Yuḥanna 20

Imeḥḍaren war tifen ca Siḏiṯneɣ Ƹisa ḏeg unḍeȓ

1Ḏi nhar amezwaru n ssimana, ṯusa-d Maryam ṯamagdaliṯ#20.1 Maryam ṯamagdaliṯ nettaṯ zeg ubilaj nni umi qqaren Magdala. ɣar yifri n unḍeȓ n Ƹisa zic. Tuɣa ƹaḏ ṯaǧest, ṯufa azru itwakkes x yifri n unḍeȓ. 2Ṯuzzeȓ-d ṯusa-d ɣar Simƹan Buṭrus ḏ umeḥḍar nneɣni wenni iƹizzen x Ƹisa aṭṭas, ṯenna-asen qa ysin Ƹisa zeg yifri n unḍeȓ, war nessin mani ṯ ggin.

3-4Iffeɣ Buṭrus ḏ umeḥḍar nni nneɣni ruḥen s ṯazzȓa s ṯnayen iḏsen ɣar yifri n unḍeȓ. Ameḥḍar nni izwar-as i Buṭrus yuweḍ ḏ amezwaru ɣa yifri n unḍeȓ. 5Isijj x yifri yufa ȓecfen imars ḏinni walakin war yuḏif ca. 6Iḏeffar-iṯ-iḏ Simƹan Buṭrus ixḍeȓ, yuḏef ḏeg yifri n unḍeȓ. Itwaȓa ȓecfen nni 7yufa ȓqabb iy zi tuɣa iɣeṭṭa uzeǧif n Ƹisa war iǧi ca ag ȓecfen, iḍfes waḥḏes. 8Ȓexddenni yuḏef umeḥḍar nni izwaren ɣar yifri n unḍeȓ, iẓra manayenni yumen. 9Walakin niṯni ƹaḏ war fhimen ca zi Lkitab belli labud aḏ ikkar Ƹisa zi ȓmewṯ. 10Ssenni rewwḥen imeḥḍaren.

Siḏiṯneɣ Ƹisa itmeḍhar-d i Maryam ṯamagdaliṯ

11Maryam ṯbedd ɣar ṯewwarṯ n yifri n unḍeȓ ṯeqqim ṯetru. Wami ṯetru ṯsijj x yifri n unḍeȓ 12ṯufa ṯnayen n lmalaʼikaṯ s warruḍ ḏ acemȓaȓ icten ṯeqqim ɣar uzeǧif icten ṯeqqim ɣar iḍaren mani tuɣa ṯeǧa ddat n Ƹisa.

13Nnant-as: "A ṯamɣarṯ min cem yuɣin ṯetruḏ?"

Ṯenna-asent: "Ysin Siḏi, war ssineɣ mani ṯ sersen." 14Ṯenna manayenni ṯexzar ɣar ḏeffar ṯufa ḏinni Ƹisa, walakin nettaṯ war ṯessin ca netta ḏ Ƹisa.

15Inna-as Ƹisa i Maryam: "A ṯamɣarṯ min cem yuɣin ṯetruḏ, mixef ṯrezzuḏ?"

Maryam tɣir-as ḏ bab n jarda nni, ṯenna-as: "A Siḏi meȓa ḏ cek iy ṯ iysin, in-ayi mani ṯ ṯserseḏ ḥima aṯ ysiɣ."

16Inna-as Ƹisa: "A Maryam!"

Ȓexddenni ṯeƹqeȓ-iṯ ṯenna-as s wawaȓ n israʼiliyen: "A Rabuni!" (Zaƹma <A Lmuƹallim.>)

17Inna-as Ƹisa: "War ḏayi teṭṭef ca,#20.17 Imken tuɣa teṭṭef-iṯ zeg iḍaren nnes. Xzar Matta 28:9. qa nec ƹaḏ war gaƹƹḏeɣ ca ɣar Baba. Ruḥ ɣar ayṯma inu, in-asen qa nec aḏ gaƹƹḏeɣ ɣar Baba ḏ Babaṯwem, ɣar Arebbi inu ḏ Arebbi nwem."

18Ṯruḥ Maryam ṯamagdaliṯ ṯessiweḍ-asen ȓexbar i imeḥḍaren ṯenna-asen qa ẓriɣ Siḏiṯneɣ issiweȓ-d akiḏi aqa min ḏayi inna...

Siḏiṯneɣ Ƹisa itmeḍhar-d ṯȓaṯa n ṯwaȓaṯin i imeḥḍaren nnes

19Nhar n ȓḥad munen imeḥḍaren ɣar ṯmeddiṯ, ṯiwwura qqnent ggwḏen zeg israʼiliyen. Yusa-d Ƹisa ibedd ḏi ȓwesṭ inna-asen: "Sȓam xawem." 20Inna-asen manaya, isbeyyen-asen-d ifassen nnes ḏ uɣezḏis nnes. Farḥen imeḥḍaren wami ẓrin Siḏiṯsen. 21Inna-asen ƹaweḏ Ƹisa: "Sȓam xawem. Mammec ḏayi d issekk Baba, ammu nec akenniw ssekkeɣ." 22Wami inna manaya iṣṣuḍ xasen inna-asen: "Qebȓeṯ Arruḥ iqeddsen. 23Wenni umi ṯsemḥem i ddnub nnes, aḏas twasemḥent. Wenni umi war ṯesmiḥem ca, war ḏas twasmiḥent ca."

24Walakin ijjen zi ṯenƹac n imeḥḍaren nnes umi qqaren Tuma tȓaɣan-as Acniw,#20.24 Acniw netta ḏ aḵniw. war kisen iǧi ca wami d yusa Ƹisa. 25Nnan-as imeḥḍaren nni nneɣni qa neẓra Siḏiṯneɣ!

Ikkar Tuma inna-asen: "Meȓa war ẓriɣ ca lʼaṯar n imesmiȓen ḏeg ifassen nnes aḏ ggeɣ ḍaḍ inu ḏeg umcan n imesmiȓen nni, aḏ serseɣ fus inu x uɣezḏis nnes, war timneɣ ca."

26Menbaƹd i ṯmeniyyam, munen imeḥḍaren ƹaweḏ ɣar ḏaxeȓ, ṯiwwura qqnent akiḏsen Tuma. Yusa-d Ƹisa ibedd ḏi ȓwesṭ nsen inna-asen: "Sȓam xawem!" 27Inna-as i Tuma: "Egg ḍaḍ nnec ḏanita, xzar ifassen inu. Sers fus nnec x uɣezḏis inu. War tcekka ca; Lla, amen."

28Indeq-d Tuma inna-as: "A Siḏi inu, ay Arebbi inu!"

29Inna-as Ƹisa: "Aȓ wami ḏayi ṯeẓriḏ, ƹaḏ iy ṯumneḏ? Ssaƹḏ n yinni war ḏayi ẓrin ca, umnen."

30Igga Ƹisa aṭṭas n lmuƹjizaṯ nneɣni zzaṯ i imeḥḍaren nnes, niṯenti war urint ca ḏi Lkitab-a. 31Ṯimesȓayin-a urint ḥima aḏ tamnem belli Ƹisa netta ḏ Lmasiḥ Mmis n Arebbi bac meȓa ṯumnem aɣarwem ṯiȓi ṯuḏarṯ ḏeg yisem nnes.

Currently Selected:

Yuḥanna 20: RIF

Highlight

Copy