मरकुस 14

यीशु पाकुड़ना री च़ाल

(मत्ती 26:1-5; लुका 22:1-2; यहुन्ना 11:45-53)

1दुई दिना बासिऐ फसह रौ साज़ौ और बिण संज़ेड़ै री रोटी रौ साज़ौ औणै वाल़ौ थौ। यहुदी शास्त्री और बौड़ै याजक यीशु पौकड़ाइऔ झ़ांगणौ च़ाहा थै। 2पर सै बोला थै कि एस साज़ै रै दिना दी नाईं पाकुड़दै। नाईं ता भीड़ा रै लोग हालौ मौच़ावा ई।

बैतनिय्याह दी यीशु रोटी खांदै

(मत्ती 26:6-13; लुका 12:1-8)

3यीशु बैतनिय्याह गांवा दी शमौना रै घौरा दी आशौ ज़ुण पैहलै कोढ़ी थौ। ज़ेबी सै रोटी खांदै थै बोशै औन्दै तेबी तिऐ एक छ़ेउड़ी आशी ज़ासरै हाथा दी ज़ौड़ी-बुटी रै खुशबुदार तेला री शीशी थी। सेऊ तेल भौरी शुद्ध और किमत्ती थौ। तिऐं छ़ेउड़ीऐ सै शीशी चोड़ी और सेऊ तेल यीशु रै मुंडा तौल़ै पेरौ। 4तैबै कई लोग ज़ो तिऐ बोशै औन्दै थै सै आपु मांझ़िऐ रोशुइयौ बोलदै लागै कि, “एऊ मैहंगौ तेल बर्बाद कैलै कियौ औलौ? 5एस तेला री कीमत एती आ कि ज़ेती एक आदमी एकी साला दी दिहाड़ी कौमावा आ। एस तेल बेच़ीयौ पैसै गरीब लोगु दी बांडणै च़ांई थै।” सै लोग तिऐं छ़ेउड़ी धौमकाउंदै भी लागै। 6तैबै यीशुऐ तिऊं लोगु लै बोलौ, “तुमै इऐं छ़ेउड़ी इणौ कौरणै दैऔ, इआंलै कैलै रोशिआई? इंऐ तंग कैलै कौरा ई? इंऐ छ़ेउड़ीऐ मैरै भौलै लै कियौ आ। 7गरीब लोग ता तुमु आइलै सौदा साथाई रौआ ई। तिऊं आइलै ज़ेबी भी भौलाई कौरणै च़ाहा लै कौरी बौल़ा ई। पर हाऊं तुमु आइलै सौदा नाईं रौइंदौ। 8इंऐ छ़ेउड़ीऐ ज़ो भौलाई कौरणी थी कौरी एरी आ। इंऐ छ़ेउड़ीऐ मैरै मुंडा दी खुशबुदार तेला पेरिऔ मौरणै कु पैहलै मैरौ ज़िसम दबाउणा लै तैयार कौरी ऐरौ आ। 9हाऊं तुमुलै सौच़्च़ौ बोलाऊ, पुरी धौतरी दी ज़िऐ-ज़िऐ खुशी री खौबर शुणावा लै, तिऐ-तिऐ इंऐ छ़ेउड़ी रै कामा री बुशै भी यादा दी हुआई।”

यहुदा रौ विश्वासघात

(मत्ती 26:14-16; लुका 22:3-6)

10तैबै करियोत गांवा रौ यहुदा, ज़ुण यीशु रै बारह चुनै औन्दै च़ेलेऊ मांझ़िऐ कु एक थौ, सेऊ बौड़ै याजकु काऐ डैऔ और बौल़ौ कि, “हाऊं यीशु पौकड़ावा ऊ।” 11इणै शुणियौ सै लोग भौरी खुश हुऐ और तेसकै पैसेऊ दैणै रौ वायदौ कियौ। तैबै यहुदा यीशु पौकड़ाउणा लै मौकौ लोड़दै लागौ।

