HECHOS 15

Jerusalén meshijo jjachichaquicapoa etii poanicuana emimimimijji problemajo

1Ma ba'ijo aje becacuana Jesosaja epeejji judío dejja Judea meshijo nequi poeapoa Antioquía meshiyasijje. Ohuaya esohui jama huohuime aquicapoa majo ba'ecacuana ba'a: —Miquianaya Jesosaja epeejji mijjacuiishashajehuisejjameequimajje, ma ecua yahuajonei Moisesya esohui acapoa cuana jama mijjapomeequimajje, miquianaya Eyacuiñajjija enahue'yojji pojjeama poaje.— 2Ohuaya esohui jama acaje shajja-ajjamajje Pablo, Bernabé pea-ai jjamimicuiajeanobiaquiapoa onijje. Jamajojoya aje Pablo, Bernabé, peacuana pea-ai bajjanicapoa ma meshijo nequica Jesosaja epeejjicuaa epoquijji Jerusalén meshiyasijje Jesosaja babaca dejjacuananijje mimiquiya. Jerusalén meshijo Jesosaja epeejjicuanajaahuanapoquiajji poani etiinijje mimipea-aiya poquiapoa cuana ma Judea meshijo nequi poecuaa a'a esohui e'ejojonei queapame huohuicani ebajji.

3Jamajjeya Jesosaja epeejjicuana ma Antioquía meshijo esohuijo jjachichaquipoquianija huoojea, Fenicia meshijje, Samaria meshijje pea-ai jjayejjequicapoa epoquijji Jerusalén meshiyasijje. Ma meshicuanajo ba'eca Jesosaja epeejjicuana huohuicananapoa cuaa jjayejjequijeya. Queahuiso judío pojjeamacuaa oja etiiquianaja esohuicuana cajaa aca'yani Jesosajo ejjashahuabaqui'yojji huohuicananapoa. Ma epoquicuaa jama huohuime acajje macuiñajjicuana Jesosaja epeejji queabihui pocapoa oja huohui esohuijo.

4Majoya aje quijje Pablo, Bernabé pea-ai Jerusalén meshijo aniñaquiajo Jesosaja epeejjicuaa queabihui acajjequiapoa. Jesosaja epeejjicuanajaahuanapoquiajji etii poanicuaa, Jesosaja babaca dejjacuaa pea-ai queapame apea-aicajjequiapoa ma poquinajecuana. Majoya aje Pablohua, Bernabeya pea-ai huohuicañaquiapoa ojjaña ma Eyacuiñajjiya oya chacomeecanaje huisotii peajaajjicuanaja meshijo nequi. 5Majo ejjachichaqui anicajo becacuana fariseo dejja Jesosajo ejjashahuabaqui'yo nequisohuapoa emimijji. Jama mimime poa cuana ba'a: —Jiquio Jesosaja epeejji eyacua poani, peajaajji judío pojjeamacuana cuiishashajehuisejjameecue. Ojjaña Eyacuiñajjija esohui Moisesja tehuecuana ojaya ajeyocajji pea-ai— jamaya acapoa.

