HECHOS 17

Tesalonicacuiñajjicuana queahuiso quenequenecuajicapoa

1Majoya aje Pablo, Silas pea-ai ejeojjijje Anfípolis meshijje, Apolonia meshijje pea-ai jjayejjequimajje Tesalónica meshijo aniñaquiapoa. Ma meshijoya judiocuanaja ejjachichaquijji equi-ai aniapoa. 2Jamajjeya Pablo poquiapoa ma equi-ai ejjachichaquijji aniyasijje ejomishocajji sábado pojjajo ma ecua oya poquimajamajanequinaje jama po-o'oyaa. Tres sábado huisome poquinequiapoa cuamaya majo ejjachichaqui anicanijje mimiya Eyacuiñajjija esohuijo. Ohuaya Eyacuiñajjija esohui etehue acanequiapoa ona huohuijji. 3Pablohua huohuicanequiapoa cuana Eyacuiñajjija huoojea ojjaña nahue'yojji epojji ebionei manoje'yo. Majoya oya mano'yomajje shequije'yo jamaya ohuaya huohuicanequiapoa. Pablohua jama acapoa cuana ba'a: —Jiquio eya huohuiaña Jesosaya e'ejojonei Eyacuiñajjija huoojea ese nahue'yojji poani.—

4Ohua esohui jama huohuime acajje judiocuana beca jjashahuabaqui'yapoa Jesosajo. Jamajojoya aje macuana Pablonijje, Silasnijje pea-ai ojee nequipoquiapoa. Griego dejjacuana pea-ai ma Eyacuiñajji bihuiapoquiajji poanajecuana jjashahuabapea-aiqui'yapoa. Queahuiso eponacuana ma meshijo anica etiicuana poanija ehuanasecuana jjashahuabaqui'yapoa pea-ai. 5Majoya aje queahuisocuana jjashahuabaqui'yani bamajje judiocuana ma jjashahuabaqui'yoajja poanicuana queaquenenee pocapoa. Pablo, Silas pea-ai botiama acapoa macuaaya. Jamajjeya ma judiocuaa pea dejjamimishicuana, ma chacochacoajja plazahuasijje poaequinequianicuana, jjachichameequicapoa. Majoya oja chicha dejjamimishicuana queaquenenee epomeejji peacuananijje esohui queatai jeacuayacanequiapoa cuaa. Majoya aje judío dejjacuana ma Pablo botiama ajji poanajecuana poquicuajicapoa Jasonja equiyasijje Pablo, Silas pea-ai sa-ajja'yohua o jeacuayajeaa ojjaña ma ejjachichanequicaja ebajji. 6-7Pablo, Silas pea-ai oja equijo ani ba'yojjima acapoa cuaa. Jamajjeya equimese Jasón jjequiyiyejeacuayajeacapoa cuaa esecueyasijje edojojji o huoojeapoquiajji etii poanija ebajji. Jesosaja epeejji pea-ai ma equijo ani dojojeapea-aicapoa cuaa. Oja dojocuana etii poanicuana cojjaneijo nequimeemajje jama taaame poa cuana ba'a: —Jiquio dejjacuaa queahuisojaajjicuana queaquenenee pomeecuajicapoquiani cua oya poquije meshicuanahuasijje. Jiquiacua pea-aiya jjeya poeyanaje. Jasón dejjaa oya jjequinobiacanaje oja equiyasijje. Roma emeshimeseja esohuicuana oja tehuemee a-ajja oya. Jiquio dejjacuaa huohuicani pea emeshimese aje enequi, oya Jesosa bajjani— jama taaame ponequiapoa cuana.

8Ona jama taaametii poequi shajja-ajjamajje etiicuanaja o huoojeapoquiajji poanija bajjima poa yajja oya acajji. Queahuisoneecuana majo ejjachichaqui nequica queaquenenee poa. Peacuana ca queamete poa. 9Majoya aje Jasonya ma onijje nequi pea-ai dejjacuaa bejjo quiacapoa etii poanicuaa ejeanobiameeca poanijje. Majoya poqui'yapoa cuana huacuaya oja equiyasijje.

