HECHOS 16

Timoteo bajjani dejja poquipea-aiapoa Pablonijje, Silasnijje pea-ai

1Majoya aje Pablo, Silas pea-ai poquiapoa Derbe meshiyasijje, Listra meshiyasijje pea-ai. Listra meshijo aniñaquimajje Pablohua oe dejja Timoteo bajjani Jesosaja epeejji bacapoa. Oja nae judío epona Jesosaja epeejji poa. Oja chii ca griego dejja peajaajji poa. 2Jesosaja epeejjicuana Listra meshijo ba'eca queapame mimicapoa ojo. Iconiocuiñajjicuana pea-ai esohui queapame mimicapoa Timoteojo. 3Jamajjeya Pablohua Timoteo dojosa-acapoa onijje poquiya o asahuaa. Oya oja dojojjimahua Pablohua oya cuiishasha jehuisejjameecapoa judiocuana ma meshicuanajo ba'eca'yo queaquene onijje epojjequi poanijje. Macuanajaya eba poa oja chii griego dejja poanaje, judío dejja pojjeama. 4Majoya aje ma oya poquinequinaje meshicuanahuasijje majo ba'eca Jesosaja epeejjicuana huohuicapoa cuaa. Ma Jesosaja babaca dejjacuaa esohui Jerusalén meshijo ani etii poanicuanaja tehue huohuicanequiapoa judío pojjeamacuana oja tehue jayojja eba'epoquijji. 5Jamajjeya Jesosaja epeejjicuana queahuiso meshijo ba'ecacuana queaca'a pocapoquiapoa ma esohuicuanajo jjashahuabaquimajje. Queahuiso pocapoquiapoa Jesosaja epeejjicuana epojji ojjaña pojjajo.

6Majoya aje quijje Edojjoshahuapameya Pablo ma onijje poquinajecuana pea-ai huohuicapoa jama ba'a: —A'a ca cuamaya poquijji provincia Asia meshiyasijje majo ba'eca esohui queapame huohuiya.— Jamajjeya jjayejjequiapoa cuana Frigia meshimijijje, Galacia meshimijijje pea-ai. 7Majoya aje Misia bajjani meshihuineijo aniñaquiapoa cuana. Majo aniya jjashahuabaquiapoa cuana Bitinia meshiyasijje epoquijji. Jamatii Jesosaja Edojjoshahuapameya cuama poquimeejjima acacuanapoa. 8Jamajojoya aje Misia meshijje queahueshapishana jjayejjequimajje poquiapoa cuana Troas ejeojji jaahuasijje. 9Ma meshi ejeojjijo aniya aje Eyacuiñajjiya Pablo jjacahuibameequiani jayojja ani mecajje bameecapoa oe dejja Macedoniacuiñajji epi nequi. Ma dejjaa huohuiajjaneineicanaje jama ba'a: —Ecuanaja meshi Macedonia bajjaniyasijje poecue, ecuana asahuahuacue.— 10Majoya aje Eyacuiñajjiya Pablo queaja'a huohuicaje jjabaquimajje ecuana jja-aquiapoa epoquijji Macedonia meshiyasijje. Jama acapoa Pablohua ba'a: —Eyacuiñajjiya eseya e'ejojonei iyaacani cuamaya epoquijji oja esohui queapame Quitojo huohuiquiya.—

Filipos meshijo nequiya sohuihuohuicanequiapoa cuana

11Majoya aje ecuana Troas meshi ejeojjijo ani bishe'aiyasijje anisohuaquiapoa ebesapoquijji. Ecuana besapoquicuajiapoa Samotracia nasi nequiyasijje. Majoya pea pojjajo ecuana besapoquiapoa Neápolis bajjani ejeojji jaahuasijje. 12Majo ani ecuana poquiapoa Filipos bajjani meshi ba'eyasijje ejeojjijje. Filiposcuiñajjicuana queahuiso Roma meshijo nequi poe'yo. Roma emeshimese dejjaa Filiposcuiñajjicuana huoojeacapoquiapoa. Queahuiso Macedoniacuiñajjicuana Filipos meshiyasijje poquinequiapoa aquiana jjesheya. Ma meshijotii ecuana aniñaquiapoa so'o. 13Ma meshijo ani ejomishocajji sábado epojjajo ecuana esecueyasijje cuayaquiapoa cueisahua jaahuasijje. Majotiiya judiocuana mimipoquinaje Eyacuiñajjinijje. Jamajjeya ecuana cuamaya anioqueapoa. Eponacuana majotii ejjachichaqui anica ecuaa esohui Quitojo huohuiapoa. 14Oe epona majo ani Lidia bajjani poa. Oya Tiatiracuiñajji epona daquicuana queanahuenee queahuo'onee quiapoquiajji poa. Oya Eyacuiñajji bihuiapoquiajji poa, jamajjeya ohuaya Eyacuiñajjija esohui shajja-ajjaneineicapoa. Majoya aje Emeshimeseneiya oya jjashahuabameequicapoa Pabloja esohuijo. 15Majoya aje ma epona Eyacuiñajjija esohuijo jjashahuabaqui'yomajje jjaiñajeanobiameequiapoa enaojjohuasijje ojee ojjaña oja huapa pojjeamacuananijjetii. Majoya ohuaya ecuana huohuiajjaneicapoa jama ba'a: —Miquiana eya e'ejojonei Jesosaja epeejji poani bamajje poecue ecuea equiyasijje aniya.— Jamaya ohuaya ecuana animeecapoa oja equiyasijjetii.

