Markos 2
2
1Anpetu tonana iyohakam hehan ake Kapernaum en i; unkan ti mahen yanka he oyakapi.
2Unkan hecehnana wicota en mniciyapi, hecen tuktedan en hipi kte śni, tiyopa kin itankan tanhan ocikan śni: unkan wicoie kin owicakiyaka.
3Unkan hehan en hipi, wicaśta wan ṭaṭake cin wicaśta tom akiyuhapi, he en aupi.
4Unkan wicota kin on tokadan ikiyedan upi śni, hehan tipi akaḣpe kin yuḣdokapi; he yujujupi hehan ṭaṭake cin owinja akan yanka ecehna en yuhukun iyeyapi.
5Unkan wacinyanpi kin he Jesus wanyake c̣ehan, ṭaṭake cin heciya; Cinś wayaḣtani kin nicicajujupi ce.
6Tuka wowapi kagapi wanjikji hen iyotankehan unpi kin hena cante mahen hecinpi;
7Tokeca wicaśta kin de śicaya ia he: Tuwe woaḣtani kajuju kta okihi he, Wakantanka ecedan.
8Unkan hena hecekcen awacinpi kin, Jesus iye tawacin ekta sdonya, hehan hewicakiya; Tokeca hena hecekcen awacannipi he.
9Wayaḣtani nicicajujupi, qa iś, Najin, owinja ehdaku qa mani wo, ṭaṭake cin eciyapi kta, unma tukte waśakadan he.
10Tuka Wicaśta Cinhintku kin he maka akan woaḣtani kajuju kta okihi, he sdonyayapi kta; hehan ṭaṭake cin he heciya;
11Najin, qa owinja ehdaku, qa yati ekta hda wo, eciciya ce, eya.
12Unkan hecehnana najin hiyaye c̣a, owinja ehdaku, qa owa, sin wicitokam tankan kihda; he cen owasin inihanpi, Wakantanka yatanpi qa heyapi; Tohinni taku dececa wanunyakapi śni.
13Hehan ake tankan mde kahda iyaya; unkan wicota en mniciyapi; unkan waonspewicakiya.
14En hiyaya icunhan, Lewi, Alpheus cinhintku, mazaska mnayanpi ece kin en iyotanka, he wanyake c̣a; Miyahna u wo, eciya. Unkan najin hiyaye c̣a ihakam ya.
15Unkan he ti kin ohna Jesus wota iyotanka, hehan mazaska mnayanpi waḣtanipi sa ko ota Jesus kici iyotankapi, waonspewicakiye cin hena koya: wicota qa ihakam unpi ece.
16Unkan wowapi kagapi Pharisee ko, wamnayanpi qa waḣtanipi sa om wota yanka wanyakapi, hehan waonspewicakiye cin hewicakiyapi;. Tokeca e wamnayanpi waḣtanipi sa ko om wota qa wayatkan he.
17Jesus he naḣon, hehan hewicakiya; Tuna zanipi kin hena pejinutawicaśta kin cinpi śni, tuka wayazankapi kin hena e cinpi: wicaśta owotanna kin heca on wahi śni, tuka waḣtanipi sa iyopeic̣iyapi kta e wicakico wahi ce.
18Johannes waonspewicakiye cin hena, qa Pharisee tawapi kin akiḣanic̣iyapi ece; unkan en hipi qa heciyapi; Tokeca e Johannes waonspewicakiye cin hena, qa nakun Pharisee tawapi kin, akiḣanic̣iyapi he, tuka waonspewicayakiye cin hena akiḣaniciyapi śni.
19Unkan Jesus hewicakiya; Wakankiciyuzapi cinca kin hena tohanyan tawicu ton kte cin om un kin hehanyan akiḣanic̣iyapi kta okihipi he. Tohanyan tawicu ton kte cin yuhapi kinhan, hehanyan akiḣanic̣iyapi kte śni.
20Tuka anpetu kin u kta, tohan tawicu ton kte cin he ewicakiciyakupi kta, unkan anpetu kin hena en akiḣanic̣iyapi kta.
21Tuwedan śina teca onśpa onḣdoḣda tanike cin en akihdagton śni; hecon kinhan onśpa teca en akagegepi kin he tanike cin etanhan namna kta, hecen oyuḣdece kin sanpa tanka aya.
22Nakun tuwedan miniśa teca ojuha tanike cin en okaśtan śni; hecon kinhan miniśa teca kin he ojuha tanike cin kaḣdeca ece, hecen miniśa skepe c̣a ojuha kin ihangyapi; tuka miniśa teca kin ojuha teca kin en okaśtanpi kta.
23Unkan anpetu wakan icunhan wojupi kin ehna iyaya; qa waonspewicakiye cin, yapi icunhan, wahuwapa yuksapi.
24Hehan Pharisee kin heciyapi; Wanyaka wo, anpetu wakan icunhan, taku econpi kta iyecece śni tokeca econpi he.
25Unkan hewicakiya; Dawid qa tona om un qon, wotektehdapi qa einpi qehan, token econpi qon he dawapi śni he.
26Abiathar wośnapi kaga itancan taanpetu kin en, Wakantanka ti kin en ye c̣a, wayutanin aguyapi kin he yute c̣a, om un kin hena nakun wicaqu; he wośnapi kagapi iśnana yutapi kta tuka.
27Unkan hehan hewicakiya; Anpetu wakan kin he wicaśta on kagapi, qa wicaśta kin iś anpetu wakan kin on kagapi śni:
28Heon etanhan Wicaśta Cinhintku kin anpetu wakan kin en Itancan un.
Currently Selected:
Markos 2: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.
