HECHOS 11

Pedrohua Jesosaja epeejjicuana Jerusalén meshijo ba'eca huohuiquicapoa ma ohua esohui peacuana huohuiquicanaje

1Majoya aje quijje Jesosaja babaca dejjacuaa, pea Jesosaja epeejji Judea meshijo nequicacuaa pea-ai shajja-ajjacapoa peajaajji judío pojjeamacuana Eyacuiñajjija esohuijo jjashahuabaquipea-ai'yonaje. 2Majoya Pedro Jerusalén meshiyasijje poe'yajo becacuana judío Jesosaja epeejji poaniya, ma ejjacuiishashajehuisejjaquiya, Pedro niñebacapoa. 3Oya jama acapoa cuaa ba'a: —¿Apiojji acuae mi poquinaje jocuama judío dejja pojjeamacuanahuasijje o baa? ¿Apiojji onijje ijjiaijjianaje pea-ai miya judío dejja poani?—

4Majoya aje Pedrohua huohuicapoa cuana ojjaña ma o jjacahuibaquiani jayojja ani Eyacuiñajjiya bameecanaje huisotiijo. Jama huohuime acapoa cuana ba'a: 5—Eya ciudad Jope meshijo nequi Eyacuiñajjinijje mimianijo eya jjacahuibaquiani jayojja ani Eyacuiñajjiya bameecanaje oe daqui queaquemonee equipajaajji jayojja omiji pea-ai cuema jeyo jeaoqueacani eyajje e mimianiyasijje. 6Eyaya oya baneinaje ebajji ae shai cuana daqui queaquemoneebiajje ani. Majoya eyaya banaje ijjiacajjicuana joya cuatro quiseme huiso poani, meshijjepojjicuana, ebiocuiñajjicuana queamase, cuichojjicuana pea-ai banaje. 7Majoya enijje mimije shajja-ajjanaje. Eya jama acanaje ba'a: “Pedro, nequisohuacue. Jiquio ani ijjiacajjicuana cuia'yocue mique ijjiajji.” 8Ohua jama acajje eya jama poanaje ba'a: “Chojja Emeshimesenei, ecuea ijjiajjimaneitii coma ecuanaja ijjiaca-ajja.” 9Majoya enijje mimio'oyanaje eyajo nequi jama ba'a: “Joya Eyacuiñajjiya queapame acanajecuana a'a ijjiaca-ajja poso ajji.” 10Oya esohuiya tres huisome jama poanaje enijje. Majoya aje ma daqui equipajaajji jayojja queaquemonee jjequisohuaca'yonaje eyahuasijje. 11Manei eshequi nequijotiiya aje tres dejjacuana poeyanaje Cesarea meshijo nequi e baa. E ani equijotiiya aniñanaje cuana. 12Edojjoshahuapameya eya huohuicanaje onijje epoquijji meteama. Jiquio jjeya enijje nequi seis huisome Jesosaja epeejjicuana poquipea-ainaje enijjetii. Majoya ecuana nobiquiñaquinaje ma dejjaja equiyasijjeya. 13Ma dejjaaya Corneliohua ecuana huohuicanaje oe ángel oja equijo jjanequija'aquinaje. Maya onijje miminaje jama ba'a: “Dejjacuana huoojeacue Jope meshiyasijje Simón bajjani dejja jjequiya. Oya bajjani pea Pedro. 14Ma dejjaaya miya queaja'a huohuicaje yajja pocajji Eyacuiñajjija nahue'yo epojji. Ohuaya miya, miquea huapa pojjeamacuana pea-ai huohuicaje.” Jamaya oya acanaje angelya. 15Jamajjeya oja meshiyasijje eya poquinaje. Majoya eya esohui huohuicooquijotii Edojjoshahuapame poeyanaje oque oya Edojjoshahuapame yamijji epopea-aijjijo. Ma ecua eseya yahuajo acanaje jama pea-aiya ohuaya acanaje ma equijo anicacuana Edojjoshahuapameya. 16Oya oque nobiquije bamajje eyaya shahuaba'yonaje ma Emeshimesenei Jesosaa acanaje esohui. Jama oya poanaje ba'a: “E'ejojonei Juanya iñajeanobiacanaje cuana, epona, dejja pea-ai enaojjohuasijje. Eyacuiñajjiya quiana ca oe Edojjoshahuapame yamijji pomeecaje miquianaja eyamidojjohuasijje enequipoqui'yojji.” 17Eyacuiñajjiya peajaajjicuana quiacanaje ma ese ohua quiacanajeya oya Edojjoshahuapameya ma Jesosa Quitojo jjashahuabaqui'yonaje huisotiicuana. Jamajjeya Eyacuiñajjiya peacuana judío pojjeama Edojjoshahuapame yamijji pomeecanaje bamajje ecuea Eyacuiñajji jama pomeejjima yajji pojjeama— jama huohuimeya acacuanapoa Pedrohua.

