Lev 16
16
Ekiro ky'okuleherra ebibi
1Batabani ba Arooni ababiri abaahongiire MUKAMA n'omurro ogurukuzirwa, obu baamazire kufa, MUKAMA yagambira Musa ati: 2#Baheb 6:19.“Gambira mugenzi wawe Arooni, obwire bwona, atalitaaha Omukiikaro Ekirukwera omunda y'enyigamo omumaiso ag'ekitebe eky'okuganyirraaho ekinyakuli ha sanduuko ey'endagaano, ataliija kufa, habwokuba ndizooka ha kitebe eky'okuganyirraho ndi omu kicu. 3#Baheb 9:7.Baitu Omukiikaro Ekirukwera, Arooni ataahemuga ati: Aijege n'enimi ento ey'ekihongwa eky'okuganyiza ebibi, n'entaama ey'ekihongwa eky'okwokya. 4Ajwale ekanzu erukwera eya kitaani n'empale engufu nayo eya kitaani, ayeteege omweko ogwa kitaani, ate ha mutwe ekitambaara ekya kitaani; ebi nibyo byokujwara ebirukwera. 5Abanze ayoge omubiri gwona nukwo ajwale. Abaana ba Isirairi bamuhe empaya z'emburabuzi ibiri ez'ekihongwa eky'okuganyiza ebibi, n'empaya y'entaama emu ey'ekihongwa eky'okwokya.
6“Arooni ahonge enimi, kibe kihongwa eky'okumuganyiza ebibi, ayereherre, aleherre n'eka ye. 7Hanyuma akwate embuzi ibiri, aziitire omumaiso ga MUKAMA, ha mulyango ogw'Eheema ey'okutangatanganiramu; 8embuzi ezi, aziterre itomo, akabaale kamu kahandiikweho habwa MUKAMA, akandi habwa Azaazeeri. 9Embuzi erigwibwaho akaruuru habwa MUKAMA, agireete agihonge, ebe kihongwa eky'okuganyiza ebibi; 10kandi erigwibwaho itomo habwa Azazeeri, agireete omumaiso ga MUKAMA eri nyomeezi, niyo ereherweho, nukwo erekerwe egende mwirungu ery'Azazeeri.
11“Arooni aleete enimi ey'okuganyiza ebibi, ayereherre kandi aleherre n'eka ye; aite enimi ey'ekihongwa eky'okumuganyiza ebibi bye. 12Akwate oruswa orw'amakara ag'omurro agarukuruga ha itambiro erinyakuli omumaiso ga MUKAMA, n'ebihi#16:12 ebihi “...ekihi...” kingana engaro ibiri z'ensano. bibiri eby'eseeta enyakuniinuukire kurungi; aruleete omunda y'enyigamo 13ate eseeta ha murro ogunyakuli omumaiso ga MUKAMA, nukwo omwika ogw'eseeta guswekerre ekitebe eky'okuganyirraho ekinyakuli ha sanduuko ey'endagaano, nukwo aleke kufa. 14Ha sagama ey'enimi, aiheho nke, aibikemu orukumo rwe, agimiisire obuso obw'ekitebe eky'okuganyirraaho, kandi agimiise n'orukumo rwe emirundi musanju omumaiso gaakyo.
15 #
Baheb 9:12. “Hanyuma, aite embuzi ey'ekihongwa eky'okuganyiza abantu ebibi, aleete esagama yayo omunda y'enyigamo, agikole nkooku akozire ey'enimi, agimiisire ekitebe eky'okuganyirraaho n'omumaiso gaakyo; 16nukwo aleherre ati Ekiikaro Ekirukwera, habw'obubi na habw'ensobi ez'abantu ba Isirairi, na habw'ebibi byabo; kandi nukwo akole ati n'Eheema ey'okutangatanganiramu ei baikara nayo, bali omu bibi byabo. 17Omu Heema ey'okutangatanganiramu, hatalibamu muntu n'omu, Arooni obu araabaga naataaha kuleherra abantu Omukiikaro Ekirukwera okuhika obu arakarugamuga, amazire kwereherra, aleheriire eka ye n'ekitebe eky'abantu ba Isirairi. 18Hanyuma arugeyo agende ha itambiro erinyakuli omumaiso ga MUKAMA alireherre, akwate ha sagama ey'enimi na ha y'embuzi, agisiige ha mahembe g'itambiro ageehingulirize. 19Alimiisire esagama n'orukumo rwe emirundi musanju, alisemeze kandi alyeze, aliiheho obubi obw'abantu ba Isirairi.
