Mar 1

Okurangirra kwa Yohaana Omubatiza

(Mat 3:1-12; Luk 3:1-18; Yoh 1:19-28)

1Amakuru Amarungi aga Yesu Kristo, Omwana wa Ruhanga, nkooku gaatandikire. 2#Mara 3:1.Kikahandiikwa omu kitabu kya Isaaya omurangi kiti:

“Dora, nintuma omukwenda wange akwebembere,

akuteekanirize omuhanda gwawe;

3 # Is 40:3. nuwe ogu arukwamirra omwirungu ati:

Muteekanirize MUKAMA omuhanda,

mutereekereze obuhanda bwe.”

4Nikyo Yohaana Omubatiza yazookiire omwirungu naarangirra abantu beegarukemu, nukwo babatizibwe, baganyirwe ebibi. 5Abantu ab'omu Buyudaaya yoona n'aba Yerusaalemu boona bakagenda nambere ali, yababatiriza omu kisaaru Yorudaani, nibaatura ebibi byabo. 6#2 Bakam 1:8.Yohaana ogu yajwaraga ekyokujwara ky'ebyoya by'engamiya, naayeteegesa orukoba rw'oruhu, kandi yalyaga enzige n'obwoki obw'omwirungu. 7Akarangirra ati: “Arukunkiza obusobozi naija ankuratiire, ou ntasemeriire kwinama kusumurra orukoba rw'enkaito ze. 8Nyowe mbabatiza n'amaizi; baitu uwe alibabatiza na Mwoyo Ahikiriire.”

Yesu naabatizibwa kandi naayohebwa Sitani

(Mat 3:13—4:11; Luk 3:21-22; 4:1-13)

9Omu biro ebi, Yesu akaija naaruga Nazareeti orwa Galiraaya yabatizibwa Yohaana omu kisaaru Yorudaani. 10Obu akaba nakyaruga omu maizi ati, yarora iguru lyakinguka, na Mwoyo Ahikiriire naamusirimukaho omu kisisani ky'eriiba; 11#Kub 22:2; Zab 2:7; Is 42:1; Mat 3:17; 12:18; Mar 9:7; Luk 3:22.iraka lyaruga omwiguru nirigamba liti: “Niiwe Mwana wange omugonzibwa, ou nsiima muno.”

12Ahonaaho Mwoyo yamutwara omu irungu. 13Yamarayo ebiro makumi ana, naayohebwa Sitaani; kandi yaikaraga omu nyamaiswa hagati; n'abamalaika baamuheerezaaga.

Yesu naayeta abasohi bbana

(Mat 4:12-22; Luk 4:14-15; 5:1-11)

14Yohaana obu yamazire kukwatwa, Yesu yaija Galiraaya, naarangirra Amakuru Amarungi aga Ruhanga, 15#Mat 3:2.naagamba ati: “Akasumi kahikire, obukama bwa Ruhanga bwiriire haihi; mwegarukemu, mwikirize Amakuru Amarungi.”

16Obu akaba naaraba ha musa gw'enyanja ya Galiraaya, yarora Simooni na Andereya owanyina nibanaga akatimba omu nyanja; habwokuba bakaba bali basohi. 17Yesu yabagambira ati: “Mumpondere, ndibafoora basohi b'abantu.” 18Ahonaaho baasiga obutimba bwabu, baamuhondera. 19Obu yagenzireho omumaiso kake, yarora Yakobbo mutabani wa Zebedaayo, na Yohaana owanyina, nabo bakaba bali omu bwato bwabu nibasumiikaniza obutimba. 20Ahonaaho yabeeta; baaleka isebo Zebedaayo omu bwato hamu n'abarukukolerra empeera, baamuhondera.