18Jesosaja epeejji judiocuana Pedro jama poani shajja-ajjamajje mimima' anica'yapoa. Eyacuiñajji bihuiacapoa cuaa jama ba'a: —Jamajjeya Eyacuiñajjiya judío pojjeamacuana nahuepea-aica'yani. Peajaajjicuana pea jjashahuabaquime Jesosajo popea-ai'yani eba'etiitii'yojji quijje onijje.—

Jesosaja epeejji Antioquía meshijo ba'ecacuana jjachichaquicapoquiapoa

19Yahuajopishana Esteban jajahuejjajeaca'yajo dejjamasecuaa Jesosaja epeejjicuana queanee epojji jeanobiameecapoa. Jamajojoya aje queahuiso Jesosaja epeejjicuana quehuapoquicuajica'yapoa Fenicia meshiyasijje, Chipre meshiyasijje, Antioquía meshiyasijje pea-ai cuamaya ba'equi'yohua. Ma meshijo ba'equi'yomajjeya onijjejaajji judío dejja oopana ma meshijo ba'eca esohui queapame huohuicanequiapoa cuaa. 20Jamatii beca Jesosaja epeejjicuana Chipre meshijo ba'eya, Cirene meshijo ba'eya pea-ai Antioquía meshiyasijje poquimajje majo ba'eca judío pojjeamacuana esohui queapame Jesosajo oya Emeshimesenei poanijo esohuiya huohuiquicapoa. 21Eyacuiñajjiya queaca'a pomeecapoa ma pea meshiyasijje poquinaje Jesosaja epeejjicuana. Jamajjeya Antioquiacuiñajjicuaa oja etiiquianacuanaja esohui queaquehua cajaa acapoa Jesosajo ejjashahuabaqui'yojji.

22Jesosaja epeejjicuaa ma Jerusalén meshijo jjachichaquipoquianicuaa shajja-ajjacapoa peajaajjicuana Jesosaja epeejji popea-aicanaje. Jamajojoya aje Bernabé bajjani dejja huoojeacapoa cuaa Antioquía meshiyasijje macuiñajjicuana Jesosaja epeejji eyacua poani baa. 23Ma meshijo aniñaquimajje Bernabeya bacañaquiapoa cuana Eyacuiñajjiya queaja'a ba'emeesahuacapoquiani. Jamajjeya oya Bernabé queabihuinee poñaquiapoa. Ohuaya sohuihuohuicapoa cuana o queaca'a nequipoquijji Eyacuiñajjijo. 24Bernabé bajjani dejja queapamenee nequipoquiapoa mimishiama. Edojjoshahuapameya oya queaja'a jjashahuabameequicapoquiapoa. Jamajojoya aje queahuisocuana Jesosajo jjashahuabaquica'yapoa ohua esohui queaja'a huohuicajje.

25Majoya aje quijje Bernabé poquiapoa Tarso bajjani meshiyasijje Saulo ba'yohua. 26Saulo ba'yomajje Bernabeya oya dojoca'yapoa Antioquía meshiyasijje onijjetii huacuaya. Majotiiya aje Saulo, Bernabé pea-ai nequipoquiapoa oe eshequiaja Jesosaja epeejjicuananijjetii. Ma beca dejjaa queahuisocuana sohuihuohuimajamajacapoquiapoa. Ma Antioquía meshijo ba'eca Jesosaja epeejji poanicuana bajjanicoocapoa cuaa ba'a: cristianos.

27Ma shequiajajotiiya aje becacuana Eyacuiñajjija esohuihuohuijji poani Jerusalén meshijo nequi poquiapoa Antioquía meshiyasijje. 28Oe dejja ma poquinaje Agabo bajjani poa. Edojjoshahuapameya oya huohuimeecapoa ma quijje poajejo. Jamajjeya ohuaya epi nequiya huohuicapoa cuana quijjepishana ojjaña meshiyasijje bobicuana chama'nei poaje. Majoya quijje ma ohua acapoa esohui jayojjaya bobicuana chama'nei poa. Claudio bajjani emeshimese enequiahuajo bobicuana chama'nei poa. 29Majoya aje Jesosaja epeejjicuana Antioquía meshijo ba'eca Agaboja esohui bobi chama' poaje'yo shajja-ajjamajje jjashahuabaquiapoa bejjo huoojeajjijo Judea meshijo anica Jesosaja epeejjicuanaja yajji bobi jjeshejji. Ma ohua quiasa-acanaje huisotiiya bejjo huoojeacapoa cuaa chichamajje. 30Jamajjeya Jesosaja epeejjicuaa bejjo chichacapoa. Majoya Bernabé, Saulo pea-ai oja chicha bejjo dojomeecapoa cuaa cuamaya Judea meshijo ba'eca Jesosaja epeejjicuanajaahuanapoquiajji etii poanija majo ba'eca quiajji.

Currently Selected:

HECHOS 11: ESE

Highlight

Copy