Bar 4
4
1Erae aosou ekitaabo ŋolo a ŋakiciketa a Akuj,
erae iŋes ŋikisila ŋulu iboiyete ŋikaru ka ŋikaru.
Eyarete ŋulu daadaŋ iricakinete aosou,
ido etwakete ŋulu eŋerete iŋes.
2Okoe ŋiletok a Yakob kibelekinos tocamut aosou;
toloto neni ileereo aosou.
3Nyiinakis apolou kus neni a ice,
kori nyiinakis ŋarereŋisyo kus neni a ŋituŋa a ŋulugelae.
4Okoe Ŋisirael, ikirereŋ iwon,
anerae ikiyeni iwon ŋakiro ŋuna italakarete Akuj.
Akisimukekinet aŋuna a Ŋisirael
5Okoe ŋituŋa kaŋ, tomukyaketa iyes ŋulu iturubakinito ekiro a Isirael eyai.
6Meere aŋuna ka amunyaro kus iŋes ikigyelarere iyes nakwapin,
nai aponi ikipotokin iyes neni a ŋimoe kus, anerae ipotu iyes kitoŋoa Akuj,
7Ipotu iyes kitoŋoa Akuj ŋina ikisubuni iyes
aŋuna iponiata inanakis ŋamuronisya neni a ŋipyan meere neni ka Akuj.
8Abu ikimuryak iyes Akuj ŋina a ŋikaru ka ŋikaru,
Akuj ŋina ikitopolouni iyes,
ipotu iyes toŋero Yerusalem, etaun ŋolo ikitanuni iyes,
9anerae abu iŋes kiŋolik aŋoit ka Akuj ŋina abunit neni kus
ido tema,
kiirasi ŋikidunyeta a Sion, ayau Akuj akiyaloloŋ ŋina apolon neni kaŋ,
10anerae eŋolik ayoŋ ŋituŋa kaŋ ŋikilyok ka ŋaberu erikoryo,
arikoro ŋina abu Akuj ŋina a ŋikaru ka ŋikaru tolimok ikes.
11Abu ayoŋ etan ikes a alelyanu,
nai abu ayoŋ erita ikes igworosi ka iyaloloŋete.
12Nyemaikina ituŋanan idio tolelyan aŋuna kaŋ a ŋolo ikikwaan ka apuserut
ka eyaloloŋi ayoŋ aŋuna a ŋulu alalak;
abu ayoŋ edoŋ emam ituŋanan iboi alotooma kaŋ aŋuna a ŋasecisya a ŋituŋa kaŋ,
anerae apotu ikes toŋero akiwuap ŋikisila a Akuj.
13Pa amisito ikes ŋakiro ŋuna atubunit Akuj;
nyiwuapa ikes ŋakiciketa ka Akuj,
kori nyitiya ikes ŋuna iyookino ŋuna edodikinitae ikes.
14Emaikina ŋikidunyet a Sion potu,
totamunito akikamaro a ŋituŋa kaŋ a ŋulukilyok ka ŋuluberu,
akikamaro ŋina abu Akuj ŋina a ŋikaru ka ŋikaru totubok ikes.
15Abu Akuj kiyaku ŋituŋa a akwap a ŋina alwanan akiman ikes,
ŋituŋa a akwap a ŋina eryenyaaka ŋituŋa keŋ ka ŋulu irworosi aŋajep ŋinagela,
ŋituŋa ŋulu pa etopoloorito ŋikasikou ka pa esyoniete ikoku ŋini cici.
16Apotu ikes torikosi ŋidwe ŋulusapa ŋulu a apuserut ŋuluminan,
kisiyaloloŋo apuserut ŋina asilikinit, yaasi tari ŋidwe keŋ ŋulupesur.
17Nai alipite ekeŋarakinia ayoŋ iyes?
18anerae iŋes ŋini ayauni ŋican lu neni kus,
iŋes pei ebuni alakun iyes anapedor a ŋimoe kus.
19Toloto, okoe ŋituŋa kaŋ,
toloto anerae ekemyekin ayoŋ arae ereŋorot.
20Alaca ayoŋ ekaaso ŋolo ke ekisil,
ido anap ŋiguniyae aŋuna ka adyekitoi kaŋ.
Egwori ayoŋ neni a Akuj a ŋina a ŋikaru
ka ŋikaru ŋirwa ŋulu a akiyar kaŋ daadaŋ.
