HECHOS 13

Bernabé, Saulo pea-ai peajaajjicuana sohuihuohuiquijji epojji pomeecapoa

1Antioquía meshijo Jesosaja epeejjicuana ma esohuijo jjachichaquipoquiani becacuana esohuihuohuijji nequiapoa. Peacuana ca esohui bameesahuajji nequiapoa. Ma meshijo esohuihuohuijjicuana ma bajjani poa ba'a: Bernabé, Simón oya bajjani pea poa Negro. Lucio, oya Cirenecuiñajji poa, Manaén ma pea Herodes Galilea emeshimesenijje tiipoquiapoa. Pea esohuihuohuijji Saulo poa. Mahuisoya poa cuana. 2Majoya aje oe pojjajo Jesosaja epeejji ejjachichaqui anicajo, Eyacuiñajji bihuiajji oya bobi ijjiapojjima' anicajo pea-ai Edojjoshahuapame jama poa macuananijje ba'a: —Eyaya Bernabé, Saulo pea-ai babacanaje ejo echacochacopoquijji cua eya o huohuije echacojji ojaya eapoquiajjijo.—

3Majoya aje Eyacuiñajjinijje mimimajje, bobi ijjiapojjima' animajje pea-ai Jesosaja epeejjicuaa eme huanacapoa Sauloja ebeyojjobiajje, Bernabeja pea-ai. Jama amajjeya oya huoojeacapoa ona sohuihuohuiya.

Chipre meshiyasijje sohuihuohuiquicapoa cuaa

4Majoya aje Bernabé, Saulo pea-ai poquiapoa Seleucia meshiyasijje Edojjoshahuapameja huoojea, oyanei pojjeama. Majo aniya bishe'aijo anisohuaquiapoa ebesapoquijji Chipre bajjani nasi nequiyasijje. 5Salamina ejeojjiyasijje ba'eñaquimajje Eyacuiñajjija esohui huohuicañaquiapoa cuaa judiocuanaja equi-aicuana ejjachichaquijjijo anicacuanahuasijje. Juan poquipea-aiapoa onijjetii o asahuaa.

6Jamajjeya ma nasijo ba'ecacuanahuasijje ejeojjijje poquinequiapoa Saulo, Bernabé o sohuihuohuiya. Majoya Pafos meshijo aniñaquiapoa. Majo aniya aje oe judío dejja eyamiquecua Barjesús bajjani bacapoa cuaa. Oya Eyacuiñajjija esohuihuohuijjinisho poa, siajjepojji. 7Ma dejja eyamiquecua poani emeshimese Sergio Pauloja epeejji poa. Oya emeshimese queasapaja'anee poa. Majoya aje emeshimese ma Bernabeya, Saulohua pea-ai huohuicani Eyacuiñajjija esohui shajja-ajjapea-aisapoa. Jamajjeya ohuaya iyaameequicapoa cuana oja esohui eshajja-ajjajji. 8Ma eyamiquecua dejja griego esohuijo Elimas bajjani oya poa. Majoya aje ohuaya emeshimese nahueajjacapoa esohui Jesosajo oja shajja-ajjajjima yajji nisho. Ohuaya poemeejjima a-ajjacapoa cuana eyamiquecuaa emeshimese sohuihuohuiya. 9-10Jamajjeya Saulo, ma bajjani pea acanaje Pablo, Edojjoshahuapameya queaca'a mimimeecapoa eyamiquecua dejjanijje. Pablohua oya jama tecueame acapoa queacojjaqueneya ba'a: —Miya siajjepojjinei, queamimishica'a, edosiquianaja bacua poani. Ojjaña joya dejja queapame poani cajaa ajji pea-ai poani miya. Emeshimeseneija esohui queapamenee miyaya huohuitaiaña. 11Jamajojoya aje mi Emeshimeseneiya queanee pomeecaje. Jjacojjama'jeameequicaje mi. Miquea eshequiya jeaja'acani ebajji pojjeama poaje so'o.—

Ma Pablohua o esohui jama acanajejotiiya aje Elimas dejja jjacojjama'quinanapoa. Ohuaya pea dejja o dojo'yojji epojji sa-ajjacapoa majotii nequiya oya jjacojjama'quimajjeya. 12O jjacojjama'quije bamajje emeshimese Sergio Paulo dejja jjashahuabaqui'yapoa Jesosajo. Ohuaya baneicapoa achepamenee esohui Emeshimesenei Jesosajo huohuicani cuaa.