Pablo, Silas pea-ai jeanobiameecapoa cuaa

16Majoya aje pea pojjajo ecuaa poquio'oyaniya ma ona mimipoquiani Eyacuiñajjinijje meshiyasijje oe eponasho'i eshahuamase yamijji poeje bapoa. Eponasho'iya huohuicapoa ma quijje poaje cuaa oja ajjimahuajo. Jamajjeya e-eponasho'imesecuaa queabejjohuiso iñacapoa oja esohuijo ma quijje acaje cuaa ohua huohuicajo. Oya ca eponasho'i jamatii chacochacoapoa sosema'. 17Ma eponasho'iya ecuana Pablo pea-ai equijje acapoa. Jama taaame oya ponequiapoa ba'a: —Jiquio dejjacuana Eyacuiñajji Eyajo nequija chacojji poani. Jiquio dejjacuaa Eyacuiñajjija esohui huohuicani Eyahuasijje epoqui'yojjijo.—

18Ma eponasho'i queacahuihuisopishana ma meshijotii ani oya esohuiya jama pomajamajanequiapoa Pabloquiquishijji poquije. Jamajjeya Pablo hueyahueyapoa oya esohui ohua amajamajacapoquianijo. Majoya Pablo jjanequijeapajjaquiapoa o cojjaneijo ma oja yamijo nequi eshahuamasenijje emimijji. Jama mimime poa onijje ba'a: —Jesosa Eyacuiñajjija huoojea ojjaña nahue'yojji poanija bajjanijo eyaya miya oja yamijo nequi mi cuayaqui'yojjijo huohuiaña.— Pablohua esohui jama acajeahuatii eshahuamase cuayaquinana'yapoa.

19Majoya aje e-eponasho'imesecuaa oya shahuamase yamima'yo baca'yapoa. Ojo bejjo queahuiso eiñapoquiajji pojjeama poaje'yo bamajje ma dejjacuaaya Pablo, Silas pea-ai iñaca'ajeacapoa queaqueneya. Majoya oya dojocapoa cuaa etii poanicuanaja ebajji oya oja meshijo jjachichaquianiyasijje, plazahuasijje. 20Romano dejja etii poanicuana cojjaneijo Pablo, Silas pea-ai nequimeecapoa cuaa etiicuanaja a'a oya queamimishi poanaje ebajji. Jama acapoa cuaa ba'a: —Jiquio judío dejjacuaa esenijjejaajjicuana jiquiojo ba'eca queaquenenee pomeecuajicani. 21Jiquio nequi beca dejjaa pea esohuicuana yecani ese huoojeapoquiajji poani etiija esohui jama pea-ai pojjeama. Jamajjeya esejaya eshajja-ajjajji pojjeama pea-ai poaje ojaya esohui eseya romano dejjacuana poanijjejojoya.—

22Majoya aje queahuisocuana quenequeneneimajje cuajicuajicajebeapoa Pablo, Silas pea-ai iñaca'ajeaa. Romano dejja etii poanicuaa huohuicapoa o daqui huijjiajeajjijo. Majotii nequiya etii poanicuaa Pablo, Silas pea-ai acuiya cuianeineimeecapoa janobajjimanei. 23Majoya etii poanicuaa Pablo, Silas pea-ai cuianeimeemajje jeanobiameecapoa ejjajeanobiaquijji equiyasijje. Majoya ejeanobia anijaahuanajji poani dejja huohuineicapoa Pablo, Silas pea-ai oja jaahuananeineijjijo. 24Etii poanicuaa oya jama huohuime acajje o jaahuanajji dejjaa ejjajeanobiaquijji equi eyiyedojjoneiyasijje jeanobiacapoa o quehuapoquijjima epojji. Quibo jeyochichacapoa pea-ai acuijo majotii ejaajji.