21Okoe ŋituŋa kaŋ, tomukyaaketa,
kigworo neni ka Akuj,
ido ikilakuni iŋes iyes anapedor ka anakan a ŋimoe kus,
22anerae ewuak ayoŋ akigeno kaŋ neni ka Akuj a ŋina a ŋikaru
ka ŋikaru aŋuna ka aiun iyes,
ido aryamu ayoŋ alelyanu aneni ka Akuj a ŋina asegan,
aŋuna ka akisyon a ŋina ebuni neni kus anapaki a
ŋina euruwuana aneni a ekalakunan a ŋolo a ŋikaru ka ŋikaru.
23Abu ayoŋ eketeo iyes irotokinete, ido abu ayoŋ eyaloloŋ ka egwor,
nai ikinyakuni Akuj iyes neni kaŋ ka ilelyanete ka ilakara ŋikaru ka ŋikaru.
24Ikwapei tokona eŋolikiniata ŋikidunyet a Sion akikamaro kus, ikwaŋinapei iŋolikinete ikes anapaki a ŋina euruwuana aiuno kus ŋina ebuni aneni ka Akuj, ŋina ebuni neni kus ka apolou a ŋina apolon nooi ka akica a Akuj a ŋina a ŋikaru ka ŋikaru.
25Ŋituŋa kaŋ, kidaŋidaŋa ka apatanu anyunyura ŋina abu neni kus aneni ka Akuj.
Ikilout iyes ŋimoe kus, nai alotooma apaki ŋina euruwuana,
iŋolikinete iyes amunyaro kec ka icakacakaete iyes ŋimosiriŋin kec.
26Aloto ŋituŋa kaŋ ŋuluminan iwuapito ŋirotin ŋulusagam,
aponi torikoroe ikes esibit esipan a ŋamesekin ŋolo eŋatarito ŋimoe.
27Ŋituŋa kaŋ, tomukyaaketa ka kigworo neni ka Akuj,
anerae ikitamuni iyes Akuj ŋina abu ikimyek iyes iryamunete ŋican lu;
28anerae ikiwaŋina aponere ikimyekin iyes tooliyosi aneni ka Akuj,
toboŋutu ka ainakina a ŋina alalan kiwara iŋes,
29anerae Akuj ŋina ayauni ŋican lu neni kus,
iŋes pei eyauni neni kus alelyanu ŋina a ŋikaru ka ŋikaru aŋuna ka aiuno kus.
Kiikinae Yerusalem akiŋarakino
(Isa. 52:1-10)
30Okoe ŋituŋa a Yerusalem, tomukyaaketa,
anerae ikisirworiuni iyes ŋini abu tolimok etaun kus ekiro.
31Inyasun ŋulu apotu itotiŋa iyes erono
ka ŋulu alelyanete ikamaryo etaun kus.
32Inyasun ŋitaunio ŋulu apotu ŋituŋa a Yerusalem kitiyanakis ikwapei ŋipi;
inyasun etaun ŋolo abu kijau ŋiletok a Yerusalem;
33anerae ikwapei abunio etaun ŋol tolelyan ikamaryo etaun kus
ka tolelyan aŋuna ka akinyasuno kus,
ikwaŋinapei ebuni etaun ŋol akiyaloloŋ aŋuna eruworor iŋes daŋ ereŋorot.
34Alemari ayoŋ akituro keŋ ŋina ituror iŋes aŋuna eyakar ŋituŋa ŋulu alalak nooi ka eruwor adedeŋu a ŋituŋa keŋ akiyaloloŋ,
35anerae iyakuuni neni kec Akuj ŋina a ŋikaru ka ŋikaru akim ŋirwa ŋulu alalak
ka epote ŋipyan akiboi alotooma keŋ apaki ŋina aoyan.
36Okoe ŋituŋa a Yerusalem, kiŋoliyasi Kide kiŋolikis alelyanu ŋina ebunit neni kus aneni ka Akuj.
37Kiŋolikisi, eponito ŋituŋa kus ŋulu aponi kiritarae alotaun kus nariet;
eponito ikes ecununitae alo Kide ka alo To,
erae Akuj ŋina asegan alimu ŋun,
eponito ikes elelyanete anapolou ka Akuj.
Currently Selected:
Bar 4: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.