Antioquía meshijo nequiya, Pisidia meshijo pea-ai Pablohua, Bernabeya pea-ai esohui huohuicapoquiapoa cuana

13Majoya aje Pablo onijje poquicuana pea-ai Pafos ejeojjijo ani bishe'aijo anisohuaquiapoa ebesapoquijji Perge ejeojji jaahuasijje. Perge ejeojji Panfilia meshijo jaapoa. Juan Marcos ca majotiiya Pablo, Bernabé pea-ai jeacana'yapoa huacuaya Jerusalenyasijje epoqui'yojji oenei. 14Majoya aje Perge ejeojjijo ani poquiapoa cuana ejeojjijje Antioquía meshi aniyasijje, ma Pisidiachipinei meshi jaahuasijje. Ma meshijo aniñaquimajjeya nobiquiapoa cuana judiocuanaja equi-ai ejjachichaquijji aniyasijje ejomishocajji sábado pojjajotii. Majotii anioqueñaquiapoa cuana equi-aijotii. 15Eyacuiñajjija esohui etehue ma yahuajonei Moisesya, esohuihuohuijji poacuaa pea-ai tehuecapoa esohuicuana acanequiapoa judío dejjacuana etii poaniya. Ma esohui ajeyomajje equi-ai ejjachichaquijjijo nequiya ohuaya jama acapoa Pablo, Bernabé pea-ai ba'a: —Ecuananijjejaajji epeejji, ¿a'a miquiana esohui jiquiojo anicacuana queabihui pojji huohuisapoani? Jjeyanei ecuana huohuicue.—

16Jamajjeya Pablohua nequisohuamajje eme jeasohuacapoa o jeca anijji ojaya esohui shajja-ajjajji. Jama huohuime acapoa cuana ba'a: —Israelja osecua judiocuaa shajja-ajjacue, quiojo peajaajji poanicuaa pea-ai joya Eyacuiñajjijo jjashahuabaquianiya shajja-ajjapea-aicue jiquio eya jjeya huohuije esohui. 17Israelitacuanaja Eyacuiñajjiya eseja etiiquianacuana babacacapoa yahuajonei. Oejaajji queahuisonee epojji, queaca'a pea-ai epojji ohuaya pomeecapoa eseja etiiquianacuana jamatii peaja meshijotii ba'eca'yapoa cuana Egipto meshijotii. Majoya quijje Eyacuiñajjiya israelitacuana ma peaja meshijotii ba'e'yocuanaya cuayameequica'yapoa ojjañacuana oya queaca'anee poaniyajjejojoya. 18Eyacuiñajjiya Israelja osecuacuana jaahuanacapoquiapoa queashequiajahuiso jamatii shajjama'neitii pocapoquiapoa cuana. Cuarenta shequiajame huiso se-ejjama' meshijabojo ani Eyacuiñajjiya jaahuanacapoquiapoa cuana. 19Eyacuiñajjiya siete jaajjime huisocuana Canaán meshijo nequicacuana quecuameeca'yapoa eseja etiiquianacuana ma meshijotii eba'epoqui'yojji. Ma siete jaajjime huisocuanaja meshicuana jjeshemeeca'yapoa. 20Jamaya ba'ecapoquiapoa Israelja osecua judiocuana queashequiajahuiso, 450 shequiajame huiso majotii.

