Lev 17
17
Ekiikaro eky'okuhongeraho
1MUKAMA yagambira Musa ati: 2Gambira Arooni n'abatabani n'abantu boona aba Isirairi ngu: kinu nikyo MUKAMA araagiire; 3Kakuba omuntu aitira enimi rundi omwana gw'entaama rundi embuzi, omu rukande rundi aheeru yarwo, 4akalema kugireeta ha mulyango ogw'Eheema ey'okutangatanganiramu, kugihongera MUKAMA omumaiso g'Enju ye, omuntu ogu alijunaanwa habw'esagama y'ekisoro ei aseesire; alibingwa aruge omu bantu b'owaabu. 5Ekirukugendererwa omuli eki, Abaisirairi ebyonzira byabo ebibaraitiraga aheeru y'orukande, babireeterege MUKAMA, babikwase nyakatagara ha mulyango ogw'Eheema ey'okutangatanganiramu, nukwo abitwale bibe byonzira ebinya kuhongiirwe MUKAMA habw'okusaba Obusinge; 6amiise esagama ha itambiro lya MUKAMA, ha mulyango ogw'Eheema ey'okutangatanganiramu, ayokye n'ebisajwa birugwemu ekisorokoko ekirungi ekirukuboyera MUKAMA. 7Abantu ba Isirairi tibalyongera kutaba beesigwa hali MUKAMA nibaita ebisoro byabo nibabihongera embandwa z'embuzi empaya. Kinu kiraabaga kiragiro kyabo eky'ebiro byoona.
8“Kandi ogaruke obagambire oti: ‘Omuntu Omwisirairi rundi omunyaihanga anyakwikara nabo, alihonga ekihongwa eky'okulya rundi alitamba ekyonzira, 9akalema kukireeta ha mulyango gw'Eheema ey'okutangatanganiramu kukitambira MUKAMA; omuntu ogu abingwe aruge omu bantu b'owaabu.’
Ruhanga naatanga kulya esagama
10 #
Kub 9:4; Lev 7:26,27; 19:26; Bir 12:16,23; 15:23. “Kakuba omu ha bantu ba Isirairi rundi omunyaihanga arukwikara nabo alya esagama, omuntu kirya esagama ndimujunaana, mmubinge omu bantu b'owaabu. 11#Baheb 9:22.Habwokuba obwomeezi bw'ekisoro niyo esagama, kandi nkabaragira mugitege ha itambiro, nukwo muleherre emyoyo yanyu; habwokuba esagama niyo ereherra obwomeezi. 12Nikyo natangiire Abaisirairi nti: Hatalibaho n'omu omuli inywe rundi omunyaihanga arukwikara nainywe arukulya esagama. 13Ekindi, kakuba omu ha bantu ba Isirairi rundi omunyaihanga arukwikara nabo akwasa ekisoro rundi ekinyonyi ekirukwikirizibwa kuliibwa, akisalege akiihemu esagama, esagama egi agiswekerre n'ecuucu.
14“Habwokuba obwomeezi obw'ekisoro kyona, niyo esagama yakyo, nikyo natangiire Abaisirairi nti: Mutalirya esagama y'ekisoro kyona, habwokuba obwomeezi bw'ekisoro kyona niyo esagama yakyo; wena anyakugirya abiingwege aihwe omu bantu b'owaabu. 15Omuntu anyakulya ekyefeera rundi ekisoro ekinyakwisirwe ekisoro ekindi, omuntu ogu obu araabaga ali nzaarwa rundi munyaihanga araayogyaga engoye ze, na uwe ayoge, araabaga naazirwa okuhika akairirizi, hanyuma araabaga atarukuzirwa. 16Baitu kakuba atazoogya, na uwe wenka akooga, araikaraga n'obubi bwe.
Currently Selected:
Lev 17: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
