Bar 2
2
1Aŋun, abu Ekapolon kisiyook ŋakiro keŋ ŋuna sek alimunit, etiya iŋes ŋun itoroniyarit ŋikatubok yok ŋulu epukato akwap a Isirael ka ŋirwosi yok, ŋikepukak yok ka ŋituŋa a Isirael ka Yudaya. 2Nyitiyakina a iwace anakwap a daadaŋ ŋakiro ŋuna ikote ŋuna etiyak Ekapolon Yerusalem, lopite ŋolo elimunitere anakiro a ŋuna abookoi toceito, a ŋuna aponi kigirae lokisila a Moses. 3Aŋuna aditiya akimuj, apotu iwon ŋice tonyama ŋidwe kec ŋulusapa ka tonyama ŋice ŋidwe kec ŋulupesur. 4Abu Ekapolon kituruwo ŋikapolok ŋul ŋicaryo aneni a ŋapukasinei a daadaŋ a ŋuna ikirimokinito iwon kidiŋ, abu kituruwo ikes ŋulu ejamuwaritae ka ŋituŋa ŋulu iboiyete alokasile, alotuŋa a daadaŋ a ŋulu eboiyete anawaetin kec aneni abu Ekapolon kiela ikes. 5Aponi kituruworoe ikes ŋicaryo meere ŋulu itopolooritae, anerae apotu ŋituŋa a akwap yok toseca aneni ke Ekapolon Akuj yok, aŋuna aponiata towout akiirar ŋakiro keŋ.
6Iyookinit Ekapolon Akuj yok, nai tokona, ikirumito iwon ŋileec kaapei ka atapapaa yok nakoloŋit na. 7Ŋican daadaŋ ŋulu alimunit Ekapolon atemar toceito, apotu tokona neni yok. 8Kikote neni daŋ, nyedyekuna iwon akiŋarakino aneni ke Ekapolon aŋuna ikimyekinia iŋes iwon, nyekiwa iwon anakitam ŋakiro ŋuna aronok. 9Aŋun, etemok Ekapolon ŋican, ido ayau ŋican ŋul neni yok, anerae iyookino Ekapolon aloticisyo a daadaŋ a ŋulu abu iŋes itolimok iwon akitiya. 10Kikote neni daŋ, nyiwuapa iwon ŋakiro keŋ, ikiwou iwon akiwuap ŋakiro ŋuna etubunit Ekapolon, ŋuna abu iŋes ikiinak iwon.
Akilip aŋuna ka alakuno
(Dan. 9:15-17)
11Tokona, okoe Ekapolon Akuj a Isirael, Akuj ŋina iyauni ŋituŋa kon anakwap a Ijipit ka apedor a ŋina etiron ka a ŋakitoodyanakineta ka ŋaumonokineta ta apedor ŋina apolon akiuryarit isua alowaetin a daadaŋ, toruunio ekiro kon tari nakoloŋit na, 12ikisec isua, ikipotu isua oruworos ŋulu nyikinupit, okoe Ekapolon Akuj kosi, etiyae isua ŋuna nyiyookino, abili isua ŋikisila kon daadaŋ. 13Tojoŋo aŋoikinit isua, anerae edoŋi isua ikikudyoko alotuŋa a ŋakwapin a daadaŋ a ŋuna ibu iyoŋ ikiela isua. 14Okoe Ekapolon, kiira akilip kosi ka adyekitoi kosi ka aŋuna kon a elope tolakunae isua ka kitoodikinae isua ajokis kon alokiŋaren ŋituŋa ŋulu apotu ikirikosi isua nakwapin kec; 15ikotere eyenunete ŋituŋa daadaŋ atemar irae iyoŋ Ekapolon Akuj kosi, anerae enyaritae Isirael ka ŋiletok keŋ a ekiro kon.
16Okoe Ekapolon, kiŋoliu kwap anakibois kon a ŋina asegan ka totamunae isua. Okoe Ekapolon, topupok ka kiirarae isua; 17okoe Ekapolon, toŋaa ŋakonyen kon ikiŋolik, anerae nyepedorete ŋikatwak ŋulu alemar etau anawat kec ainakin akitopoloorit, kori akiyookino neni ke Ekapolon, 18nai tari kiyaloloŋi ituŋanan kelosi ijuuri ka kepalag, ido tonyamite toyari ca iŋes, epedori alimor apolou ka akiyookino kon, okoe Ekapolon.
