JUAN 11

Lázaro mano'yapoa

1-2Oe dejja Lázaro bajjani Betania meshijo nequi queamanonee jaapoa. Oja jjo'i Marta, María pea-ai aniapoa onijje ma meshijoya. Yahuajopishana Mariaa Jesosaja ejeojji shiyeshiyeya shamajje oja esao-aohua Jesosaja ejeojji cuicapoa. 3Majoya aje quijje oja no Lázaro queamanonee jaa bamajje ejjo'imese Martaa María pea-aiya oe dejja huoojeacapoa Jesosa huohuiñaquiya Lazarojo. Jama huohuime ameecañaquiapoa ba'a: —Jesosa, miquea epeejji Lázaro oya jjeya queamanoneenee jaa.—

4Jesosa esohui Lazarojo shajja-ajjamajje jama poa ba'a: —Coma emanomeejjija oya epoquijeyomee'yojjitii pojjeama poaje. Quijjepishana Eyacuiñajji, oja Bacuaejja pea-ai queaca'anee queasajajanee nequi ojjañacuanaja ebajji oya jjeya queamanoneenee jaa.—

5Jesosaja Marta, oja shehue María, Lázaro pea-ai queajeanee poa. 6Jamatii Jesosa Lázaro queamanoneenee jaa shajja-ajjamajje majotiiya aniapoa so'o beca cahuime huisotii, poquijjima poa oque. 7Majoya aje Jesosaa o shajja-ajjajji poanicuana jama acapoa ba'a: —Cua'a, Judea meshiyasijje epoqui o'oya.—

8O shajja-ajjajji poanicuaa oya saja-acapoa jama ba'a: —Chojja esohuihuohuijji, yahuajopishana judío etiicuaa ma meshijo nequica dejjacuaa miya jajahuejjajea'yosa-acanaje meiya. ¿A'a mi cuamaya poquio'oyasapoani? ¡De! ¿Ajeo?—

9Jesosaa jama acapoa cuana ba'a: —¿A'a e'ejojonei epojjanei 12 horas poani? Epojjajo eshequiya jeaja'acanijo dejja ejjaquecuasajaquijji pojjeama. Queaja'a oya poquiani eshequija jeaja'ajo. 10Mecajje ca jama pojjeama, quea-aapojo oya jjaquecuasajaquichana epojja pojjeamajojoya.—

11Jesosaa jama apea-aicapoa o shajja-ajjajji poanicuana ba'a: —Esejaya epeejji Lázaro cahui'yonaje. Eya jjeyanei poquije o ishe'a'yohua.—

12Majoya o shajja-ajjajji poanicuana jama poa ba'a: —Emeshimesenei, Lázaro cahui'yomajje jja-ajaquije'yo. Jamajjeya cacahuiquiahua.—

13Jesosaa jama huohuiajjacapoa cuana Lázaro e'ejojonei manonei'yonajejo. O shajja-ajjajji poanicuaa ca Lázaro cahui'yani poso acapoa. Jesosaja esohui queaquehua shajja-ajjacapoa cuaa. 14Jamajjeya Jesosaa queaja'anee huohuicao'oyapoa cuana jama ba'a: —Epeejjicuana, oya Lázaro manonei'yonaje. Chama'yotii jaa. 15Eya Lazaronijje anijjima poanaje o mano'yonaje epojjajo. Jamaya queapame poanaje miquianajo. Jjeya miquianaya eya queaca'anee poani bamajje ejo jjashahuabaquije'yo. Cua'a, jjeya eseyaya oya baquije— jamaya Jesosa poa.