6Jamajjeya Jesosaja babaca dejjacuana, pea Jesosaja epeejji etii poanicuana pea-ai jjachichaquiapoa ojee a'a ojaya esohui Moisesja tehuecuanajo queapame acani ebajji. 7Majoya oya pea esohui pea esohui mimianijotii Pedro nequisohuapoa o huohuijji. Jama huohuime acapoa cuana ba'a: —Ecue dohuecuana, shajja-ajjacue mo quiaa. Miquianaja ebanei Eyacuiñajjiya eya babacacanaje oja esohui queapame judío pojjeamacuana sohuihuohuicooquijji epojji. Macuana Jesosajo ejjashahuabapea-aiqui'yojji eyaya esohui huohuicooquinaje. 8Eyacuiñajjija ojjañacuanaja ejjashahuabaquijji ebaneinei. Ohuaya judío pojjeamacuana oja Edojjoshahuapame quiapea-aicanaje ojjañacuanaja ebajji Eyacuiñajjiya oya pea-ai queajeanee acani. Jiquio eseja eyamijo nequiya oya Edojjoshahuapameya Eyacuiñajjiya ojaya eyamijo enequi'yojji quiapea-aicanaje. 9Jamajjeya Eyacuiñajjiya judío pojjeamacuana eseya jayojja pea-ai bacani, oya jayojjaya. Judío pojjeamacuana jjashahuabaqui'yajo Eyacuiñajjiiya oja mimishicuana chama'yo acani, cuijeaca'yani. 10Jamajjeya, ¿yajjajo acuae quiana Eyacuiñajjija ejjashahuabaquijji jama posapo-ajjanei poani? Miquiaaya Jesosaja epeejji judío pojjeama poanicuana ojjaña Moisesja esohui etehuecuana ajeyomeetiisa-aña. Ma esohuicuanaya esejaya etiiquianaja ajeyojjima poa. Esejaya pea-ai jjeya eajeyojji pojjeamatii poani. 11Bacue, eseya caca oe jjashahuabaqui'yani Emeshimesenei Jesosaa eseya judiocuana nahueca'yani ojaya eseya queajeanee poanijojoya, eseyanei queapame poanijotii pojjeama. Judío pojjeamacuana pea-ai ohuaya nahuepea-aica'yani Eyacuiñajjiya oya jama sapomajje ojayanei ejjashahuabaquijjijo— jamaya Pedro poa.

12Majo ejjachichaqui anicacuaa mimima'nei aniya shajja-ajjaca-aniapoa ohua jama huohuime acaje esohui. Majoya aje Pablohua, Bernabeya pea-ai huohuicapoa cuana Eyacuiñajjiya dejjaja ajjima'neineicuana oya ameecanaje judío pojjeamacuanaja meshijo nequi. 13Pablo, Bernabé pea-ai mimijeyoajo Santiagohua jama acapoa cuana ba'a: —Jesosaja epeejjicuana, shajja-ajjacue mo quiaa. 14Jjeya Simón Pedrohua huohuicanaje Eyacuiñajjiya judío pojjeamacuana queapame apea-aicani. Ohuaya peajaajjicuana babacacani ojayatii epo'yojji. 15Ma ecua yahuajonei esohuihuohuijji poacuaa tehuecapoa jama pea-aiya ohuaya judío pojjeamacuana jjeya acani. Jama tehueme acapoa cuaa yahuajo ba'a:

16“Quijje jama poajo eya poeje o'oya.

Davidja daquiequi eoque'yo jaa eyaya iyaje'yo.

Queapamenee iyaje'yo ma eoque'yo jaa.

Jamajjeya eyaya queapamenee iyaje'yo.#15.16 Nota: Jiquio etehue esohui Davidja equijonei pojjeama mimiani. Oja osecuacuanajo ca jiquio esohui mimiani.*

17Majoya eya jama aje'yo bamajje

queahuisocuaa Emeshimesenei sacaje ojo ejjashahuabaqui'yojji.

Jamaya queahuiso judío pojjeamacuana pea-ai

joya ejo ejjashahuabaqui'yocuana ecueatii popoquije'yo.

18Yahuajoneitii Emeshimeseneiya huohuicapoa jamaya ohuaya acaje quijje.

