JUAN 10

Jesosaa huohuicapoa cuana esohui ovejacuanajaahuanajjijo, ovejacuanajo pea-ai

1Majoya aje quijjepishana Jesosaa pea esohui huohuicapoa jama ba'a: —Eyaya ovejacuanajo huohuije. Bacue, jiquio esohui oveja peeijji'ya esecuejjanijjijo. Joya esecuejjanijje nobiquiajja poanicuana coma queamimishi siipojji poani. Oya huapajje poquiani nobiquiya. 2Joya esecuejjanineijje nobiquiani dejja comaya e'ejojonei ovejacuanajaahuanajjinei poani. 3Esecuejjaniqueyajji poani dejjaa esecuejjani ca'apejocani ovejajaahuanajji poani nobiquijji. Majoya ovejajaahuanajji dejjaa ojaya ovejacuana iyaacani oja bajjanineijo. Ovejacuana o jaahuanajji poanija esohuijo jjashajja-ajjaquiani. Ohuaya dojocuayaquicani esecueyasijje. 4Ojjaña ojaya ovejacuana cuayaquiajo ohuaya huidojocapoquiani. Jamaya ojaya ovejacuana oquiquishijji poquiani ojaya esohui eshajja-ajjaneijojoya. 5Pea dejjanijje o jaahuanajji pojjeamanijje ovejacuana poquiajjanei. Ovejacuana peacuanajo cuajicuajiquehuajeananani queacojjapi peajo ojaya esohui shajja-ajjajjimajojoya.—

6Jamaya Jesosaa esohui huohuicapoa cuana ovejacuanajo queaja'anee o jjashahuabaquimeejji nisho. Jamatii queaquehua poa cuanaja, yajja Jesosaa acani poso jjabaquicapoa cuana ovejajo.

Jesosa ovejajaahuanajji queapamenee poani

7Jamajjeya Jesosaa huohuicao'oyapoa cuana jama ba'a: —Jiquio esohui e'ejojonei eyaya quiana aña. Eya ca iña esecuejjani jayojja poani ovejacuana nobimeequijji poani, ecuayameequijji pea-ai. 8Ojjañacuana ma e poejjimahuajo poe'yonaje cuana ovejajaahuanajjinisho pohua e'ejojonei pojjeama poanaje. Oya siipojji, queajjashahuabaquitai pea-ai poani. Ovejacuana o jaahuanajjinisho poani dejjajo jjashajja-ajjaquiajja poanaje. 9Eya ca iña esecuejjani jayojja nequi. Ojjaña joya eque poeje cuana nobiquiya eyaya comacuanaya nahueje'yo. Jiquio ecua ovejacuana nobiqui'yani, cuayaquipoquiani pea-ai sipone queapamenee ijjiaa oya jayojja ecue nahue'yocuana eque poeje.

10—Bacue, siipojjicuana poeani oveja siiya, o queanee pomee'yohua pea-ai poeani, o cuia'yohua pea-ai. Mahuisoya asa-acani ohuaya. Eya caca poeapoa ojjañacuana ba'etiitiimee'yohua, queabihuinee ba'etiitiimee'yohua jjeyanei, quijje pea-ai. 11Eya ovejajaahuanajji queapamenee poani. Ovejajaahuanajji queapamenee oja oveja nahuejo manoje'yo. 12Bacue, jiquio pea dejjacuana ovejajaahuanajji poani bejjo yajji sosejjenei chacochacoani, mahuisojoneiya. Ebiocuiñajjicuana queamasenee poeyajo oveja nahuejjima acaje macuaa. Cuajicuajiquehuajeananaje joya bejjojo chacochacoani dejjacuana, ojayanei ovejacuana pojjeama poanijojoya. Majoya ebiocuiñajji queamasenee tohuaje ovejacuana nequiyasijje. Ohuaya jjajeaajajeameequicani ovejacuana queahuesha. 13Joya ovejajaahuanajjinisho poani dejja cuajicuajiquehuajeananani oya bejjo yajjineijo chacochacoanijjejojoya. Jjashahuabaneiquiajja ovejacuana jaahuanajjinei epojji.

