HECHOS 18

Pablo Corinto meshijo nequiapoa

1Majoya aje Pablohua Atenas meshi jiñacapoa epoquijji Corinto meshiyasijje. 2Majotii nequiya Pablohua oe judío dejja Aquila bajjani bacapoa. Oya Ponto meshicuiñajji poa. Yahuajopishana Aquila, oja huanase Priscila pea-ai Italia meshijo ba'yapoa. Oya majo ba'eya poqui'yapoa Roma emeshimeseya Claudio bajjaniya ojjaña judiocuana Roma meshijo ba'e o poqui'yojji esohui jama ohua huohuime acajje. Majoya aje Pablo poquiapoa o baa. 3Aquilaa, oja huanaseya pea-ai oya echacojji acapoa ma Pablohua acapoquiapoa echacojji pea-aiya. Oya daquiequi socojji pea-ai poa. Jamajjeya Pablo aniapoa onijje so'o daquiequicuana socopoquiajji ojee. 4Ojjaña sábado ejomishocajji pojjajo Pablo poquinequiapoa judiocuanaja equi-ai ejjachichaquijji aniyasijje majo anicacuananijje mimimimiya Eyacuiñajjija esohuijo. Judiocuana, judío pojjeamacuana pea-ai esohui Jesosajo oja queaja'a ebajji ohuaya huohuiajjaneicapoa.

5Majoya aje quijje Silas, Timoteo pea-ai Macedonia meshijo ani poeajo Pablohua oja echacojji daquiequicuana socopajeacapoa judiocuana huohuineipoquiajji ojjaña pojjajo Eyacuiñajjija esohui queapamejo. Jesosa e'ejojonei Eyacuiñajjija huoojea ojjaña nahue'yojji poani ohuaya huohuiajjaneicapoa cuana. 6Ohua esohui Jesosajo jama huohuime acajje judiocuana iyehuiso o shajja-ajjasapo-ajjanei poa. Ma dejjacuaaya Pablo niñebacapoa. Jamajojoya aje Pablohua oja daqui jjequi-iyajajeacapoa ona queaja'a jjabaquijji oja esohui cajaa acanaje cuaa. Jama acacuanapoa Pablohua ba'a: —Miquianaya caca oe shajjama'tii jayojja poanijjejojoya queaneeneetii quiana nequipoquije'yo Cuaqui-aiyasijje. Ecuea esohui miquiana huohuijjimajo pojjeama quiana ca oe queaneeneetii poaje'yo. Jamajjeya jjeya eya poquinequijetii judío pojjeamacuana sohuihuohuiquiya.—

7Majoya Pablo judiocuanaja equi-ai ejjachichaquijjijo ani poqui'yapoa oe dejjaja Ticio Justo bajjanija equiyasijje. Oya Eyacuiñajji bihuiajji poa. Oya ba'yapoa judioja equi-ai ejjachichaquijji animiji cojjasahuajje. 8Crispo bajjani dejja judioja equi-ai ejjachichaquijjijo anicuana sohuihuohuijji etii poa. Oya, ojjaña oja huapa pojjeamacuana pea-ai jjashahuabaqui'yapoa Jesosajo. Queahuiso ma meshijo ba'ecacuana Corintocuiñajjicuanaya jjashahuabapea-aiquica'yapoa esohui Jesosajo Pablohua queaja'a huohuicajje. Macuanaya jjaiñajeanobiameequicapoa enaojjohuasijje. 9Majoya aje oe mecajje Pablohua jjacahuibaquiani jayojja aniya Emeshimesenei onijje mimije shajja-ajjacapoa jama ba'a: —Pablo, ¡a'a queamete pojji! Esohui queapame huohuipoquiacuetii cuana. ¡A'a oe esohui huohuipajeajji! 10Eya minijjetii nequipoquiani, chama'nei cuana pea mi queaneenee pomeejji jiquiojo. Jiquio meshijo queahuiso ecuea epeejjicuana poani ba'eca— jamaya acapoa. 11Jamajjeya Pablo oe eshequiaja seis ba'ime huiso pea-ai nequiapoa Corinto meshijotii. Ohuaya Eyacuiñajjija esohui huohuicapoquiapoa macuiñajjicuana.

12Majoya aje quijje Galión bajjani dejja Acaya emeshimese epojji nequi'yapoa. Jama nequijo judío dejjacuaa Pablo iñaca'ajeacapoa ojo queatai jjaniñebaquimajje. Oya dojocapoa cuaa emeshimese dejjaja ebajji, ejeanobiameejji. 13Emeshimese jama acapoa o iñaca'ajji epocuaa ba'a: —Jiquio dejjaa esohui queahuisocuana huohuitaicani. Ecuanaja romanocuanaja esohui etehue jama pojjeama ohuaya Eyacuiñajji bihuiameecani cuana.—

14Oya jama poanijotiiya aje Pablohua emimijji nisho a-ajjacapoa. Majoya aje emeshimese Galionya judiocuana jama huohuime acapoa ba'a: —De, jiquio dejja queamimishinee poanijojjemo, pea quecuajji poanijojjemo, eyaya miquianaja esohui shajja-ajjame. 15Oya jama pojjeama. Oya queamimishi pojjima' ecuanaja Romanocuanaja esohui etehuejo. Miquianaya ca queaquene poani oja esohuijo ma ohua huohuicani esohuijo, ebajjanicuanajo pea-ai. Miquianajaya judiocuanaja esohui etehuecuana ohua huohuitaicani quiaa aña. Jamajjeya miquiaaya oopanaatii a'a oya queamimishi poani bacue. Miquiaa oja mimishi huohuije eya shajja-ajjasapo-ajja. Eya ca iña o queanee pomeesapo-ajja, ¿ajeo?— jamaya poa.

