Luk 14

Yesu naakiza omusaija ow'akaba arwaire omuhago

1Ha kiro kya Sabbato, Yesu obu yagenzire kulya omunju y'omu ha bakuru b'Abafalisaayo, abantu boona baamuhanga amaiso. 2Omu kitebe hagati hakaba haroho omusaija ow'akaba azimbire emikono n'amaguru. 3Nukwo Yesu kukaguza abeegesa b'ebiragiro n'Abafalisaayo ati: “Ebiragiro nibitwikiriza kukiza ha Sabbato rundi nangwa?” 4Bbo baahuna kwonka. Nukwo Yesu kukwataho omusaija yamukiza, yamwohereza agende. 5#Mat 12:11.Hanyuma yabagambira ati: “Nooha omuli inywe anyakwina endogoyi rundi ente, kakuba egwa omu iziba ha Sabbato, ataakugiihiremu ahonaaho ha kiro eki?” 6Eki nakyo batasobole kukigarukamu.

Amakune n'okwebundaaza

7Yesu obu yarozire abagenyi abamu nkooku beekomiire ebiikaro eby'ekitiinisa, nubwo yabacweriire orufumo runu ati: 8#Nfu 25:6,7.“Obu baraakuraaliza ha bugenyi bw'obugole, leka kwikarra omu kiikaro ky'ekitiinisa, tihaikara kubaho omuntu arukukukiza ekitiinisa ayaraaliziibwe; 9kandi ayabaraaliize inywembi akaija akakugamba ati: ‘Rugiza omuntu onu.’ Nukwo okagenda n'ensoni kwikarra omu kiikaro eky'enyuma. 10Kakuba oraalizibwa, genda oikarre omu kiikaro ekitali ky'ekitiinisa, kikuraaliza obu aija hali iwe akugambire ati: ‘Munywani wange, ija oikarre omumaiso.’ Kinu kirikuhaisa ekitiinisa omu maiso g'abagenyi abandi boona. 11#Mat 23:12; Luk 18:14.Habwokuba weena anyakwenyumiza, alibundaaziba; kandi anyakwebundaaza, alinyumizibwa.”

12Kandi Yesu yagambira ayamuraaliize ati: “Obu oraabaga ocumbiire abantu ebyokulya ebya nyamusana rundi otaralizaaga bagenzi baawe, rundi beene banyu, rundi abaguuda bataahi baawe, tibaikara kukuraaliza nkooku wabaraaliize, kandi buli osaswirwe. 13Baitu obu oraateekaga obugenyi, oraalizeege abanaku, ebizingo, abalema n'abafu b'amaiso. 14Nubwo oliheebwa omugisa, habwokuba bbo, tibaina eki basobora kukugarurra, kandi iwe olisasurwa ha kuhumbuuka kw'abahikiriire.”

Orufumo rw'obugenyi obwayangirwe

(Mat 22:1-10)

15Omu ha bantu abakaba baikaliire nibalya nawe, obu yahuliire eki, yagambira Yesu ati: “Aina omugisa ogu ow'alirya ebyokulya omu bugenyi bw'omu bukama bwa Ruhunga!” 16Baitu Yesu yamugarukamu ati: “Hakaba haroho omusaija ayateekere obugenyi bwingi, yaraaliza abantu baingi. 17Akasumi k'obugenyi obu kaahikire, yatuma omuheereza we kugambira abaaraaliziibwe ati: ‘Mwije, byona biteekaniziibwe.’ 18Baitu boona baatandika kwekasa omu-omu. Ow'okubanza yagambira omuheereza ati: ‘Nguzire ekibanja, kimpikiriire kugenda kukirora. Nkesengeriize onganyire.’ 19Ondi yagamba ati: ‘Nguzire ente ikumi, hati ningenda kwirengesa. Nkwesengeriize, onganyire.’ 20Ondi yagamba ati: ‘Nubwo ndugire kugabura, nikyo kintangire kwija.’

21“Omuheereza yagarukayo, ebi byona yabigambira mukama we. Nubwo nyineeka yakwasirwe ekiniga, yaragira omuheereza we ati: ‘Rahuka, ogende omu nguudo z'omu rubuga n'omu mihanda yarwo, oleete abanaku, ebizingo, abafu b'amaiso, n'abalema.’ 22Omu kasumi kake omuheereza yagaruka kumugambira ati: ‘Waitu, eki oragiire, kikozirwe; baitu nabwo hakyaroho omwanya.’ 23Nubwo mukama we yamuragiire ati: ‘Irooko ogende omu nguudo enkooto n'omu mihanda y'omu byaro, ohambirize abantu baije, nukwo enju yange ijule. 24Baitu nimbagambira nti: Busaho n'omu ha bantu abo abaaraaliziibwe alirya ha bugenyi bwange.’ ”

Abahondera Yesu ebi beeyangisa

(Mat 10:37-38)

25Ebitebe by'abantu baingi bikaba nibihondera Yesu mbere arukugenda. Uwe yahinduka yabagambira ati: 26#Mat 10:37.“Weena anyakwija nambere ndi, ateerekeseze ise na nyina, mukazi we n'abaana, bagenzi be n'abanyaanya, nangwa n'obwomeezi bwe, ogu tasobora kuba mwegesebwa wange. 27#Mat 10:38; 16:24; Mar 8:34; Luk 9:23.Weena ateetweka musaraba gwe akampondera, tasobora kuba mwegesebwa wange.

28“Nooha omuli inywe anyakugonza kwombeka omunaara, atabanza kwikarra akabalirra ebiragwombeka; akamanya ngu, aina sente ezirukumara omulimo? 29Kakuba atabalirra, obu aliba amazire kulima omusingi, kandi akasangwa atarukusobora kumara omulimo gwona, nubwo boona abaligurora balitandika kumusekeereza, 30nibagamba bati: ‘Omuntu onu akatandika kwombeka, baitu tiyasobora kumaliriza!’

31“Rundi mukama ki anyakugonza kuramagira omukama ondi, atabanza kwikarra akahanuura nkooku araasobora n'abaserikale be omutwaro gumu kurwanisa omukama ondi anyakwina abaserikale emitwaro ebiri? 32Kakuba arora nkooku atarukusobora, atuma abakwenda okutangatangana omukama ogu akyali hara, naasaba obusinge. 33Na inywe nukwo kiba kiti, tiharoho n'omu anyakusobora kuba mwegesebwa wange, ateerekeseze byona ebi ainabyo.”

Ekisura ekitaina rusa

(Mat 5:13; Mar 9:50)

34“Ekisura kirungi, baitu obu kihoibwamu orusa ruligarurwamu ruta? 35Tikiina mugaso ha itaka noobu haakuba ha rubungo. Kisigarra kunagwa abantu. Anyakwina amatu, ahurre!”

Currently Selected:

Luk 14: BRR2008

Highlight

Copy