Mat 27

Yesu naatwarwa mba Pilaato

(Mar 15:1; Luk 23:1-2; Yoh 18:28-32)

1Obwire obu bwakiire, banyakatagara abakuru boona n'abakuru b'abantu baahanuura kwita Yesu; 2baamuboha, baamutwara, baamukwasa Pilaato omulemi omukuru.

Okufa kwa Yuda

(Ebik 1:18-19)

3 # Ebik 1:18,19. Yuda ayamugobiize, obu yarozire Yesu amazire kusingwa omusango, yayegarukamu eki yakozire, yagarurra banyakatagara abakuru n'abakuru b'abantu ebicweka by'efeeza amakumi asatu, 4naagamba ati: “Nsiisire okugobeza omuntu ataina musango.” Baamugarukamu bati: “Itwe eki nitukifaaho ki? Oyemalirre wenka.” 5Nubwo yahungwire ebicweka by'efeeza omunju ya Ruhanga, yabarugaho, yagenda, yayehanika. 6Baitu banyakatagara abakuru baasorooza ebicweka ebi by'efeeza, nibagamba bati: “Tikirukuhika kubita omu lyahurro ly'Enju ya Ruhanga, habwokuba sente zinu ziguzire esagama y'omuntu.” 7Baahanura kuziguramu ekibanja ky'omubumbi, baziikemuga abanyamahanga. 8Nikyo ekibanja eki kyeterwa Ekibanja ky'Esagama n'okuhika hati. 9#Zek 11:12,13.Nubwo ekyagambirwe omurangi Yeremiya kyahikiriire kiti: “Bakatwara ebicweka by'efeeza makumi asatu, nugwo muhendo gw'ogu abantu ba Isirairi baaramwire, 10kandi babiguramu ekibanja ky'omubumbi, MUKAMA nkooku yammanyisize.”

Pilaato naakaguza Yesu

(Mar 15:2-5; Luk 23:3-5; Yoh 18:33-38)

11Yesu yayemerra omumaiso g'omulemi mukuru. Ogu yamukaguza ati: “Niiwe Mukama w'Abayudaaya?” Yesu yamugarukamu ati: “Nukwo ogambire.” 12Baitu banyakatagara abakuru n'abakuru b'abantu obu baamulegere, atagarukemu. 13Nubwo Pilaato yamukagwize ati: “Torukuhurra ebi byona ebi barukukunyegerra nkooku biri bingi?” 14Baitu Yesu atamugarukemu na kimu hali ebi byona ebi baamunyegeriire; omulemi nawe yahunirra muno.

Pilaato naacwera Yesu omusango gw'okufa

(Mar 15:6-15; Luk 23:13-25; Yoh 18:39—19:16)

15Ha kiro kikuru, ekaba eri engeso y'omulemi omukuru okulekerra abantu omunyankomo omu ou baasiimaga. 16Omu kasumi ako bakaba baina omunyankomo omu arukurangaanwa muno, ibara lye Baraaba. 17Obu baayesoroize, Pilaato yabakaguza ati: “Nimwenda mbalekerre oha: Baraaba rundi Yesu arukwetwa Kristo?” 18Akamanya nkooku bamuhaireyo habw'ihali. 19Pilaato obu yaikaliire ha kitebe ky'okucweraho emisango, nubwo mukazi we yamutumiireho ati: “Omusaija ogu ahikiriire otamukoraho kantu koona; habwokuba ebi mmuroosireho ekiro, binsaalize muno.” 20Baitu banyakatagara abakuru n'abahanuuzi bakasoonasoona abantu kusaba Baraaba, baite Yesu. 21Omulemi omukuru yabakaguza ati: “Hali banu bombi, nimwenda mbalekerre oha?” Baamugarukamu bati; “Baraaba.” 22Nandiki Pilaato ati: “Kandi Yesu arukwetwa Kristo, mmukole ki?” Nukwo boona kugarukamu bati; “Abambwe ha musaraba!” 23Omulemi yabakaguza ati: “Habwaki? Akozire kibi ki?” Baitu bbo baatokera haiguru kukiraho bati: “Abambwe ha musaraba!”

