Mat 28
28
Okuhumbuuka kwa Yesu
(Mar 16:1-10; Luk 24:1-12; Yoh 20:1-10)
1Sabbato ekahwaho, kandi nyenkya omu rukyakya, ha Sande, Mariya Magadaleena na Mariya ondi bakagenda ha kituuro. 2Hakabaho omusisa gw'amaani, habwokuba malaika wa Ruhanga akasirimuka yaruga omu iguru, yaija yakumbya ibaale lya ha munwa gw'ekituuro, yaliikarraho. 3Amaiso ge gakaba nigangasana nk'omurabyo kandi ebijwaro bye bikaba nibyeera nk'ebirika. 4Abalinzi habw'okumutiina, bakatukumira, baagwa, baasisana nk'abafiire. 5Baitu malaika yagambira abakazi ati: “Mutatiina; habwokuba mmanyire nkooku murukuserra Yesu ayabambirwe ha musaraba. 6Hanu taroho; ahumbuukire nkooku yagambire. Mwije murole nambere bakaba bamutaire. 7Hati mugende bwango, mugambire abeegesebwa be nkooku ahumbuukire kandi naija kubabanza kuhika Galiraaya; oku nuho mulimurorra. Hati mmazire kubagambira.” 8Bbo baaruga bwango ha kituuro baina obutiini hamu n'omuhimbo mwingi, bairuka kugambira abeegesebwa be. 9Nubwo Yesu yabatangaine yabaramukya ati: “Mirembe!” Baamwirra haihi, baamukwata ebigere, baamuramya. 10Aho Yesu yabagambira ati: “Mutatiina, irooko mugambire bagenzi bange bagende Galiraaya; oku nuho balindorra.”
Okuguliira abalinzi
11Abakazi abo obu bakaba nibakyarugaho, abamu ha balinzi bakagenda omu rubuga kugambira abanyakatagara byona ebyabaireho. 12Baanyakatagara obu baayesoroize kuhanuura hamu n'abakuru b'abantu, nubwo baahaire abalinzi sente, 13baabateererra bati; “Mugambire abantu ngu: ‘Abeegesebwa be baizirege ekiro obu tubaire tugwijagiire, baamwiba, baamutwara.’ 14Kandi kinu omulemi omukuru obu araakihurra, nitwija kumunanura, nukwo na inywe tubaihe omu kabi.” 15Abalinzi baatwara sente, baakora nkooku baahanuliirwe; amakuru ago gakararanga omu Bayudaaya n'okuhika hati hoona!
Yesu naatuma Abakwenda omu mahanga goona
(Mar 16:14-18; Luk 24:36-49; Yoh 20:19-23; Ebik 1:6-8)
16 #
Mat 26:32; Mar 14:28. Omu kasumi ako, abakwenda ikumi n'omu bakagenda Galiraaya, ha rusozi Yesu oru akaba abagambireho. 17Obu baamurozire, baamuramya; baitu abandi baafuberra. 18Yesu yairra haihi, yabagambire ati: “Nkaheebwa obusobozi bwona omwiguru n'omunsi. 19#Ebik 1:8.Nahabweki mugende, muhindule abantu ab'omu mahanga goona beegesebwe, nimubabatiza omu ibara lya Isiitwe, n'erya Mwana, n'erya Mwoyo Ahikiriire, 20mubeegese okukwata byona ebi naabaragiire. Mumanye nkooku ndi na inywe ebiro byona okuhika ha mpero.”
Currently Selected:
Mat 28: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
