HECHOS 21

Pablo poquio'oyapoa Jerusalén meshiyasijje

1Majoya aje dejja etii poanicuana Jesosaja epeejjicuanajaahuanapoquiajji jiña'yomajje ecuana bishe'aijo besapoquicuajiapoa Cos meshiyasijje. Majoya pea pojjajo ecuana besapoquiapoa Rodas meshiyasijje. Majo nequiya aje ecuana besapoquiapoa Pátara meshiyasijje. 2Pátara meshijo nequiya ecuaa pea bishe'ai ba'e bañaqui'yapoa Fenicia meshiyasijje ebesapoquijji. Jamajjeya ecuana anisohuaquiapoa ma bishe'aijo cuamaya besapoquiya. 3Majoya aje besapoquianiya ecuaa Chipre nasi meshi bananapoa. Ma nasi meshi bananamajje ecuana besapoquiapoa shanimijiyasijje Siria meshiyasijje ba'eñaquiya. Ecuana besapoquijji epo bishe'ai aquianajji poa. Jamajjeya eaquianameseya Tiro meshi ejeojjiyasijje ba'eñaquimeecapoa majo oja aquiana jeananaa. Ecuana majje nequisohuaquiapoa ma meshiyasijje. 4Ma meshijo nequiya ecuaa Jesosaja epeejjicuana majo ba'eca baquiapoa onijje mimiya. Jamajjeya ecuana majotii aniapoa siete cahuime huiso onijjetii. Edojjoshahuapameya majo nequi Jesosaja epeejjicuana esohui huohuimeecapoa Pablojo o nahuejjijo jama ba'a: —Pablo, a'a Jerusalén meshiyasijje besapoquimee'yojji.— 5Jamatiiya aje siete epojja huisome jjayejjequiajo ecuana jja-aquiapoa ebesapoquio'oyajji. Ojjaña ma meshijo ba'ecacuana Jesosaja epeejjicuana huanaseña, bacuaña pea-ai poquipishanapoa ecuananijjetii bae-ai anisahuahuasijje. Majoya ma meshijajijoya ecuana ojee ecuioshajjajo anioquemajje miminanapoa Eyacuiñajjinijje. 6Majoya onijje mimijeyomajje ecuana anisohuaquio'oyapoa bishe'aiyasijje ebesapoquijji. Majoya aje ma meshijo ba'ecacuana Jesosaja epeejjicuana oja equicuanahuasijje poquica'yapoa.

7Jamajjeya ecuana Tiro meshi ejeojjijo ba'e besapoquiapoa bishe'aijo Tolemaida meshi ejeojjiyasijje. Majo ba'eca Jesosa epeejjicuana ecuaa esohui queapame añaquiapoa. Ecuana majotiiya cahui oe aniapoa so'o onijje. 8Majoya pea pojjajo ecuana poquiapoa ejeojjijje Cesarea meshiyasijje. Majo aniñaquimajje ecuana poquiapoa Felipeja equiyasijje onijje aniya. Felipe Jesosaja epeejji pojjeamacuana sohuihuohuiquinequijji poa. Oya Jesosaja babaca dejjacuana poani asahuajji pea-ai poa pea dejjacuana seis huisomenijje. Ecuana oja equijo aniapoa. 9Felipeja ebacuase ahuema' ani cuatro huisome poa. Oja bacuasecuaa esohui huohuicapoquiapoa ma quijje acajejo ebajji. 10Majoya aje ecuana majotii ani queacahuihuiso poajo oe dejja Jesosaja epeejji Agabo bajjani Judea meshijo nequi poeapoa. Oya pea-ai ma quijje acajejo huohuijji poa. 11Ecuana ani cojjaneijo aniñamajje ohuaya Pabloja ejjayica'aquijji jjeshecañapoa. Oya jjamejeyoquimajje jjajeojjijeyopea-aiquimajje Pabloja ejjayica'aquijjijo jama poa ba'a: —Edojjoshahuapameya huohuicani judío dejjacuaa Jerusalén meshijo nequicaa jama jeyomeya acaje ejiquiojjayica'aquijjimese dejja jiquio ecua jjeya eya nequi jama. Majoya oya quiacaje judío pojjeamacuanaja queaneenee pomeejji.—