—Majoya aje quijje Eyacuiñajjiya dejjacuana queasapaja'a onijjejaajji huoojeapoquiajji epojji nequimeecapoquiapoa Samuel dejja esohuihuohuijji enequiahuajo. 21Majoya aje eseja Israelcuiñajjicuaa dejja oja emeshimese etii epojji sacapoa cuaa ona huoojeapoquiajji epojji. Jamajje Eyacuiñajjiya Saúl bajjani dejja Cisja bacuaejja Benjaminja osecua nequimeecoocapoa oja emeshimese epojji. Ohuaya 40 shequiajame huiso Israelcuiñajjicuana huoojeacapoquiapoa. 22Majoya quijje Eyacuiñajjiya Saúl emeshimese nequimeepajeaca'yapoa cajaa amajje. Oja jjocojo pea dejja David bajjani nequimeeca'yapoa Israelcuiñajjicuanaja emeshimese epo'yojji. Eyacuiñajjiya jama acapoa Davidjo ba'a: “Eyaya oe dejja Isaija bacuaejja banaje oya queapame. Ojaya eya queajeanee poani. Cua eya o ameesa-aña echacojji ohuaya ajeyocuajicani queabihuiya.” 23Oe Davidja osecuaya Jesosa poa. Comaya Eyacuiñajjiya huoojeacapoa Israelcuiñajjicuana nahue'yohua ma ecua ohuaya yahuajo tehuemeecapoa jamaya. 24Jesosa ojaya echacojji ajjimahuajo Juanya ebionei esohui huohuicanequiapoa Israelcuiñajjicuana jama ba'a: “Pea jjashahuabaquime quiana oe po'yocue miquianaja mimishijo. Jjaiñajeanobiameequicue quiana enaojjohuasijje” jamaya Juan poa. 25Ma dejjaa Juanya oja echacojji beshahuanei ajeyomajje jama acapoa ba'a: “Eya ca iña ma miquiaaya ishoaña dejja pojjeama. ¡A'a eya quiaa oya poso ajji! Quijjepishana pea dejja queapameneetii queaca'aneetii poeje jiquio ecua eya quiajja pojjeama, ca'a-amanei. Eya jjabaquiani queapame pojjeama ojo echacochacojji oya queapameneeneejojoya” jamaya acapoa.

26—Jamajjeya enijje Abrahamja osecua poani quiaa, jaajji pea quiaa joya Eyacuiñajjijo jjashahuabaquijji poanicuaaya shajja-ajjapea-aicue. Jiquio eyaya huohuinaje esohui ese nahue'yojji epojjijo ojjaña esejaya jiquiojo anija bacajji. 27Jamatii caca jiquio Jerusalén meshijo nequicacuanaja cuamaya etii poanicuanaja pea-ai ajeo Jesosa poeyanaje bajjimatii cuanaja poani. Ma ejjachichaqui anicacuaa esohuihuohuijji poaja oja tehuecuana ojjaña ejomishocajji sábado pojjajo acanitii oja equi-ai ejjachichaquijjijo aniya. Jamatii oja tehue shajja-ajjacapoquinaje macuaaya queaquehuatii. Jamajjeya Jesosa manojeameeca'yonaje cuaa. Eyacuiñajjija esohui ma ecua yahuajonei tehuecapoa esohui oya jayojja ajeyoca'yonaje cuaa. 28Chama'neinei poanaje Jesosaja mimishi o manojeamee'yojji. Jamatiiya macuaaya Pilato huohuiajjacanaje oja Jesosa manojeamee'yojjijo. 29Majoya macuaaya ajeyoca'yonaje ma ecua yahuajonei tehuecapoa cuaa esohui yajja oya acaje'yo cuaa quijje. Ma ecua profetacuaa tehuecapoa jayojjaya Jesosa aca'yonaje Jerusalén meshijo nequicacuaa. Majoya oya acui ecuiata'apeejo ba'e jjequioqueaca'yonaje cuaa ehuananobiajji. 30Eyacuiñajjiya ca oya emano'yo jaa shequimeeca'yonaje. 31Majoya aje ma onijje poquinajecuaa Jerusalenyasijje Galilea meshijje poquiya queacahuihuisopishana oya eshequi'yo eshe nequi'yo bacapoqui'yonaje. Jjeya comaaya o eshe nequi'yo bajji poanicuaaya esenijjejaajjicuana huohuicapoqui'yanitii ojo.

