मरकुस 15

पिलातुसा काऐ यीशु

(मत्ती 27:1-2,11-14; लुका 23:1-5; यहुन्ना 18:28-38)

1दोउत राची यहुदी शास्त्री, बौड़ै याजक और स्याणै लोग, ज़ो यहुदी फैसलै कौरणै वाल़ी खुंबल़ी रै ज़ौणै थै। तिंउऐ आपु मांझ़िऐ चौपड़ुइयौ यीशु तिदरु बानियौ पिलातुसा काऐ नियौं। (पिलातुस यहुदा परदेशा दी रोमी सरकारा रौ बौड़ौ आफसर थौ) 2पिलातुसै यीशु कु पुछ़ौ, “का तू यहुदी लोगु रौ राज़ौ ई?” यीशुऐ ज़वाब दैऔ, “ओ! तुमै ता आपु ई बोलदै लागै औन्दै।” 3तैबै बौड़ै याजक यीशु माथै भौरी कुछ़ गलत आरोप लाइंदै लागै। 4पिलातुसै यीशु कु औज़ौ पुछ़ौ, “का तू ज़वाब नाईं दैंदौ? इऐ लोग तैरै विरोधा ई भौरी कुछ़ ई बोलदै लागै औन्दै।” 5तैबै भी यीशुऐ कुछ़ ना बोलौ। यीशु रै च़ुटुक रौइणै कु पिलातुस भौरी हैरान हुऔ।

मौरणै री सौज़ा रौ हुकम

(मत्ती 27:15-26; लुका 23:13-25; यहुन्ना 18:39; 19:16)

6हर साल ज़ैबै यहुदी लोग फसह रौ साज़ौ मौनावा थै तैबै रोमी सरकारा री तौरफा कु यहुदी लोगु रै बोलणै माथै एक कैदी आज़ाद हुआ थौ। 7सेज़ै बौगतै बरअब्बा नावां रौ एक आदमी ज़ो कैदीऊ आइलै कैदा ई बन्द थौ, ज़ुणिऐ झ़ौगड़ै कौरदी बारै एकी रौ खून कियौ थौ। 8तैबै सारी भीड़ पिलातुसा काऐ आगुड़ै डेइयौ तेसलै बोलदै लागै कि, “ज़िणौ तुमै हर साल कौरा ई। एज़ी बारै भी तिणौ कौरौ। आमुलै एक कैदी आज़ाद कौरौ।” 9पिलातुसै तिउंलै ज़वाब दैऔ, “का तुमै च़ाहा ई कि हाऊं तुमुलै एस यहुदिऊ रौ राज़ौ आज़ाद कौरु?” 10सेऊ ज़ाणा कि बौड़ै याजक लोग यीशु री मीश कौरा ई और सेऊ तैबै इऐ पकड़ाऔ आ। 11बौड़ै याजकुऐ भीड़ा रै लोगु लै बोलौ कि यीशु नाईं बल्कि बरअब्बा नावां रौ कैदी मांगौ। तैबै भीड़ा रै लोग मांगदै लागै कि बरअब्बा नावां रौ आदमी आज़ाद कौरौ। 12तैबै पिलातुसै पुछ़ौ कि, “हाऊं यहुदी लोगु रै राज़ै रौ का कौरु?” 13भीड़ा रै लोगुऐ ज़ोरै बोलौ, “तेस झ़ांगणा लै क्रुसा माथै च़ड़ाऔ” 14पिलातुसै बोलौ, “कैलै? तिणीऐ का बुरौ कियौ आ?” पर सै लोग औज़ौ भी ज़ोरै-ज़ोरै बोलदै लागै कि, “एस क्रुसा माथै च़ौड़ाऔ।” 15तैबै पिलातुसै भीड़ा रै लोग खुश कौरना लै बरअब्बा नावां रौ कैदी आज़ाद कियौ। और यीशु रोमी सिपाईउ कै कोड़ै लाइणा लै और क्रुसा दी च़ड़ाउणा लै सांबी ऐरौ आ।

रोमी सिपाईउ रै ज़ौरिऐ यीशु री बेइज़्ज़ती

(मत्ती 27:27-31; यहुन्ना 19:2-3)