14-15—Eya ca iña ovejajaahuanajji queapamenee poani. Jiquio ecua ecue Chiija eya ebaneinei poani jama pea-aiya ecuea ecue Chii ebaneinei. Jama pea-aiya ecuea ovejacuana ebaneinei poani. Oya jayojjaya ecuea ovejacuanaja eya ebanei, eya pea-ai shajja-ajjaneicani. Eya manoje'yo ecuea ovejacuana nahuejo. 16Pea ovejacuana ecuea enequi jiquiacua eque poejjima so'o. Eyaya oya quijje jjequije pea-ai. Ecuea esohuijo jjashajja-ajjaquimajje ovejacuana eque jjachichaquicaje oe epeei nequiyasijje. Majoya eya ojjaña ovejacuana jaahuanapoquiajji enei nequije.

17—Ecue Chiija eya queajeaneenee poani eya jjaiñameequijejojoya emano'yojji. Majoya quijje eya mano'yomajje shequije'yo. 18Chama'neinei dejja queaca'anee jamatii e manomee'yojji epojji. E jama sapomajje eyaneitii jjaquiaquije onaja manomee'yojji. Dejjacuana queaca'a poanijo pojjeama eya jjamanomeequije'yo. Ecuea eyami ecueanei equiajji emano'yojji. Jamajjeya eya mano'yomajje quijjepishana shequije'yo. Jama ejjapomeequi'yojjiya ecue Chiiya eya jiquio meshiyasijje huoojeacapoa— jamaya Jesosaa acapoa cuana.

19Jesosaja esohui shajja-ajjamajje judío etii poanicuana ojee ani oya jayojja pea-ai jjashahuabaquime pojjeama poa Jesosajo. Beca queapame jjashahuabaquiapoa, peacuana ca queaquehuatii. 20Judiocuana queahuisonee jama poa ojo ba'a: —De, ¿apiojji acuae oya shajja-ajjacani cuaa? Jesosa eshahuamase yamijji de, eniñepoqui'yo jayojja coma dejja.—

21Pea dejjacuana ca jama poa ojo ba'a: —Chojja, dejja eshahuamase yamijji jama mimime po-ajja. ¿A'a cuae eshahuamaseya dejja cojjama'tii cuaya jjacojjaja'ameequicame?— jamaya poa.

Etii poanicuana Jesosa sapo-ajjanei poa

22Ma ba'ijoya aje queahuoenee poa Jerusalén meshijo. Judiocuana ojee jjachichaquicapoa fiesta ea'yojjijo Eyacuiñajjija equi-ai apoa acapoa epojja shahuaba'yojji. 23Jesosa majotii Eyacuiñajjija equi-ai shashaquibojje jeojeonequiapoa “Salomonja Equishashaquibo” bajjanijje. 24Majotii o nequijo judío etiicuana oque jjachichaquio'oyamajje oya huohuiajjacapoa jama ba'a: —¿Acheshono acuae ecuana queaja'anee huohuije ba'a: “Eya e'ejojonei Eyacuiñajjija huoojea ojjaña nahue'yojji poani?” ¡Miya e'ejojonei jama poani jjabaquimajje ecuana jjeyanei jamaya queaja'a huohuicue!—

25Jesosaa saja-acapoa cuana jama ba'a: —Huohuimajamaja-ajjanaje aje quiana, jamatii eya miquiaaya e'ejojonei pojjeama poani poso aña. E'e, ecue Chiiya dejjaja ajjima'neineicuana eya ameesahuacani miquianajaya queaja'a ebajji nisho eya e'ejojonei oja huoojea poani. 26Miquiaaya ca eya e'ejojonei pojjeama poani poso aña miquianaya ecuea ovejacuana pojjeama poaniyajjejojoya. 27Ecuea ovejacuaa ecuea esohuinei shajja-ajjacapoquiani. Ecuea oya ebanei pea-ai. Jamajjeya equiquishijjitii poquianicuana enijjetii. 28Eyaya oya ba'etiitiimeeje'yo Eyahuasijje. Pea dejjacuanaja ecuea ovejacuana ejjeshejea'yojji pojjeamatii poaje, chama'nei pea dejja o jjasejjameequi'yojji epojji ejo. 29Ecue Chii e ovejacuana quiajji poani queaca'aneetii nequipoquiani. Jamajjeya chama'neinei pea oja quia ovejacuana jjeshejea'yojji epojji. 30Ecue Chii, eya pea-ai oe jayojja poani. Oya jjashahuabaquime pea-ai ecuana popoquiani— jamaya Jesosaa judío etiicuana huohuicapoa.

