Lev 25
25
Omwaka gwa musanju
1 #
Kurug 23:10,11. MUKAMA akagambira Musa ha rusozi Sinai ati: 2“Gambira abantu ba Isirairi ngu: Obu mulihika omunsi ei ndukwija kubaha, itaka libe na Sabbato ya MUKAMA. 3Mulimara emyaka mukaaga nimulima emisiri, nimubyara engonjo, kandi emyaka egi mukaaga, muligimara nimwombera, nimusarra engonjo ez'emizaabbibbu, nimunoga ebijuma kandi nimuhunika ebi mwereze; 4baitu omwaka ogwa musanju, gubege Sabbato ya MUKAMA, itaka lyona lihuumule; omwaka ogu, mutaligubyarramu rundi kusarra engonjo zanyu. 5Ebiryemeza byonka mumazire kugesa, mutalibigesa, n'ebijuma by'emizaabbibbu etasaliirwe, mutalibinoga; guraabaga mwaka gw'itaka lyona kuhuumura. 6Sabbato ey'itaka niyo eraabahaga ebyokulya, inywe inywenka, abairu baanyu n'abazaana, abakozi baanyu abakorra empeera n'abanyamahanga abarukwikara na inywe; 7kandi eraahaga ebyokulya ente zanyu n'ebisoro byona ebinyakuli omunsi yanyu, byona itaka ebi liraamezaaga, mubiryege.
Omwaka ogw'okugarra buhyaka
8“Mubalege Sabbato ey'emyaka musanju, nukwo kugamba emyaka musanju emirundi musanju, egi niyo myaka ana na mwenda. 9Ha kiro ekya ikumi eky'okwezi kwa musanju, ekiro eky'okwereherra, muteere engwara ihulirwe omunsi yanyu yoona. 10Musemezeege omwaka ogw'amakumi ataano, murangirre abantu boona nkooku guli mwaka gw'obusinge; guraabaaga mwaka gwanyu ogw'okujaguza. Buli omu omuli inywe, nubwo araasoboraga kugaruka omunsi ei yaihirwemu rundi omu ruganda rwe. 11Omwaka ogw'amakumi ataano ogu, guraabaga gw'okujaguza kwanyu, mutaligubyarramu, noobukwakuba kugesa ebinyakwemereze byonka rundi kunoga ebijuma by'emizaabbibbu etasaliirwe. 12Habwokuba guraabaga mwaka ogurukwera, mulyege ebi gumereze omu misiri.
13“Omu mwaka ogu, buli muntu agarukege owaabu. 14Kuba oguza rundi oguraho mutaahi wawe ekibanja, muleke kugobezangana. 15Omusasule noororra ha myaka eyakahinguraho ekijaguzo kimazire kuhwa, na uwe akuguzeege naarorra ha birimwa ebya buli mwaka. 16Emyaka obu eraaba eri nyingi, oyongere omuhendo gw'ensimbi, obu eraaba eri nke, ogukeehye, habwokuba eki arukukuguza nibyo ebirimwa ebya buli mwaka. 17Muleke kugobezangana, kyonka mutiine nyowe Ruhanga wanyu; habwokuba ninyowe MUKAMA Ruhanga wanyu. 18Habweki, mukwatege ebiragiro byange, mukuraatire n'ebigambo kandi mukole ebibirukuragira; nubwo muliikara omunsi n'obusinge. 19Ensi eribeereza ebyokulya, mulirya mwigute nukwo mugiikalemu n'obusinge. 20Kakuba mwekaguza muti: ‘Obu turaaba tutarukusiga kandi tutarukugesa, tulirya ki omu mwaka ogwa musanju?’ 21Ndibaha omugisa omu mwaka ogwa mukaaga, gubeereze ebyokulya ebi mulirya okumara emyaka esatu. 22Obu muliba nimusiga omu mwaka ogwa munaana, muraalyaga ebyokulya eby'emyaka ey'enyuma; okuhika omu mwaka ogwa mwenda, ebyalimirwe omu mwaka ogu, obu birigeswa. 23Itaka muleke kuliguliza kimu, habwokuba lyange; inywe muli banyamahanga kandi nsuuhuuki abanyebingire. 24Habweki, omunsi egi yoona ei mwatungire, mwikirizeege itaka licungurwe.