Yesu naakiza ayakwasirwe omwoyo omubi

(Luk 4:31-37)

21Bakagenda Kafaranaumu; atabandaale, ha kiro kya Sabbato akataaha omu isorrokaniro, yatandika kwegesa. 22#Mat 7:28,29.Enyegesa ye ekahuniriza abantu, habwokuba akabeegesa nk'anyakwina obusobozi, atabeegese nk'abeegesa b'ebiragiro oku baabeegesaaga. 23Omu isorrokaniro eri hakaba harumu omusaija akwasirwe omwoyo mubi: 24Yatokera haiguru naagamba ati: “Yesu owa Nazareeti nootwenza ki? Oizire kutuhwerekereza? Ninkumanya, niiwe ahikiriire wa Ruhanga.” 25Baitu Yesu yagucoomera ati: “Culeera, murugeho!” 26Omwoyo omubi gwamukankaniza, gwayamuliza haiguru, gwamurugaho. 27Abantu boona baatangaara, nukwo kukaguzangana bati: “Kinu kiki? Enu nyegesa mpyaka! Naaragiza obusobozi emyoyo emibi, nayo neemuhurra.” 28Ahonaaho yagenda naayeyongera kurangaanwa omu bicweka byona ebya Galiraaya.

Yesu naakiza nyinazaara Simooni

(Mat 8:14-17; Luk 4:38-41)

29Obu baarugire omu isorrokaniro, baataaha omu nju ya Simooni na Andereya, bali hamu na Yakobbo na Yohaana. 30Nyinazaara Simooni akaba abyamire, arwaire omuswija obu akaba naakyahikaho ati, baamumugambira. 31Yesu yaija, yamukwata ha mukono, yamwimukya; omuswija gwamurugaho; yatandika kubaheereza.

32Rwebagyo, izooba obu lyagwire, bakamuleetera boona abakaba barwaire n'abakwasirwe emyoyo emibi. 33Ab'omu rubuga boona bakeesorooleza ha mulyango. 34Yakiza baingi abakaba barwaire endwara ezitali zimu; yabinga emyoyo emibi nyingi, kandi atagiikirize kugamba, habwokuba ekamumanya.

Yesu naarangirra Amakuru Amarungi omu Galiraaya yoona

(Luk 4:42-44)

35Nyenkya akaimuka obwire butakakiire, yagenda omu kiikaro ekitarumu bantu, yasabirayo. 36Simooni n'abo aba akaba ainabo baija nibamuserra, 37obu baamugwireho baamugambira bati: “Boona nibakuserra.” 38Nawe yabagarukamu ati: “Tweyongereyo omu byaro ebindi ebiherraineho, naho nyegeseeyo; habwokuba nikyo kyandeesire.” 39#Mat 4:23; 9:35.Yagenda naaraba omu Galiraaya yoona, naarangirra omu masorrokaniro gaabu, kandi naabinga emyoyo emibi.

Yesu naakiza omugenge

(Mat 8:1-4; Luk 5:12-16)

40Omugenge akaija nambere ali, yateeza amaju naamwesengereza ati: “Obu oraaba noogonza, noosobora kunkiza.” 41Yesu yakwatwa embabazi, yagorra omukono, yamukwataho, namugambira ati: “Ego ningonza; kira.” 42Omu kasumi ako konyini ebigenge byamurugaho, yakira. 43Ahonaaho Yesu yamuragira agende, naamuteererra muno ati: 44#Lev 14:1-32.“Otakisura okakigambiraho omuntu n'omu, baitu genda oyeyoleke nyakatagara, kandi habw'okusemezibwa kwawe oheyo ekihongwa Musa eki yaragiire, bube bwakaiso hali abantu.” 45Baitu obu yaturukire aheeru, yatandika kwebaliza naabirarangya hoona; nahabweki Yesu akaba atakyasobora kugaruka kutaaha omu byaro burole, baitu akaikara ha rubaju; abantu baarugaga hoona hoona, nibamusangayo.

Currently Selected:

Mar 1: BRR2008

Highlight

Copy