HECHOS 12

Pedro ejeanobia jaa cuayameequica'yapoa Eyacuiñajjiya

1Ma shequiajajotiiya aje emeshimese Herodesya Jesosaja epeejjicuana iyehuiso queanee pomeecooca'yapoa, jeanobiameecacuanapoa pea-ai emeshimeseya. 2Ohuaya Santiago, Juanja edohuemese piqui jajasejjajeameeca'yapoa baase'becaa. 3Emeshimese Herodesya bacapoa judiocuana queabihui poani onijje Jesosaja epeejjicuana ohua jama queanee ameecaje'yo bamajje. Jamajjeya ohuaya Pedro pea-ai iñaca'ameecapoa ejeanobiameejji. Jamaya ohuaya Pedro ameecapoa judiocuaa fiesta pahui shejjeemeejjima eijjiajji aca'yajo. 4Majoya emeshimese Herodesya Pedro iñaca'ameemajje jeanobiameecapoa ejjajeanobiaquijji equiyasijje. Majo aniya aje Pedro queyaneineica-aniapoa soldadocuaa. Cuatro soldadocuana ejjachichaqui nequiapoa oe anijjime. Cuatro anijjimeya ejjachichaqui soldadocuaa oya queyaneica-aniapoa. Herodes jjashahuabaquiapoa Pedro jeacuayameejjijo judiocuanaja ebajji quijje fiesta eshahuaba'yojji ma yahuajonei Eyacuiñajjiya judio etiiquianaja bacuacuana nahuecapoa jjayejjequiajo. 5Jamajjeya Pedro ejjajeanobiaquijji equijo aniapoa equeyaneinei soldadocuanaja. Jesosaja epeejjicuana ma meshijo ba'eca caca oe mimimajamajacapoquiapoa Eyacuiñajjinijje Pedrojo.

Oe angelya Pedro ejeanobia jaa cuayameesahuaquica'yapoa

6Majoya aje ma mecajjetii ma o jeacuayameejji epojja poejjimahuajo judiocuanaja oya ebajji Pedro ecahui jaapoa beca soldado ojeepejjeneijo. Oya cadena becaja jeyo jaapoa. Pea soldadocuana ca ejjajeanobiaquijji equi esecuejjani queyajji nequiapoa. 7Majoya Pedro ecahui jaajo oe Emeshimeseneija ángel jjanequija'aquiapoa o ejeanobia jaa equiyasijje. O jaajji equecuayijji cuamayee jeaja'ameecapoa angelya. Majoya ma angelya Pedro oja dojjojjanijjijje iñaisheacapoa eshequijji. Oya jama acapoa ba'a: —Jjeyahuanei miya nequisohuacue.— Ohua o jama acajeahuajo cadena o me jeyojji'ya ba'e oyatii jjapejojeananaquiapoa. 8Majoya ma angelya oya jama apea-aicapoa ba'a: —Mi jjayica'aquijji poanijo jjayica'aquina'yocue, jeojjishejee pea-ai huosho'yocue.—

Pedrohua oja esohui jayojja acapoa. Angelya atiicapoa ba'a: —Mi jjabeboquijji poani daqui-aojo jjabeboquina'yomajje equijje mo acue.—

9Jamajjeya Pedro angelquiquishijjitii cuayaqui'yapoa. Ojaya bajjima poa a'a e'ejojonei angelya oya cuayameeneiquica'yani, a'a oya jjacahuibaquiani pojja'a, jamaya jjabaquiapoa. Ojaya bajjima poa. Jamajjeya Pedro jjacahuibaquiani poso jjabaquiapoa. 10Majoya aje ma ebionei soldadocuana o queyajji poani Pedrohua yejjeca'yapoa oja bajjimatiiya. Pea soldadocuana o queyajji poani yejjepea-aica'yapoa ohuaya angelquiquishijjitii poquije'yohua. Majoya ohuaya baacuii esecuejjani bacañaquiapoa ma esecueyasijje ecuayaqui'yojjijo nequi. Majoya aje esecuejjani oyatii jjaca'apejoquiapoa. Jamajjeya Pedro cuayaqui'yapoa esecueyasijje angelnijjetii. Ojee poquipishana'yomajje ejeojjijje ma angelya Pedro oenei jeacana'yapoa majotiiya.

