Luk 13

Naayegesa ha kwegarukamu

1Omu kasumi ako hakabaho abantu abamu abamanyisize Yesu ha by'Abagaliraaya abaisirwe Pilato obu yabasangire nibatamba ebyonzira. 2Yesu yabagarukamu ati: “Nimuteekereza Abagaliraaya banu nubo bakaba bali basiisi okukira Abagaliraaya abandi, nikyo baabonaboniire bati? 3Nangwa, nimbagambira nti: Na inywe obu mutalyegarukamu, nukwo mulihwerekerra muti. 4Rundi nimuteekereza abantu ikumi na munaana bali, abaatiirwe omunaara gwa Silohamu gwabaita, nubo bakaba baina omusango ogurukukira ogw'abantu abandi abaikaraga Yerusaalemu? 5Nangwa, nimbagambira nti: Na inywe obu mutalyegarukamu, nukwo mulihwerekerra muti.”

Orufumo rw'omutini ogutarukwana

6Aho Yesu akabaganikiza oruganikyo runu ati: “Omusaija akaba aina omuti gw'omutini ogwameezire omu rugonjo rwe orw'emizaabbibbu. Akaija kuguserraho ebijuma, tiyabisangaho. 7Yagambira omulimi w'emizaabbibbu ati: ‘Hati nakamara emyaka esatu ninyija kuserra ebijuma ha muti gunu omutini, ntarukusangaho kantu. Guteme! Nigusiisira ki itaka?’ 8Baitu omulimi yamugarukamu ati: ‘Waitu, haakire guleke gumale omwaka gunu. Mbanze ngulimirre, nguteho n'ebyokuguleetera orwezo. 9Omwaka ogurukwija obu gulyana, kiriba kirungi, obu gutalyana nubwo tuligutema.’ ”

Yesu naakiza omukazi omulema ha Sabbato

10Ha kiro kya Sabbato, Yesu akaba naayegesa omu isorrokaniro erimu. 11Hakaba haroho omukazi ow'akaba aina omwoyo omubi ogwamucekeze kumara emyaka ikumi na munaana; akaba ayegemere, atarukusobora kwegorra. 12Yesu obu yamuboine, yamweta ati: “Mukazi iwe, okiziibwe endwara yaawe!” 13Yamutaho emikono, ahonaaho omukazi yagorroka, yakugiza Ruhanga.

14 # Kurug 20:9,10; Bir 5:13,14. Omukuru w'isorrokaniro yabiihirwa habw'okurora Yesu akirize omuntu ha Sabbato. Nukwo kugambira abali aho ati: “Abantu baina ebiro mukaaga ebi basemeriire kukorramu emirimo. Nahabweki mwijege omu biro ebi, mukiziibwe; baitu hatali ha Sabbato!” 15Nubwo MUKAMA Yesu yamugarukiremu ati: “Bagobya inywe! Haroho omuli inywe atasibura ente ye rundi endogoyi ha Sabbato akagitwara kugyesera amaizi? 16Omukazi ogu, omwijukuru wa Abburahamu, Sitaani ou yazingazingire okumara emyaka ikumi na munaana; nawe tasemeriire okuzingururwa ha kiro kya Sabbato?” 17Obu yabalize ebigambo ebi, abanyanzigwa be boona baakwatwa ensoni; baitu ekitebe ky'abantu baasemererwa habw'ebyamahano byona ebi yakozire.

Orufumo rw'akasigo ka karadaali

(Mat 13:31-32; Mar 4:30-32)

18Yesu yagamba ati: “Obukama bwa Ruhanga nibusisana buta? Ndabulengesaniza na ki? 19Nibusisana akasigo ka karadaali #13:19 Karadaali nikyo kimera ekikura nk'ikoma-mahanga, baitu kiina obujuma butoito nk'obwa kalituusi. omuntu aka yatwaire yabyara omu musiri gwe, kakakura, kaafooka kisaka kikooto, n'enyonyi zaayombeka ebiju byazo omu mataagi gaakyo.”

Orufumo rw'ekitumbisa

(Mat 13:33)

20Yesu yayongera yagamba ati: “Obukama bwa Ruhanga ndabulengesaniza na ki? 21Nibusisana ekitumbisa omukazi eki yajwanganiize omu bihi bisatu eby'ensaano okuhika yoona obu yatumbire.”

Irembo erifunzire

(Mat 17:13-14,21-23)

22Yesu akagenda naayegesa omu mbuga n'omu byaro, akwasire omuhanda oguraamuhikya Yerusaalemu. 23Nubwo omuntu omu yamukagwize ati: “Mukama wange, abo abalijunwa baliba bake?” Yesu yamugarukamu ati: 24“Mwekambe kutaaha nimuraba omu irembo erifunzire. Nimbagambira nti: Abantu baingi balirengaho okulirabamu, baitu tibalisobora.

25“Nyineeka obu alikamara kukinga orwigi, mulyemerra aheeru nimweranga muti: ‘Waitu, tukingurre!’ Uwe alibagarukamu ati: ‘Tindukumanya nambere murukuruga.’ 26Nubwo mulitandika kwetonda muti: ‘Twalyaaga na iwe twanywaga na iwe, kandi wayegesaaga omu makuute g'owaitu.’ 27#Zab 6:8.Nandiki uwe ati: ‘Mbagambiire: tindukumanya nambere murukuruga! Mundugeho inywe enkozi z'ebibi!’ 28#Mat 22:13; 25:30.#Mat 8:11,12.Obu nubwo haliba okurra n'okunena ensaya, obu mulirora Abburahamu, Isaaka, Yakobbo n'abarangi boona bali omu bukama bwa Ruhanga, kandi kunu inywe mutangiirwe aheeru! 29Abantu baliruga Burugaizooba na Bugwaizooba, ha Bukiizi obw'emoso na Bukiizi bw'obulyo baikarre ha bugenyi omu bukama bwa Ruhanga. 30#Mat 19:30; 20:16; Mar 10:31.Mumanye nkooku abamu ab'enyuma baliba b'okubanza, kandi abamu ha b'okubanza baliba b'enyuma.”

Yesu naalirirra Yerusaalemu

(Mat 23:37-39)

31Omu kasumi ako konyini, Abafalisaayo abamu bakaija baagambira Yesu bati: “Ruga hanu ogende, habwokuba Herode nagonza kukwita.” 32Yesu yabagarukamu ati: “Eboha egi, mugende mugigambire muti: ‘Hati na ijo nimbinga emyoyo emibi, ninkiza n'abarwaire, kandi ha kiro kya kasatu nubwo ndimalirra omulimo gwange.’ 33Baitu hati na ijo na ijweri ndi w'okweyongera omu maiso. Tikihikire omurangi okwitirwa aheeru y'orubuga Yerusaalemu.

34 # 2Esid 1:30. “Yerusaalemu, Yerusaalemu iwe anyakwita abarangi kandi anyakuteeza amabaale abakwenda abakutumiirwe! Kaingaha obu nagondeze kusorooza abaana baawe nk'enkoko oku ebumbatira obwana bwayo omu mapapa gaayo, baitu mwayanga! 35#Zab 118:26.Hati murole: Enju yanyu neija kusigara eri kifurukwa. Kandi nyowe nimbagambira nti: Timulindora okuhikya obu muligamba muti: ‘W'omugisa ogu arukwija omu ibara lya MUKAMA.’ ”

Currently Selected:

Luk 13: BRR2008

Highlight

Copy