HECHOS 19

Pablo Éfeso meshijo nequiapoa

1Majoya aje Apolos bajjani dejja Corinto meshijotii nequijo Pablo meshi queayiyohuiso nequijje jjayejjequiapoa Éfeso meshiyasijje poquiya. Éfeso meshijo aniñaquimajje ohuaya Jesosaja epeejjicuana majo ani bacañaquiapoa. 2Majotii nequiya Pablohua jama huohuiajjame acañaquiapoa cuana ba'a: —¿A'a cuae Edojjoshahuapame yamijji ponananaje so'o quiana Jesosajo jjashahuabaqui'yomajje?—

Oya saja-acapoa cuaa jama ba'a: —Chojja de, ecuanaja caca esohui che oe macuana shajja-ajjajjimanei Edojjoshahuapamejo.—

3Pablohua huohuiajjacao'oyapoa cuana jama ba'a: —¿Ajea huohuijo jjashajja-ajjaquimajje acuae quiana jjaiñajeanobiameequinaje?—

Ma nequicacuaa saja-acapoa jama ba'a: —Juanja esohuicuana pea huohuicajje ecuana jjaiñajeanobiameequinaje.—

4Jamajjeya Pablo jama mimime po-o'oyapoa onijje ba'a: —E'e, Juanya iñajeanobiacapoquiapoa cuana ma Eyacuiñajjijo pea jjashahuabaqui'yome oja mimishijo poanajecuana. Juanya huohuicanequiapoa cuana ma quijje oquiquishijji poeje dejjajo ejjashahuabaqui'yojji. Ma quijje poeje dejjaya Jesosa bajjaniya poani.—

5Pablo jama poani shajja-ajjamajje jjaiñajeanobiameequiapoa cuana enaojjohuasijje Jesosa Emeshimeseneija bajjanijo. 6Majoya Pablohua oja eme oja yamibiajje huanacajo Edojjoshahuapame poeapoa oja yamidojjohuasijje nequi'yohua. Jamajjeya o oque nobiquimajje peaja esohuijo oja bajjimanei esohuijo mimimeecapoa cuana. Ma quijjenei Eyacuiñajjiya acajejo ohuaya huohuimeepea-aicapoa cuana queaja'anee. 7Ma Pablohua oja eme huanajji acapoa dejjacuana beshahuanei 12 huisome poanaje.

8Majoya Pablo tres ba'ime huiso poquinequiapoa judiocuanaja equi-ai ejjachichaquijji aniyasijje. Ohuaya meteamaneiya esohui huohuicanequiapoa cuana. Majo ejjachichaqui anica ohuaya jjashahuabameequisa-acapoa Eyacuiñajji ojjañacuana huoojeapoquiajjitii nequipoquianijo. 9Ma equi-aijo ejjachichaqui ani beca judío dejjacuana ca jjashahuabaqui'yosapo-ajjanei poa. Oya esohui ma Jesosajo huohuicani shajja-ajjamajamajamajje queaquijijjica'a poa cuana. Jamajjeya ojjaña cojjaneijo nequiya queatainee huohuicapoa cuaa Jesosajo oya Ejeojji Eyacua poani jayojjajo. Macuaa esohui queaquehua Jesosajo jama acani shajja-ajjamajje Pablo onijje jjapeepajeaqui'yapoa. Majoya ohuaya Jesosaja epeejjicuana dojocapoa oe equi-ai ejjasohuihuohuiquijji aniyasijje, Tirano bajjani dejjaja equi-aiyasijjeya. Ma equijotii nequiya Pablohua ojjaña pojjajo sohuihuohuicanequiapoa cuana. 10Jamaya ohuaya esohui huohuicapoquiacuanapoa beca shequiajame huiso nequiya. Jamajjeya ojjaña ma meshicuiñajjicuaa provincia Asia meshijo ba'ecacuaaya Jesosaja esohui shajja-ajjacapoa. Judío dejjacuaa, judío pojjeamacuaa pea-ai shajja-ajjacapoa. 11Eyacuiñajjiya Pablo dejjaja ajjima'neineicuana ameecapoquiapoa queahuiso. 12Macuiñajjicuaa Pabloja daqui ejasisicuana, oja daquinei pea-ai dojocanequiapoa emanocuana jaahuasijje. Queahuisocuana jja-ajaqui'yapoa oja daqui napamajje. Eshahuamasecuana oja yamijo nequi cuayameequica'yapoa pea-ai oja daqui ohua napacajo.