16Majoya aje Jesosa shajja-ajjajji dejja Tomás, ma Becajaa bajjani pea-ai, jama mimime poa peacuananijje ba'a: —Cua'a, Jesosanijje epoqui onijjetii ojee manopea-ai'yohuaya.—

Jesosa ojjañacuana shequimee'yojji poani, ojjañacuana ba'emeesahuajji poani pea-ai

17Majoya aje quijje Lázaro cuatro cahuime huiso onaja huananobia jjanijo jaajo Jesosaa pueblo Betania meshi bacañaquiapoa. 18Betania meshi Jerusalén meshichipineijo ojee jaapoa. Tres kilómetros hueshame jaapoa. 19Queahuiso judiocuana poquicapoa Marta baa, María baa pea-ai o yenoamapishana pomee'yohua oja no mano'yonajejo. 20Jesosa ejeojjijje poeje shajja-ajjamajje Marta cuayananaquiapoa o ja'ajjequiya. María ca eyiyejotii aniapoa, cuayaquijjima ca oma' poa. 21Martaa Jesosa huohuicajjequiapoa jama ba'a: —Jesosa, Emeshimesenei mi jiquiojo enequijojjemo ecue no mano'yojjima poquiae. 22Jamatii ecuea eba jjeyanei pea-ai miya Eyacuiñajjinijje mimianijo cua miya saña huisotii ohuaya acaje.—

23Jesosaa Marta huohuicapoa jama ba'a: —Marta, mique no shequimeecaje'yo.—

24Martaa oya saja-acapoa jama ba'a: —E'e, jamaya ecuea eba oya shequimeecaje'yo quijjenei epojja oe-ejjenei apoa poajo, Eyacuiñajjiya ojjaña emano'yocuana jaa shequimeecaje'yo pojjajo.—

25Jesosaa oya huohuitiicanequiapoa jama ba'a: —Marta, eya ca iña ojjañacuana shequimee'yojji poani. Eya ojjañacuana eshe pomeejji poani pea-ai. Jamajjeya ojjaña joya e'ejojonei ejo jjashahuabaqui'yanicuana oya mano'yomajje ba'etiitiije'yo Eyajo enijjetii. 26Ojjaña jiquio jjeya eshe ba'ecacuana so'o ejo jjashahuabaqui'yanicuana ejjasejjaqui'yojji pojjeamatii poaje ejo. ¿A'a miya jamaya jjashahuabaqui'yani ejo?—

27Oya saja-acapoa jama ba'a: —E'e Emeshimesenei, eya mijo jjashahuabaqui'yani miya Eyacuiñajjija huoojea ojjaña nahue'yojji epojji, Eyacuiñajjija Bacuaejja pea-ai. Mi poejjijo yahuajonei Eyacuiñajjija esohuihuohuijji poacuaa tehuecapoa maya jiquio jjeyanei miya nequi— jamaya Martaa acapoa.

Jesosa papea-aiapoa

28Majoya aje Marta Jesosanijje mimimajje poquiapoa oja shehue María huohuiya. Ohuaya oja shehue quehuajje huohuiquicapoa jama ba'a: —María, esohuihuohuijji Jesosa jjeya epoe jiquiacua. Ohuaya miya iyaacani oque epoquijji.—

29Majoya aje ohua jama huohuime acajje María nequisohuananamajje poquicuajiapoa Jesosa baa. 30Jesosaja Betania meshi bañaquijjima poa so'o. Jesosa nequiapoa ma o Martanijje mimimiminajejotiiya. 31Queahuiso judiocuana Marianijje mimiapoa o yenoama pomee'yojjijo. Majoya María nequisohuananaje poquicuajije bamajje judiocuana poquipea-aiapoa oquiquishijjitii. María oja no jjanijo ehuananobia jaahuasijje paa poquije poso acapoa cuaa.

32Majoya María Jesosa nequi bañaquimajje ecuioshajjajo anioqueñaquiapoa o nequipejjejo. Jama acañaquiapoa ba'a: —Emeshimesenei, miya jiquiacua epoejojjemo ecue no mano'yojjima poquiae— jamaya María poa onijje queayenonee.

33Jesosa María paneineiani, onijjejaajjicuana pea-ai paneineiani bamajje queayenonee popea-aiapoa. Queaquijijjiyenonee poa. 34Majoya Jesosaa huohuiajjacapoa cuana jama ba'a: —¿Achacua acuae quiaa Lázaro huananobiaquinaje?—

Jesosa jama saja-acapoa cuaa ba'a: —Emeshimesenei Jesosa, poeajja jocuama ejjaba-ajjaquiqui— jamaya poa cuana.

