Markos 1

1Jesus Messiya Wakantanka Cinhintku kin Wotanin Waśte tawa tokaheya kin he dee.

2Wicaśta wokcanpi kin en owapi qon iyececa; Iho, niite kin itokam wahośi mitawa yewaśi kta, nitokam canku wiyeya enicihnake kta.

3Wicaho wan ḣewotahedan hotanin kin hee, Itancan tacanku kin wiyeya ekicihnaka wo, ocanku owotanna kicaga wo.

4Johannes ḣewotahedan baptem wicaqu, qa woaḣtani kajujupi kta, on iyopeic̣iyapi baptem wicaqupi kin he oyaka ece.

5Unkan Juda makoce kin owancaya tanhan, qa nakun Jerusalem etanhan ekta yapi; unkan woaḣtani ohdaka, Jordan wakpa kin en, iye owasin baptem wicaqu.

6Unkan Johannes kamel hin kin koyake c̣a teḣmiso wan ipiyagkiton; qa psipsicadan tuḣmaga canhanpi ahna yuta ece:

7Qa woyake c̣a heya; Mihakam wanji mikapeya waśake cin he u ce, he patuś nawajin qa hankpan weciyuśdoke kta iyemicihantu śni.

8Miś miye awicakehan mini on baptem cic̣upi; tuka iye qe Woniya Wakan kin on baptem nic̣upi kta ce.

9Unkan anpetu kin hena icunhan, Galile en Nazareth etanhan Jesus u, qa Jordan en Johannes baptem qu.

10Unkan mini kin etanhan itanwankanhde ku qehan, ecahankeya maḣpiya kin yuzamnipi qa Woniya Wakan kin wakiyedan kaḣya kuntkiya u qa en hiyahan, he wanyaka.

11Unkan maḣpiya eciyatanhan wicaho wan tanin, Micinkśi waśtewakidake c̣a tanyan iyomakipi kin he niye ce.

12Hehan ecahankeya Woniya kin ḣewoskan makoce kin ekta kaḣam aya.

13Unkan anpetu wikcemna topa ḣewotahedan makoce kin en un; qa hen Satan iyutanyan; wamanica kin om un, unkan maḣpiya ohnihde kin okiyapi ece.

14Unkan Johannes kaśka hnakapi qehan, Jesus Galile en hi, qa Wakantanka tokiconze wotanin waśte kin oyaka:

15Qa heya; Wanna iyehantu, Wakantanka tokiconze kin kiyedan un; iyopeic̣iya po, qa wotanin waśte kin wicada po.

16Unkan Galile mde kin icahda omani, hehan Simon wanyaka, qa iye sunkaku Andrew nakun, mde kin en ho wan iyohpeyapi; hena hopsicapi kin hecapi nakaeś.

17Unkan Jesus hewicakiya; Miyahna u po, kinhan wicaśta wicadupsicapi kta cicagapi kta ce.

18Unkan ecahankeya ho kin eḣpekiyapi, qa ihakam iyayapi.

19Unkan hetanhan kitan ecinyan iyoopta ye c̣a, Jakob Zebede cinhintku, nakun sunkaku Johannes eciyapi, wanwicayaka; hena wata ohna ho kin piyapi.

20Unkan ecahankeya wicakico; unkan atkukupi Zebede, qa tona wowidake wicayuhe cin hena om, wata kin en eḣpewicayapi, qa ihakam iyayapi.

21Hehan Kapernaum en yapi; unkan anpetu wakan icunhan omniciye tipi kin katinyan en ye c̣a, woyaka.

22Unkan taku oyake cin on yuśinyayapi; wicaśta itancanyan waonspewicakiya, qa wowapi kagapi kin iyecece śni.

23Unkan omniciye tipi kin he ohna wicaśta wan woniya śica yuha; unkan he howaya,

24Qa heya; Unkayuśtan po; Jesus Nazareth etanhan, taku ecaunniconpi he; ihangunyayapi kta yahi he; nituwe kin sdonwaya, Taku Wakan Wanji Wakantanka tawa kin he niye.

25Hehan Jesus iyopeye c̣a heciya; Inina yanke c̣a, tankata hninanpa wo.

26Unkan woniya śice cin he wicaśta kin yuḣdece c̣a, hotankakiya hotanin, hehan tankan hinanpa.

27Unkan owasin inihanpi qa heya ikiciwangapi; De taku he; de woonspe teca kin tukte e he; woniya śice cin itancanyan owawicakiya, unkan anagoptanpi ece.

28Unkan hetanhan Galile makoce ihdukśan owancaya oḣan kin oyakapi.

29Unkan omniciye tipi kin etanhan hdicupi, hehan katinyan Simon qa Andrew tipi tawapi kin en yapi, Jakob qa Johannes nakun opapi.

30Tuka Simon tawicu hunku kin he tancan kata on wayazanka yanka; unkan he okiyakapi.

31Hehan en hi, qa napata yuze c̣a najinkiya; unkan ecahankeya tancan kata ayuśtan, qa hehan owicakiya.

32Wanna ḣtayetu, wi iyaya hehan, wayazankapi kin owasin yanke cin en awicahipi, tona wakanśica wicayuhnaśkinyan hena koya.

33Hecen otonwe kin ocowasin tiyopa kin en kata iheya.

34Unkan wowayazan toktokeca on wayazanpi kin ota asniwicaya, qa taku wakan śica ota nakun tankan hinanpe wicakiya; qa wakan śice cin hena ia iyowinwicakiye śni, hena iyekiyapi nakaeś.

35Unkan ihanḣanna, hinaḣin anpa itehan, hehan inajin, qa tankan inanpe c̣a, ḣewotahedan makoce wan ekta ye c̣a, hen wocekiye eya.

36Unkan Simon tona om un kin hena koya ihakam iyayapi.

37Qa iyeyapi hehan heciyapi; Owasin anicitapi ce.

38Unkan hewicakiya; Otonwe ikiyedan kin hena en unyanpi kta; hen nakun womdake kta; heon etanhan wahi ce, eya.

39Unkan Galile makoce kin owancaya, omniciye tipi kin ohna woyake c̣a, wakan śica hinape wicakiya ece.

40Unkan wicaśta wan lepros ececa, he en hi, qa cekiya, canpeśka makehde inajin qa heciya; Yacin kinhan ska mayakage kta oyakihi.

41Unkan Jesus onśikida, nape ekta yekiye c̣a, yutan qa heciya; Wacin, ska un wo.

42Unkan heye cin hecehnana, lepros ececa qon he ayuśtan, qa ska icaga.

43Hehan tanyan wahokonkiye c̣a hetanhan hdeśi;

44Qa heciya; Ihnuhan tuwe taku eyakiye cinhan; tuka hde c̣a, wośna kage cin he en hdutanin wo, qa niyuskapi kta on taku Moses econ wicaśi qon hena wayuśna wo, hecen iyepi ekta woyutanin kta.

45Tuka tankan hde c̣a, nina ohdake c̣a, owancaya yaotanin, hecen hetanhan Jesus otonwe kin en taninyan ye kta okihi śni, tuka tankan ḣewotahedan un ece: unkan owancaya tanhan yanke cin en hipi ece.

Currently Selected:

Markos 1: DAKOTANT

Highlight

Copy