19Okoe Ekapolon Akuj kosi, nyikilipi isua neni kon edyekunitae akisyonio aŋuna a ŋiticisyo atapapaa kosi, kori aŋuna a ŋiticisyo a ŋirwosi kosi; 20ikilipi isua, anerae iyau iyoŋ aŋoit kon ka anyunyura kon neni kosi lopite ŋolo ilimunitor iyoŋ aneni a ŋiketiyak kon a ŋikadwarak ibala, 21“Irworo Ekapolon ebe, ‘Kitiditeunos kitiyanakis erwosit a Babilon, ido irubakinete iyes iboiyete anakwap aŋina abu ayoŋ oinak atapapaa kus. 22Nai ani pa kiwuapa iyes ŋakiro a Ekapolon ka pa kitiyanakis erwosit a Babilon, 23alemari ayoŋ alotaunio a Yudaya ka anakiboisyo a ŋuna idunyito Yerusalem ecelet ŋolo ka alelyanu ka ecelet ŋolo ka alakara, ecelet ŋolo a ŋasuban a ekeitan ka ŋolo a ŋasuban a ateran, ido eruwor akwap daadaŋ ekasile neni emam ŋituŋa iboiyoto.’ ”
24Nai nyiwuapa isua ŋakiro kon ŋuna ilimunit iyoŋ atemar kitiyanakisi erwosit a Babilon, ido isiyook iyoŋ ŋakiro ŋuna ikilimokinit isua acoikinit ŋuna sek ilimunit aneni a ŋiketiyak kon a ŋikadwarak atemar elemunio ŋakoyo a ŋirwosi kosi ka ŋuna atapapaa kosi, anakiboisyo a ŋuna sek anukakinitae, 25kire emasun ikes kiŋa namwanis a akoloŋ ka nalilimu a akuwar. Apotu ikes totwaka eryamunito ŋican ŋulu alalak, apotu totwaka aŋuna ka akoro, aŋuna aarere ka aŋuna a ŋidekesyo. 26Iinak iyoŋ Akai ŋina enyaritae a ekiro kon toyakaun lopite ŋolo eyakar tokona aŋuna ka aronis a ŋituŋa a Isirael ka ŋituŋa a Yudaya.
Totamunae akiikinet a Akuj
(Ŋikis. 28:58, 62; Yer. 32:28-40)
27Okoe Ekapolon Akuj kosi, kikote neni daŋ, itiya iyoŋ neni kosi anarimaanut kon a daadaŋ ka anakisyon kon a daadaŋ a ŋina apolon, 28lopite ŋolo ilimunitor iyoŋ aneni a eketiyan kon Moses akoloŋit ŋina ilimokinia iyoŋ iŋes akigir ŋikisila kon alokiŋaren ŋituŋa kon Ŋisirael ibala, 29“Ani pa kiwuapa iyes ŋakiro kaŋ, ekudyokunete ŋituŋa ŋulu alalak lu alotuŋa a ŋakwapin a ŋuna eelari ayoŋ ikes; 30anerae ayeni ayoŋ atemar nyiwuapete ikes ŋakiro kaŋ, anerae erae ikes ŋituŋa ŋulu egogoŋ ŋakyes. Nai epote ikes ayenun ŋakiro apaki ŋina eyakaunotor ikes nakwap ŋina erikoritae ikes. 31Eyenunete nai ikes atemar arae ayoŋ Ekapolon Akuj kec. Ainakini ayoŋ ikes ŋitai ŋulu iwuapyata ŋakiro kaŋ ka ŋaki ŋuna iiraryata ŋakiro kaŋ, 32ekepurete ikes ayoŋ anakwap a ŋina erikoritae ikes ka akatamunete ikes ayoŋ, 33ido kilocokinos anakisyaanu kec ka aloticisyo kec a ŋulu aronok, anerae etamunete ikes ŋiticisyo atapapaa kec a ŋulu apotu toseca alokiŋaren Ekapolon. 34Ayauni nai ayoŋ ikes nabo nakwap ŋina abu ayoŋ ekoŋ ainakin neni atapapaa kec Aburaam, Isaka ka Yakob, ido ipukaete ikes akwap ŋin ka eyatakini ayoŋ ikes, nyitukudyokuunio ikes nabo. 35Ewuakini ayoŋ acamunet ŋina a ŋikaru ka ŋikaru ka ikes, oruwor ayoŋ Akuj kec ka eruworosi ikes ŋituŋa kaŋ, ido mam nabo jik nyalemari ayoŋ ŋituŋa kaŋ Ŋisirael anakwap a ŋina abu ayoŋ oinak ikes.”
Currently Selected:
Bar 2: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.