32-33—Jamajjeya ecuaaya oya esohuitiiya huohuiaña quiana Eyacuiñajjija esohui queapame Jesosajo. Ma yahuajonei Eyacuiñajjiya eseja etiiquiana huohuicoocapoa yajja ohua acaje'yo quijje jjeya apoa ohuaya ajeyoca'yonaje. Ohuaya Jesosa shequimeeca'yonaje. Yahuajonei Eyacuiñajjija esohui Salmos dos bajjani papenijo jaa Eyacuiñajji jama poani ba'a: “¡Miya ecue Bacuaejja, jjeya eyaya miya baña ecuea!” 34Jamaya Eyacuiñajjiya David yahuajonei huohuicapoa Jesosa shequimeecaje'yo. Jamajjeya oja yami eihuijeajji pojjeama poanaje. Yahuajonei Eyacuiñajjiya esohui acapoa maya oja tehue ejaatii jama ba'a: “Eyaya ecuea esohui queapamenee ajeyoje'yo ma yahuajonei eyaya David o queapame pomeejjijo huohuiapoa esohuiya.” 35Jamajjeya esohui pea etehue jaa jama poa ba'a: “Jiquio mique babaca queapame oja yami miquea eihuimee'yojji pojjeama poaje” jamaya yahuajonei Eyacuiñajjiya tehuemeecapoa oja esohui. 36E'ejojonei Davidya eshe nequiahuaa ma Eyacuiñajjiya o huohuicapoa oja echacojji ohuaya queapame acapoquiapoa. Majoya quijje oya David mano'yapoa. Oya oja babacuana jaapejjejotii huananobiacapoa cuaa. Oja yami ca ihuijeyo'yapoa. 37Jiquio Jesosaja Eyacuiñajjiya shequimeeca'yonajeja eyami caca ihui'yojjimatii poanaje. 38-39Jamajjeya oe jiquio esohui enijjejaajji epeejjicuaa shajja-ajjacue. Jesosajonei caca oe eseya mimishima'yo poaje. Ojjaña joya ojo jjashahuabaquije'yocuana Jesosaa oja mimishicuana chama'yo acaje'yo, cuijeacaje'yo. Eyacuiñajjija esohui Moisesja tehuejo quiana ca mimishima'yo epojji pojjeama poaje. 40Jjabaneineiquicue oe quiana ma yahuajonei esohuihuohuijji poacuaa tehuecapoa joya shajjama' jayojjacuana queaneeneetii poaje'yo miquiana jama pea-ai epo'yo poanijje. 41Jama tehueme ameecapoa cuana yahuajonei Eyacuiñajjiya ba'a:

“Miquiaaya ecuea esohui peajja poso aña.

Jjabaneineiquicue oe ejo Eyacuiñajjijo,

eyaya quiana chama'yotii pomeeje'yo.

Eyaya Eyacuiñajjiya miquiana eshe nequijo

dejjaja ajjima'neineicuana apoquiaje.

Jamatii quiana jjashahuabaqui'yojjimatii poaje

ejo peacuaa esohui huohuicajo.”

Jamaya tehuecapoa esohuihuohuijji poacuaa— jama huohuimeya acapoa cuana Pablohua.