च़ेलेऊ आइलै आखरी बार साज़ै री रोटी खाणी

(मत्ती 26:17-25; लुका 22:7-14,21-23; यहुन्ना 13:21-30)

12तैबै बिण संज़ेड़ै री रोटी रै साज़ै रौ पैहलौ दीन थौ ज़ेबी यहुदी लोगु रै हर टौबर फसह रै गाबड़ु री बौल़ी च़ौड़ावा थै। तैबै यीशु रै च़ेलेउऐ यीशु कु पुछ़ौ कि, “गुरुज़ी, तुमै किऐ च़ाहा ई कि आमै तुमु कालै फसह रै साज़ै री रोटी खाणै रौ इन्तज़ाम कौरुलै?” 13तैबै यीशुऐ आपणै च़ेलेऊ मांझ़िआ कु दुई च़ेलै भेज़ै और तिउंलै बोलौ कि, “तुमै यरुशलेमा शहरा दी डैऔ। तिऐ तुमुकै एक आदमी मिला ज़ुण काछ़ा माथै पाणी री बोटल़ोऊ चुंगिऔ आ डेउंदै लागौ औन्दौ। तुमै तेस आदमी पिछ़ु डेवेऊ। 14ज़ेज़ै घौरा दी सेऊ आदमी डैआ लौ, तुमै तेस घौरा रै स्याणै लै बोलेऊ कि, ‘गुरु इणौ बोला आ, “मुकालै तैयार कियौ औन्दौ कौमरौ केज़ौ आ, ज़िऐ हाऊं आपणै च़ेलेऊ आइलै फसह रै साज़ै री रोटी खाऊ?” ’ 15तैबै सेऊ घौरा रौ स्याणौ तुमुकै तेस घौरा री माथली मंजली दी सौज़ाऔ औन्दौ बौड़ौ कौमरौ देखावा आ। तुमै तिऐ फसह री रोटी खाणै रौ इन्तज़ाम कौरेऊ।” 16तैबै च़ेलै यरुशलेम शहरा दी डेवै। ज़िणौ-ज़िणौ यीशुऐ बोलौ थौ तिणी तिऊं आइलै हुऔ। तैबै तिंउऐ तिऐ फसह रै साज़ै री रोटी रौ इन्तज़ाम कियौ।

17ब्याल़कै यीशु आपणै बारह चुनै औन्दै च़ेलेऊ आइलै सेज़ै घौरा दी आशै ज़िऐ संज़ेड़ै री रोटी खाणै रौ इन्तज़ाम थौ कियौ औन्दौ। 18ज़ैबै सारै बोशियौ रोटी खांदै लागै तैबै यीशुऐ बोलौ, “तुमै सारै ई इदै मुं आइलै रोटी खांदै लागै औन्दै। हाऊं तुमुलै सौच़्च़ौ बोलाऊ कि तुमु मांझ़िऐ कु एक आ ज़ो मुं पौकड़ावा आ।” 19इणै शुणियौ सै सारै निराश हुऐ और एक-एक कौरीऐ सारै बोलदै लागै, “का हाऊं ता नाईं?” 20तैबै यीशुऐ बोलौ, “सेऊ तुमु बारह च़ुनै औन्दै च़ेलेऊ मांझ़िऐ आ, ज़ुण मुं आइलै बोशियौ मैरै खोरु कु रोटी च़ोबिऔ आ खांदै लागौ औन्दौ। 21हाऊं, ज़ुण परमेश्‍वरा री तौरफा कु भेज़ौ औन्दौ ऊ, मैरौ मौरणौ ता इणौ भी आ लिखौ औन्दौ। फिटकार तेस आदमी लै ज़ुण मुं पौकड़ावा आ। तेस आदमी लै तैबै आच़्छ़ौ थौ कि तेसरौ ज़नमा ना हुआ थौ।”

