosaa Lázaro emano'yo jaa shequimeecaje'yo bajji poanajecuaa onijjejaajjicuana huohuicapoqui'yapoa Jesosajo. 18Jamajjeya queahuisoneecuana cuayaquicapoa Jesosa bihuiajjequiya ohua Lázaro shequimeeca'yonaje shajja-ajjamajje. 19Fariseo dejjacuana ca queaquene poa ojo, jamajjeya ojee mimimimicapoa jama ba'a: —Bacue, ¿yajja acuae seya aje? ¡Jiquio queahuisocuana ese shajja-ajjasapo-ajja po'yani, de! Queahuisoneecuana Jesosanijje poquica'yani o shajja-ajja'yosapoani cuana— jamaya ojee mimimimicapoa.

Peajaajji griego bajjani dejjacuaa Jesosa sa-ajjacapoa

20Ma poquicapoacuana Eyacuiñajji bihuiaa Jerusalén meshiyasijje judiocuana oopana pojjeama poa. Ejjacuiahuaqui poa cuana peajaajjinijje. Becacuana griego dejja poa. 21Majoya aje ma griego dejjacuana Felipe nequiyasijje poquiapoa. Oya Felipe provincia Galilea pueblo Betsaidacuiñajji dejja poa. Ma dejjacuaaya Felipe huohuiajjaneineicapoa jama ba'a: —Felipe, ecuana Jesosa bapea-aisapoani onijje emimijji.—

22Jamajje Felipe poquiapoa Andrés huohuiquiya ma griego dejjacuanajo. Majoya Felipe Andresnijjetii poquiapoa Jesosa huohuiya, griego dejjacuana onijje mimisapoani huohuiya. 23Oja esohui shajja-ajjamajje Jesosaa huohuicapoa jama ba'a: —E'e, jjeya eya apoa Dejjapojji epo queaca'anee queasajajanee nequi ojjañaja eya e'ejojonei ebajji. 24Eyaya e'ejojonei pea esohui huohuiaña jama ba'a: Anosoai meshiyasijje quecuajjima ani, meshiquipajo oja jjii ihuijjima ani pea-ai oyaneitii anije pohua'yojjimatii. Eso' quecuacajje ejjii meshijo ani ca ihuije jiquio ecua oya mano'yani jama, majoya oya pohua'yani ejjii ihuiajo. Queajjajjahuiso poaje tii'yomajje. 25Bacue, joya dejja oja eba'ejjineijo jiquio meshijo jjashahuabaquianitii jiquio ecua anosoai eso' quecuajjima añani jama pea-ai oya poani. Jamatii oya nequipoquije, Eyacuiñajjima' jayojjatii jjashahuabaqui'yoajjanei. Joya pea dejja oja eba'ejjineijo jiquio meshijotii jjashahuabamajamajatiiquiajja poani dejja ca queaja'a jjashahuabaquipoquiani Eyacuiñajjija echacojji yajjijo. Quijje oya mano'yomajje Eyahuasijje nequitiitiipoquije'yo queapame. 26Ojjaña cua ejo chacochacosapoajecuana enijjetii nequipoquica'yojji. Cua e anijo oya anije pea-ai ejo echacochacojji. Joya ejo chacochacoanicuana ecue Chii esohui queapame mimije ojo.—

Jesosaa huohuicapoa cuana o mano'yojjijo

27Majoya aje Jesosa mimiapoa oja Chiinijje jama ba'a: —Eya jjeya queaquijijjiyenoneenee ani. ¿Yajja huohuime acuae mi aje? ¿A'a jama huohuime acajji so'o ba'a?: “Ecue Chii, nahue'yocue mo quijje ma e queaneenee epojji epojja poeyajo eya queaneenee epo'yo poanijje.” ¿A'a jamaya eya mimicajji? ¡Chojja! Majoya eya jiquio meshiyasijje poeapoa jjaquiaquiya. 28Ecue Chii, ojjañacuana bameecue miya Eyacuiñajji e'enei poani, queaca'aneetii queasajajanee nequi onaja ebajji— jamaya mimiapoa Jesosa.