12Judiocuaa oya jama acaje shajja-ajjamajje, ecuaa Jesosaja epeejji majo ba'ecacuaa pea-ai Pablo huohuiajjaneineiapoa oya Jerusalén meshiyasijje poqui'yojjima epojji nishojo. 13Pablohua ca ecuana jama acapoa ba'a: —¿Ajeo quiana pani? ¿Apiojji acuae quiaa eya queayenonee pomeesa-ana? Eya caca meteama epoquio'oyajji Jerusalenyasijje jamatii judiocuaa eya me jeyocajjequije. Eya apoa epo nequi emano'yojji majotiiya Emeshimesenei Jesosaja echacojjijo— jamaya poa.

14Ecuaa oya pea jjashahuabaquime pomeejjima poa o cuamaya poqui'yojjima epojjijo. Jamajjeya ecuaa oya jama huohuime apoa ba'a: —Eyacuiñajjiya oja ejjashahuabaquijji mijo ca-acahua.—

15Majoya esohui jama huohuime amajje ecuana jja-aquiapoa epoquijji Jerusalén meshiyasijje ojee. Jamajjeya ecuana poquiapoa cuamaya. 16Beca Jesosaja epeejji Cesareacuiñajjicuana poquipea-aiapoa ecuananijjetii. Majoya Jerusalén meshijo aniñaquiajo ma ecuananijje poquicuaa ecuana dojocapoa Mnasonja equiyasijje majo aniya. Mnasón Chiprecuiñajji dejja Jesosaja epeejji nequiapoa queashequiajahuiso. Ohuaya ecuana oja equijo cahuimeecapoa.

Pablohua Santiago baquicapoa onijje mimimimiya

17Majoya aje Jerusalén meshijo aniñaquiajo Jesosaja epeejjicuaa ecuana queabihui acajjequiapoa. 18Majoya aje pea pojjajo Pablo poquiapoa ecuananijje Jesosaja epeejji Santiago dejja baa onijje mimiya. Majotiiya oja equijoya ojjaña majo nequica Jesosaja epeejjicuanajaahuanapoquiajji dejja etii poani anipea-aiapoa. 19Jamajjeya Pablohua esohui o queabihui pojji acañaquiapoa etii poanicuana eme ejeahuañaquijji. Majotiiya ohuaya huohuica'yapoa cuana ojjañatii ma Eyacuiñajjiya oya ameecapoquinaje echacojjicuana judío pojjeamacuanajo. 20Pablohua oja echacojjijo huohuicaje shajja-ajjamajje etii poanicuaa Eyacuiñajji bihuiacapoa. Majoya etii poanicuaa oya jama acapoa ba'a: —Ee Pablo, ¡queapame jama de! Miquea eba pea-ai judiocuana queahuisoneenee Jesosajo jjashahuabaquica'yonaje. Queahuisocuaa Moisesja tehue ma yahuajonei Eyacuiñajjiya o quiacapoa esohuicuanaya shahuabatiisa-acapoquiani cuaa oya jayojjatii eba'epoquijji. 21Beca judiocuaa huohui poani mijo. Miyaya pa judiocuana peaja meshijo ba'eca'yo huohuiaña Eyacuiñajjija esohui Moisesja tehuecuana eatiipoquiajji pojjeamajo. Miyaya pa huohuiaña cuana oja bacuaejja esho'icuana cuiishasha jehuisejjameeca'yoajja jjeya. Eseja etiiquianaja esohuicuana atiicapoquiajja miyaya pa jama huohuime aña cuana. 22Jamajjeya miya ¿yajja acajji? E'e jiquiojo ba'eca judiocuaa jjeya bacaje miya poeo'oyanaje. Queaquene pojja'a poaje cuana minijje. 23Jamajjeya jjeya jiquio ecuaa mi huohuije esohui huisotii miyaya acue. Jiquiojo cuatro dejja enequi jjeya. Yahuajo jiquio dejjacuaa Eyacuiñajjija echacojji eajjijo esohui acanaje Moisesja tehuecuana jayojja. Jjeya oya jayojjaya ajeyocanaje cuaa. 24Dojocue jiquio dejjacuana minijjetii. Eyacuiñajjija esohui Moisesja tehue miquiana queaboejea epojji aquicue onijjeya. Miquiana jjacuiapojimeequimajje jiquio minijje poquijeja sapa cuiapojijji sosejje sosequiacue. Majoya miya jama poani bamajje queahuiso judiocuaa esohui siajje poani mijo bacaje. Judiocuaa miya eseja etiiquianaja Moisesja tehuecuanajo jjashahuabaquijji poanitii bacaje cuaa queneamaa. 25Ma peajaajji Jesosajo ejjashahuabaqui'yocuana judío pojjeama tehuenaje ecuaaya ecuanaja ejjashahuabaquijji ojo. Jama tehueme anaje ba'a: “Noe yamicuana enaa jehui'yo eyacuiñajjinisho quiajji oja iya ijjiaca-ajja. Ijjiacajjicuanaja yami najji pea-ai ijjiaca-ajja. Joya ehuone epiqui jeahuahuo'ya, ehui'i'yo pea-ai ijjiaca-ajja. Peacojjojji pea-ai poca-ajja” jama tehuemeya ecuaaya anaje.—

