HECHOS 20

Pablo Macedonia meshiyasijje poquio'oyapoa

1Majoya aje ojjaña queaquenenee ejjachichaqui nequicacuana poquijeyoca'yajo Pablohua iyaacapoa Jesosaja epeejjicuana majo ba'eca ehuohuijji ojaya esohui pajeajjima yajjijo. Majoya esohui o poquijjijo huohuinanamajje oya poquio'oyapoa Macedonia meshiyasijje. 2Pablohua Jesosaja epeejjicuana o queaca'a nequipoquijjijo esohui huohuicapoquiapoa Macedonia meshiyasijje ejeojjijje poquianiya. Queahuiso meshicuana ohuaya baquicanequiapoa. Majoya aje quijje Grecia meshi bacañaquiapoa. 3Ma meshijotiiya oya tres ba'ime huiso nequiapoa. Majoya ohuaya apoa pomajje Siria meshiyasijje ebesapoquijji nisho poajeya shajja-ajjacapoa judiocuaa oya quecuapanacani. Jamajjeya oya jjashahuabaquiapoa epoquio'oyajji ejeojjijje huacuaya Macedonia meshi jaajje. 4Mahuiso poquio'oyapoa onijje huacuaya ba'a: Sópater bajjani, oya Bereacuiñajji poa Pirroja bacuaejja. Pea ca Aristarco bajjani, pea ca Segundo, oya Tesalonicacuiñajji poa. Pea ca Gayo bajjani, oya Derbecuiñajji poa. Pea ca Timoteo, oya poquipea-aiapoa Pablonijje. Pea ca Tíquico, pea ca Trófimo pea-ai oya Asiacuiñajji poa. 5Mahuiso Jesosaja epeejjicuana ebionei poquio'oyapoa. Troas meshi ejeojjijo nequi ecuanajo jjaishoaquianiapoa cuana. 6Ecuaaya ca fiesta pahui shejjeemeejjima ijjiajji anaje. Majoya ecuana Filipos meshi ejeojjijo nequi besapoquiapoa bishe'aijo Troas meshiyasijje. Ecuaaya cinco cahuime huiso besapoquimajje bañaquiapoa cuana Troas meshijo ani. Majotiiya ecuana aniñaquiapoa siete cahuime huiso.

Pablohua Jesosaja epeejji Troas meshijo ba'eca baquicao'oyapoa

7Ma meshijoya aje ebionei epojjajo ecuana jjachichaquiapoa bobi Jesosa shahuabapoquiajji ojee eijjiajji. Majoya Pablohua Jesosaja epeejjicuana huohuicapoa. Ohuaya pea pojjajo epoquijjiyajjejojoya esohui queahuiso huohuitiicanequiapoa cuana quea-aonee mecajjetiicuanaya. 8Ecuana ma mecajjetii jjachichaquiapoa equi equecuayijji tres jamacoome eyahuasijje. Ma equecuayijjijoya cuaquijiji queahuiso jijinequiapoa. 9Oe dejjasho'i shacuima' nequi Eutico bajjani majo pea-ai aniapoa esecuejjani huejja ca'ajjimapejjejo eanioque ani. Pablohua ma mecajje esohui quea-aonee huohuitiitiicanequinajejojoya ma dejjasho'i majotii ani cahuiapoa. Oya cahuineimajje majotii tres jamacoo-aome equijo ani cahuioque'yapoa meshiyasijje. Ma ejjachichaqui anicacuana oya emano'yo jjequisohuaca'yapoa. 10Majoya aje Pablohua jaaoquequimajje dejjasho'i eoque'yo jaa mapacañaquiapoa. Ohuaya dejjasho'i jjequisohuamajje jama acapoa cuana ba'a: —¡A'a queayeno pojji quiana! Oya caca eshe.—

11Majoya Pablo o eshe ani ba'yomajje jaasohuaquio'oyapoa macuana sohuihuohuio'oyaa. Ohuaya pahui mijicapoa Jesosaja epeejjicuananijje bobi Jesosa shahuabapoquiajji eijjiajji. Oya ona sohuihuohuipoequitii jjapojjaquiapoa. Majoya Pablo jjapojjaquiajo poquiapoa. 12Ma dejjasho'i eoque'yo dojoca'yapoa cuaa eshequi'yo. Oya queapame'yo poani bamajje queabihuinee poquica'yapoa cuana.