Jesosa jama mimime pojeahuajo Eyacuiñajjiya eyajo nequiya jama acapoa ba'a: —Eya Eyacuiñajji e'enei queaca'aneetii queasajajanee nequi ojjañacuana bameenaje. Oya jayojja eya Eyacuiñajji e'enei queaca'aneetii queasajajanee nequi jjabameequije o'oya ojjañacuanajo— jamaya Eyacuiñajji poa.

29Ojjaña ma Jesosaque ejjachichaqui anicacuaa Eyacuiñajji eyajo nequi mimije shajja-ajjacapoa. Jamatii becacuaa cueiji poani poso acapoa. Peacuana ca jama poa ba'a: —Chojja, ángel coma eyajo nequi Jesosanijje mimiani— jama posoya acapoa cuaa.

30Jamajjeya Jesosaa ma ejjachichaqui anicacuana huohuicapoa jama ba'a: —Jjeya ecue Chii eyajo nequi miminaje miquianaja eshajja-ajjajji, ecueanei shajja-ajjajji pojjeama oya miminaje. 31Jjeya apoa. Eyacuiñajjiya ojjaña meshijo ba'ecacuana ja'anei huohuicaje'yo queamimishi epojeyojeyo. Edosiquiana jiquio meshijo ba'ecacuana queamimishi pomeejjitii poani Eyacuiñajjiya oya huoojeacuayajeacaje'yo. 32Eya acui ecuiata'apeejo ba'ehuanasohuajeacaje cuaa. Majoya eyaya queahuisonee ojjaña meshijo ba'ecacuana poemeesahuaje eque ejo ejjanahuemeequi'yojji.—

33Jamaya Jesosaa esohui acapoa ojjañacuanaja queaja'a ebajji achajja oya manoje'yo. 34Majo nequicacuaa Jesosa jama acapoa ba'a: —Eyacuiñajjiya oja esohui yahuajonei tehuemeecapoa ba'a: Oja huoojea ojjaña nahue'yojji epojji ba'etiitiipoquije'yo. Jamajjeya, ¿apiojji acuae miyaya jamaya aña ba'a?: “E'ejojonei Dejjapojji epo ba'ehuanasohuajeacaje cuaa emanomee'yojji.” ¿Ae shai jiquio Dejjapojji epo?— jamaya Jesosa huohuiajjacapoa cuaa.

35Jesosaa saja-acapoa cuana jama ba'a: —Eya jiquio ojjaña jeaja'apoquiajji poani miquiananijje nequi so'o. Majoya quijje eya poquije'yo. Jamajjeya quiana jjeya jiquio e enequijo so'o queaja'anee jjashahuabaqui'yocue eyaya quiana jeaja'a-aña. Quijjepishana e chamajo quea-aaponee poaje. Cua ejo jjashahuabaqui'yojjimacuana queacamajaneetii ba'epoquije ecuaquisho'yo jama. 36Jamajjeya jjeyanei ojjañacuana jeaja'apoquiajji poanijo jjashahuabaqui'yocue e epoqui'yo cuahuajo. Majoya miquiana ba'epoquije jiquio ecua dejjacuana epojjajotii ba'epoquiani queaja'a jama.— Majoya aje jama huohuime amajje Jesosaa jiñacapoa cuana. Jjabameepajeaqui'yapoa ma dejjacuanajo, ma eponacuanajo pea-ai.

Judiocuana Jesosajo jjashahuabaqui'yojjimatii poa

37Jesosaa queahuiso dejjaja ajjima'neineicuana acapoquiapoa queahuisocuanaja cojjaneijo oja queaja'a ebajji. Jamatii ojo jjashahuabaqui'yosapo-ajjatii poa cuana. 38Jamajojoya aje yahuajonei Eyacuiñajjija esohuihuohuijji Isaías bajjaniya esohui tehuecapoa jama ba'a:

“Emeshimesenei, ¿ache dejja shai ecuea esohui mijo jjashahuabaqui'yonaje?