Berea meshijo nequiya esohui huohuicanequiapoa Pablohua, Silasya pea-ai

10Majoya aje ma mecajjetiiya Jesosaja epeejjicuaa ma meshijo nequicaa Pablo, Silas pea-ai quehuahuoojeacapoa Berea meshiyasijje poquiya. Berea meshijo aniñaquimajje poquiapoa judiocuanaja equi-ai ejjachichaquijji aniyasijje. 11Ma Bereacuiñajji judiocuana queaja'a jjashahuabaquicapoa Tesalonicacuiñajjicuana jama pojjeama. Macuiñajjicuaa Eyacuiñajjija esohui Pablohua huohuicaje shajja-ajjaneicapoa. Ojjaña pojjajo Eyacuiñajjija esohui etehue baneicapoquiapoa cuaa a'a Pablohua huohuicani esohui e'ejojonei poani ebajji. 12Jamajjeya queahuisocuana jjashahuabaquica'yapoa Jesosajo. Macuiñajjicuana, griego dejjacuana pea-ai jjashahuabaquica'yapoa. Ma meshijo nequica dejjacuana etii poani, oja huanasecuana pea-ai jjashahuabaquica'yapoa pea-ai. 13Majoya aje Tesalonicacuiñajji judiocuana Pablohua esohui huohuicani Berea meshijo nequiya shajja-ajjamajje poquicuajicapoa cuamaya. Ma ojo ejjachichaqui anicacuana queaquene epomeejji esohui jeacuayacañaquiapoa cuaa. Taaamajamajacanequiapoa ma meshijo ba'ecacuana eponañajii queaquenenee Pablonijje, Silasnijje pea-ai. 14Jamajjeya Jesosaja epeejjicuaa ma meshijo ba'ecaa Pablo huoojeacuajicapoa bae-aisahuahuasijje. Timoteo, Silas pea-ai ca majotii aniapoa Berea meshijotii, poquijjima. 15Ma Pablonijje poqui dejjacuana poquiapoa Atenas meshiyasijjeyee onijjetii. Majoya huacuaya poe'yapoa cuana Berea meshiyasijje. Timoteo, Silas pea-ai huohuicaña'yapoa cuaa Pablojo o poquicuajijjijo cuamaya Pablo nequiyasijje.

Pablo Atenas meshijo nequiapoa

16Jamajjeya Pablohua Atenas meshijo nequiya oja epeejjicuana Timoteo, Silas pea-ai ishoaca-aniapoa. Majotii jjaishoaquianiya ohuaya bacapoa Atenascuiñajjicuanaja eyacuiñajjinisho queahuisonee nequi oja meshijo. Jamajjeya oya queayenonee poa ma queahuiso nequi bamajjeya. 17Jamajjeya Pablo judío dejjacuananijje miminequiapoa Eyacuiñajjija esohuijo judiocuanaja equi-ai ejjachichaquijjijo nequi. Peajaajjicuana ma Eyacuiñajji shahuabapoquiajji poanicuananijje pea-ai miminequiapoa Eyacuiñajjija esohuijo queaja'a oja bajjijo. Pablo equi-ai aquianaquiajji acanijo mercadojo miminequipea-aiapoa Eyacuiñajjija esohui majo anicanijje. 18Majo nequiya aje dejjacuana queasapaja'a epicúreos bajjani, peacuana estoicos bajjani pea-ai mimijajisapoa Pablonijje oja esohui shajja-ajjamajje. Jama jjaniñebaquime poa cuana Pablojo ba'a: —¿Ajeo acue jiquio dejja queasapaquehua mimimajamajani jiquiacua eseque?—

Peacuana ca jama poa ba'a: —Oya peajaajjicuanaja eseja bajjimanei Eyacuiñajjija esohuihuohuijji poani pojja'a.— Jamaya esohui acapoa cuaa ojo Pablohua esohui queapame Jesosa shequi'yonaje huohuicanequinajejojoya. 19Jamajjeya ma dejja queasapaja'acuaa Pablo dojocapoa Areópago eyiyosisi ejjachichaquijji nequiyasijje. Oya huohuiajjacapoa cuaa jama ba'a: —¿A'a queaja'a bacajji jiquio esohui eyacua miyaya yenaje? 20Ecuanajaya bajjimaneinei jiquio esohui miyaya huohuiaña jjeya. Ecuana basapoani yajja poanijje shai jiquio esohui mique ye.—

21Atenascuiñajji dejjacuana, peajaajjicuana oja meshijo ba'eca'yo pea-ai peaja esohui eyacuacuana onaja ye shajja-ajjamajamajasapoa ojjaña pojjajo. Mahuisotiiya, esohuicuana eyacua shajja-ajjamajamajasa-acapoquiapoa cuaa.