35Majoya Jesosa paapoa. 36Judiocuana o pani bamajje jama poa ba'a: —Bacue, Jesosa ojaya Lázaro queajeaneenee poanaje.—

37Becacuana ca jama poa ba'a: —Yahuajo Jesosaa dejja cojjama'tii cuaya jjacojjaja'ameequicanaje. ¿Yajjajje shai oya Jesosa mipoecuajinaje Lázaro jja-ajameequi'yohua? E'e pojja'a de Lázaro mano'yojjima poquiae oya epoecuaji poanajejojjemo.—

Lázaro shequi'yapoa

38Jesosa queayenonee poquiapoa meijjani huananobiacanajeyasijje. Meijjani nabacapajji'ya mei-ai enequiapoa. 39Majoya Jesosaa jama acapoa cuana ba'a: —Meijjani nabacapajji'ya mei-ai jeacajjajjacue.—

O jama poajo Marta, emano'yoja jjo'i, jama poa onijje ba'a: —Chojja Emeshimesenei, oya yahuajopishana mano'yonaje. Cuatro cahuime huiso jaa emano'yo, quea-ihuineenee oya jjeya.—

40Jesosa jama poa onijje ba'a: —Marta, eyaya miya huohuinaje e'ejojonei miya jjashahuabaqui'yomajje Eyacuiñajji queaca'aneetii queasajajanee nequi baje.—

41Majoya meijjani nabacapajji'ya mei-ai jeacajjajjacapoa cuaa. Jesosa eyahuasijje jjabajeasohuaquimajje Eyacuiñajjinijje mimiapoa jama ba'a: —Ecue Chii, eyaya miya bihuiaña ecuea esohui miyaya shajja-ajjañajojoya. 42Ecuea ebanei miyaya ecuea esohui shajja-ajjapoquiañatii. E'e, jamajje eya minijje mimiani ojjaña jiquio anicacuanaja queaja'anee eya ebajji. Eya e'ejojonei mique huoojea ojjaña nahue'yojji poani bacaje cuaa. E'e ecue Chii, mahuiso, apoa— jama mimimeya Jesosa poa oja Chiinijje.

43Eyacuiñajjinijje mimimajje Jesosa taaapoa jama ba'a: —¡Lázaro, cuaya'yocue!—

44Majoya aje Lázaro shequi'yomajje cuaya'yapoa daquiosheja onaja bebotii. Ojaya ejeojji, eme, oja sapa pea-ai ebebotii poa daquiosheja. Jamajojoya aje Jesosaa acapoa cuana jama ba'a: —Daqui o bebojji'ya pichojea'yocue o poqui'yojji.— Majoya aje Lázaro pichojeaca'yajje poqui'yapoa.

Judío etiicuana Jesosa quecuamee'yojjijo jjaniñebaquiapoa

(Mt 26.1-5; Mc 14.1-2; Lc 22.1-2)

45Queahuiso judiocuaa ma Marianijje poquinajecuaa Jesosaa Lázaro emano'yo jaa shequimeecaje'yo bacapoa. Jamajojoya aje queahuisocuana Jesosajo jjashahuabaqui'yapoa. 46Beca judiocuana ca Jerusalén meshiyasijje poquiapoa fariseo dejjacuana huohuiya ma Jesosaa Lázaro emano'yo jaa shequimeeca'yonajejo. 47Jamajjeya Eyacuiñajjija equi-aijo chacochacopoquiani etii poanicuaa, fariseocuaa pea-ai pea judío etii poanicuana Junta Suprema bajjani iyaacapoa ejjachichaquijji emimimimijji onijje Jesosajo. Jama acapoa cuaa ba'a: —¿Yajja acuae seya aje oya, de? Bacue, Jesosaa dejjaja ajjima'neineicuana queahuiso acani. 48Ecuaa oya iñameejjima ajo queahuiso judiocuana ojo jjashahuabaquicaje'yo oya Eyacuiñajjija huoojeanei poani bamajje. Majoya romano dejja etii poanicuaa judiocuana jama poani bamajje oja soldadocuana huoojeacaje eseya judío etii poanicuana huoojeacuayajea'yohua. Eseya etii popajeaje'yo. Eyacuiñajjija equi-ai queapame pea-ai quecuajeabichajeacaje'yo oja soldadocuaa— jama mimimeya judío etiicuana poa.