25Majotii aniya aje mecashononei Pablo, Silas pea-ai sohuicuaya-aniapoa Eyacuiñajji bihuiajji, onijje mimianiapoa pea-ai. Ma pea ejeanobia anicacuaa oya shajja-ajjacapoa. 26Majoya aje oya jama mimime po-anijo meshi huehuahuehuacuajinanapoa. Ejjajeanobiaquijji equi meicuana jeaquenaquenacapoa. Jama poajoya ojjaña esecuejjani ca'ajjicuana majo nequi jjaca'apejojeananaquiapoa. Ojjaña majo ejeanobia anicacuanaja cadena oja quibojo ba'e jjapejojeaquinanapoa. 27Majoya aje jeanobiacuanajaahuanajji dejjaa shequimajje bacapoa ojjaña esecuejjani ca'ajjicuana ejjaca'apejojeaqui nequi. Jamajje ohuaya oja baa jjequihuijjiacapoa o jjayacuajeaqui'yojji nisho ojjaña ejeanobia anicacuana epoquiquehuajo poso. 28O jjayacua-ajjaquije'yo bamajje Pablo taaapoa jama ba'a: —¡A'a oe jjayacuajeaqui'yojji! Ojjañatii ecuana quiojo ani, poquiquehuajjima.—

29Majoya aje o jaahuanajji poaniya cuaquijiji huohuiajjacapoa ejeaja'ajji. Cuaquijiji jjeshemajje o aniyasijje oya cuajicuajinobiquiapoa queametenee, cacacacaqui. Nobiquimajje oya jaabichajeananaquiapoa Pabloja equibopejjeneijo, Silasja pea-ai. 30Majoya ohuaya Pablo, Silas pea-ai jjequicuayacapoa ehuohuiajjajji. Jama huohuiajjame acapoa ba'a: —¿Yajja acuae pocajji Eyacuiñajjija eya enahue'yojji?—

31Oya saja-acapoa jama ba'a: —Emeshimesenei Jesosa Quitojoya oe jjashahuabaqui'yocue. Ohuaya miya, ojjaña miquea huapa pojjeamacuana pea-ai nahuecaje'yo Cuaqui-aijo.—

32Majoya Pablohua, Silasya pea-ai oya Emeshimeseneija esohui huohuineicapoa ma oja equijo anicacuana pea-ai. 33Ma mecajjetiiya aje ejeanobiacuanajaahuanajji dejjaa Pabloja Silasja pea-ai esicuana shicuicapoa. Majoya oya, ma oja equijo anica oja huapa pojjeamacuana pea-ai jjaiñajeanobiameequiapoa enaojjohuasijje. 34Majoya ohuaya Pablo, Silas pea-ai dojocapoa oja equiyasijje bobiaa. Jamajjeya oya, ma oja equijo anicacuana pea-ai queabihuinee poa Eyacuiñajjijo oya Jesosajo jjashahuabaqui'yonajejjejojoya.

35Majoya aje pea pojjajo mecajjeahua dejja etii poanicuaa soldadocuana huoojeacapoa ejeanobiacuanajaahuanajji poani dejja huohuiya oja Pablo, Silas pea-ai huoojeacuaya'yojjijo. 36Jamajjeya ejeanobiajaahuanajji dejjaa Pablo jama acapoa ba'a: —Etii poanicuaa eya huohuicanaje miquianajo ecue miquiana ehuoojeacuaya'yojjijo. Jamajjeya quiana jjeya queabihui poquije'yo.—

37Pablohua ca soldadocuana o jaahuanajji epo acapoa jama ba'a: —Ecuana ca quio romano dejja poani. Etii poanicuaa ecuana jamatiiya cuianeimeecanaje acuiya ojjañacuanaja ebajji. Ojaya bajjimajotii a'a ecuana queatai poani jamatii cuianeimeecanaje. Majoya etiicuaa ecuana jeanobiameecanaje ejjajeanobiaquijji equiyasijje. Jjeya caca ecuana quehuahuoojeacuaya'yosa-acani cuaa. ¡Chojja de! Oya ca oe ma etii poanicuana capoeahua ecuana jeacuaya'yohua.—

38Jamajjeya ejeanobiajaahuanajji soldadocuaa huohuiquicapoa etii poanicuana Pabloja esohui. Pablo romano dejja pea-ai poani shajja-ajjamajje etiicuana queametenee ponanapoa ojo. 39Jamajojoya aje romano etiicuana poquiapoa Pablo baa, Silas baa pea-ai onijje mimiya o jjabeimeequi'yohua. Ejjajeanobiaquijji equijo ani jeacuayameequica'yapoa cuana. Majoya etiicuaa Pablo, Silas pea-ai huohuiajjaneicapoa o oja meshijo ani poqui'yojjijo. 40Majoya aje Pablo, Silas pea-ai ejjajeanobiaquijji equijo ani cuayaqui'yomajje poquiapoa Lidia eponaja equiyasijje. Jesosaja epeejjicuana ma meshijo ba'ecacuana bamajje huohuicapoa esohui o queaca'a nequipoquijjijo. Majoya Pablo, Silas pea-ai poqui'yapoa.

Currently Selected:

HECHOS 16: ESE

Highlight

Copy