42Majoya aje Pablo, Bernabé pea-ai judioja equi-aijo ani cuayaqui'yajo judío pojjeamacuaa oya huohuiajjacapoa o pea ejomishocajji sabadojo epoeo'oyajjijo o sohuihuohuio'oyaa oya esohuiya. 43Majoya judiocuanaja equi-aijo anica oja ejjachichaquijji apoa poajo queahuiso judiocuana peacuana ma judío dejja jayojja epojji ejjashahuabaquicuana pea-ai Pablonijjetii nequicapoa, Bernabenijje pea-ai. Jamajjeya Pablohua macuanaya huohuicanequiapoa o queaca'a nequipoquijjijo. Eyacuiñajjiya macuana queajeaneetii acani esohui oja pajeajjima yajjijo ohuaya huohuipea-aicapoa cuana.

44Majoya aje pea ejomishocajji sábado pojjajo beshahuanei ojjañatii ma meshijo ba'ecacuana jjachichaquio'oyacapoa Emeshimeseneija esohui Pablohua huohuicaje eshajja-ajjajji. 45Queahuisoneecuana jjachichaquicaje Pablohua esohui huohuicaje shajja-ajjajji bamajje judío etii poanicuana queaquenenee poa onijje. Jamajjeya Pablohua esohui huohuitaicani niñebacapoa cuaa o botiamanei poajjejojoya. 46Judío etii poanicuaa jama queatai niñebame acani shajja-ajjamajje Pablohua, Bernabeya pea-ai huohuineicapoa cuana meteamaneiya jama ba'a: —Ecuanaja ebionei miquianaya judío dejjacuanaya oopana huohuicoocajji poanaje. Miquiaaya caca oe esohui cajaa anaje. Eyahuasijje eba'etiitii'yojjijo jjashahuabaqui'yoajja quiana poanaje. Jamajjeya ecuana poquije peajaajjicuana judío pojjeamacuanahuasijje o sohuihuohuiya. 47Emeshimeseneiya Jesosaa ecuana jama acanaje ba'a:

“Eyaya quiana nequimeeaña ojjañajaajjicuana, judío pojjeamacuanaya,

jeaja'apoquiajji jayojja epojji oque esohui dojojji.

Eya ojjañacuana nahue'yojji poani esohui huohuiquije quiaa ma queahueshaneenee ba'ecacuanaja meshiyasijje”

jamaya ohuaya acapoa.—

48Ohua esohui jama huohuime acani shajja-ajjamajje ma judío pojjeamacuana queabihuinee pocapoa. Jama acapoa cuaa ba'a: —Eyacuiñajjija esohui caca queapamenee.— Jamajjeya majo ba'ecacuana queahuiso jjashahuabaquica'yapoa Jesosajo ma Eyacuiñajjiiya babacacapoacuanaya eba'etiitii'yojji Eyajo. 49Jamajjeya Eyacuiñajjija esohui huohuineicapoquiapoa cuaa ojjaña ma meshijo ba'ecacuanaja queaja'a ebajji. 50Majoya aje pea judío dejjacuana ma meshijo nequica dejja queaca'a etii poanicuananijje, eponacuananijje pea-ai joya Eyacuiñajjijo queapame jjashahuabaquijji poaninijjeya mimimimiapoa ojaya Pablo, Bernabé pea-ai botiama eajjijo. Jamajojoya aje macuaaya esohui queatai acapoa Pablojo, Bernabejo pea-ai oja o napameejjijo. Majoya aje oja meshijo ani poquicuaji'yapoa. 51Majoya poquicuajipishana'yomajje Pablohua, Bernabeya pea-ai meshipohui oja jeojjishejeejo ani cuia-iyajajeacana'yapoa. Jamaya acana'yapoa macuiñajjicuanaja queaja'a ejjabaquijji ohuaya Eyacuiñajjija esohui cajaa acanijo. Majoya pea meshiyasijje poquiapoa Iconio meshiyasijje. 52Jesosaja epeejji Antioquía meshijo ba'ecacuana ca queabihuinee pocapoa, Edojjoshahuapameya queaja'a ba'emeesahuacapoquiapoa cuana.

Currently Selected:

HECHOS 13: ESE

Highlight

Copy