11Majoya Pedro esecuejo nequi'yo jjabaqui'yapoa e'ejojonei oya cuayaqui'yonaje. Jama poa oya ba'a: —Jjeya eyaya queaja'a baña. Emeshimeseneiya oja ángel huoojeacanaje e dojocuayasahuaqui'yohua. Ohuaya eya nahuecanaje emeshimese Herodes dejjajo, ma judío dejjacuaa eya quecuamee'yosa-acanijo pea-ai.—

12Pedro e'ejojonei ecuayaqui'yo nequi jjabaqui'yomajje poqui'yapoa Mariaja equiyasijje Juanja enaeseja equiyasijjeya. Juan bajjani pea poa Marcos bajjani. Ma equijoya queahuisocuana mimica-aniapoa Eyacuiñajjinijje Pedrojo. 13Majoya Pedrohua esecuejjani cuiaqueyacañaquiapoa onaja ejjequinobiajji. Majoya aje eponasho'i Rode bajjani poeapoa aya esecuejjani cuiaqueyacani baa. 14Pedro esecuejotii mimiqui shajja-ajjamajje eponasho'i queabihuinee ponana'yapoa. Jamatii ojaya Pedro jjequinobiajjima poa so'o, esecuejjani ca'apejonanajjima acapoa. Oya ca queabihuinee cuajicuajinobiqui'yapoa peacuana huohuiñaqui'yohua Pedro esecuejjanijo nequijo. 15O jama poani Pedrojo shajja-ajjamajje jama acapoa eyiye ejjachichaqui anicaa ba'a: —¡Chojja, miya eniñepoqui'yo jayojja poani!—

Eponasho'iya ca amajamajacapoa cuana ba'a: —E'ejojonei oya jjeya esecuejjanijo nequi.—

Majoya ma ejjachichaqui anicacuaa oya jama acapoa ba'a: —Oyanei pojjeama jja miyaya shajja-ajjaña che. Oja ángel pojja'a coma shajja-ajjaña.—

16Oya jama mimime poanijotii Pedrohua esecuejjani cuiaqueyatiitiicanequiapoa. Majoya aje esecuejjani ca'apejomajje Pedro bacacuaapoa e'ejojonei oyaya nequi. Queabihuinee ponana'yapoa cuana o ba'yomajje. 17Jamajjeya Pedrohua eme jeasohuacapoa oya mimima' epo'yojji so'o. Majoya ohuaya huohuijeyoca'yapoa cuana yajja oya Eyacuiñajjiya acanaje o cuayaqui'yojji ejjajeanobiaquijji equijo jaa. Jama apea-aicapoa cuana ba'a: —Jiquio e acanaje huisotii huohuiqui'yocue Santiago, pea Jesosaja epeejjicuana pea-ai.— Majoya Pedro equijo ani cuayaqui'yomajje poquiapoa pea meshiyasijje.

18Majoya aje pea pojjajo mecajjeahuanei soldadocuana o queyajji po-ajjanequinajecuana mimiapoa oya oopana queametenee Pedro chama'yo bamajje. Yajja oya Pedro po'yonaje ojaya bajjimanei mimime poa. 19Jamajjeya emeshimese Herodesya huoojeacacuanapoa o sa-ajja'yohua. Jamatii ojaya soldadocuanaja oya ba'yojjimatii poa. Majoya aje Herodesya ma Pedro queyajji po-ajjanequinaje soldadocuana huohuiajjaneimajje quecuameeca'yapoa. Majoya quijje Herodes Judea meshijo nequi poqui'yapoa Cesarea meshiyasijje ba'e'yohua.

Herodes mano'yapoa

20Herodes queaquenenee poa Tirocuiñajjicuananijje, Sidoncuiñajjicuananijje pea-ai. Ma beca meshicuiñajjicuaa bejjo sosejje emeshimeseja bobi jjeshecapoquiapoa, jamajjeya oya onijje jjabeimeequi'yosa-acapoa cuaa. Jamajjeya macuiñajjicuana oe emeshimeseja nequimee dejja etii poani Blastonijje jjapeequimajje onijje mimiapoa cuana ojee Herodes cojjaneijo enequijji o jjabeimeequi'yojji onijje. 21Majoya aje quijjepishana Herodesya oe epojja o poejji huohuicapoa emimimimijji onijje. Ma epojja poeajo emeshimese Herodesya daqui queanahuenee emeshimeseja huoshocapoa. O quii-anijji queaquemojo anioquemajje ohuaya huohuica-aniapoa cuana o huijo animajje. 22Oya queaca'anee mimiani shajja-ajjamajje jama taaame poa cuana ba'a: —Jiquio jjeya mimiani dejja pojjeama, Eyacuiñajji jayojja jiquio mimiani— jama bihuiameya acapoa cuaa oya. 23Ona jama poequijotii oe Emeshimeseneija angelya Herodes manomeecuajicapoa oyanei queaca'a poani poso jjabaquijji poanajejojoya, ojaya Eyacuiñajji bihuiajjimanei poanajejojoya pea-ai. Oja yamiquipajje ani conohua ijjiacuajica'yajje oya mano'yapoa.

24Majoya aje quijje queahuisocuiñajjicuana Eyacuiñajjija esohui shajja-ajjapoquiamajje jjashahuabaquica'yapoa Jesosajo.

25Bernabé, Saulo pea-ai Jerusalén meshijo nequi Eyacuiñajjija echacojji apoa ajeyomajje huacuaya poqui'yapoa. Poquije'yohua Juan bajjani onijje dojocapoa. Oya bajjani pea poa Marcos.

Currently Selected:

HECHOS 12: ESE

Highlight

Copy