Pablo Eyacuiñajjija equi-aiquibojo nequi iñaca'ajeacapoa cuaa ejeanobiameejji

26Majoya aje pea pojjajo Pablohua ma cuatro dejjacuana dojocapoa onijjetii. Oja etiiquianaja esohui queaboejea epojji acapoa cuaa, Pablohua pea-ai. Jama amajjeya Eyacuiñajjija equi-aiquibohuasijje poquiapoa cuana Eyacuiñajjija equi-aijo chacochacopoquiani dejja huohuiya acheshono dejjacuana, Pablo pea-ai apoa poaje queaboejea epojji. Apoa pomajje ma dejjacuaa oja quia huanacaje oja ehuone enaa jehui'yo Eyacuiñajji quiajji.

27Majoya aje quijje beshahuanei oya apoa queaboejea siete epojja jjayejjequiajo beca judío dejjacuaa Asia meshijje poeya Pablo Eyacuiñajjija equi-aiquibojo nequi bacahuapoa. Ma dejjacuaaya majo anicacuana queashajjaquijjonee Pablonijje queaquenenee emimijajijji esohui queatai jeacuayacapoa. Jamajojoya aje Pablo iñaca'ajeacapoa cuaa queaqueneya. 28Jama taaame ponequiapoa cuana ba'a: —Israelitacuana, ecuana iñaca'asahuacue jiquio dejja. Ohuaya ojjaña meshicuanahuasijje esohui huohuitiicapoquiani cuana esenijjejaajji judiocuana. Eyacuiñajjija esohui Moisesja tehuecuana shahuabatiicapoquiajja acani. Jiquio Eyacuiñajjija equi-aiquibojo pea-ai oya queatainee mimiani. Jjeya pea-ai ohuaya peajaajji griego dejjacuana nobimeequicanaje jiquio Eyacuiñajjija equi-aiquibohuasijje. Jama aca-ajja. Jiquio Eyacuiñajjija equi-ai queatai ohuaya pomeecani— jama taaameya poa cuana.

29Jama taaameya ponequiapoa cuana Pablo Jerusalén meshijo nequi Trófimo dejja Efesocuiñajjinijje nequi ojee bamajje. Pablohua Trófimo dojonobiaquicanaje poso Eyacuiñajjija equi-aiquibohuasijje acapoa cuaa.

