Kus 12

Obunyanzigwa bw'omukazi n'ekijoka

1Kandi haazooka omwiguru ekintu ekirukuhuniriza muno: omukazi ajwaire izooba, okwezi kuli hansi y'ebigere bye, kandi ha mutwe ajwaire ekondo ey'enyunyuuzi ikumi na ibiri. 2Omukazi ogu akaba akulize, naataaga habw'okurumwa ebisa, ali omu busaalizi obw'okuzaara.

3 # Dan 7:7. Kandi omwiguru haazooka ekirukuhuniriza ekindi; nikyo ekijoka ekikooto ekirukutukura, ekiina emitwe musanju, amahembe ikumi, n'ekondo musanju ha mitwe yakyo. 4#Dan 8:10.Omukira gwakyo gwasingorra kimu kya kasatu eky'enyunyuuzi ez'omwiguru, gwazinaga hansi. Ekijoka kyayemerra omumaiso g'omukazi ow'akaba ali haihi kuzaara, nukwo kisonsomere omwana we naakyamuzaara ati. 5#Is 66:7; Zab 2:9.Yazaara omwana w'obwojo ow'akaba ali w'okulema amahanga goona naagalemesa omwigo ogw'ekyoma, baitu omwana we yasahurwa, yatwarwa omba Ruhanga na ha kitebe eky'obukama bwe. 6Omukazi yairukira omwirungu nambere Ruhanga akaba amuteekaniriize ekiikaro h'asobora kuroleererwa kurungi okumara ebiro rukumi bibiri n'enkaaga.

Ekijoka nikibingwa omwiguru

7 # Dan 10:13,21; 12:1; Yud 1:9. Nubwo obulemu bwacwekere omwiguru, Mikairi na bamalaika be baarwana n'ekijoka; kandi ekijoka na bamalaika baakyo baarwana, 8baitu baasingurwa, kandi tibaagaruka kutunga kiikaro omu iguru. 9#Kub 3:1; Luk 10:18.Ekijoka eki kikooto kyahungurwa hansi, niyo enjoka egi eya ira enyakwetwa Omwohi kandi Sitaani, anyakubiihabiiha ensi yoona--yahungurwa omunsi hamu na bamalaika be.

10 # Yob 1:9-11; Zek 3:1. Kandi nahurra iraka erikooto omwiguru nirigamba liti: “Hati okujuna, amaani, n'obukama bwa Ruhanga waitu hamu n'obusobozi obwa Kristo we biizire, habwokuba omulegi wa bagenzi baitu, anyakubalega hali Ruhanga waitu nyamusana n'ekiro, abingirwe omwiguru. 11Bamusingwize okufa kw'Omwana gw'Entaama n'obwakaiso bw'amananu obu bamuheriire; batataatirre bwomeezi bwabo, nangwa baikiriza n'okumufeera. 12Nahabweki, semererwa iwe iguru, na inywe abaliikaramu! Baitu ziribabona inywe ensi n'enyanja, habwokuba Omwohi abaiziiremu aina ekiniga kingi, kandi amanyire nkooku asigaize akasumi kake!”

Ekijoka nikihiiganiza omukazi n'oruzaaro rwe

13Ekijoka obu kyarozire nkooku kihungwirwe omunsi, kyaronza omukazi ayazaire omwana omwojo. 14#Dan 7:25; 12:7.Baitu omukazi akaheebwa amapapa abiri ag'isamba erikooto, nukwo asobole kwiruka ekijoka, agende omu irungu, omu kiikaro nambere akaba naija kuroleerererwa okumara akasumi akali nk'emyaka esatu n'ekicweka. 15Ekijoka eki kyabooga ekisaaru ky'amaizi maingi, nikigaiha omu kanwa kaakyo, gahondere omukazi, nukwo entunga yago emutwale hara; 16baitu ensi yakoonyera omukazi agu, yayesama, yamira ekisaaru ekyaboogerwe ekijoka. 17Nubwo ekijoka kyabiihiriirwe omukazi, kyagenda kurwanisa oruzaaro rwe orwasigaireho, nubo abo abakwata Ebiragiro bya Ruhanga kandi abajurra Yesu. 18Nubwo ekijoka kyayesimbire ha musa gw'enyanja.

Currently Selected:

Kus 12: BRR2008

Highlight

Copy