Kus 13

Ekijoka nikikwasa ekinyamaiswa obusobozi bwakyo

1 # Dan 7:3; 2Esid 11:1; Kus 17:3,7-12. Nyowe nkaba nyemeriire ha musa gw'enyanja; kandi narora ekinyamaiswa nikiimuka omu nyanja kiina amahembe ikumi, emitwe musanju, ekondo ikumi ha mahembe gaakyo, kandi ha mitwe yakyo hahandiikirweho ibara erirukujuma Ruhanga. 2#Dan 7:4-6.Ekinyamaiswa eki narozire, kikaba nikisisana engo, ebigere byakyo nibisisana eby'edubu, akanwa kaakyo nikasisana ak'entale. Ekijoka kyakiha amaani gaakyo, n'ekitebe kyakyo eky'obukama, n'obusobozi bwakyo obwingi. 3Ogumu ha mitwe yakyo gukaba nigusisana ogwina ekihuta ekirukusobora kukiita, baitu ekihuta eki ekyakusoboire kukiita, kyakira; kandi abantu boona ab'ensi bahondera ekinyamaiswa bahuniriire. 4Abantu baaramya ekijoka eki, habwokuba obusobozi bwakyo kikabuha ekinyamaiswa, kandi baaramya n'ekinyamaiswa nibagamba bati: “Nooha arukusisana ekinyamaiswa, kandi nooha asobora kukirwanisa?”

5 # Dan 7:8,25; 11:36. Ekinyamaiswa eki kyaheebwa akanwa k'okugamba ebigambo eby'okwekuliriza n'eby'okujuma Ruhanga, kandi kyaikirizibwa okukozesa obusobozi bwakyo okumara ameezi amakumi ana n'abiri. 6Kyayesamya akanwa kaakyo kubaza eby'okujuma Ruhanga, nikijuma ibara lye, n'ekiikaro eki aikaramu, n'abo abaikara omwiguru. 7#Dan 7:21.Kandi kyaikirizibwa okurwanisa abantu ba Ruhanga n'okubasingura. Kyaheebwa obusobozi ha nganda zoona, ha bantu boona, ha ngambo zoona, na ha mahanga goona. 8#Zab 69:28.Kandi boona abaikara omunsi baliramya ekinyamaiswa eki. Nubo abo ab'amabara gaabo gatarahandiikiirwe okuruga ha kuhangwa kw'ensi omu kitabu eky'obwomeezi eky'Omwana gw'Entaama ayatambirwe. 9Anyakwina okutu, ahurre:

10 # Yer 15:2; 43:11. Ogu ow'okunyagwa, anyagwe omu bwiru;

ogu anyakwisa empirima, nawe aitwe n'empirima.

Aho nuho harukwetaagirwa okwikiriza n'okugumiisiriza okw'abantu ba Ruhanga.

Eby'ekinyamaiswa ekya kabiri

11Nubwo narozire ekinyamaiswa ekindi ekyakununukire omu itaka; kiina amahembe abiri nk'entaama, kyabaza nk'ekijoka. 12Kyakozesa obusobozi bwona obw'ekinyamaiswa eky'okubanza, na kiri kikiroleeriire. Kyahambiriza ensi n'abagirumu kuramya ekinyamaiswa eky'okubanza ekyakizire ekihuta kyakyo eky'okukiita. 13Kyakora ebirukuhuniriza, kyaragira omurro guruge omwiguru gugwe hansi, abantu nibarora. 14Ebihuniriza ebi kyaikiriziibwe kukora omu maiso g'ekinyamaiswa eky'okubanza bikahabisa abo abaikara omunsi. Kikabaragira kukora ekisisani eky'okunyumirizaaho ekinyamaiswa eki ekyahutaaziibwe empirima, baitu kyagaruka kyayomeera. 15Kyaikirizibwa kuhuuha orwoya omu kisisani eki ky'ekinyamaiswa, nukwo kisobole kubaza; kandi kyaikirizibwa n'okwita abo abarukwanga kuramya ekisisani eky'ekinyamaiswa. 16Kyahambiriza boona, abato n'abakuru, abaguuda n'abanaku, ab'obugabe n'abairu, bateebweho akarorwaho ha mukono ogw'obulyo rundi ha buso, 17nukwo haleke kubaho n'omu asobora kugura n'okutunda, rundi buli aina akarorwaho ako, niryo ibara ly'ekinyamaiswa, rundi enamba y'ibara lyakyo. 18Eki kintu ky'okwetegereza: arukwetegereza ayezorre amakuru ag'enamba y'ekinyamaiswa eki, habwokuba nayo namba y'abantu. Enamba yakyo, rukaaga mu nkaaga, na mukaaga.

Currently Selected:

Kus 13: BRR2008

Highlight

Copy