13Majo nequiya aje beca judío dejjacuaa ejeojjijje poquianiya eshahuamasecuana onaja yamijo nequi huoojeacuayajeameecapoqui'yapoa. Majoya Jesosa Quitoja bajjani asa-acapoa macuaaya eshahuamase cuayameequi'yojji. Jamajje eshahuamase jama acapoa cuaa ba'a: —Jesosa Quitoja bajjanijo, jiquio Pablohua huohuicanija bajjanijoya ecuaa huohuipea-aiaña mi cuayaqui'yojjijo.—

14Jamaya apea-aicapoquiapoa judío dejja Esceva bajjanija bacuaejjacuaa siete huisomeya. Oya Esceva Eyacuiñajjija equi-aijo chacochacopoquiani dejja etii poa. 15Majoya aje quijje oe eshahuamaseya Escevaja bacuacuaa huohuicajje o cuayaqui'yojjijo saja-acapoa jama ba'a: —Ecuea eba Jesosa, Pablo pea-ai ecuea eba. Miquianaya caca oe ecuea bajjimanei.—

16O jama mimime pojeahuajo dejja ma eshahuamase yamijji poani tohuananapoa Escevaja bacuaejjacuana nequiyasijje. Majoya ohuaya cuianeicapoa cuana. Oya queamaseneeyajjejojo oja daquicuana isajeajeacapoa pea-ai. Jamajojoya aje Escevaja bacuaejjacuana beshahuanei daquima' cuayacuajijeananaquiapoa esecueyasijje o yajjajo. 17Ojjaña Efesocuiñajjicuaa eshahuamaseya oja bacuaejjacuana cuianeicanaje shajja-ajjacapoa. Jamajjeya judiocuana, judío pojjeamacuana pea-ai queametenee pocapoa eshahuamaseya oya jama acanaje shajja-ajjamajje. Majoya macuiñajjicuaa jama bihuiame acapoa ba'a: —Emeshimesenei Jesosaja bajjani queasohuipojanee, queaca'anee poani pea-ai— jamaya acapoa queahuisocuaa.

18Jamajjeya ma Jesosajo jjashahuabaquica'yonajecuaa oja mimishicuana ja'anei huohuica'yapoa ojjañacuanaja eshajja-ajjajji ma yahuajo Jesosaja epeejji pojjimahua ba'eya acapoquinaje cuaa. 19Majoya aje eyamiquecua poanajecuaa oja esohui etehuecuana yecapoa edahuajeajji. Ojjañacuanaja cojjaneijo papeni dahuajeacapoa cuaa. Oja esohui etehuecuana ache sosehuiso poanaje sicoca'yapoa cuaa. Cincuenta mil eso'dojjo soseme huiso poa, esohui etehue queasosehuisonee dahuajeacapoa eyamiquecua poanajecuaa. 20Jamajjeya Emeshimeseneija esohui queahuesha dojocapoa cuaa peajaajjicuanaja ebajji. Queahuisocuaa Jesosa queaca'aneetii poanijo esohui shajja-ajjacapoa.

