Mar 2

Yesu naakiza omusaija anyakuzingamire

(Mat 9:1-8; Luk 5:17-26)

1Obu haahingwireho ebiro, Yesu yagaruka Kafaranaumu, boona baamanya nkooku ali omuka. 2Abantu baingi bakeesorooza, baijura omu nju; na ha mulyango omwanya gwabura; akaba naabatebeza ekigambo kya Ruhanga. 3Haija abantu, baamuleetera omurwaire azingamire, ahimbirwe abasaija bbana. 4Obu baabuzirwe h'okumumuhikizaaho habw'obwingi bw'abantu, baasakurra orusu rw'enju haiguru ya Yesu mbere akaba ali; obu baamazire kutunga omwanya gw'okumurabyamu, baamusirimurra ha katabu aka akaba abyamireho. 5Yesu obu yarozire nkooku baina okwikiriza, yagambira ekizingo ati: “Mwana wange, ebibi byawe bikuganyirwe.” 6Nukwo abamu ha beegesa b'ebiragiro abakaba baikaliire aho, kwekaguza bati: 7“Omusaija onu kiki ekirukumugambisa kiti? Naajuma Ruhanga! Nooha asobora kuganyira ebibi atali Ruhanga wenka?” 8Yesu obu yakengere nkooku barukwekaguza bati, yagaruka yabakaguza ati: “Kiki eki murukwekaguliza muti omu mitima yanyu? 9Ekirukukira kurahuka kiraha, kugambira ekizingo nti: ‘Ebibi byawe bikuganyirwe,’ rundi kugamba nti: ‘Imuka, ohimbe akatabu kaawe, orubate’? 10Hati ka mumanye Omwana w'omuntu nkooku aina obusobozi omunsi obw'okuganyira ebibi.” Nubwo yagambiire ekizingo ati: 11“Ninkuragira nti: Imuka, ohimbe akatabu kaawe, otaahe.” 12Uwe yaimuka, ahonaaho yahimba akatabu ke, yaturuka aheeru boona bamuroleriire; nukwo bbo kutangaara, baakugiza Ruhanga nibagamba bati: “Ekintu nka kinu titukakiroraga!”

Okwetwa kwa Leevi

(Mat 9:9-13; Luk 5:27-32)

13Yesu akagaruka kugenda ha musa gw'enyanja; ekitebe kyona kyamwesoroolezaaho, uwe yabeegesa. 14Obu akaba naahingura, yarora Leevi, mutabani wa Alifaayo, aikaliire omu isoroolerezo ly'omusoro, yamugambira ati: “Mpondera.” Nawe yaimuka, yamuhondera.

15Kandi obu akaba aikaliire omunju ya Leevi naalya, abasorooza b'omusoro baingi n'abasiisi bakaba bailkaliire nawe n'abeegesebwa be; habwokuba hakaba haroho baingi abaamuhondiire. 16Abeegesa b'ebiragiro ab'omu Bafalisaayo obu baamurozire naalya n'abasiisi n'abasorooza b'omusoro, nukwo kukaguza abeegesebwa be bati: “Habwaki naalya kandi naanywa n'abasooroza b'omusoro n'abasiisi?” 17Yesu obu yakihuliire, yabagarukamu ati: “Aboomeezi tibeetaaga mufumu, baitu ayetaagwa abarwaire; ntaizirre kweta abahikiriire baitu abasiisi.”

Ekikaguzo ha kusiiba

(Mat 9:14-17; Luk 5:33-39)

18Omu kasumi ako abeegesebwa ba Yohaana Omubatiza n'Abafalisaayo bakaba nibasiiba; abantu baija baakaguza Yesu bati: “Habwaki abeegesebwa ba Yohaana n'ab'Abafalisaayo nibasiiba, kunu abaawe batarukusiiba?” 19Yesu yabagarukamu ati: “Abagenyi basobora kusiiba kunu omuswezi ainabo? Obu baba bakyali na omuswezi, tibasobora kusiiba. 20Akasumi kalihika kigabura obu alibaihwaho, ha kiro eki nubwo balisiiba. 21Tiharoho n'omu abazirirra ekikoba kihyaka ha kijwaro kikuru. Kakuba akorakwo, ekikoba kitaagura ekijwaro kandi ekihuru kigalihira kimu. 22Kandi tiharoho muntu anyakuta eviini ey'ehiira omu ndyanga enkuru. Kakuba akorakwo, endyanga ebbaruka, eviini eseeseka, n'endyanga esiisikara; baitu eviini ey'ehiira bagita omu ndyanga empyaka.”

Yesu nuwe MUKAMA wa Sabbato

(Mat 12:1-8; Luk 6:1-5)

23 # Bir 23:25. Ha Sabbato emu, Yesu akaba naaraba omu misiri y'engano, kandi abeegesebwa be, obu bakaba nibahingura, baatandika kucwa entwe z'engano. 24Nukwo Abafalisaayo kukaguza Yesu bati: “Abeegesebwa baawe, habwaki bakora ekitarukwikirizibwa Biragiro bya Musa ha Sabbato?” 25Yesu yabagarukamu ati: “Timukasomaga Daudi eki yakozire obu yarumirwe enjara naayetaaga ebyokulya, uwe hamu n'abo aba akaba ainabo? 26#Lev 24:9.#1 Sam 21:1-6.Akataaha omu Nju ya Ruhanga, Abiyasaali obu akaba ali mukuru w'Abanyakatagara, yalya emigaati ey'ekaba ehongiirwe Ruhanga, niyo etarukwikirizibwa kuliibwa muntu weena kwihaho baanyakatagara, kandi yagiha n'abo aba akaba ainabo.” 27Akongera yabagambira ati: “Sabbato ekateebwaho habw'omuntu, baitu omuntu atateebweho habwa Sabbato; 28nahabweki Sabbato nayo Omwana w'omuntu nuwe MUKAMA wayo.”

Currently Selected:

Mar 2: BRR2008

Highlight

Copy