प्रभु भोज़

(मत्ती 26:26-30; लुका 22:14-20; 1 कुरि. 11:23-25)

22रोटी खांदी बारै यीशुऐ एक रोटी च़ुंगी और परमेश्‍वरा रौ धन्यबाद कौरीयौ रोटी चोड़ी और आपणै च़ेलेऊ लै देई और बोलौ, “आं पाकड़ौ, इंऐ रोटी मैरौ ज़िसम सौमझ़ियौ खाऔ।” 23तैबै यीशुऐ अंगुरा रै रौसा रौ खोरु च़ुंगौ और परमेश्‍वरा रौ धन्यबाद कौरीयौ आपणै च़ेलेउलै दैऔ और सै च़ेलै तेस खोरु कु बारी-बारिऐ पिंदै लागै। 24तैबै यीशुऐ बोलौ, “एस अंगुरा रौ रौस तुमै वायदा रौ मैरौ लोऊ सौमझ़ौ ज़ो भौरी लोगु तिंउरै पापा री सौज़ा कु बौच़ाउणा लै बौइणै वाल़ौ आ। (मैरै मौरणै कु परमेश्‍वर लोगु आइलै एक नौउंऔ रिश्तै रौ वायदौ पाकौ कौरा आ) 25हाऊं तुमुलै सौच़्च़ौ बोलाऊ कि एथ बासिऐ हाऊं अंगुरा रौ रौस दुजी बारै तेबी झ़ांऊ ना पिंदौ ज़ेबी झ़ांऊ राज़ौ बौणीयौ आशीयौ ना पिऊ।” 26तैबै भजन गाइयौ सै घौरा कु बाइरै निकल़ियौ जैतून पहाड़ी लै डेवै।

पतरसा री इनकार कौरणै री भविष्यवाणी

(मत्ती 26:31-35; लुका 22:31-34; यहुन्ना 13:36-38)

27बाटा दी डेउंदै-डेउंदै यीशुऐ बोलौ, “पवित्रशास्त्रा दी इणौ आ लिखौ औन्दौ कि, ‘परमेश्‍वर भेराल़डु झ़ांगा आ, तैबै भेरी ओरु-पोरु भागा ई।’ इणी मुं भी पौकड़ाउइयौ झ़ांगाई, तैबै तुमै सारै और मुं छ़ाड़ियौ भागा ई। 28पर हाऊं ज़िउंदौ हुईऔ तुमु कु औगाड़िऐ गलील परदेशा ई पौउंच़ाऊ। तिऐ हाऊं तुमुकै मिला ऊ।” 29पतरसै यीशु लै बोलौ, “च़ाऊ सारै डौगमौगाइऔ भागा लै, तैबै भी हाऊं तुमु छ़ाड़ियौ ना डेउंदौ।” 30इणै शुणियौ यीशुऐ पतरसा लै बोलौ, “हाऊं ताउंलै सौच़्च़ौ बोलाऊ कि आज़ राची कुखड़ै रै दुई बारै बाश्णै कु पैहलै तू चिया बारै आपणै मुंआ कु बोलाई कि तू मुं नाईं ज़ाणदौ।” 31तैबै पतरसै औज़ौ भी काठै कौरीऐ बोलौ कि, “च़ाऊ मुं ताऊं आइलै मौरणौ भी जा लौ, तैबै भी हाऊं केबी ना बोलदौ कि हाऊं तुमु नाईं ज़ाणदौ!” और सारै च़ेलै इणौ लागै बोलदै।

गतसमनी दी प्राथना

(मत्ती 26:36-46; लुका 22:39-46)