24 # Bir 21:6-9. Pilaato obu yarozire nayejwahiza busa, kandi nkooku harukwija kubaho akajagarro, yakwata amaizi, yanaaba omu ngaro boona nibarora, naagamba ati: “Nyowe tindukujunaanwa sagama y'omuntu onu ahikiriire, ebi bigambo byanyu.” 25Abantu boona nukwo kugarukamu bati: “Esagama ye ebe hali itwe na ha baana baitu!” 26Nubwo yabalekerra Baraaba, kandi yaragira babanze bateere Yesu enkoba, hanyuma yamuhayo kubambwa ha musaraba.

Yesu naajwekwa ekondo y'amahwa

(Mar 15:16-20; Yoh 19:2-3)

27Nubwo abaserikale b'omulemi omukuru baatwaire Yesu omunju erukwetwa kibbira, ekihanda kyabu kyona kyamwesoroolezaaho. 28Baamujuura ebijwaro bye, baamujweka orugoye orurukugaajuka. 29Baaruka ekondo y'amahwa, baagimuta ha mutwe, baamukwasa orubingo omu mukono gw'obulyo. Baateeza amaju omumaiso ge nibamuteerra enaku bati? “Hangiriza, Omukama w'Abayudaaya!” 30Baamucwera ebicwanta, baamwihaho orubingo, baarumuteeza ha mutwe. 31Obu baamazire kumuterra enaku, baamujuura orugoye orurukugaajuka, baamujweka ebijwaro bye, baamutwara kumubamba ha musaraba.

Yesu naabambwa ha musaraba

(Mar 15:21-32; Luk 23:26-43; Yoh 19:17-27)

32Obu bakaba nibagenda, baatangana omusaija owa Kireene, ibara lye Simooni, baamuhambiriza okwetwekeraho Yesu omusaraba. 33Obu baahikire omu kiikaro ekirukwetwa Gologota (ekirukumanyisa ngu: kiikaro ky'oruhanga), 34#Zab 69:21.baaha Yesu eviini etabwirwemu omubazi, aginywe; baitu obu yarolezeeho, yayanga kuginywa. 35#Zab 22:18.Abaserikale obu baamazire kumubamba, baabagana ebijwaro bye nibabitera itomo; 36baikarra hansi bamuroleriire. 37Kandi haruguru y'omutwe gwe, bakataho ekihandiiko ky'omusango gwe ekirukugamba kiti: “Onu nuwe Yesu, Omukama w'Abayudaaya.” 38Akabambwa hamu n'abahuura babiri, omu ha mukono gwe ogw'obulyo, n'ondi ha gw'emoso.

Yesu naatererwa enaku ali ha musaraba

39 # Zab 22:7; 109:25; Sir 12:17,18; 13:7. Kandi abo abakaba nibahingura baamujuma, nibacwa emitwe yabo, 40#Mat 26:61; Yoh 2:19.nibagamba bati; “Iwe ayagondeze kuseesa Enju ya Ruhanga, okagaruka kugyombekera ebiro bisatu wejune wenka! Obu oraaba oli Mwana wa Ruhanga, wehanuule ha musaraba.” 41Baanyakatagara abakuru, n'abeegesa b'ebiragiro, hamu n'abakuru b'abantu, nabo nukwo baamujumire bati: 42“Akajuna abandi, baitu tasobora kwejuna wenka, kunu nuwe Omukama wa Isirairi. Hati ayehanuule ha musaraba, nukwo na itwe tumwikirize. 43#Zab 22:8; Ama 2:18-20.Ayesiga Ruhanga, leka Ruhanga amujune hati, obu araaba naamugonza; habwokuba akagamba ati: ‘Ndi Mwana wa Ruhanga.’” 44Kandi abahuura abaabambirwe nawe, nabo nukwo baamujumire bati.