31Majoya aje o jama poani shajja-ajjamajje judío etiicuaa mei iñacao'oyapoa Jesosa jajahuejjajea'yojji nisho queaqueneneeya. 32Jesosaa ca jama acapoa cuana ba'a: —Ecue Chiiya eya queahuisonee dejjaja ajjima'neineicuana queapame ameesahuacanaje miquianajaya ebajji. Jamajjeya, ¿ache jiquio dejjaja ajjima'neinei eyaya queapame anajejo sosejje eya jajahuejjajea'yosa-aña quiaa meiya?—

33Judío etiicuaa oya saja-acapoa jama ba'a: —Ecuaaya miya dejjaja ajjima'neineicuana queapame anajejo pojjeama jajahuejjajeaje'yo meiya. Ecuaaya miya jajahuejjajeaje'yo miquea esohui Eyacuiñajjijo queaquehuaneenee huohuiañajojoya. Miya caca dejja pea-aiya, miya Eyacuiñajjinei poani miame.—

34Jesosaa huohuitiicapoa cuana jama ba'a: —Eyacuiñajjija esohui Moisesja tehuecuana ma miquiaa aña esohuijo Eyacuiñajjiya jama acapoa ba'a: “Miquianaya Eyacuiñajji jayojja pea-ai poani” jama tehuemeya acapoa yahuajonei. 35Eyacuiñajjija esohui etehue jaa e'ejojonei poanitii, pea po'yoajjanei. Maya tehuemeecapoa yahuajonei dejjacuana esohuihuohuijjicuanajo jama ba'a: “Miquianaya Eyacuiñajji jayojja pea-ai poani” jamaya tehuemeecapoa Eyacuiñajjiya. 36Eyacuiñajjiya caca oe eya babacacapoa jiquio meshiyasijje ehuoojeajji. Jamajjeya, ¿apiojji acuae miquiaaya eya queaquehuanee Eyacuiñajjijo mimiani poso aña? Eya Eyacuiñajjija Bacuaejja poani huohuiajje miquiana queaquenenee poanaje enijje. 37Bacue, eyaya ecue Chiiya acani jayojja mibamajje a'a ejo jjashahuabaqui'yojji. 38E'e jojonei eyaya jiquio ecua ecue Chiiya acani jama pea-aiya aña. Jamatii eya miquiaaya siajje poani poso aña. Jiquio eyaya anaje queapame dejjaja ajjima'neineicuana bacue quiaa. Eya jama anaje bamajje miquianaya queaja'a jjashahuabaquica'yojji poanaje ejo eya ecue Chii Eyacuiñajji jayojja pea-ai poanijo. Eyacuiñajji eya jayojja pea-aiya poani— jamaya Jesosa poa.

39Ohua esohui jama acajo judío etiicuaa Jesosa eiñajji nisho a-ajjacao'oyapoa. Majoya Jesosa jjanequishiñaquiapoa ojo, iñajjimatii poa cuanaja.

40Majoya aje Jesosa poquio'oyapoa Jordán cuei ojjemijiyasijje, ma yahuajo Juanya ona enaojjohuasijje iñajeanobiacanequinaje meshiyasijje. Majotiiya oya aniapoa. 41Cuamaya queahuisocuana jjachichaquinequiapoa Jesosa bajji. Jama poa cuana ojo ba'a: —Yahuajo dejjaja ajjima'neineicuana Juanaja ajjima'nei poanaje. Jamatii ohuaya jiquio dejja Jesosajo e'ejojonei huohuicanaje— jamaya poa cuana.

42Jamajojoya aje ma meshijo ba'ecacuana queahuiso Jesosajo jjashahuabaquica'yapoa.

Currently Selected:

JUAN 10: ESE

Highlight

Copy