32तैबै सै एकी बौगिच़ै दी पौउंच़ै ज़ासरौ नाऊं गतसमनी थौ। तिऐ यीशुऐ आपणै च़ेलेऊ लै बोलौ, “तुमै इदै बोशी रौएऊ ज़ेबी झ़ांऊ हाऊं प्राथना कौरुलै।” 33तैबै यीशुऐ तिऊं मांझ़िआ कु पतरस, याकूब और यहुन्ना आपु आइलै दौख आगुड़ै निऐं। तेबी यीशु भौरी दुखी औन्दै लागौ। 34यीशुऐ तिऊं चीन च़ेलेउलै बोलौ कि, “हाऊं भौरी दुखी ऊ, ज़िणौ मौरणै वाल़ौ ऊ। तुमै इदै रुकौ और उज़ीई रौएऊ।” 35यीशु दौख आगुड़ै डेइयौ धौनी ज़मीना माथै झुकियौ प्राथना कौरदै लागौ कि, “ओ मैरै बाब! एस दुखा रौ बौगत मुं काऐ रौ पोरु टाल़ 36तुमै ता सब कुछ़ कौरी बोलाई। एस दुखा रौ बौगत मुकाऐ रौ पोरु टाल़। तैबै भी मेरी नाईं बल्कि तेरी मौरज़ी च़ांई पुरी हुई।” 37तैबै यीशुऐ आपणै च़ेलेऊ काऐ आशीयौ देखै ता सै थै सुतै औन्दै। यीशुऐ शमौन पतरसा लै बोलौ, “शमौन, तू सुतदै ई लागौ औन्दौ? का तू एकड़ी घौड़ी भी उज़ीई नाईं रौई बौल़दौ? 38तुमारौ ज़िऊ ता मैरै हुकमा मानणा लै तैयार आ, पर तुमारै ज़िवा री इच़्छ़ा पुरी कौरणै री शक्ति तुमु दी नाईं आ। ज़ागदै रौएऊ और प्राथना कौरेऊ ताकी तुमै इम्तहाना दी फेल ना हुआ।” 39यीशु तिदरा कु डैऔ और तिणी प्राथना कौरदै लागौ ज़िणी पैहलै की थी। 40ज़ेबी यीशु दुजी बारै आशौ तेबी भी सै च़ेलै सुतै औन्दै थै कैलैकि तिउंकै भौरी नीज थी लागी औन्दी। ज़ैबै यीशु तिऊं उज़ीयावा थौ ता सै शौरमा रै मारै यीशु लै कुछ़ ना बोली बौल़ा थै। यीशु तौंइऐ प्राथना कौरदै डैयौ। 41तैबै चीजी बारै यीशु सुतै औन्दै च़ेलेऊ काऐ आशौ और तिउंलै बोलौ, “का तुमै औज़ौ सुती गौऐ? बस! उठौ! देखौ, आदमी रौ छ़ोहरु पापी लोगु रै हाथा दी पकड़ाइणै वाल़ौ आ। 42उठौ औगांऊ हाण्डौ। देखौ मुं पकड़ाउणै वाल़ौ आशी गौ आ।”

यीशु धोखै दी पाकुड़नौ

(मत्ती 26:47-56; लुका 22:47-53; यहुन्ना 18:3-12)