Okufa kwa Yesu

(Mar 15:33-41; Luk 23:44-49; Yoh 19:28-30)

45Okuruga esaaha mukaaga okuhika esaaha mwenda ensi yoona ekaswekwa omwirima. 46#Zab 22:1.Kandi ha saaha nka mwenda, Yesu yayamuza n'iraka likooto ati: “Eli, Eli lama sabakatani?” Amakuru gaakyo ngu: “Ruhanga wange, Ruhanga wange, ondugiireho ki?” 47Abamu ha basungi, obu baahuliire eki, nukwo kugamba bati: “Omusaija onu naayeta Eriya.” 48#Zab 69:21.Ahonaaho omu halibo yairuka yaleeta ekijumankuba yakiibika omu marwa agasaaliire, yakita ha rubingo, yamuha anyunyuguze. 49Baitu abandi baagamba bati; “Ka turole Eriya nkooku araija kumujuna.” 50Baitu Yesu yagaruka yayamuliza haiguru, yacwekana.

51 # Kurug 26:31-33. Ahonaaho enyigamo y'omunju ya Ruhanga yatemukamu habiri, okuruga eruguru okuhika hansi; ensi yatengeeta, n'emyandara yayatika; 52ebituuro byayesama, emitumbi nyingi ey'abahikiriire abakaba bagwijagire yahumbuurwa. 53Abaarugire omu bituuro Yesu amazire kuhumbuuka, bakagenda omu rubuga orurukwera baabonekera baingi. 54Mukuru w'abaserikale n'aba akaba ainabo nibalinda Yesu, obu baahuliire omusisa, nibarora n'ebyabaireho byona, baatiina muno nibagamba bati: “Mazimakwo, onu abaire Mwana wa Ruhanga!”

55 # Luk 8:2,3. Hakaba haroho n'abakazi baingi abaarugire Galiraaya bahondiire Yesu nibamuheereza, beemeriire haraho nibarora; 56omuli bo hakaba harumu Mariya Magadaleena, Mariya nyina Yakobbo na Yosefu, kandi na nyina batabani ba Zebedaayo.

Yesu naaziikwa

(Mar 15:42-47; Luk 23:50-56; Yoh 19:38-42)

57Obwire obu bwahikire rwebagyo, hakaija omusaija omuguuda owa Alimateya, ibara lye Yosefu, nawe akaba ali mwegesebwa wa Yesu. 58Akagenda hali Pilaato, yamusaba omutumbi gwa Yesu. Pilaato yaragira bagumuhe. 59Yosefu yatwara omutumbi, yaguzinga omu rugoye rwa bafuta, 60yaguta omu kituuro ekihyaka eki akaba ayebaiziire omu mwandara; yakumbya ibaale likooto, yaigara omunwa gw'ekituuro, yagenda. 61Mariya Magadaleena na Mariya ondi bakaba baroho, baikaliire baroleriire ekituuro.

Abalinzi nibalinda ekituuro

62Obwire obu bwakiire, nikyo kiro ekyakuraatiire ekiro ky'Okweteekaniza, banyakatagara abakuru n'Abafalisaayo baayesorooleza hali Pilaato 63#Mat 16:21; 17:23; 20:19; Mar 8:31; 9:31; 10:33,34; Luk 9:22; 18:31-33.baagamba bati; “Waitu, nitwijuka omubiihi w'ebisuba ogu, obwakaba akyali mwomeezi, akagamba ati: ‘Obu halihinguraho ebiro bisatu, ndihumbuuka.’ 64Nahabweki, ragira balindire kimu ekituuro okuhika ha kiro kya kasatu, obw'olyaho abeegesebwa be tibaikara kwija bakaiba omutumbi gwe, hanyuma bakagambira abantu bati: ‘Ahumbuukire omu bafu’, kandi okuhaba okwa hanyuma nikwija kukira okw'okubanza obubi.” 65Pilaato yabagarukamu ati; “Mwina abalinzi, mugende mukirinde nkooku murukusobora.” 66Baagenda, baagumya ekituuro; ibaale balitaho emanyikirizo, baataho n'abalinzi.

Currently Selected:

Mat 27: BRR2008

Highlight

Copy