Troas meshijo ani poquiapoa Mileto meshiyasijje esohuihuohuiya

13Majoya aje ecuana ebionei besapoquiapoa bishe'aijo Aso meshi ejeojjiyasijje Pablo ma meshijo nequi jeanaa. Jamaya oya mimiapoa ecuanaja oya majo nequi ejeanajji. Oya ca ejeojjijje poquiapoa cuamaya Aso meshiyasijje. 14Majoya aje ecuana Aso meshi ejeojjijo ba'e bañamajje Pablo anisohuapoa bishe'aiyasijje ecuananijje besapoquiya Mitilene meshiyasijje. 15Majoya Mitilene nasi meshijo ba'e ecuana pea pojjajo besapoquiapoa Samos meshi ejeojjiyasijje. Oe nasi Quío bajjani nequi meshijje ecuana jjayejjequiapoa bishe'aijo. Majoya pea pojjajo ecuana Samos meshiyasijje ba'eñaquiapoa. Majoya pea pojjajo ecuana ba'eñaquiapoa Mileto meshi ejeojjiyasijje. 16Jamaya ecuana besapoquipoquiapoa Éfeso meshiyasijje ba'eñaquijjima epojji Pablo majo Asia meshijo nequisapo-ajjanei poajojoya. Pablo Jerusalén meshiyasijje poquicuajisapoa Pentecostés epojja poechipianijojoya. Jamajjeya oya majotii Jerusalén meshijotii nequisapoa fiesta eajjijo.

Pablohua huohuicapoa Éfeso meshijo ba'eca Jesosaja epeejjicuanajaahuanapoquiajji poani etii dejjacuaa

17Majoya aje Pablohua Mileto meshijo nequiya iyaameecapoa cuana ma Éfeso meshijo nequi Jesosaja epeejjicuanajaahuanapoquiajji etii poani dejjacuana Pablo nequiyasijje epoejji. 18Majoya Jesosaja epeejjicuanajaahuanapoquiajji etii poanicuana poeajo Pablohua jama huohuime acapoa cuana ba'a: —Epeejjicuana, eya Asia meshijo ebionei nequi miquiaaya banaje achajja eya ba'epoquinaje. 19Eya ojjaña pojjajo Eyacuiñajjijo chacochacopoquinaje miquianaja meshijo nequi. Eya chacochacopoquinaje eyanei queaca'a poani poso jjabaquijjima. Judiocuaa majo nequicacuaa eya queacamajanee pomeecanaje, queayenonee pomeecanaje pea-ai. Eya jamaya ponequinaje cojjanajji queayenonee ma Eyacuiñajjiya e ameesa-acanaje echacojjicuanajo. 20Jamatii eyaya quiana huohuipoquianajetii miquiana queaca'a etiipoquijji esohuiya. Huohuipajeajjimatii quiana anaje. Miquianaja equijotiiya, ejjachichaquijji equijo pea-ai ja'anei esohui huohuipoquianaje quiana bichoamaa. 21Judiocuana, judío pojjeamacuana pea-ai oya esohuiya Eyacuiñajjijo pea jjashahuabaqui'yome epojjijo huohuineinaje cuana. Jesosa Quitojo eseja Emeshimeseneijoya ejjashahuabaqui'yojji huohuipea-aineinaje cuana. 22Jjeya ca iña Jerusalén meshiyasijje poquije. Edojjoshahuapameya eya cuamaya poquimeecani. Jamatii ecuea bajjima yajja shai eya acajjequije cuaa Jerusalén meshiyasijje aniñaquiajo. 23Jiquio ca ecuea ebaneitii ba'a: Cua e poquije meshicuanahuasijje Edojjoshahuapameya eya jama acani ba'a: “Queaneenee mi acapoquije cuaa so'o. Miya jeanobiameepea-aicaje cuaa.” 24Jamatii ecuea eyami enahueneijji pojjeama ma dejjacuanajo. E'e pojja'a eya quecuacaje'yo cuaa. Jamatii eya queaja'atii nequipoquisapoani Jesosajo echacochacopoquijjitii queabihui, emano'yojji pea-ai. Eyacuiñajjija echacojji ma ohua e acanaje ecuea yajji eyaya oe ajeyo'yosa-aña peajaajjicuana esohui queapame huohuipoquiajji epojji. Eyacuiñajjiya ojjaña queajeanee acani esohui huohuipoquiajetii cuana.