43यीशु इणौ बोलदै थौ लागौ औन्दौ कि खरकच़ार यहुदा, ज़ो चुनै औन्दै बारह च़ेलेऊ मांझिया कु एक थौ, तिऐ आशौ। तेस आइलै एक भौरी भीड़ थी ज़ासकै तलवारै और डिंगै थै। सै भीड़ बौड़ै याजक यहुदी शास्त्री और स्याणै लोगुऐ थी भेज़ी औन्दी, यीशु पाकुड़ना लै। 44यहुदै पैहलै बोलौ औन्दौ थौ कि, “ज़ासरै गौल़ै दी घीणा लाइयौ खोबु देउलै सेऊ आ यीशु। तेस पाकड़ेउ और सौंभाल़ियौ निंएउ।” 45तैबै यहुदा खरकच़ार यीशु काऐ आशौ और बोलौ, “गुरुजी!” साथाई तेसरै गौल़ै दी घीणा लाइयौ खोबु दैऔ। 46तैबै तिऊं लोगुऐ आगुड़ै आशीयौ यीशु पाकड़ौ। 47इणै देखीयौ एकी च़ेलै आपणी तलवार गाड़ीयौ परधान याजका रै नुकरा रौ कौन्थु पोरु पा काटौ। 48यीशुऐ तिऊं लै बोलौ, का तुमै मुं डाकु सौमझ़ियौ तलवारी और डिंगै कौरौ पाकुड़दै आशै औन्दै? 49“हाऊं ता रोज़ तुमु आइलै रौआ थौ और परमेश्‍वरा रै घौरा दी शिक्षा दिआ थौ। तेबी तुमै मुं आसानी कौरी पाकड़ी बौल़ा थै। पर इणौ सारौ एथीलै हुऔ ताकी पवित्रशास्त्रा दी लिखी औन्दी बूश पुरी हुआ।” 50तैबै सारै च़ेलै यीशु छ़ाड़ियौ पोरु भागै। 51तैबै एक ज़वान आदमी आपणै नांगै ज़िसमा दी एक च़ादरु कौशटियौ यीशु पिछ़ाड़ी-पिछ़ाड़िऐ थौ डेउंदै लागौ औन्दौ। तिऊं लोगुऐ सेऊ आदमी पाकड़ौ। 52पर सौ आदमी आपणौ च़ादरु छ़ाड़ियौ तिदरु नांगी भागौ पोरु।

बौड़ी खुंबल़ी काऐ यीशु

(मत्ती 26:57-68; लुका 22:54-55,63-71; यहुन्ना 18:13-14,19-24)

53ज़ुणी लोगुऐ यीशु पाकड़ौ थौ तिंउऐ यीशु परधान याजका रै घौरा दी नियौं। तिऐ शास्त्री और सारै बौड़ै याजक, स्याणै लोग कौठै थै हुऐ औन्दै। 54पतरस यीशु पिछ़ाड़ी-पिछ़ाड़िऐ परधान याजका रै घौरा रै खौल़ै झ़ांऊ डैऔ। पतरस तिऐ च़ोउकीदारु काऐ बोशियौ आगी तापदै लागौ। 55बौड़ै याजक और सारै यहुदी फैसलै कौरणै वाल़ी खुंबल़ी रै लोग च़ाहा थै कि कोई यीशु रै विरोधा दी गवाही दिआ ज़िणै कौरीऐ यीशु लै मौरणै री सौज़ा मिला। पर कोई तिउंकै सुराग ना मिलौ। 56काफी लोग यीशु रै विरोधा दी गवाही दैंदै लागै पर तिउंरी बुशै आपु मांझ़िऐ नाईं मिला थी। 57तैबै कई लोग खौड़ै हुइयौ झ़ुठी गवाही दैंदै लागै कि, 58“आमुऐ शुणौ आ कि इयौ बोला, ‘हाऊं आदमी रै चाणौ औन्दौ परमेश्‍वरा रौ घौर ढाल़ीयौ चिआ दिना दी एक दुजौ परमेश्‍वरा रौ घौर चाणाऊ ज़ो आदमी रै हाथा कौरीऐ नाईं आ चाणौ औन्दौ।’ ” 59तैबै एज़ी बुशा दी भी तिउंरी गवाही एकी दुजै आइलै नाईं मिला थी। 60तैबै परधान याजकै आपु खौड़ी उठीयौ तिऊं सारेऊ रै सामनै यीशु कु पुछ़दै लागौ, “तू ज़वाब कैलै ना दैंदौ? इऊं गवाइऊ रौ ताउंकै कोई ज़वाब नाईं आसतौ?” 61पर यीशु च़ुटुक थाकौ। तिणीऐ कुछ़ भी ज़वाब ना दैऔ। तैबै परधान याजकै औज़ौ पुछ़ौ, “का तू परमेश्‍वरा रौ छ़ोहरु मसीहा ई?” 62यीशुऐ बोलौ, “ओ। और तुमै देखा ई कि हाऊं ज़ुण परमेश्‍वरा री तौरफा कु भेज़ौ औन्दौ ऊ, भौरी शक्ति वाल़ै परमेश्‍वरा री सुल़टी भिलै बोशियौ राज़ कौराऊ, और बादल़ु दी सौरगा कु आशाऊ।” 63इणै शुणियौ परधान याजक रोशुइयौ आपणौ च़ोगौ च़िरौ और बोलदै लागौ कि, “आबै आमुकै कासी री गवाही री ज़ुरत नाईं आसती, 64कैलैकि आमुऐ आपु शुणी गौ आ कि इयौ परमेश्‍वरा री बुराई कौरा आ। आबै तुमै इणौ बोलौ कि तुमारौ फैसलौ का सा?” सारै लोगुऐ बोलौ कि यीशु लै मौरणै री सौज़ा मिलणी च़ांई। 65तैबै तिऊं मांझ़िआ कु कुछ़ लोग यीशु रै मुंआ दी थुकदै लागै। तेसरी आखी दी कापड़ौ बानियौ सै लोग तेस पिटदै लागै और तेसरौ मज़ाक उड़ाइयौ बोलदै लागै, “अगर तू भविष्यवक्ता ई ता बोल, ताऊं दी कुणिऐ लाई आ?” और बौड़ै याजकु रै च़ोउकीदारुऐ भी तेसदी थापै लाई।

