HECHOS 14

Iconio meshijo nequiya esohui huohuicanequiapoa cuana Pablohua, Bernabeya pea-ai

1Majoya aje Iconio meshi bañaquimajje Pablo Bernabenijje nobiquiñaquiapoa judiocuanaja equi-ai ejjachichaquijji aniyasijje. Majo nequiya Pablohua esohui queaja'a huohuicajje queahuiso judiocuana Jesosajo jjashahuabaquica'yapoa. Judío pojjeamacuana pea-ai jjashahuabaquica'yapoa ohua esohui huohuicajje. 2Pea judiocuana ma meshijotii ba'eca Jesosajo jjashahuabaqui'yoajjacuana ca queatai jjaniñebaquinequiapoa Jesosaja epeejjicuanajo. Jamajjeya ma meshicuiñajjicuananijje, judío pojjeamacuananijje mimimimiapoa ojaya Jesosaja epeejjicuana botiamanei yajji. 3Jamatiiya aje Jesosaja babaca dejjacuana majotii nequipoquiapoa queacahuihuisonee. Meteamaneiya esohui huohuicanequiapoa oja babaca dejjacuaa Eyacuiñajjiya ojjañacuana queajeanee acani esohuiya. Majoya aje Eyacuiñajjiya dejjaja ajjima'neineicuana ameesahuacapoquiapoa oja babaca dejjacuana ojjañacuanaja ohua esohui e'ejojonei acani queaja'a ebajji. 4Ma meshicuiñajjicuana ojjañatii oya jayojja pea-ai jjashahuabaquime pojjeama poa. Iyehuiso judiocuanaja esohui ma Jesosaja epeejji botiama poanicuanaja esohuiya shajja-ajjasapojji poa. Peacuana ca Jesosaja babacacuanaja esohui shajja-ajjasapojji poa. 5Jamajjeya judío dejjacuana, ma Jesosaja epeejji sapo-ajja poacuanaya, pea dejjacuana judío pojjeama ma meshijo ba'eca, ma meshijo etii poanicuana pea-ai mimimimicapoa ojee. Jesosaja babaca dejjacuana queanee pomee'yojji ejajahuejjajeamee'yojjijo jjaquecuapanaquica-aniapoa. 6Majoya aje queahuisocuana jjaquecuapanaquiani shajja-ajjamajje Pablo, Bernabenijjetii quehuapoquicuajiapoa Listra meshiyasijje. Derbe meshiyasijje poquipea-aiapoa. Ma meshicuana ojeechipineiya aniapoa Licaonia meshi jaajo. 7Ma meshijotii nequiya Pablohua, Bernabeya pea-ai Eyacuiñajjija esohui queapame Jesosajo huohuicanequiapoa cuana.

Pablo Listra bajjani meshijo nequi jajahuejjajea-ajjaca'yapoa cuaa

8Listra meshijoya aje oe dejja jeoajja cuaya aniapoa. Jeoajjatii cuaya oya anipoquiapoa. 9Majo aniyaya dejja jeoajjaa Pabloja esohui shajja-ajjacapoa. Jamajjeya Pablohua bacapoa oya queaja'a jjashahuabaquiani Pabloja o jeomeejjijo. 10Jamajjeya dejja jeoajja janobajjimanei huohuicapoa Pablohua jama ba'a: —Nequisohua'yocue oe, epinei miquea ejeojjijo nequicue.—

Majoya oya meshijo ani nequisohuananapoa epi enequijji. Jama pomajjeya oya jeojeonequiapoa. 11Majoya aje Pablohua dejja jeoajja cuaya jeomeecaje'yo bamajje macuiñajjicuana taaapoa oja esohuineijo jama ba'a: —Bacue oe, Eyacuiñajjicuana dejja jayojja pomajje nequioquenaje eseque— jamaya poso acapoa cuaa.

12Jamajjeya Bernabé oja eyacuiñajji Zeus bajjani poso acapoa macuiñajjicuaa. Pablo ca pea oja eyacuiñajji Hermes bajjani poso apea-aicapoa cuaa oya Pablo miminequinajejojoya. 13Majoya aje Zeusja equi-aijo chacochacopoquiani dejjaa shashacuana esipi eyijji yecapoa. Macayahuecuana ohuaya yepea-aicapoa. Oja meshi enobiquijjichipineijo Zeus bihuiajji equi-ai aniapoa. Majo aniya ma dejja etii poaniya macuiñajjicuananijjeya macayahuecuana enaa jehui'yojji yecapoa Pablo, Bernabé quiajji o bihuiajji. 14Macuaaya oya Eyacuiñajji jayojja acani jjabaquimajje Pablohua, Bernabeya pea-ai oja yamijo ba'e oja daqui isajeajeacapoa.#14.14 Nota: Jamaya Pablohua, Bernabeya pea-ai oja daqui isajeajeacapoa ojaya oya bihuiajjima yajji. Jama jjabihuiameequisapo-ajjanei poa onajo.* Majoya Pablo, Bernabé pea-ai ejjachichaqui anicahuasijje poquicuajiapoa onijje janobajjimanei mimiya. 15Jama mimisajajeame poa onanijje ba'a: —Dejjacuana quiojo nequica, ¿yajjajo acuae quiaa ecuana jama asa-aña? Ecuana caca dejja pea-ai poani yamijji miquiana jayojja pea-aiya. Ecuana jiquiacua poeyanaje miquiana esohui e'ejojonei queapamenee huohuiya. Jamajjeya jiquio miquiaaya esohui queaquehua aña eyacuiñajjinishocuana bihuiajji epajea'yojji majoya ecuana poeyanaje. Jamajjeya pea jjashahuabaquime po'yocue Eyacuiñajjineijo jiquio eyatahuatahua panajji, meshi panajji, bae-aiaicuana panajjinei epo Eyacuiñajjijo. Ojjaña bae-aiaijo jaaca oja pana pea-ai. Ohuaya ojjañaneitii panacapoa. 16Yahuajonei dejjacuana Eyacuiñajjiya ojayanei ejjashahuabaquijji queamimishi epojjijo nahuejjima acapoa. 17Dejjacuana jamaya queaquehuaneetii ba'ecapoquiapoa. Jamatii Eyacuiñajji jjabameequipoquiapoa macuanajo oya queapameneetii poani ohua queapamenee acapoquianijjejojoya. Ohuayatiiya jjeyanei ena huoojeacani. Queajjajjahuiso ohuaya pomeecani miquianaja banacuana. Maatiiya oeyaya quiana bobi quiacapoquiani miquianaja eijjiajji, miquiana queabihui ba'epoquijji— jama huohuimeya acapoa cuana Pablohua.