Oya esohuiya ohuaya oja esohuihuohuijji poacuana huohuimeecapoa.”—

19Majoya Santiagohua jama huohuime atiicapoa cuana ba'a: —Jamajjeya eya jjashahuabaquiani judío pojjeamacuanajo joya Jesosajo jjashahuabaqui'yocuanajo. ¡A'a esohui ma yahuajonei tehuecapoa cuaa ajeyomeejji cuana! ¡Moisesja tehuecuana ca queacamajanee! 20Mahuisoya esohui tehuecajji Jesosaja epeejji judío pojjeamacuana oya jayojja eba'epoquijji ba'a: Bobicuana joya eyacuiñajjinishojo onaja iya ijjiaca-ajjajo esohui tehuecue cuana. Peacojjojji poca-ajja pea-aijo esohui tehuecue. Ijjiacajjicuanaja yami joya epiqui jeahuahuojeaja, ehui'i'yo pea-aija ijjiaca-ajjajo tehuecue cuana. Oja ena' pea-ai ijjiaca-ajja. 21Jama tehueme acue judío pojjeamacuanaja ebajji, judiocuana joya ojjaña ejomishocajji sabadojo judiocuanaja equi-aijo ejjachichaquipoquijji Eyacuiñajjija esohui Moisesja tehuecuana shajja-ajjajjitii poanicuana queaquene epo poanijje onijje— jama huohuimeya acapoa cuana.

Papeni tehuecapoa cuaa judío pojjeamacuanaja yajji

22Majoya aje Jesosaja babaca dejjacuaa, oja epeejjicuanajaahuanapoquiajji etii poanicuaa, pea Jesosaja epeejjicuaa majotii nequiya pea-ai babacacapoa onijjejaajji Jesosaja epeejjicuana epoquijji Antioquía meshiyasijje. Pablonijje, Bernabenijje pea-ai epoquijji ojee bacapoa ache poquije. Jamajjeya Judas ma bajjani pea Barsabás, pea dejja Silas bajjani pea-ai babacacapoa cuaa epoquijji. Onijjejaajji Jesosaja epeejjicuaa oja babacacuana queapame poani bacapoa. 23Ma poquije dejjacuananijje esohui oja tehue huoojeacapoa cuaa. Jama tehueme acacuanapoa ba'a:

“Ecuaaya Jesosaja babaca dejjacuaa, Jesosaja epeejjicuanajaahuanapoquiajji etii poanicuaa pea-ai miquiana Jesosaja epeejji judío pojjeama poani Antioquía meshijo ba'eca, Siria meshijo ba'eca, Cilicia meshijo ba'eca pea-ai jiquio ebionei esohui miquiana queabihui pojji aña esohui queapame. 24Ecuaaya shajja-ajjanaje becacuana jiquiojo nequi cocuamaya poquinaje jamatii ecuanaja huoojea pojjeama, oyatii. Ma poquinaje dejjacuaa esohui queaquehua huohuiquicanaje quiana. Jamajjeya miquianaya jjabataiquinaje oja huohui esohuijo. Queayeno poanaje quiana ohua esohui huohuitaicajje. 25Jamajjeya ecuana ojee mimimiminaje oya jjashahuabaquime epojjijo. Jiquio ecuananijje ani Jesosa epeejjicuana huoojeaje cocuamaya miquiana baa. Pablo, Bernabé pea-ai jiquio ecuanaja queajeanee poani dejjacuana poquipea-aije onijje. 26Pablohua, Bernabeya pea-ai Emeshimesenei Jesosa Quitoja esohuijo huohuicanijojoya pea dejjamasecuaa oya chama'yotii pojeamee'yosa-acanaje. 27Jjeya ecuaaya Judas bajjani dejja, Silas pea-ai huoojeaña miquianaque. Oya mimije ojjaña miquiana cojjaneijo nequimajje miquianaja queaja'a ebajji jiquio ecuaa tehuenaje esohuiya. 28Edojjoshahuapameja ejjashahuabaquijji ecuana oya jayojja pea-ai jjashahuabaquime poani. Jamajjeya ecuanaja ma yahuajonei Moisesya tehuecapoa esohui miquiana eajeyomeejji pojjeama. 29Mahuisoya esohui ecuaa baña queapame miquiana oya jayojjaya eba'epoquijji ba'a: Noe yamicuana enaa jehui'yo eyacuiñajjinisho quiajji onaja iya ijjiaca-ajja. Ijjiacajjicuana epiqui jeahuahuojeaja eyami, ehui'i'yocuanaja pea-ai ijjiaca-ajja, oja na' pea-ai ijjiaca-ajja majoya ecuaa quiana tehueaña. Peacojjojji poca-ajja pea-ai tehueaña. Jiquio esohuicuana jayojja queapame ba'epoquimajje quiana queapame poaje. Mahuisoya ecuanaja esohui etehue” jama tehuemeya acapoa cuana.