20“Arooni obu araamaraga kuleherra Ekiikaro Ekirukwera, Eheema ey'okutangatanganiramu n'itambiro, aheyoga embuzi enyomeezi; 21#Tob 8:3.agite emikono ha mutwe, agyaturreho obubi bwona, ensobi zoona n'ebibi byona eby'abantu ba Isirairi, ebi byona abitweke embuzi egi, agikwase omuntu anyakweteekaniize, agitwale mwirungu. 22Ataisule embuzi enyakwetwekere obubi obu bwona, ebutwale ebugoromole mwirungu nambere hatali bantu.
23 #
Ezek 44:19. “Arooni, nubwo aije omu Heema ey'okutangatanganiramu, ajuulemu ebyokujwara ebya kitaani ebi yajwaire naagenda Omukiikaro Ekirukwera, abisigemu; 24ayoge amaizi aganyakuli Omukiikaro Ekirukwera, ajwale ebyokujwara bye aturuke, aheyo ekihongwa kye eky'okwokya, hamu n'eky'abantu eky'okwokya, nukwo ayereherre wenka aleherre n'abantu. 25Ebisajwa eby'ekihongwa eky'okuganyiza ebibi, abyokeze ha itambiro. 26Omuntu anyakutwaire embuzi mwirungu Azazeeri, ayogye ebyokujwara bye, na uwe wenka ayoge, nukwo hanyuma agaruke omu rukande. 27#Baheb 13:11.Enimi n'embuzi ez'ebihongwa eby'okuganyiza ebibi, esagama yazo eyaleesirwe Omukiikaro Ekirukwera kuba ndehwa, emitumbi yabyo etwarwe aheeru y'orukande; empu zaazo, enyama n'efa yazo, babisiiriize n'omurro. 28Omuntu anyakubyokya, ayogye ebyokujwara bye, na uwe wenka ayoge, hanyuma nukwo agaruke omu rukande.
29 #
Lev 23:26-32; Kubar 29:7-11. “Eki kiriba kiragiro kyanyu eky'ebiro byona, ekirukumanyisa ngu ha kiro ekya ikumi eky'okwezi kwa musanju, muraayefubiraga, timwakolege mulimo na gumu noobu araabaga muntu nzaarwa, rundi omunyaihanga arukwikara na inywe; 30habwokuba ha kiro eki, nikyo muraalehererwahoga musemezibwe, mwihweho ebibi byona; mube barungi omumaiso ga MUKAMA. 31Ekiro eki, kiro kya Sabbato, hali inywe, kiro ky'okuhuumurra kimu; mwefubirege, eki kiragiro kyanyu eky'ebiro byona. 32Kandi nyakatagara ayaseesirweho amagita, aganyakweza nukwo kukora omulimo ogw'obunyakatagara omu kiikaro kya ise, nuwe araatonganirraaga abantu, ajwaire engoye ezirukwera eza kitaani; 33araatonganirraaga Ekiikaro Ekirukwera, Eheema ey'okutangatanganiramu, itambiro, banyakatagara n'abantu boona ab'ekitebe. 34Eki kiraabaga kiragiro kyanyu eky'ebiro byona, ekirukumanyisa ngu abantu ba Isirairi baraatonganirirwaga omurundi gumu buli mwaka, habw'ebibi byabo byona. Musa yakora nkooku MUKAMA yamuragiire.
Currently Selected:
Lev 16: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