16Majoya aje huohuijeyomajje emeshimese dejjaa judiocuana huoojeacuayacapoa esecueyasijje. 17Majoya aje judiocuaa ma oja huoojeacuaya dejjacuaaya Sóstenes bajjani dejja judioja equi-aijo etii poani iñaca'ajeacapoa. Majotiiya oya cuianeicapoa cuaa emeya emeshimese dejja ani cojjaneijotii. Jamatiiya Galionya baca-aniapoa cuana Sóstenes oja nahuejjima.

Pablo Antioquía meshiyasijje poquio'oyapoa

18Pablo queacahuihuisonee nequipoquiapoa Corinto meshijotii. Majoya Jesosaja epeejji majo ba'ecacuana esohui o poquijjijo huohuinanamajje Pablo Aquilanijje, Priscilanijje pea-ai bishe'aijo anisohuaquiapoa ebesapoquijji Siria meshiyasijje. Cencrea meshijo ba'eñaquimajje Pablo jjacuiapojijeaquiapoa bishe'aiyasijje anisohuaquio'oyajjimahua. Jamaya Pablo poa ma ohua Eyacuiñajji yahuajo huohuicapoa oja esohui oya jayojja ajeyocaje judiocuanaja ebajji. 19Majoya aje quijje Éfeso meshi ejeojjiyasijje ba'eñaquimajje Pablohua Aquila, Priscila pea-ai jiñacapoa epoquijji judiocuanaja equi-ai ejjachichaquijji aniyasijje. Majo ani judío dejjacuana Pablohua esohui huohuicapoa. 20Majo ejjachichaqui anicacuaa Pablo huohuiajjacapoa oya oja meshijo majotii enequipoquijji nisho. Pablo ca majotii nequipoquisapo-ajjapoa. 21Jamajjeya Pablohua esohui o poquijjijo huohuicananapoa macuanaya jama ba'a: —Eyacuiñajjiya huoojeacao'oyajje aje pojja'a mo jiquiacua miquianaque poeje o'oya.—

Majoya Pablo Éfeso meshijo ani bishe'aiyasijje anisohuaquio'oyapoa ebesajebe'yojji. 22Majoya aje Pablo huacuaya Cesarea meshiyasijje besajebe'yomajje ejeojjijje poqui'yapoa Jerusalén meshiyasijje. Jesosaja epeejji majo ba'ecacuana ohuaya queabihui esohui acañaquiapoa. Majo nequi Pablo poquiapoa Antioquía meshiyasijje.

23Majoya aje quijje Pablo Antioquía meshijo nequi poquio'oyapoa provincia Galacia meshiyasijje. Ma ohua esohui huohuicanequinaje meshicuanahuasijje huisotii oya poquinequio'oyapoa majo ba'eca Jesosaja epeejjicuana queaca'a nequimeesahuaa. Frigiacuiñajjicuana pea-ai ohuaya baquicapoa.

24Majoya Pablo pea meshicuanahuasijje poquinequianijo oe judío dejja Apolos bajjani Éfeso meshiyasijje poeapoa. Oya Alejandría meshicuiñajji poa. Oya queapamenee sohuijjochiamanei miminequiapoa. Apolosja ebaneinei poa Eyacuiñajjija esohui etehue. 25Pea esohuihuohuijji poani dejjacuaa Apolos sohuihuohuicapoquiapoa queaja'anee. Jamajjeya Apolosya hueya-ama sohuihuohuicapoquiapoa Efesocuiñajjicuana queaja'anee Eyacuiñajjija esohui. Jamatii ohuaya Juanja ma ona iñajeanobiajji poaja esohui oenei queaja'anee bacapoa. Pea esohuicuana Jesosajo ojaya ca oma' bajjima poa so'o. 26Apolosya judiocuanaja equi-ai ejjachichaquijjijo nequiya esohui huohuicanequiapoa cuana meteamaneiya. Majotii ohua esohui huohuicani shajja-ajjamajje Aquilaa, Priscilaa pea-ai oya dojotepecapoa onijje emimijji. Eyacuiñajjija esohui Jesosajo queaja'anee oja ebajeyojji onijje mimianiapoa. 27Majoya aje quijje Apolos Acaya meshiyasijje epoquijji jja-aquiequijo Jesosaja epeejjicuaa o queabihui poquimeejji esohui acapoa. Éfeso meshijo ba'ecacuaa Jesosaja epeejjicuana Acaya meshijo ba'ecaja yajji esohui tehuecapoa papenijo majo ba'ecaja Apolos queapame ajjequijji. Majoya aje Apolosya Acaya meshi bacañaquiajo queahuiso Jesosaja epeejji majo ba'ecacuaa oya asahuacajjequiapoa. Ma Jesosajo jjashahuabaquica'yonajecuaa jamaya acapoa oya Eyacuiñajji queapamenee poanijojoya. 28Apolosya judiocuana queahuiso ma meshijo ejjachichaqui anicacuana queaja'anee esohui huohuicanequiapoa. Mimima' anicapoa cuana yajja saja-ame yajji ohua queaja'a huohuicanajejojoya. Ohuaya esohui etehue bameecapoa cuana Jesosa e'ejojonei Eyacuiñajjija huoojea ojjaña nahue'yojji poani.

Currently Selected:

HECHOS 18: ESE

Highlight

Copy