Lev 27
27
Ebiragiro ebirukukwata ha ndagaano
1MUKAMA akagambira Musa ati: 2“Gambira abantu ba Isirairi ngu: Binu nibyo ebiragiro ebinyakutairweho habwabo. Omuntu kakuba ahebwayo hali MUKAMA habw'okuhikiriza endagaano eyakozirwe; omuntu ogu aralekerwaga hamazire kuhabwayo omuhendo gunu ogwa sente; 3kusigikira ha rulengo orwatairweho nkokuziragirwa: Omusaija ow'emyaka abiri kuhika ha nkaaga ey'obukuru haraheebwayoga ebicweeka bya feeza makumi ataano. 4Kakuba omuntu ogu aba ali mukazi, haraheebwayoga ebicweeka bya feeza makumi asatu. 5Kakuba aba ali mwana mwoojo ow'emyaka etaano kuhika ha abiri ey'obukuru, haraheebwayoga bicweeka bya feeza makumi abiri; kandi omwisiki ow'emyaka nkeegi, uwe araheererwaga bicweeka bya feeza ikumi. 6Kandi obwaraabaga atarukukira ha myaka etaano, obwaraabaga mwoojo haraahebwayoga ebicweeka bya feeza bitaano, kandi obwaraabaga mwisiki bibege bicweeka bya feeza bisatu. 7Omuntu ogu kakuba aba ali w'emyaka nkaaga n'okukiraho, obwaraabaga ali musaija araaherwaga bicweeka bya feeza ikumi na bitaano; kandi obwaraabaga mukazi bibege bicweeka bya feeza ikumi. 8Omuntu kakuba aba munaku muno atarukusobora kusasura muhendo ogu omubaliriire, ayereete omumaiso ga nyakatagara, nyakatagara nuwe amubalirre naarorra ha bintu ebi anyina.
9“Obu kiraaba kiri kisoro, abantu eki bahongera MUKAMA, kyona hali ebi omuntu eki ahongera MUKAMA, kiba kirukwera. 10Atalireeta ekintu ekindi omu kiikaro kyakyo rundi kukihingisaamu ekindi, akata ekirungi omu kiikaro ky'ekibi, rundi ekibi omu kiikaro ky'ekirungi; kakuba ekisoro akihingisamu ekindi, obu, eki ekyalesire, na kiri ekirukuhingisibwa, byombi nibyera. 11Kakuba kibaire kisoro ekirukuzirwa ekitasobora kuhongerwa MUKAMA, ekisoro eki omuntu akitwarre nyakatagara. 12Nyakatagara eki araacwamu, nikyo kiikirizibwe. 13Kihonga kisoro eki, kakuba agonza kukicungura ha muhendo gwakyo ogwakibaliriirwe, ayongereho kimu kya kataano kyagwo.
14“Kakuba omuntu ahayo enju ye kuba nju erukwera ya MUKAMA, nyakatagara nuwe araabibalirraga, obu eraaba eri nungi rundi mbi, nyakatagara eki araacwamuga nukwo kiikale. 15Kihayo nju, kakuba agonza kugicungura, ayongereho kimu kya ikumi ekya sente ezaagibaliriirwe, nukwo emugarukire.
16“Omuntu kakuba ahongera MUKAMA, ekicweka eky'itaka lye eri yagwetiirwe, omuhendo gubaliriirwe ha bwingi bw'embibo ezikusobora kusigwamu; endengo ey'embibo eya Sairi, ebalirwe ha rulengo rwa ebicweeka bya feeza ikumi habwa buli kiloguraamu makumi abiri. 17Kakuba ahonga omusiri gwe okurugirra ha mwaka ogw'okujaguza, gusasurwe omuhendo ogu aramwiire; 18baitu kakuba aguhonga Okujaguza kumazire kuhwa nyakatagara omuhendo gwa sente zagwo, agubalirre naarorra ha myaka enyakusigaire okuhika ha mwaka gw'okujaguza ogw'omumaiso, nukwo omuhendo ogubaliriirwe, gwihwe hali guli oguramwirwe. 19Ogu anyakuhongere omusiri gwe kakuba ayenda kugucungura, ha muhendo ogubaliriirwe, ayongereho kimu kya kataano, nubwo gumugarukire. 20Baitu obu araaba atarukwenda kugucungura, rundi obu araaba agugulize omuntu ondi, buli tikikyasoboka kugucungura. 21Baitu omu mwaka ogw'okujaguza, kigugura obu gulimurugaho, guliba kintu kya MUKAMA ekirukwera; omusiri ogu, habw'okusoroorwa, nyakatagara nuwe agutungege. 22Omuntu kakuba ahongera MUKAMA itaka eri aguzire, litali eri yagwetiirwe, 23nyakatagara abalirre omuhendo gwalyo okuhika ha mwaka gw'okujaguza, omuntu ogu ayaguguzire agusasule ha kiro eki kyonyini gube kintu kya MUKAMA ekirukwera. 24Omu mwaka ogw'okujaguza, itaka nubwo lirigarukira oli ayaligulize, nuwe mukama w'itaka ayaligwetiirwe. 25Buli muhendo gulirengerwa ha rulengo oruragirwa.
26“Baitu ekisoro kyona ekizigaijo, habwokuba kizigaijo, eki kya MUKAMA, hatalibaho n'omu akihonga; noobu eriba nte rundi ntaama, egi ya MUKAMA. 27Ekisoro eki kakuba kiba ekirukuzirwa, ayongere akigule ha muhendo ogu obaliriire, agwongereho kimu kya kataano kyagwo; rundi kakuba kitacungurwa, kiguzibwe ha muhendo ogubaliriirwe.
28 #
Kubar 18:14. “Busaho kintu na kimu ekyasoroirwe kyahongerwa MUKAMA ekisemeriire kuguzibwa rundi kucungurwa, abe muntu, kibe kisoro rundi itaka eryagwesirwe; ekintu kyona ekihairwe MUKAMA, kiba kintu ekirukukirra kimu kwera. 29Busaho muntu ayayeziibwe ati, asemeriire kucungurwa; ogu aitwege.
30 #
Kubar 18:21; Bir 14:22-29. “Ekicweka kyona ekya ikumi eky'itaka rundi eky'ebyokulya ebinyakwezire ha itaka eri, rundi eky'ebijuma by'emiti, kiba kya MUKAMA, kiba kintu kya MUKAMA ekirukwera. 31Kakuba omuntu ayenda kwesigaliza kimu kya ikumi, asasulege omuhendo gwakyo ogubaliriirwe, ayongereho kimu kya kataano kyagwo. 32Kimu kya ikumi eky'ente, entaama rundi embuzi, buli kisoro omuliisa eki ataho omwigo gwe obu aba naabara, kiba kisoro kya MUKAMA ekirukwera. 33Omuntu atalyejwahya kukaguza obu kiraaba kiri kirungi rundi kibi, kandi tasemeriire kukihingamu ekindi; kakuba akihinga, byombi, ekyahingire, na kiri eki ahingisize, byona biriba bintu birukwera; tikisemeriire kucungurwa.”
34Binu nibyo biragiro MUKAMA ebi yaragiire Musa ha rusozi Sinai abimanyise abantu ba Isirairi.
Currently Selected:
Lev 27: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