18Pablohua esohui queaja'a huohuiajjacapoa cuana jamatii ojaya eyacuiñajjinisho oya asa-atiicapoquiapoa. O bihuiajji oja ehuone enaa jehui'yo quiasatiiacapoa cuaa.

19Majoya aje macuaa Pablo bihuia sa-acanijotii pea judío dejjacuana poeapoa Antioquía meshijo nequi, Iconio meshijo nequi pea-ai. Majo ejjachichaqui anicacuana pea jjashahuabaquime pocuajimeecapoa Pablojo ma pea meshijo nequi poe dejjacuaa. Jamajjeya majotiiya Pablo jajahuejjajeacapoa meiya macuiñajjicuaa quenequenemajjeya. Majoya oya emano'yo jaa poso jjequiyiyejeacuayajeacapoa cuaa oja equicuana ani queahuesha esecueyasijje. 20Majoya aje Jesosaja epeejjicuana o mano'yonaje poso ajji poanajecuana o baa jjachichaquiajo Pablo nequisohuapoa o nequicapejjejotii. Oya nequisohuamajje poquio'oyapoa huacuaya ma o jajahuejjajeacanaje meshiyasijje. Majoya pea pojjajo oya poquiapoa Derbe meshiyasijje Bernabenijjetii.

21Derbecuiñajjicuana esohui queapame ohua huohuicajje queahuisocuana majo ba'eca jjashahuabaquica'yapoa. Majoya esohui huohuijeyomajje Pablo, Bernabé pea-ai huacuaya poqui'yapoa. Listracuiñajjicuana Iconiocuiñajjicuana, Antioquiacuiñajjicuana pea-ai baquicao'oyapoa macuanaja meshiyasijje aniquio'oyamajje. 22Jesosaja epeejjicuana ma meshicuanajo ba'eca queabihui pomeecao'oyapoa Pablohua, Bernabeya pea-ai. O queaca'a nequipoquijjijo esohui huohuiquicapoa pea-ai. Jama huohuime acapoa cuana ba'a: —Jiquio meshijo ani quiana queacamajanee acapoquije cuaa. Majoya quijje poquije'yo quiana Eyacuiñajjiya huoojeacapoquianitii meshi Eyahuasijje— jamaya acapoa. 23Pablohua, Bernabeya pea-ai dejjacuana Jesosaja epeejjicuanajaahuanapoquiajji etii epojji bajjanicapoa ojjaña ma o poquinequiapoa meshicuanahuasijje echacochaconequijji. Ma dejjacuana etii epojjijo Eyacuiñajjinijje mimimajje, bobi ijjiapojjima' animajje pea-ai esohui queapame acapoa Pablohua, Bernabeya pea-ai o queapame chacochacopoquijjijo. Eyacuiñajjijo o nahue'yojji poanijoya esohui queapame acapoa cuana o queaca'a nequipoquijji.

24Majoya aje Pablo, Bernabé provincia Pisidia meshijje jjayejjequimajje Panfilia meshijo aniñaquiapoa. 25Ma meshijotii nequiya esohui huohuicanequiapoa Pablohua, Bernabeya pea-ai Pergecuiñajjicuana. Majoya quijje poquiapoa Atalia meshiyasijje. 26Ma meshijotii nequi anisohuaquiapoa bishe'aijo ebesajebe'yojji queahuesha Antioquía meshiyasijje huacuaya. Yahuajo cuamaya Jesosaja epeejjicuaa majo ba'ecaa Pablo, Bernabé pea-ai esohui queapame Eyacuiñajjijo echacochacojji acapoa. Jamajojoya aje huacuaya besajebe'yapoa o huoojeajji epocuana bao'oyaa. Oja echacojji apoa ajeyocapoa Pablohua, Bernabeya pea-ai. 27Majoya aje quijje Antioquía meshi bañaqui'yomajje ojjaña Jesosaja epeejjicuana majo ba'eca iyaacapoa ejjachichaquijji. Majoya Pablohua huohuica'yapoa cuana ojjaña ma o Eyacuiñajjiya chacomeesahuacapoa peaja meshiyasijje poqui. Eyacuiñajjiya oya judío pojjeamacuana pea-ai esohui huohuimeesahuacanaje huohuica'yapoa Pablohua, Bernabeya pea-ai. Eyacuiñajjija esohui ohua huohuicajje peajaajjicuana jjashahuabaquica'yonaje esohui huohuipea-aicapoa. 28Majoya Pablo, Bernabé pea-ai ma meshijotii queaba'ihuiso anipoquiapoa Jesosaja epeejjicuananijje.

Currently Selected:

HECHOS 14: ESE

Highlight

Copy