16रोमी सिपाईउ ऐ यीशु पिलातुसा रै मैहला री खोल़ी भितै निऔं। तिऐ तिंउऐ सारै सिपाई कौठै कियै। 17तैबै यीशु रौ मज़ाक उड़ाउणा लै यीशु कै एक बैंगनी रौंगा रौ च़ोगौ भिड़ाऔ ज़िणौ राज़ै लोग भीड़ा थै। और तिंउऐ यीशु रै मुंडा दी काँडेऊ रौ एक ताज़ बेलियौ लाऔ। 18तैबै सै लोग “यहुदिऊ रै राज़ै री ज़ै ज़ै” बोलीयौ यीशु रौ मज़ाक उड़ाउंदै लागै। 19सिपाई घौड़ी-घौड़ीयै यीशु मुंडा दी छिवांटी री लाइंदै लागै। और यीशु माथै थुकदै भी लागै। और सै मज़ाका दी यीशु रै सामनै धौनी झुकियौ ढाल कौरदै लागै 20ज़ैबै तिंउऐ आच़्छ़ा कौरीऐ मज़ाक उड़ाऔ तैबै सिपाइउऐ सै बैंगनी रौंगा रै जुड़कै उतारीयौ तेसकै तेसी रै जुड़कै भिड़ाऐ। और क्रुसा माथै च़ड़ाउणा लै तेस शहरा कु बाइरै निऔं।

यीशु क्रुसा माथी च़ौड़ाउणौ

(मत्ती 27:32-44; लुका 23:26-43; यहुन्ना 19:17-27)

21यीशु क्रूस आपणै काछ़ा माथै च़ुंगियौ आण्डदै थौ लागौ औन्दौ। तैबै बाटा दी सिपाइउऐ एक आदमी पाकड़ौ ज़बर ज़ौस्ती तेसकु क्रूस च़ुंगाउणै भेज़ौ। सौ आदमी कुरेन नावां रै शहरा रौ रौइणै वाल़ौ थौ। सौ गांवा कु आशदै थौ लागौ औन्दौ। तेस आदमी रौ नाऊं शमौन थौ ज़ो सिकन्दर और रूफुस नावां रै दुई छ़ोहरु रौ बाब थौ। 22क्रुसा माथै च़ड़ाउणा लै एक ज़ागाह थी ज़ासरौ नाऊं गुलगुता थौ। गुलगुता रौ मतलब आ खोपड़ी ज़िणी ज़ागाह। तिंउऐ यीशु तिऐ आणौ। 23क्रुसा माथै च़ड़ाउणा कु पैहलै बेदणी मिटाउणा लै तिंउऐ अंगुरा रै रसा दी मुर्र नावां री ज़ौड़ी-बुटी मिलाइयौ यीशु लै पिलाउणा री कोशिश की पर यीशुऐ नाईं पियौ 24तैबै तिंउऐ यीशु क्रुसा माथै च़ौड़ाऔ। और तेसरै जुड़कै बांटणा लै कि कासकै का मिला आ चिट्ठी पाई। 25दोअती लगभग नौ बाज़ै तिंउऐ यीशु क्रुसा माथै च़ड़ाऔ। 26क्रुसा माथै एक तख्ती भी टांगी ज़ासदी यीशु लै लिखौ औन्दौ थौ कि, “यहुदी लोगु रौ राज़ौ।” 27यीशु आइलै दुई डाकु भी थै ज़ो अलग अलग क्रुसा माथै थै च़ड़ाऐ औन्दै। एक थौ यीशु री सुल़टी भिलै और एक थौ उल़टी भिलै। 28ज़िणौ पवित्रशास्त्रा दी भौरी पैहलै यीशु रै बारै दी भविष्यवाणी कौरीयौ लिखौ थौ कि, “सौ कैदीऊ मांझ़िऐ गिणौ आ,” सेज़ौ वचन पुरौ हुऔ आ। 29तिऐ बाटा दी आशणै-डेउणै वाल़ै लोग भी यीशु री बेइज़्ज़ती थै कौरदै लागै औन्दै। सै आपणै मुंडा हिलाई-हिलाइयौ थै बोलदै लागै औन्दै कि, “आड़ै, परमेश्‍वरा रौ घौर ढाल़ीयौ चिजै दिना दी तेस चाणनै वाल़ौ! 30आबै क्रुसा कु उतरियौ देखाऊ और आपु ता बौच़।” 31तिणी ई यहुदी शास्त्री और बौड़ै याजक भी यीशु रौ मज़ाक उड़ाइयौ बोलदै लागै कि, “इणीऐ ता दुजै लोग बौच़ाऐ ई आबै आपु ना बौच़ी बौल़दौ। 32इयौ आपुलै मसीह और इस्राइला रौ राज़ौ माना आ। अगर इयौ आमारै सामनै क्रुसा कु उतरा लौ ता आमै भी एस माथै विश्वास कौरी ई।” यीशु आइलै ज़ो दुइया भिलै डाकु थै टांगै औन्दै सै भी यीशु रौ मज़ाक उड़ाउंदै थै लागै औन्दै।

यीशु रै प्राण छ़ाड़णै

(मत्ती 27:45-56; लुका 23:44-49; यहुन्ना 19:28-30)