Achepishana.

¿Aya shai Emeshimesenei queaca'aneetii bacanaje?

¡Ayapishana!”

jama tehuemeya acapoa. 39Jamajjeya queahuisocuana Jesosajo jjashahuabaqui'yojjimatii poa. Isaiasya yahuajonei esohui tehuepea-aicapoa jama ba'a:

40“Ohuaya judiocuana cojjama' jayojja pomeecanaje

ojo jjashahuabaqui'yojjimatii epojji.

Esapadojjojje queajjashahuabaquiquehua pomeecanaje cuana

ojo queaja'anee ejjashahuabaqui'yo poanijje.

Jamajjeya Jesosaque jjanequichipiquijjimatii poanaje cuana oja mimishi cuijea'yojji.”

41Yahuajonei Jesosa jiquio meshiyasijje poejjimahuajo Isaías dejjaa Jesosa queaca'aneetii queasajajanee nequi bacapoa. Jamajojoya aje ohuaya esohui tehuecapoa ojo.

42Jamatii queahuiso judiocuana, iyehuiso judío etii poanicuana pea-ai Jesosajo jjashahuabaqui'yapoa. Macuanaya peaja cojjaneijo Jesosajo mimijjima poa fariseocuana yajjajo fariseocuanaja oya ehuoojeacuayaca'yo poanijje judiocuanaja ejjachichaquijji equi-aijo ani. 43Ma queametepishana poa dejjacuana onijjejaajji esohui queapame mimije ojonei queabihui epojjijo shajja-ajjasapoa. Eyacuiñajji ojo queabihui pojjijo ca jjashahuabaquijjima poa.

Jesosaa ojjañaja mimishi huohuicaje'yo queaja'anee ebajji

44Jamajjeya Jesosaa ojjaña onijje ejjachichaqui anicacuana janobajjimanei huohuipea-aicapoa jama ba'a: —Ojjaña joya ejo jjashahuabaqui'yanicuana Eyacuiñajji ecue Chiijo e huoojeajji epojo pea-ai jjashahuabapea-aiqui'yani. 45Jamajjeya ojjaña joya e bajji poanicuaa e'ejojonei Eyacuiñajji e huoojeajji epo queaja'a bapea-aicani. 46Eya ojjañacuana jeaja'apoquiajji poani jiquio meshiyasijje poeapoa. Ojjaña cua ejo jjashahuabaquije'yo huisotiicuana quea-aapo jayojjatii eba'epoquijji pojjeama poaje'yo. 47Eya ojjaña jiquio ecuea esohui shajja-ajjanishojji poanicuana queanee pomee'yojji pojjeama poani oja mimishijo. Eya ca jiquio meshiyasijje poeapoa ojjaña meshijo ba'ecacuana nahue'yohua oja mimishijo, ona queanee pomee'yohua pojjeama poe. 48Jamajjeya ojjaña joya e cajaa ajjitii poanicuanaja, joya ecuea esohuijo jjashahuabaquiajjatii poanicuanaja oja mimishi queaja'anee huohuicaje'yo quijje. Jiquio esohui eya huohuinajeya Cuaqui-aiyasijje oya huoojeacaje'yo. 49Jiquio esohuicuana ecueanei pojjeama huohuiaña. Eyacuiñajjija, e huoojeajji epoja esohuinei eyaya huohuiaña quiana. Ohuaya eya huohuimeecani cua ohua e huohuimeesa-acani esohuiya. 50Ecuea ebanei jiquio Eyacuiñajjija, ecue Chiija eba'etiitiimee'yojji esohui poani. Jamajjeya jiquio esohuicuana eyaya huohuiaña ma Eyacuiñajjiya e huohuimeesa-acani huisotiiya.—

Currently Selected:

JUAN 12: ESE

Highlight

Copy