30Majoya aje etii poanicuananijje mimijeyomajje oja babacacuana poquiapoa Antioquía meshiyasijje etii poanicuanaja tehue esohui dojohua. Majo aniñaquimajjeya jjachichameequicapoa cuaa Jesosaja epeejji majo ba'eca etii poanicuanaja tehue esohui equiajji. 31Majoya oja tehue esohui shajja-ajjamajje queabihui pocapoa majo ba'eca Jesosaja epeejji poanicuana. Etii poanicuanaja oja ejjashahuabaquijji etehue jaa queapame poani camaja-ama oya jayojja eba'epoquijji bacapoa majo ba'ecaa. 32Judas, Silas pea-ai esohuihuohuijji ponequiapoa. Jamajjeya macuiñajji Jesosaja epeejji poanicuana queabihui pomeecapoa ohua esohui queaja'a huohuicajje. Esohui o queaca'a nequipoquijjijo huohuipea-aicapoa. 33-34Majoya aje quijje queacahuihuiso poajo ma meshijo ba'eca Jesosaja epeejjicuaa ma oque poe Judas, Silas pea-ai poquimeesahuaca'yapoa. O poqui'yojji esohui queapame acapoa cuaa queabihuiya. Jamajjeya poqui'yapoa cuana huacuaya ma o huoojeajji poanajeja meshiyasijje. 35Pablo, Bernabé pea-ai ca majotii Antioquía meshijotii nequiapoa so'o, poqui'yojjima ca oma poa. Ma meshijo ba'eca Jesosaja epeejjicuana sohuihuohuicapoquiapoa Pablohua, Bernabeya, pea dejjacuaa pea-ai. Esohui queapame Emeshimesenei Jesosajo huohuimajamajacanequiapoa Jesosaja epeejji pojjeamacuana pea-ai.

Pablo Bernabejo jjasejjaquiapoa, ojee poquinequipajeapoa

36Majoya aje quijjepishana Pablohua jama acapoa Bernabé ba'a: —Cua'a ejjaba-ajjaquiquio'oya Jesosaja epeejjicuana ma ese poquinequinaje meshicuanahuasijje. A'a cuana queapame ani baa epoqui o'oya macuanaya eseja sohuihuohuiqui.—

37Bernabeya ma pea dejja Juan bajjani cuamaya dojosa-apea-aicapoa. Oya bajjani pea Marcos poa. 38Pablo ca o dojosapo-ajjanei poa. Yahuajopishana Panfilia meshijo aniya Marcosya Pablonijje, Bernabenijje pea-ai chacochacoqui oya jeacana'yapoa. Ohuaya oya chacosahuapajeacapoa, jamajojoya aje Pablo o dojobecasapo'yoajjapoa. 39Jamajjeya ma beca dejja Pablo, Bernabé pea-ai mimijajiapoa Marcosjo, yajja Marcos acajji. Pablo, Bernabé oya jayojja pea-ai jjashahuabaquime mipomajje Marcosjo jjasejjaquiapoa. Majoya Bernabeya Marcos dojocapoa onijjetii. Chipre nasi meshiyasijje besapoquiapoa bishe'aijo. 40Pablohua ca Silas bajjani dejja baca'yapoa onijje enequipoqui'yojji echacochacopoqui'yojji esohuijo. Majoya aje majo ba'eca Jesosaja epeejjicuana Eyacuiñajjinijje mimiajo oja o queapame poquimeesahuajjijo Pablo, Silas pea-ai poquiapoa. 41Ma jjachichaquipoquiapoa Siria meshijo ba'eca Jesosaja epeejjicuana esohui o queaca'a nequipoquijjijo huohuicananapoa Pablohua. Cilicia meshijo ba'eca Jesosaja epeejjicuana huohuipea-aicapoa oja meshiyasijje jjayejjequijeya.

Currently Selected:

HECHOS 15: ESE

Highlight

Copy