33दुसै लगभग बारह बाज़ै सारै देशा दी न्यारौ हुऔ और चिआ घंटै झ़ांऊ न्यारौ थौ। 34दुसकै चिआ बाज़ै यीशुऐ ज़ोरै आपणी बोली दी बोलौ, “इलोई, इलोई लमा शबक्तनी?” ज़ासरौ मतलब आ, “मैरै परमेश्‍वर! मैरै परमेश्‍वर! ताऐं हाऊं कैलै छ़ाड़ी ऐरौ ऊ?” 35तिऐ ज़ो लोग खौड़ै थै, कुछ़ लोगुऐ इणै शुणियौ गलत सौमझ़ियौ बोलौ, “शुणौ! इयौ एलियाह भविष्यवक्ता लै आ औटाइंदै लागौ औन्दौ।” 36एक आदमी फेटा मारीयौ एक स्याइचूश सिरकै दी भिज़ाइयौ एक लाम्बै डिंगै दी बानियौ यीशु लै दैऔ ताकी यीशु तेस चुशियौ पिया। तिणीऐ बोलौ कि, “देखी एरी कि एलियाह गुरु एस क्रुसा कु उतारदै आशा कि नाईं।” 37यीशुऐ औज़ौ राड़ मारी और तेबी प्राण छ़ाड़ै।

38तिंया ताकै परमेश्‍वरा रै घौरा भितै सारेऊ कु शुद्ध ज़ागाह दी सामनै ज़ो पौरदौ थौ, सेऊ माथा कु तौल़ झ़ांऊ च़ीरुइयौ दुई भिलै हुऔ। 39यीशु काऐ ज़ो रोमी सिपाईउ रौ आफसर थौ तिणीऐ देखौ कि, यीशु किणौ मौरौ आ, तैबै तिणीऐ बोलौ, “सौच़्च़ी ई, इयौ आदमी परमेश्‍वरा रौ छ़ोहरु थौ।”

40कुछ़ छ़ेउड़ी दुरा कु थी लागी ऐन्दी देखदै। इऐ छ़ेउड़ी गलील परदेशा कु थी यीशु आइलै यरुशलेमा दी आशी औन्दी, तिऊं मांझ़िऐ मगदल गांवा री एक मरियम थी और दुजी याकूब और योसेसा री आमा मरियम थी, और सलोमी नावां री एक छ़ेउड़ी भी थी। 41औज़ौ भी मोकती छ़ेउड़ी थी तिऐ। ज़ेबी यीशु गलील परदेशा दी थौ तेबी इऐ सारी छ़ेउड़ी तेस पिछ़ु डेइयौ तेसरी सेवा कौरा थी।

यीशु ओडाच़ी दी छ़ाड़णौ

(मत्ती 27:57-61; लुका 23:50-56; यहुन्ना 19:38-42)

42ज़ैबै ब्याल़ हुई एरी ता एथीलै कि तैयारी रौ दीन थौ, ज़ो आरामा रै दिना कु एक दीन पैहलै हुआ थौ। 43तेबी अरमतिया रै रौइणा वाल़ौ युसुफ आशौ ज़ो बौड़ी खुंबल़ी रौ खास ज़ौणौ थौ और आपु भी परमेश्‍वरा रै राज़ा री बाट लोड़ा थौ तिणीऐ हिम्मत छ़ाड़ियौ पिलातुसा कु यीशु रौ मौड़ौ मांगौ। 44पिलातुस हैरान हुऔ कि यीशु एती शिगरी किणौ मौरौ आ। तैबै तिणीऐ सेऊ आफसर औटाऔ ज़ुणिऐ यीशु क्रुसा माथै च़ड़ाऔ थौ। पिलातुसै आफसरा कु पुछ़ौ का यीशु मौरी गौ आ? 45ज़ेबी तिणी रोमी सिपाईउ रै आफसरै बोलौ कि यीशु मौरी गौ आ तैबै पिलातुसै यीशु रौ मौड़ौ निणै दैऔ। 46तैबै युसुफै लाठै रौ कापड़ौ खरीदियौ आणौ। और यीशु रौ मौड़ौ क्रुसा कु धौनी गाड़ीयौ तेस लाठै दी मेटौ और तैबै एक ओडाच़ी दी छ़ाड़ौ ज़ो ढोकै दी काटियौ थी चाणी ऐन्दी और सै ओडाच़ी एक बौड़ै पात्थरा कौरीऐ बंद कौरी। 47मगदल गांवा री मरियम, और योसेसा री आमा मरियम, दुइया देखदै थी लागी औन्दी कि यीशु रौ मौड़ौ किऐ छ़ाड़ाई।

Currently Selected:

मरकुस 15: BFZ-NT

Highlight

Copy