22Majoya aje Pablo ejjachichaqui anicacuanayiyesamaneijo Areópago eyiyosisijo ani nequisohuapoa o huohuijji. Jama huohuime acapoa cuana ba'a: —Atenascuiñajjicuana, eyaya quiana baña miquianajaya eyacuiñajjicuana queahuisonee nequi. Oya bihuiamajamajapoquiaña quiaa. 23Eyaya baquinaje jiquio miquiaaya eyacuiñajjicuana queahuiso nequianaje miquianaja meshijo o bihuiapoquiajji yajji. Oe eyacuiñajji oja mei eiyachicha anijo o bihuiajji yajji etehue jaa eyaya banaje ba'a. “Jiquio Eyacuiñajji esejaya bajjimanei bajjani.” Jamajjeya oe Eyacuiñajji miquiaaya bihuiaña jamatii oya bajjimajo. Maya jiquio miquianaja bajjimaya Eyacuiñajjijo eyaya huohuisa-aña quiana.

24—Ma Eyacuiñajjiyaya meshi, ojjaña aquianacuana pea-ai panacapoa. Jamajjeya oya e-eyatahuatahuamese, eojjañacuanamese poani, Emeshimesenei pea-ai. Oya ca aniajja dejjacuanaja iya equijo. 25Jamajjeya eseya o ba'emeesahua-ajjaneinei. Ohuayanei caca oe eseya eshe ba'emeecapoquiani, shajoshajomeecapoquiani pea-ai. Ojjaña ese queapame ba'epoquijji aquianacuana quiacapoquiani ohuaya.

26—Ojjañajaajjicuana oenei dejjajo ohuaya jjapapameequicapoa ojjaña meshiyasijje ejaapoquijji. Ohuaya ojjaña dejjacuana eponacuana animeecapoquiani ache meshijo ba'eje, ache shequiaja huiso oya majotii ba'eje pea-ai. Jamaya ohuaya acapoquianitii cuana. 27Eyacuiñajjiya panacapoa ojjaña meshijo ba'ecacuana onijje ejjapeequipoquijji. Jamajojoya aje Eyacuiñajji e'ejojonei bacajji seja. Oya quea-esehuesha pojjeama nequiani ese ojjañajo. 28Eseya e'ejojonei ojo Eyacuiñajjijo ba'epoquiani, ohuaya eseya eshe pomeecani. Eseya caca oja pana, eseyaneitii pojjeama jjapanaqui. Yahuajo miquianaja esohuitehuejjicuaa acapoa ba'a: “Eseya Eyacuiñajjija pana oja eshe nequimee.” 29Jamajjeya quiana oe Eyacuiñajjija pana poaniya, ¡a'a oya oro, meioshe dejjaja ne poso ajji! Dejjacuaa oja jjashahuabaquijjineijo Eyacuiñajji jamaya poso acani. ¡A'a oe jama jjashahuabaquime popea-aijji quiana! 30Yahuajonei Eyacuiñajjiya oja mimishijo queaneenee pomeecuaji'yojjima acapoa cuana. Jjeya caca ohuaya ojjañajaajjicuana huohuineicani o pea jjashahuabaquime epo'yojji ojo ejjanahuemeequijji. 31Quijje Eyacuiñajjiya oe epojja acaje ojjaña meshijo ba'ecacuana ja'anei huohui'yojji ache Eyahuasijje poquije'yo, ache Cuaqui-aiyasijje poquije'yo. Eyacuiñajjija babacaa jama acaje'yo. Maaya se queaja'anee huohuicaje'yo ojjañacuana oja ba'ejjijo achacua poquicaje'yo. Oya e'ejojonei ojjañacuana queaja'a huohui'yojji epojji bacaje cuaa Eyacuiñajjiya oya shequimeeca'yonajejojoya.—

32Pablohua ma dejjacuana Eyacuiñajjija babaca shequi'yonaje emano'yo jaa esohui ohua jama huohuime acajje becacuaa soadojocapoa oja esohuijo. Peacuana ca jama poa ba'a: —Quijje ca pea pojjajo ecuaa jiquio esohui shajja-ajjao'oyasa-aña.—

33Majo ejjachichaqui dejjacuana jama poajo Pablohua jiñacapoa cuana. 34Becacuana ca oja esohuijo jjashahuabaqui'yapoa. Jamajjeya Pablonijje nequipoquiapoa. Oe dejja oja esohuijo jjashahuabaqui'yonajeja bajjani poa ba'a: Dionisio. Oya jjachichaquipoquiapoa Areópago eyiyoiyeao nequijo peacuananijje. Oe epona Dámaris bajjani jjashahuabaqui'yapoa. Peacuana pea-ai jjashahuabaqui'yapoa oja esohuijo.

Currently Selected:

HECHOS 17: ESE

Highlight

Copy