ESERA 5
5
1 Jaana baperofeti, e bong moperofeti Hagai, le Sekaria morwa Ito, ba perofesetsa Bajuta ba ba mo Juta le Jerusalema; ba ba ruta mo ineng la Modimo wa Iseraele. 2 Foo ga nanoga Serubabele morwa Shealetiele, le Ješua morwa Josatake, mme ba simolola go aga ntlo ya Modimo e e mo Jerusalema; le baperofeti ba Modimo ba bo ba nna nabo ba ba thusa.
3Ya re ka lone lobaka loo ga tla kwa go bone Tatenai molaodi wa kwa moseja ga noka, le Shethare-bosenai, le bankana ba bone, ba ba raya jaana ba re: “E mang yo o lo neileng taolo ya go aga ntlo e, le go wetsa lorako lo?” 4Foo ra bua nabo jaana ra re: “Maina a banna ba ba dirang kago e ke bomang?” 5Mme leitlho la Modimo wa bone le ne le le mo bagolwaneng ba Bajuta, mme ba se ka ba ba khutlisa, ga tla ga tsamaya mafoko ao a isiwa kwa go Dario, mme phetolo ya busiwa ka lokwalo ka ga one.
6Malebela a lokwalo lo Tatenai molaodi wa kwa moseja ga noka, le Shethare-bosenai, le bankana ba gagwe Baafaresake, ba ba kwa moseja ga noka, ba lo rometseng kwa go Dario kgosi, ke a: 7Ba romela lokwalo kwa go ene, go kwadilwe mo go lona jaana, ga twe: “Go Dario kgosi, kagiso gotlhe. 8A go itsiwe ke kgosi fa re ne re ile lefatsheng la Juta, kwa ntlong ya Modimo o mogolo, e e agiwang ka maje a magolo, e bile dikgong di beilwe mo dithakong, e bile tiro eo e tswelela pele ka tlhoafalo, ya segofala mo seatleng sa bone.
9“Foo ra botsa bagolwane bao, ra ba raya jaana ra re: ‘E mang yo o lo neileng taolo ya go aga ntlo e, le go wetsa lorako lo?’ 10Ra ba botsa le maina a bone, go tla re go itsise, gore re tle re kwale maina a banna ba e leng ditlhogo tsa bone.
11“Mme ba re busetsa phetolo, ba bua jaana, ba re: ‘Re batlhanka ba Modimo wa legodimo le lefatshe, re aga ntlo e e sa leng e agiwa bogologolo, go fetile dinyaga di le dintsi, e kgosi nngwe e kgolo ya Iseraele e kileng ya e aga, ya e wetsa. 12 Mme e rile ka borraetsho ba ne ba tlhotlheletsa Modimo wa legodimo bogaleng, wa ba tsenya mo seatleng sa ga Nebukatenesare kgosi ya Babilone wa Mokalatea, ene a senya ntlo e, a tlosa batho a ba isa Babilone. 13 E rile ka ngwaga wa ntlha wa ga Kurose kgosi ya Babilone, Kurose kgosi a ntsha taolo ya go re ntlo e ya Modimo e agiwe. 14Le dilwana tsa gouta le tsa selefera tsa ntlo ya Modimo, tse Nebukatenesare o ne a di ntshitse mo tempeleng e e neng e le mo Jerusalema, a di isa mo tempeleng ya Babilone, tseo kgosi Kurose a di ntsha mo tempeleng ya Babilone, tsa neelwa mongwe, ga twe Shešabasare, yo o ne a mmeile molaodi. 15Mme a mo raya a re: Tsaya dilwana tse, o ye o di tsenye mo tempeleng e e kwa Jerusalema, mme ntlo ya Modimo e agiwe mo felong ga yone. 16Foo ga tla Shešebasare yoo, a thaya metheo ya ntlo ya Modimo e e mo Jerusalema; e sa le go tswa mo lobakeng loo go tla fela mo lobakeng lwa gompieno e ne e ntse e agiwa, le fa go ntse jalo ga e ise e fele.’
17“Jaana ra re, fa go le molemo mo matlhong a kgosi, a go senkwe mo ntlong ya kgosi, ya dikhumo, e e koo Babilone, gore a go ntse jalo gore ruri taolo e kile ya ntshiwa ke kgosi Kurose ya go aga ntlo ya Modimo mo Jerusalema? Jaanong kgosi e re itsise go rata ga yone ka ga tiro e.”
Currently Selected:
ESERA 5: TSW08NO
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1992. Used with permission. All rights reserved.