25—Eyacuiñajji ojjaña huoojeapoquiajjitii poani esohui huohuinaje quiana. Jjeya ecuea ebanei e'ejojonei quianaja jiquiojo anija ecue sohuihuohuija eya ebabeca'yojjitii pojjeama poaje. 26Jamajjeya jjeya eyaya huohuisa-aña quiana ojjaña joya Cuaqui-aiyasijje poquije'yo cuana ecuea oya huohuijjimajo pojjeama poquicaje'yo. 27Eyaya ojjaña Eyacuiñajjija ejjashahuabaquijji esohuicuana huohuipoquiajeyonaje quiana queaja'a miquianaja ebajji. Eyacuiñajjija esohui ecuea nahuejjimanei poanaje miquianajo. 28Jamajjeya oe jjajaahuananeiquipoquicue miquiana queaja'a ba'epoquijji. Eyacuiñajjija epeejjicuana jaahuananeipea-aicue. Edojjoshahuapameya miquiana nequimeecanaje o jaahuanapoquiajji epojji, o sohuihuohuipoquiajji epojji pea-ai. Ma Jesosaa oja ena' sosejje jjesheca'yonaje cuana jaahuananeicue quiaa. 29Ecuea eba e poqui'yajo pea dejjacuana poeje jiquio ecua ibia' queamase jama. Jesosaja epeejjicuana chama'yo asa-acaje macuaaya pea esohuijo siajje huohuicajje. 30E'e pojja'a jiquiojo jjeya oe miquiananijje nequi dejjaa etii poaniya quijje ohuaya esohui queatai huohuicaje'yo. Jesosaja epeejjicuaa oya e'ejojonei poani poso acaje. O shajja-ajjajjicuana epojji sa-ajjacaje. 31Jamajjeya oe jjabaneineiquicue ojo. A'a pajeajji eyaya tres shequiajame huiso epojjajo, mecajje pea-ai miquiana esohui huohuipoquianaje queahuiso. Cojjanajjiya queayeno nequiya eyaya quiana niñesheapoquianaje.

32—Jesosaja epeejji ecue dohuecuana jjo'icuana, eya Eyacuiñajjinijje mimiani miquiana oja jaahuanajjijo ojaya miquiana queajeaneenee. Eyacuiñajjiya queaca'a nequimeesahuacapoquije quiana oja esohui queapamejo. Ohuaya quiajeyocaje ojjaña cua ohua huohuicanaje huisotii oja epeejjicuanaja yajji. 33Ecuea miquianaja aquianacuana, bejjo, daqui pea-ai jeabajjimanei poanaje. 34Miquianajaya eya ebanei ecuea emeyanei eya chacochacopoquinaje ecuea aquiana, bobicuana jjeshepoquiajjijo, enijje nequipoquinajecuanaja pea-ai ijjiajjijo. 35Jamaya eya miquianajo jjabameequinaje chacochaconaje hueya-amanei. Joya aema'cuana poanija yajjijo, joya emano jaacacuanajo pea-ai chacochacocajji huohuinaje. A'a Jesosaja esohui pajeajji ma ohua acapoa ba'a: “Aquiana, bejjo pea-ai aema'cuana quiamajje queabihuinee poani cuana jiquio ecua aquiana peaja quia jjeshemajje jama pojjeama queabihuipishana poani”— jamaya Pablohua acanequiapoa cuana.

36Majoya aje ma etiicuana huohuijeyomajje Pablo ecuioshajjajo anioqueapoa Eyacuiñajjinijje emimijji etii poanicuananijje ojee. 37Ojjaña majo nequi Jesosaja epeejjicuanajaahuanapoquiajji dejjacuana queayenonee pacapoa ojo. Majoya Pablo mapacapoa cuaa, shemo tojjopea-aicapoa oya epoqui'yojji. 38Jamajjeya queayenonee nequiapoa cuana Pablohua esohui jama huohuime acana'yajje oja oya ebabeca'yojji pojjeama poaje. Majoya aje Pablonijjetii jaaoquequiapoa cuana bishe'ai ba'eyasijje queayenotii o poquije'yo baa.

Currently Selected:

HECHOS 20: ESE

Highlight

Copy