25“Kakuba owanyoko aseega akaguza itaka lye mugenzi we arukumukurata, itaka eri alicungule. 26Ogu kitunda, obu araaba ataina muntu ondi arukusobora kucungura itaka eri, uwe wenka ali munaku, hanyuma akatunga eby'okulicungura, 27abale emyaka eyakahinguraho, okuruga obu yaligulize, nukwo asasule kigura emyaka ey'omumaiso; itaka lye alyegarurre. 28Baitu kakuba alemwa kulicungura, atalyegarurra, alireke, liikale liri ly'oli ayaliguzire, okuhika omwaka gw'okujaguza obu gulikahika; omu mwaka ogu, ayaliguzire aliba atakyaliinaho busobozi, nubwo mukama walyo alyegarurre. 29Kakuba omuntu atunda enju erukuraarwamu, enyakuli omu rubuga orunyakuzitiirwe, asobora kugicungura omwaka gumu gutakahoireho okuruga ha mwaka ogu yagitundiireho; omu mwaka ogu gwona, naaba anyina obugabe obw'okugicungura. 30Kakuba etacungurwa omu mwaka ogu gwona, obu enju egi ebiro byona erigumibwa nkooku eri y'ogu kigigura; terimwihwaho omu mwaka gw'okujaguza. 31Baitu amaju aganyakuli omu byaro ebitazitiirwe, garaabarwaga nk'agombekerwe omu bwerre, gasobora kucungurwa kandi gasobora kugarulirwa bakama baago omu mwaka ogw'okujaguza. 32Baitu Abaleevi omu mwaka ogw'okujaguza, nibasobora kucungura amaju aganyakuli omu mbuga zaabu ezi barukulema. 33Baitu Omuleevi kakuba atacungura enju ye omu rubuga nk'oru, nubwo enju eyaguzirwe eyekaba eri omu rubuga rwabo neesobora kugarulirwa Omuleevi mukama wayo omu mwaka gw'okujaguza; habwokuba amaju goona agaraabaga omu mbuga ezinyakuli omwitaka Abaleevi eri baahairwe omu Isirairi, garaabaga gaabu. 34Baitu itaka kwonka ery'embuga zaabu litagurwe; habwokuba butaka bwabo obw'ebiro byona.
35 #
Bir 15:7,8. “Kakuba omuntu wawe afooka munaku atakyayesobora, osemeriire omukonyere, aikale na iwe nkooku wakwikaire n'omu nyaihanga rundi ensuuhuuki. 36Otalimusaba amagoba habwa sente ezi oturukize habwe rundi kwesasuza omu mulingo ogundi gwona, kyonka iwe tiina Ruhanga wawe, nukwo mutaahi wawe aikale na iwe. 37#Kurug 22:25; Bir 23:19,20.Otalimwohoza sente nukwo akuhe amagoba noobwakuba kumuliisa nukwo omutungeho amagoba. 38Ninyowe MUKAMA Ruhanga wanyu ayabaihire omunsi Misiri, mbahe ensi Kanaani, mbe Ruhanga wanyu.
39 #
Kurug 21:2-6; Bir 15:12-18. “Kakuba mugenzi wawe anyakukuheriire afooka munaku akeehayo kuba mwiru wawe, otalimukoza emirimo ey'obwiru; 40aikale na iwe nk'omupagasa kandi nk'ensuuhuuki. Aikale naakukorra okuhika ha mwaka ogw'okujaguza; 41Okujaguza obu kulihwa, nubwo akurugeho, uwe n'abaana be, agaruke omuruganda rwe, omu butaka obwa baisenkuru. 42Habwokuba bairu bange aba naihire Misiri, tibasemeriire kutundwa nk'abairu kwonka. 43Mutalibalema kubi, kyonka mutiinege nyowe Ruhanga wanyu. 44Abairu n'abazaana aba murukugonza kutunga, abo musobora kubagura omu mahanga agabaheriire. 45Kandi musobora kubagura hali abanyamahanga abarukwikara na inywe na ha baana baabo abaazaalirwe omunsi yanyu, babe bitungwa byanyu. 46Musobora kubagwetera batabani baanyu babe bantu baabu ab'ebiro byona; musobora kubafoora bairu, baitu bagenzi baanyu abantu ba Isirairi, mutalikisura mukalemangana kubi.
47“Kakuba omunyaihanga rundi omusuuhuuki aguudahara, mugenzi wanyu anyakumuheeriire akafooka munaku, akeehayo kuba mwiru w'omunyaihanga rundi w'omusuuhuuki ogu, rundi kuba mwiru w'omuntu ow'oruganda rw'omunyaihanga ogu. 48Obu araabaga aguzirwe naasobora kucungurwa; mugenzi we wenka naasobora kumucungura. 49Isento rundi mutabani wa isento, rundi omuntu ow'oruganda orwa haihi, rundi uwe wenka kakuba aguudahara, naasobora kwecungura. 50Abarrane na kimugura, nibaihirra ha mwaka ogu yamuguliiremu okuhika ha mwaka gw'okujaguza. Omuhendo gwa sente ezi araasasuraga nukwo alekerwe, gusigikirege ha myaka; akasumi aka amazire na mukama we, karaabarwaga nk'ak'omukozi ow'empeera. 51Obu haraaba hakyasigaire emyaka nyingi okuhika ha mwaka gw'okujaguza, kwija kwecungura asasulege naasigikira ha muhendo gwa sente ezi yayeheeriireyo kuba mwiru. 52Obu haraaba hakyasigaire emyaka nke okuhika ha mwaka gw'okujaguza, abalirrege na mukama we, naasigikira ha myaka ei asigaize kukora okuhika ha kujaguza, sente ez'emyaka egi nizo asasulege kwecungura. 53Aikale na iwe nk'omupagasa owa buli mwaka, atalikorwa kubi. 54Kakuba atacungurwa omu miringo egi, uwe n'abaana be balekerwe ha mwaka gw'okujaguza. 55Hali nyowe abantu ba Isirairi bairu bange, aba naihire omunsi Misiri, ninyowe MUKAMA Ruhanga wanyu.
Currently Selected:
Lev 25: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
