मरकुस 16

यीशु रौ ज़िउंदौ हुणौ

(मत्ती 28:1-8; लुका 24:1-12; यहुन्ना 20:1-10)

1ज़ैबै यहुदी लोगु रौ आरामा रौ दीन खातम हुई गौ थौ, तेबी मगदल गांवा री मरियम, सलोमी और याकुबा री आमा मरियम, इऊं चीन छ़ेउड़ीउऐ यीशु रै मौड़ै दी लाइणा लै खुशबुदार समान खरीदियौ आणौ। 2दुजै दिनै ज़ो हौफ्तै रौ पैहलौ दीन थौ, तेबी दोअती च़िलकी आरी इऐ चीन छ़ेउड़ी सेज़ी ओडाच़ी भिलै च़ाल पौड़ी ज़िऐ यीशु रौ मौड़ौ थौ छ़ाड़ौ औन्दौ। 3सै आपु मांझ़िऐ थी लागी औन्दी बोलदै कि, “आमु कालै भितरै डेउणा लै तेस पात्थर कुण गाड़ा सा? ज़ो ओडाच़ी बंद कौरना लै आ लाऔ औन्दौ।” 4ज़ेबी तिंउऐ तिऐ पंउच़ियौ देखौ ता सौ बौड़ौ पात्थर थौ तिदरा कु पोरु पा घिसरौ औन्दौ। 5सै छ़ेउड़ी तिऐ ओडाच़ी भितै डेई ता तिऐ सुल़टी भिलै थौ एक ज़वान आदमी शेतै जुड़कै भिड़ीयौ बोशौ औन्दौ। सै छ़ेउड़ी हैरान हुई। 6तिणीऐ तिऊं छ़ेउड़ी लै बोलौ, “हैरान ना हुऔ। तुमै नासरता रौ यीशु लोड़दै ई लागी औन्दी ज़ो क्रुसा माथै थौ च़ौड़ाऔ औन्दौ। सौ ज़िउंदौ हुई गौ आ। सौ इदै नाईं आसतौ। देखौ, एज़ी ज़ागाह दी थौ छ़ाड़ौ औन्दौ। 7तुमै आबै डैऔ। यीशु रै च़ेलेउलै, और खास कौरीऐ पतरसा लै बोलौ कि, ‘यीशु तुमु कु औगाड़िऐ गलील परदेशा लै डिआ सा और तिऐ तुमै तेस देखा ई, ज़िणौ तिणीऐ बोलौ थौ।’ ” 8सै छ़ेउड़ी बाइरै आशीयौ तिदरु भागी। सै कांबदै थी लागी औन्दी और डौरी औन्दी थी। तिऊं छ़ेउड़ीउऐ कासी कै ना बोलौ कैलैकि सै डौरी गोई थी।

मरियम मगदलीनी कै यीशु दिशणौ

(मत्ती 28:9-10; यहुन्ना 20:11-18)

9हौफ्तै रै पैहलै दिना दी दोअती ज़ेबी यीशु ज़िउंदौ हुऔ ता पैहलै मगदल गांवा री मरियमा कै दिशौ। ज़ासकु यीशुऐ सात बुरी आत्माऐं गाड़ी थी। 10तिदरौ डेइयौ तिंआऐ इऐ बुशै यीशु रै साथीऊ कै बोली ज़ो यीशु लै शोक कौरदै और लेरदै थै लागै औन्दै। 11ज़ेबी तिऊं च़ेलेउऐ शुणौ कि यीशु ज़िउंदौ हुई गौ आ और मरियमा कै दिशौ आ तैबै तिउंकै विश्वास ना हुऔ।

दुई च़ेलेऊ कै यीशु दिशणौ

(लुका 24:13-35)

12तेत बासिऐ यीशु दुई च़ेलेऊ कै भी दिशौ ज़ो आपणै गांवा लै थै लागै औन्दै डेउंदै। 13तिंउऐ भी वापिस यरुशलेमा दी डेइयौ ओरी च़ेलेऊ कै यीशु रै बारै दी बोलौ पर तिऊं च़ेलेउऐ तैबै भी विश्वास नाईं कियौ।

ग्याराह च़ेलेऊ कै यीशु दिशणौ

(मत्ती 28:16-20; लुका 24:36-49; यहुन्ना 20:19-23; प्रेरित 1:6-8)

14तेत बासिऐ यीशु तिऊं ग्यारह च़ेलेऊ कै भी दिशौ ज़ेबी सै रोटी खान्दै थै लागै औन्दै। यीशुऐ सै च़ेलै डांटै कैलैकि तिंउरै मन ढीठ बौणी गोऐ थै और ज़ुणिऐ भी यीशु ज़िउंदै हुणै बासिऐ देखौ थौ, तिउंरी बुशेऊ माथै तिऊं च़ेलेउऐ विश्वास नाईं कौरौ। 15तैबै यीशुऐ तिउंलै बोलौ, “तुमै सारी धौतरी दी डेइयौ सारै लोगु कै खुशी री खौबर शुणाऔ। 16ज़ो आदमी विश्वास कौरालौ बपतिस्मौ निंआ लौ सौ बौच़ा आ। पर ज़ो खुशी री खौबरी माथै विश्वास नाईं कौरालौ सौ परमेश्‍वरा री तौरफा कु सौज़ा पा सा 17विश्वास कौरणै वाल़ेऊ री निशाणी इऐ हुआ कि सै मैरै नावां कौरीऐ बुरी आत्मा गाड़ाई। और नौईं-नौईं बोली बोलाई। 18और सै गौलती दी साप भी छ़ूंआ लै, या कोई बीश भी पिआ लै तैबै भी तिउंलै कुछ़ ना हुंदौ। और सै बिमार लोगु माथै हाथा छ़ाड़ियौ ता सै बिमार लोग भी च़ांगै हुआई।”

यीशु रौ सौरगा लै डेउणौ

(लुका 24:50-53; प्रेरित 1:9-11)

19इऊं बुशु बोलीयौ परमेश्‍वरै प्रभु यीशु सौरगा लै उठाऔ। सौरगा दी डेइयौ सेऊ परमेश्‍वरा रै सुल़टी भिलै बोशौ। 20तेत बासिऐ प्रभु यीशु रै च़ेलै तिदरु डेइयौ सारी ज़ागाह दी खुशी री खौबर शुणाउंदै लागै। और प्रभु यीशु तिउंरै ज़ौरिऐ हैरानी वाल़ै काम कौरदै लागौ ज़िणै कौरीऐ लोगु कै पौतौ कि इयौ खुशी री खौबर सौच़्च़ौ आ। आमीन।

Currently Selected:

मरकुस 16: BFZ-NT

Highlight

Copy