30Majo nequicacuana queahuisonee queaquenenee pocuajicananapoa o jama taaame poaje shajja-ajjamajje. Jamajjeya queahuiso cuajicuajicajebeapoa ona ejjachichaqui nequicahuasijje. Majoya Pablo iñaca'amajje Eyacuiñajjija equi-aiquibojo nequi jjequiyiyejeacuayajeacapoa cuaa esecueyasijje. Majoya esecuejjani ca'acananapoa. 31Pablo beshahuanei cuiaca'yanijo peacuaa Romano soldadocuanahuohuijji poani etii dejja comandante huohuicuajiquicapoa ojjaña Jerusalén meshijo nequicacuana queaquenenee taaamajamajani queashajjaquijjoneejo.

32Majoya aje comandante oja soldadocuana, pea etii poanicuana pea-ai iyaamajje ojee poquicuajicapoa judiocuana ejjachichaqui nequicahuasijje. Soldadocuana poecuajije bamajje ma queaquenenee nequicaa Pablo cuiapajeacapoa soldadocuana poeje yajjajo. 33Majoya aje comandante Pabloque jjanequichipiquimajje Pablo jeyomeecapoa beca cadenaa. Ohuaya huohuiajjacapoa majo nequicacuana Pablojo jama ba'a: —¿Ae shai jiquio dejja? ¿Yajja quiana acanaje ohuaya?— 34Ohua jama huohuiajjame acajje becacuana oe esohui Pablojo taaapoa. Peacuana ca pea esohui Pablojo taaapea-aipoa ojee queashajjaquijjonee. Jamajjeya comandanteja shajja-ajjajjima poa yajja Pablohua acanaje ona queashajjaquijjonee pea esohui, pea esohui taaaquijojoya. Jamajjeya ohuaya Pablo dojomeecapoa soldadocuana anijji equi-aiyasijje. 35Majoya dejjacuana queahuisonee soldado anijji equi-ai ejaasohuaquijji jaajo aniñaquiajo soldadocuaa Pablo jjequisohuacapoa edojosohuacuajiquijji ona queamaseneenee nequijojoya onijje. 36Queahuisoneeneecuana oquishishijji taaapoquiapoa jama ba'a: —¡Oya manojeamee'yocue!—

Ona ejjachichaqui nequicajo Pablohua huohuicapoa cuana o ejjanahuemeequijjijo

37Majoya aje soldadocuaa Pablo soldadocuanaja equi-aiyasijje ejeanobiajji a-ajjacajo Pablohua comandante huohuiajjacapoa jama ba'a: —¿A'a che eya minijje jjeyanei mimicajji so'o?—

Comandanteya oya saja-acapoa jama ba'a: —¿A'a miya griego esohuijo mimijji? 38Jamajjeya miya ma yahuajopishana egipcio dejja ejjaquecuaquijji nequinaje pojjeama. Ohuaya queahuisoneecuana, 4.000 huisome pea quecua'yojji poani dejjacuana, jjachichaquimeemajje ecuana romano dejja soldadocuananijje ejjaquecuaquijji a-ajjacanaje. Majoya ohuaya ma queahuisonee dejjacuana dojocanaje se-ejjama' meshijabohuasijje— jamaya poa.

39Pablohua oya jama acapoa ba'a: —¡Chojja, eya ca iña judío dejja! Eya Tarso meshijo cuaya provincia Cilicia meshimijijje. Queahuisocuana Tarso meshi ejeojjijo ba'eca. Majjeya peacuiñajjicuana queahuiso poquiani. Jjeya che eya ejjachichaqui nequicanijje mimimeecue so'o.—

40Ohua jama huohuiajjame acajje comandanteya Pablo jama acapoa ba'a: —Ee, mimicue onijje.—

Majoya aje Pablohua ejaasohuaquijji ejeojji jaajo nequiya eme jeasohuacapoa ona jeca ani'yojji judiocuananijje emimijji. Majoya Pablo oja esohuineijo hebreo esohuijoya mimiapoa majo ejjachichaqui nequicacuananijje jama ba'a:

Currently Selected:

HECHOS 21: ESE

Highlight

Copy