पतरसा रौ इनकार

(मत्ती 26:69-75; लुका 22:56-62; यहुन्ना 18:15-18,25-27)

66ज़ेबी यीशु री पूछ़ताछ़ हुंदै थी लागी औन्दी, तेबी पतरस तौल़ भिलै खौल़ै दी थौ। तैबै परधान याजका री एक नुकराण तिऐ आशी। 67तियांऐ पतरस आगी तापदै देखौ ता तियांऐ तेस भिलै बौड़ै ध्याना कौरीऐ देखीयौ बोलौ, “तू भी ता नासरता रै यीशु आइलै साथाई थौ।” 68तैबै पतरसै बोलौ, “तू का बोलाई? हाऊं तेस नाईं ज़ाणदौ।” पतरस खोल़ी काऐ आशौ और तेबी कुखड़ौ एकी बारै बाशौ। 69तैबै तिऐं नुकराणिऐ तिऐ खौड़ै लोगु लै बोलौ कि, “इयौ आदमी यीशु रौ साथी आ।” 70तैबै पतरस दुजी बारै मुकरौ कि, “हाऊं तेस नाईं ज़ाणदौ।” दख बौगता बासिऐ तिऐ ज़ो लोग थै तिंउऐ पतरसा लै बोलौ, “तेरी बोली ता गलीली लोगु ज़िणी आ। तू ज़ुरुर यीशु रै साथी मांझ़िया कु एक ई।” 71तैबै पतरस कसमा खांदै लागौ, “हाऊं तेस आदमी बिल्कुल भी ना ज़ाणदौ। अगर हाऊं झ़ूठ बोलु लै ता परमेश्‍वरै मुलै सौज़ा च़ांई देई।” 72तेबी खरकच़ार कुखड़ौ दुजी बारै बाशौ। पतरसा कै याद आशी कि यीशुऐ तेसलै बोलौ थौ कि, “कुखड़ै रै दुई बारै बाशणै कु पैहलै तू चिआ बारै मुकरा ई कि तू मुं नाईं ज़ाणदौ।” एज़ी बूश याद कौरीयौ पतरस ज़ोरै ज़ोरै लेरदै लागौ।

Currently Selected:

मरकुस 14: BFZ-NT

Highlight

Copy