21Majoya aje quijje Pablo jjashahuabaquiapoa Macedonia meshiyasijje, Acaya meshiyasijje pea-ai epoquio'oyajji ma meshijo ba'ecacuana bao'oyaa. Jama jjashahuabaquime poa ba'a: —Eya ma meshicuiñajjicuana baquio'oyamajje Jerusalén meshiyasijje poquisapoaje o'oya quijje. Majoya quijje eya Roma meshiyasijje poquipea-aicajji Jerusalén meshijo ba'ecacuana bajeyomajje— jama jjashahuabaquimeya poa. 22Jamajjeya Pablohua ebionei beca o chacosahuajji poani Timoteo, Erasto pea-ai huoojeacoocapoa Macedonia meshiyasijje. Oya ca Pablo enequiapoa so'o Asia meshijotii.

Efesocuiñajjicuana quenequenecuajicapoa

23Ma eshequiajajotiiya aje Efesocuiñajjicuana queaquenenee pocuajicapoa esohui Jesosajo oya Ejeojji Eyacua poani jayojjajo ohua huohuicajje. 24Oe dejjaa Demetrio bajjaniya queahuisocuana quenequenecuajimeecapoa ma meshijotiiya. Oya meioshe dahuajji poa. Ohuaya meioshe dahuamajje equinishocuana necapoquiapoa oja eyacuiñajjinisho Artemisa epona bajjani anijji equi-ai jayojja. Jamajjeya ohuaya majoya bejjo queahuiso iñacapoquiapoa o jayojja chacochacome poani dejjacuaa pea-ai equinishocuana quiamajje. 25Majoya Demetriohua ojjaña equinisho nejji poanicuana joya oya jayojja chacochacome poanicuana jjachichameequicapoa. Jama acapoa cuana ba'a: —Dejjacuana miquianaja ebanei eseya queapame ba'epoquiani jiquio echacojjijo. 26Miquiaaya baña jiquio Pablo bajjani dejjaa huohuicanequiani queahuiso jiquio meshijo ba'ecacuana jiquio eseja ne equinishocuana pa ca peajja. Eseja eyacuiñajji e'ejojonei pojjeama poani pa ca quio eseja ne. Queahuisocuaa oya jama poani shajja-ajjaneicani. Jiquiojonei ba'ecacuaa pojjeama, queahuiso peajaajjicuaa Asia meshijo ba'ecacuaaya oya esohuiya shajja-ajjapea-aicani. 27Eseya esohui ohua jama huohuime acajo queayenonee poani. Eseja echacojji chama'yo pochana. Equi-ai queapamenee eseja iya Artemisa bajjani eyacuiñajji epona anijji o bihuiapoquiajji queapamepishana baca'yochana cuaa. Jjeya ca ojjaña Asiacuiñajjicuaa ojjaña pea meshicuiñajjicuaa pea-ai o anijji queapamenee bacani, oya bihuiacapoquiani pea-ai. Ohua esohui jama huohuicajje Artemisa epona, o anijji equi-ai pea-ai queapame pojjeama, queaca'a pojjeama bacaje'yo cuaa— jamaya poa Demetrio.

28Demetrio jama poani shajja-ajjamajje quenequenecuajicananapoa cuana oja esohuijo. Jama taaame poa cuana ba'a: —¡Ca-anitiitiiquiahua Artemisa epona Efesocuiñajjicuanaja eyacuiñajji!—

