Markos 3
3
1Hehan ake omniciye tipi kin en iyaya; unkan wicaśta wanji nape śnija hen yanka.
2Unkan anpetu wakan icunhan asniye kta hecinhan he iawanyakapi; taku iyaonpapi kta e heon.
3Unkan wicaśta nape śnije cin he heciya; Cokata inajin wo.
4Hehan hewicakiya; Anpetu wakan icunhan taku waśte econpi kta iyececa, qa iś taku śica econpi kta, unma tukte he; waniyanpi kta qa iś waṭeyapi kta he. Tuka inina hiyeya.
5Unkan icanksiya awicatonwan, cante teḣipike cin on iyokiśica, hehan wicaśta kin heciya; Nape hdukatin wo. Unkan hduowotanna; hecen nape kin ocowasin yuecetupi, unma kin iyececa.
6Hehan Pharisee kin hena iyaya pi, qa ecahankeya Herodian kin om wohdakapi, token he ihangyapi kta e heon.
7Tuka Jesus mde kin ekta hdicu, waonspewicakiye cin om; qa Galile etanhan qa Juda makoce kin etanhan wicota ḣinca ihakam yapi.
8Nakun Jerusalem etanhan, qa Idumia, qa Jordan akasanpa tanhan; qa Turos qa Sidon ihdukśan tanhan wicota, taku wicoḣan tanka econ naḣonpi, hehan en hipi.
9Unkan wicota aoṭinsyapi kta e heon, wata cistinna wan yuha waonspewicakiye cin akipepi kta, kewicakiya.
10Wicaśta ota asniwicaya; heon tona tancan śihtinpi kin hena yutanpi kta e yuotinzapi.
11Qa tona woniya śapa yuhapi kin hena wanyakapi, hehan itokam makata iḣpayapi qa heya howayapi, Wakantanka Cinhintku kin he niye ye.
12Unkan oyakapi kte śni nina kewicakiya.
13Unkan hetanhan paha wan ekta ye c̣a, tona cin kin hena wicakico; unkan en hipi.
14Unkan akenonpa wicakaḣniga, ohinniyan kici unpi kta, qa woyaka yewicaśi kta;
15Qa wayazankapi kin asniwicayapi kta, qa wakan śica napewicayapi kta, wowaśake yuhapi kta.
16Unkan Simon he Inyan eya caśton;
17Qa Jakob, Zebede cinhintku, qa Johannes Jakob sunkaku; unkan hena Boanerges ewicakiya, Wakinyan cincapi he kapi:
18Qa Andrew, qa Philip, qa Bartholomew, qa Mattheos, qa Thomas, qa Jakob Alpheus cinhintku, qa Thaddeus, qa Simon Kananite;
19Qa Judas Iskariot, wiyopeye cin hee. Unkan tipi wan ti mahen iyayapi.
20Hehan ake wicota en mniciyapi, hecen aguyapi yuta okihipi śni.
21Unkan iye iakuwicaye cin he naḣonpi qehan, yuzapi kta e ekta iyayapi; qa, Wanna wacinhnuni ce, eyapi.
22Nakun wowapi kagapi Jerusalem etanhan hipi kin hena heyapi; He Beelzebub yuha, qa wakanśica itancan kin on wakan śica napewicaya ece.
23Unkan iye hena wicakico qa wiyacinyan hewicakiya; Token Satan Satan napeya okihi kta he.
24Qa wokiconze wan iye iyakitedan kicize cinhan, wokiconze kin he ecen he kte śni.
25Qa tipi wanji iye iyakitedan kicize cinhan, tipi kin he ecen he kte śni.
26Nakun Satan inajin, qa iye iyakitedan kicize c̣a ihdunonpa kinhan, he ecen un kta okihi śni, tuka wanna owihanke kta.
27Tuwedan wicaśta waśaka ti kin en ye c̣a, tawaḣpaya kin ihangye kte śni; wicaśta waśake cin he tokaheya kaśke cinhan, hehan tipi tawa kin ihangye kta.
28Awicakehan heciciyapi; Waḣtanipi owasin wicaśta cincapi kin wicakicicajujupi kta, qa iapi śica on wayaśicapi ece kin hena nakun;
29Tuka tuwe Woniya Wakan kin yaśice cinhan, he icimana kicicajujupi kte śni; tuka woyaco owihanke wanica kicihe kta:
30Woniya śapa wan yuha ce, eyapi kin heon etanhan heya.
31Unkan hehan iye hunkawanjitkupi qa hunku kin hena en hipi, tankan hinajinpi, wahoyapi qa kicopi.
32He icunhan wicota ihdukśan iyotankapi; unkan heciyapi; Iho, tankan nihun qa nihunkawanjipi anicitapi ce.
33Unkan heya awicayupta; Inawaye cin he tuwe, qa mihunkawanji tuwepi he.
34Unkan tona okśan iyotankapi kin hena ekta ewicatonwe c̣a heya; Ina qa mihunkawanji, wanwicayaka po.
35Tuwe Wakantanka tawacin kin ecen econ kinhan, he mihunkawanji ee, mitawinoḣtin qa inawaye cin nakun.
Currently Selected:
Markos 3: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.