49Ma shequiajajo oe dejja Caifás bajjani Eyacuiñajjija equi-aijo chacochacopoquiani ebionei etii nequiapoa. Ohuaya judío etiicuana huohuicapoa jama ba'a: —Miquianajaya bajjimaneinei ajeo miquianaya jama mimime poani. 50Oe dejja ojjaña esejo camanoqui'yahua romano soldadocuaa ojjaña ese equecuajeyoca'yo cuahuajje— jamaya Caifás poa.

51Caifás Eyacuiñajjija equi-aijo chacochacopoquiani ebionei etii poani ma shequiajajo nequiapoa. Ojayanei ejjashahuabaquijji pojjeama poa ma ohua Jesosajo huohuicapoa esohui. Eyacuiñajjiya oya jama huohuimeesahuacapoa Jesosajo. Jesosa ojjaña judiocuanajo quijje manoje'yo Eyacuiñajjiya Caifás jamaya jjashahuabaquimeecapoa. 52Jesosa manoje'yo judío dejjacuana oopana nahue'yojjijo pojjeama. Oya ca manoje'yo ojjaña meshijo ba'ecacuanajo ma quijje ojo e'ejojonei jjashahuabaquije'yocuanajo pea-ai. Macuanaya Eyacuiñajjija bacua pea-ai poaje. Majoya quijje Jesosaa ojjaña Eyacuiñajjija bacuacuana ojjaña meshijo ani chichacaje'yo. 53Jamajjeya judío etii poanicuana ma pojjajotiiya ojee jjaquecuapanacooquiapoa Jesosajo.

54Jamajojoya aje Jesosa ona ojee ja'anei anijo poaepajeaqui'yapoa judiocuananijje. Oya ca Judea meshijo nequi poquiapoa pueblo Efraín meshiyasijje, meshijabo anichipineiyasijje. Ma meshijoya oya nequiñaquiapoa o shajja-ajjajji poanicuananijjetii.

55Judiocuanaja fiesta o jjachichaquijji poechipi'yapoa. Jamajjeya ojjaña judiocuana Jerusalén meshijo anicaje ojee ma yahuajonei Eyacuiñajjiya oja etiiquianaja bacuacuana nahuecapoajo shahuaba'yojji. Queahuisonee judiocuana ma Jerusalén meshijonei pojjeama nequica poquicapoa Jerusalén meshiyasijje. Ma judiocuaa Jerusalén meshi bañaquimajje oja mimishijo queaboejea epojji apoa acapoa fiesta ajjimahuajotii oja etiiquianaja esohui jama. 56Ma Jerusalén meshiyasijje poquicapoa judiocuaa Jesosa sa-ajjaneicanequiapoa. Eyacuiñajjija equi-aiquiquibohuasijje ojee mimimimica-aniapoa cuana jama ba'a: —¿Yajja jjashahuabaquime quiana poani Jesosajo? ¿A'a Jesosa poeje pea-ai jiquiacua fiesta po'yohua? ¿A'a epoejji pojjeama pojja'a?— jamaya poa cuana Jesosajo.

57Fariseo dejjacuaa, Eyacuiñajjija equi-aijo chacochacopoquiani etii poanicuaa pea-aiya jama huohuime acapoa cuana ba'a: —Jesosa bamajje oe ecuana huohuicuajihuacue o iñameejji— jamaya poa cuana.

Currently Selected:

JUAN 11: ESE

Highlight

Copy