29Majoya aje oya taaamajamajaquijotii peacuana ca pea taaame ponequiapoa ojee. Queashajjaquijjoneenee taaame pocapoa cuana. Jamajjeya ohuaya beca dejjacuana iñaca'ajeacapoa. Gayo bajjani, pea Aristarco bajjani Pabloja epeejji, ma onijje poqui Macedonia meshijo nequi poe, iñaca'ajeacapoa. Majoya Gayo, Aristarco pea-ai jjequiyiyejeacapoa cuaa equi-ai esohuicuayajji aniyasijje. 30Pablo cuamaya poquisapoa onanijje mimiya ma dejja queamasecuana nequiyasijje. Jamatii Jesosaja epeejjicuaa Pablo nahuecapoa, poquimeejjima acapoa onaque. 31Pea dejjacuana etii poani Macedoniacuiñajjicuana huoojeajji poani Pabloja epeejji poa. Peacuana majotii Pabloja epeejji nequipea-aiapoa. Ma etiicuaa pea dejjacuana huohuimeequicapoa Pablo oya cuamaya ona queamase poequiyasijje poquijjima epojji. 32Ma dejjacuana queamase ejjachichaqui nequica becacuana taaamajamajapoa oe esohui. Peacuana ca pea esohui taaamajamajapoa. Ojjañatii majo ejjachichaqui nequica queaqueneneenee pocapoa. Jamatii queahuisoja bajjimanei poa ajeo queaquene jjachichacuajiquicanaje cuana. Queaquehua majo nequicaja poa. 33Majotii nequiya becacuaa Alejandro bajjani dejja huohuiajjacapoa ajeo queaquenenee mimimimiani cuana. Majoya judío dejjacuaa Alejandro iñayiyejeacapoa ona ejjachichaqui nequi huiyasijje. Majo nequiya ohuaya eme jeasohuacapoa ona jeca ani'yojji. Ma dejjacuana queaquenenee ejjachichaqui nequica esohui queaja'a huohuisa-acapoa ohuaya. 34Alejandro judío dejja pea-ai poani bamajje ma ejjachichaqui nequica taaamajamajanequiatiiapoa. Dos horas huisome queashajjaquijjotii ponequiapoa cuana. Oya esohuitiiya taaanequiapoa cuana ba'a: —Ca-anitiitiiquiahua Artemisa epona Efesocuiñajjicuanaja eyacuiñajji.—

35Majoya aje oe dejja Efesocuiñajjicuanaja echacojji tehuejji poaniya jeca nequimeeca'yapoa cuana onanijje emimijji. Oya jama poa ba'a: —Efesocuiñajji dejjacuana, shajja-ajjacue. Ojjaña peajaajjicuanaja eba jiquio meshijotii equi-ai queapamenee yani Artemisa eyacuiñajji epona anipoquijji. Eseyaya jiquio equi-ai o anijji jaahuanapoquiaña. Mei Artemisa jayojja epojji eyajje oque eseyaya nahueaña jiquio equi-aijotii. 36Chama'nei peaja esohui oya eyajje oque pojjeama yajji ojo. Jamajjeya quiana queneama po'yocue, jeca ani'yocue. A'a oya queanee ajeajji jjashahuabaquijjima nequiya. 37Jiquio dejjacuana quiaa jiquiacua jjequiyiyejeajeanaje jamatiiya. Aquiana queapame eseja Artemisaja equi-aijo ani ojaya siijjimanei. Artemisajo pea-ai esohui queatai mimijjimanei poanaje. 38Enequi Romano dejja etii poanicuana queaja'a ehuohuijji a'a queamimishi poani cuana. Jamajjeya Demetrio joya oya jayojja chacochacome poanicuana pea-ai queaquene pomajje camimiquiahua ma dejja etiicuananijje oya chacochacoani epojjajotii. Majoya ma dejja etii poanicuaa huohuicaje queaja'a a'a queamimishi poani cuana. 39Miquiaaya pea esohui o napameejji huohuisa-aje jjabaquimajje ojjañacuana queapame jjachichaquimeecue ebajji ache oja mimishi poanaje jiquio ecua quiaa jjeya anaje jama pojjeama. 40Jjeya ca quiana queaquehua mimicuajinaje. Majoya etii poanicuaa quiana queamasenee poani bacachana. Eseya jama queamasenee poani etiicuaa bacajje, ¿yajja esejaya oya acajji? Ohuaya eseya huohuiajjacajje ajeo quiana jama poani, ¿yajja saja-ame seya aje oya?— jamaya poa. 41Esohui jama amajje ohuaya huoojeaca'yapoa ma queaquenenee ejjachichaqui nequicacuana.

Currently Selected:

HECHOS 19: ESE

Highlight

Copy