Bar 3
3
1Okoe Ekapolon ŋolo etiron, Akuj a Isirael, igworosi neni kon ŋituŋa ŋulu iyaloloŋete ka ŋitai ŋulu apapanut. 2Okoe Ekapolon, kiirarae ido ikisyoni isua, anerae ikisec isua alokiŋaren kon. 3Ipukat iyoŋ ŋikaru ka ŋikaru ka amunyaroi isua jik. 4Okoe Ekapolon ŋolo etiron Akuj a Isirael, kiira tokona akilip a Ŋisirael, a ŋidwe a ŋulu apotu toseca alokiŋaren kon a ŋulu apotu towout akiirar ŋakiro kon a Ekapolon Akuj kec, ido arubakis ŋican eyakasi neni kosi. 5Nyitamu ŋasecisya atapapaa kosi, nai alocan a lu totamu apedor kon ka ekiro kon; 6anerae irae iyoŋ Ekapolon Akuj kosi ka erae iyoŋ okoe Ekapolon, eponio isua akipuro, 7anerae iwuak iyoŋ akitopoloorit iyoŋ lotai kosi, ikotere enyarao isua ekiro kon ka ikipuryo iyoŋ anakwap a ŋina ikirikoritae isua, anerae alemar isua alotai kosi ŋasecisya atapapaa kosi daadaŋ a ŋulu apotu toseca neni kon. 8Kiŋolik, ikiya tokona isua nakwap ŋina ikirikoryo, neni ibu iyoŋ ikeela isua, ikotere ikiyanyo, ikicenio ka ikisicanio aŋuna a ŋasecisya a daadaŋ a ŋuna atapapaa kosi a ŋulu apotu toŋero Ekapolon Akuj kosi.
Akipuro aosou
(Yob 28:23-28; Ŋakit. 8:22-31; Sir 24:1-22)
9Okoe Ŋisirael, kiirasi ŋakiciketa ŋuna ka akiyar,
topupokisi ka toyenutu aosou!
10Okoe Ŋisirael, kaanukiro iyakatar iyes nakwap a ŋimoe kus?
Kaanukiro imojoŋikiniata iyes nakwap ŋinagela?
Kaanukiro ikimunarere iyes a ŋawat a ŋikatwak
11ka ikimaritere iyes neni a ŋulu eya nakibois ŋina a ŋikatwak?
12Iŋero iyes eitanit ŋolo ka aosou.
13Ani kerae kiwuapito iyes ŋuna ecamit Akuj,
kiboiyoto iyes alotooma ekisil ŋikaru ka ŋikaru.
14Toyenutu neni eyai aosou,
toyenutu neni eyai agogoŋu,
toyenutu neni eyai ayenut,
ikotere apaki ŋinapei iyenunete ŋuna aronok ka ŋuna ajokak,
neni eya ŋirwa ŋulu alalak ka akiyar.
Ikotere iyenunete neni eyai akica ŋina iŋolikinia ibore ka neni eyai ekisil.
15Ŋae aryamu neni eyai aosou?
Ŋae aloma nakais ŋuna iŋadatae iŋes?
16Ai eya ŋikepukak a ŋakwapin?
Ai eya ŋulu apotu kiwuakis aosou kec lotyaŋ ŋulu ka akwap?
17Ai eya ŋulu abolyasi irikaete ŋikyeny ŋulu eporete ka ŋulu edyasito esilipa ka egolid ŋiboro ŋulu ekinyomito ŋituŋa ka pa etemonokin ikes ŋiboro ŋul?
18Ai eya ŋulu ayeete epite ŋoloryamunet esilipa,
ido ayakatar ikes akiitanit iŋes jik, nai nyetakani etic kec?
19Aŋopiyasi ŋul, ido aloto nakibois a ŋikatwak
ka elunyokin ŋice nakiboisyo kec.
20Eŋolikis ŋanyameta ŋuna esidyok akica a paaran ka eboiyoto anakwap;
nai nyeyenuna ikes epite ŋolo eryamunere aosou, nyeyenuna daŋ ikes ŋirotin ŋuluryamunet aosou, kori nyimukekina ikes akikamun ŋuna ka aosou.
21Aoliyosi ŋiletok kec neni alwanan alorot a ŋolo ka aosou.
22Nyiirara ŋuna ka aosou alo Kanaan, kori nyiŋolikina alo Teman.
23Nyeyenuna ŋiletok ka Agar ŋulu iwarito ayenut anakwap erot ŋolo ka aosou,
nyeyenuna ŋikecurutak a Meran ka Teman erot ŋolo ka aosou, nyeryamuna ŋikerworok ŋiemuto ka ŋikewarak ayenut erot ŋolo ka aosou,
kori nyetamatamaete aryamun ŋirotin ŋulu ka aosou.
24Okoe Ŋisirael, epol nooi akibois ŋina ka Akuj
elal nooi akibois ŋina erae ŋina keŋ.
25Elal nooi ka emam ekisal, eoya nooi nyepedoryo akipim.
26Auruunio ŋituŋa ŋulu aburok tooyak aina,
ŋituŋa ŋulu koloŋ arae ŋikarwok,
ŋulu aburok aŋawat, ŋulu ayenete nooi ejie.
27Nyeseuna Akuj ikes, kori nyeinakina Akuj ikes erot ŋolo eryamunere ayenut.
28Aŋun, apotu ikes tomunyaros, anerae amamukatar aosou, apotu ikes tomunyaros aŋuna ka abaŋao kec.
29Ŋae abu tolot nakuj yau aosou ka ŋae abu yau aosou totiyaunor alodowuon?
30Ŋae abu tolot nanam toryamu aosou eyai nen?
Ŋae epedori agyelun aosou a egolid a ŋolo emam ibore inyalakinitae?
31Mam ituŋanan eyeni erot ŋolo ka aosou,
kori ŋini emitakinit akiwarit erot ŋolo elosi neni eyai aosou.
32Nai ŋini eyeni ŋiboro daadaŋ iŋes eyeni aosou,
abu toryamu aosou anayenut keŋ.
Iŋes ŋini asubuni akwap aŋuna a ŋapakio a daadaŋ, ŋolo abu kilelebik ŋityaŋ ŋulu a ŋakejen a ŋaomwon nakwap,
33ŋolo iyakuununui akica, tocau akwap. Abu iŋes tonyarau akica ka abu akica kiwuap ŋakiro keŋ emarani;
34tocaut ŋikacer ŋisaae ŋulu emaikina ecayata ka alakara, abu iŋes tonyara ŋikacer, toboŋokis ikes temasi, “Isua lu!”
Apotu ŋikacer tocaut elakara aŋuna a ŋini asubuni ikes.
35Arae Akuj yok iŋes etiyae ŋun,
mam ice isikwaanio ka iŋes.
36Abu iŋes toyenu erot daadaŋ ŋolo ka aosou
ka abu inak aosou ŋin neni a eketiyan keŋ Yakob
ka neni a Ŋisirael a ŋituŋa a ŋulu amina iŋes.
37Ekaku abu aosou totakanu nakwap kiboiyoto kaapei ka ŋituŋa.
Currently Selected:
Bar 3: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.